Asoo Ɛkakye?
Wɔgenga Ɛzinzalɛ Arane mɔɔ ɛra kenlensa ye la kpalɛ ɔ? Nea saa ɛbahola wɔabua kpuya ɛhye mɔ a:
Saa Nyamenle ahyehyɛdeɛ ne fa adehilelɛ maa maangyebakyi zo neavolɛma nee asafo nu mgbanyima a, duzu a ɔwɔ kɛ bɛyɛ a?
Ɔwɔ kɛ bɛdi zo ndɛndɛ. Ɔwɔ kɛ bɛbiza bɛ nwo kɛ: ‘Asoo meboa menli mɔɔ nee me tu la wɔ sunsum nu? Saa mgbanyima ne mɔ fa adehilelɛ maa a, asoo medie meto nu ndɛndɛ na medi zo?’—w16.11, m. 11.
Mekɛ boni a bɛvale nɔhalɛ Kilisienema bɛhɔle nlɔnu wɔ Babelɔn a?
Ɛhye zile wɔ mekɛ mɔɔ ɛzoanvolɛma ne mɔ wule la anzi. Mekɛ zɔhane bɛbɔle ɔ bo kɛ bɛte ɛsɔfolilɛ ekpunli. Asɔne ne nee Maanle ne boale Kilisiene Ɛzonlenlɛ ne mɔɔ ɛkpɔkye la, na bɛbɔle mɔdenle kɛ bɛnrɛmaa Kilisienema mɔɔ bɛle kɛ abɛlɛ la ane ɛnrɛvinde kpalɛ. Ɛvolɛ dɔɔnwo na 1914 adwu la, menli mɔɔ bɛkpokpa bɛ la bɔle ɔ bo kɛ bɛtwe bɛ nwo bɛavi Babelɔn Kpole ne anwo.—w16.11, m. 23-25.
Duzu ati a gyima mɔɔ Lefèvre d’Étaples yɛle la anwo hyia kpalɛ a?
Wɔ 1520 anu, Lefèvre hilele Baebolo ne abo hɔle French nu amaa koahweabanema anyia bie agenga. Kɛzi ɔhilele Baebolo ne anu edwɛkɛ ne anu la nyianle Martin Luther, William Tyndale yɛɛ John Calvin anwo zo tumi.—wp16.6, m. 10-12.
Ngakyile boni a wɔ ‘adwenle mɔɔ gyi nwonane ne azo,’ nee ‘adwenle mɔɔ gyi sunsum ne azo’ la anu a? (Wlo. 8:6)
Awie mɔɔ ye adwenle gyi nwonane ne azo la di ye sonlabaka ne mɔɔ ɛnli munli la nganeɛdelɛ nzi, dahuu ɔka nwolɛ edwɛkɛ yɛɛ ɔyɛ nwolɛ debie. Na mɔɔ ye adwenle gyi sunsum ne azo la maa ye nzuzulɛ nee ye ɛbɛlabɔlɛ gyinla Nyamenle ɛzonlenlɛ zo; Kilisienenli zɛhae maa sunsum nwuanzanwuanza ne kile ye adenle. Adwenle mɔɔ gyi nwonane ne azo la wie ewule, na mɔɔ gyi sunsum ne azo la wie ngoane nee anzodwolɛ.—w16.12, m. 15-17.
Kɛ ɔkɛyɛ na wɔade adwenleadwenle zo ɛ?
Fa ninyɛne mɔɔ hyia la dimoa, fa bodane sie ɛ nye zo, nyia mekɛ maa ɛ nwo alehyenlɛ biala, neɛnlea Nyamenle abɔdeɛ, maa ɛ nye ɛlie, kpundikpundi wɔ agbɔkɛ nu dahuu na da maa ɔde wɔ.—w16.12, m. 22-23.
“Bɛvale Yinɔko bɛhɔle amaa yeannwu ewule.” (Hib. 11:5) Adenle boni azo?
Ɔbayɛ kɛ Nyamenle maanle Yinɔko wule mɔɔ yeannwu ye bɔbɔ.—wp17.1, m. 12-13.
Duzu ati a mɛlɛbɛnwoaze nwo hyia ɛ?
Mɛlɛbɛnwoaze kile kɛ yɛbanwu kɛzi yɛde la nee yɛ sinlidɔlɛ. Ɔwɔ kɛ yɛkakye kɛ yɛ nyɛleɛ kola nyia awie mɔ anwo zo tumi, ɔti ɔnle kɛ yɛte nganeɛ kɛ yɛ nwo hyia somaa.—w17.01, m. 18.
Daselɛ boni a kile kɛ Nyamenle hilele ɛvoyia mɔɔ limoa neazo eku ne adenle, kɛ mɔɔ ɛnɛ noko ɔlɛkile Neazo Eku ne anu amra adenle la ɛ?
Sunsum ne ɛboa bɛ yemaa bɛde Ngɛlɛlera ne anu nɔhalɛ ne abo kpalɛ. Ɔlua anwumabɔvolɛma moalɛ zo bɛnleanle edwɛkɛhanlɛ gyima ne azo, eza bɛgyinlanle Nyamenle edwɛkɛ ne azo bɛvale adehilelɛ bɛmaanle. Ɛnɛ noko zɔhane ala a ɔde a.—w17.02, m. 26-28.
Ninyɛne boni mɔ a ka yɛ ɔmaa yɛnwu ɛkpɔnedeɛ ne kɛ ɔsonle bolɛ ɛ?
Ninyɛne nna ne a le: Nwane a vale maanle a, duzu ati a bɛvale bɛmaanle a, duzu a bɛvale bɛbɔle afɔle ne a, duzu a ɔlile nwolɛ gyima a. Ɔwɔ kɛ yɛsuzu kɛzi ninyɛne ɛhye mɔ anwo hyia la anwo.—wp17.2, m. 4-6.
Saa Kilisienenli si kpɔkɛ bie wie a, ɔbahola yeahakyi ye adwenle ɔ?
Ɔwɔ kɛ yɛ ɛhɛe yɛ ɛhɛe. Noko, bie a edwɛkɛ fofolɛ bie ati, ɔwɔ kɛ yɛkakyi yɛ kpɔkɛzilɛ. Mekɛ mɔɔ Nenɛvɛma nlunle bɛ nwo la, Nyamenle hakyile ye adwenle. Ɔyɛ a tɛnlabelɛ anzɛɛ edwɛkɛ fofolɛ bie ati, ɔwɔ kɛ yɛyɛ zɔ.—w17.03, m. 16-17.
Duzu ati a ndɛneyelɛ ɛnle kpalɛ ɛ?
Ɔkola ɔmaa ngyegyelɛ bie yɛ kpole. Saa yɛ edwɛkɛ yɛ fɛ anzɛɛ ɔnyɛ fɛ a, edwɛkɛ mɔɔ yɛ nyane la ɛngola ɛnziezie edwɛkɛ biala.—w17.04, m. 21.