ƐZUKOALƐDEƐ 55
Boa Wɔ Asafo Ne
Menli mgbe dɔɔnwo fa anyelielɛ sonle Gyihova wɔ asafo dɔɔnwo anu wɔ ewiade amuala. Bɛ nye die ngilehilelɛ nee adehilelɛ mɔɔ bɛnyia la anwo kpole, na bɛfi bɛ ɛhulolɛ nu bɛboa asafo ne wɔ ndenle dɔɔnwo azo. Asoo kɛ ɛte nganeɛ wɔ wɔ asafo ne anwo la ɛne?
1. Ndenle mɔɔ ɛbahola wɔalua zo wɔava wɔ mekɛ nee wɔ anwosesebɛ wɔaboa asafo ne la bie mɔ a le boni?
Yɛ muala yɛbahola yɛayɛ debie yɛaboa asafo ne. Kɛ neazo la, wɔ asafo ne anu amra bie mɔ ɛyɛ mgbanyinli anzɛɛ bɛnde kpɔkɛ ɔ? Ɛbahola wɔaboa bɛ wɔamaa bɛahɔ debiezukoalɛ ɔ? Anzɛɛ ɛbahola wɔayɛ ninyɛne bie mɔ wɔaboa bɛ, le kɛ ɛbahɔli bɛ gua wɔamaa bɛ anzɛɛ ɛbaboa bɛ wɔamaa bɛaziezie bɛ sua nu ɔ? (Kenga Gyemise 1:27.) Yɛbahola noko yɛadu yɛ nwo yɛamaa yɛaboa yɛamaa bɛaziezie Belemgbunlililɛ Asalo ɛkɛ na bɛayɛ nwolɛ boɛ. Awie biala ɛnyɛ ye kyengye kɛ yɛyɛ ninyɛne ɛhye mɔ. Emomu, ɛlɔlɛ mɔɔ yɛlɛ yɛmaa Nyamenle nee yɛ mediema la a ka yɛ maa ‘yɛfi yɛ ɛhulolɛ nu yɛtu yɛ nwo yɛmaa bɔkɔɔ a.’—Edwɛne 110:3.
Alasevolɛ mɔɔ bɛzɔne bɛ la bahola alua ndenle gyɛne zo aboa asafo ne. Mediema mrenyia mɔɔ bɛdwu ninyɛne mɔɔ Baebolo ne ka nwolɛ edwɛkɛ la anwo la bahola azonle kɛ azonvolɛ na nzinlii bɛazonle kɛ mgbanyima. Mediema mrenyia nee mraalɛ bahola azonle kɛ dahuu adekpakyelɛma amaa bɛaboa edwɛkɛhanlɛ gyima ne kpalɛ. Alasevolɛ bie mɔ boa maa bɛsisi ɛleka mɔɔ yɛsonle la anzɛɛ bɛtu bɛkɔ ɛleka mɔɔ asafo bie hyia moalɛ la na bɛboa wɔ ndenle ngakyile zo.
2. Kɛzi yɛbahola yɛava yɛ ninyɛne yɛaboa asafo ne ɛ?
Yɛbahola ‘yɛava yɛ ninyɛne mɔɔ sonle bolɛ la yɛali Gyihova eni.’ (Mrɛlɛbulɛ 3:9) Ɔyɛ yɛ fɛ kɛ yɛbava yɛ ezukoa nee yɛ ninyɛne gyɛne yɛaboa yɛ asafo ne nee ewiade amuala edwɛkɛhanlɛ gyima ne. (Kenga 2 Kɔlentema 9:7.) Yɛ ndoboa ne eza boa esiane mekɛ nu moalɛ gyima ne. Menli dɔɔnwo ‘ye mɔɔ bɛnyia ye la bie to ahane’ na bɛfa bɛye ndoboa dahuu. (Kenga 1 Kɔlentema 16:2.) Yɛbahola yɛaye ndoboa yɛagua ndoboa nlɛka mɔɔ wɔ ɛleka mɔɔ yɛsonle la anu anzɛɛ yɛalua yintanɛte zo yɛaye ndoboa wɔ donate.jw.org. Gyihova maa yɛ adenle ɔmaa yɛdua kpɔkɛ mɔɔ yɛsi kɛ yɛbava yɛ ninyɛne yɛaboa ye la azo yɛkile kɛ yɛkulo ye.
SUKOA DƆƆNWO
Nea ndenle bie mɔ mɔɔ ɛbahola wɔalua zo wɔaboa asafo ne la.
3. Yɛbahola yɛava yɛ ninyɛne yɛaboa
Gyihova kulo awie mɔɔ te ɔ nyunlu kyɛ debie la, na kɛ Gyisɛse noko de la ɛne. Kɛ neazo la, Gyisɛse hanvole kunlavolɛ ehyianli bie wɔ mɔdenle mɔɔ ɔbɔle ɔyele ndoboa la anwo. Kenga Luku 21:1-4, na akee bɛzuzu kpuya ɛhye mɔ anwo:
Asoo ɔwɔ kɛ yɛye ndoboa mgbole na Gyihova anye alie nwo ɔ?
Kɛzi Gyihova nee Gyisɛse te nganeɛ wɔ ndoboa mɔɔ yɛfi yɛ ahonle nu yɛye la anwo ɛ?
Amaa wɔanwu mɔɔ bɛfa yɛ ndoboa ne mɔ bɛyɛ la, ye VIDIO ne. Akee bɛzuzu kpuya ɛhye anwo.
Kɛzi bɛfa ndoboa ne mɔ bɛboa asafo mɔɔ wɔ ewiade amuala la ɛ?
4. Yɛbahola yɛadu yɛ nwo yɛamaa yɛaboa
Wɔ tete ne, Gyihova azonvolɛ bɔle mɔdenle yɛle gyima ɛsesebɛ vale zieziele ɛleka mɔɔ bɛsonle la. Noko tɛ ezukoa mɔɔ bɛyele bɛboale la angome a bɛvale bɛyɛle zɔ a. Kenga 2 Edwɛkɛsisilɛ 34:9-11, na akee bɛzuzu kpuya ɛhye anwo:
Kɛzi Yizilayɛnli biala boale maanle bɛnleanle Gyihova sua ne anzɛɛ ɛleka mɔɔ bɛsonle la boɛ ɛ?
Amaa wɔanwu kɛzi Gyihova Alasevolɛ sukoa tete neazo zɔhane la, ye VIDIO ne. Akee bɛzuzu kpuya ɛhye mɔ anwo.
Duzu ati a ɔhyia kɛ yɛmaa yɛ Belemgbunlililɛ Asalo ɛkɛ ne yɛ bɔkɔbɔkɔ na yɛyɛ ninyɛne mɔɔ ɛzɛkye la boɛ ɛ?
Ndenle boni mɔ a ɛbahola wɔalua zo wɔaboa a?
5. Mediema mrenyia bahola akpondɛ adenle ayɛ dɔɔnwo
Ngɛlɛlera ne maa Kilisiene mrenyia anwosesebɛ kɛ bɛkpondɛ adenle bɛlua zo bɛbɔ mɔdenle biala bɛboa asafo ne. Amaa wɔanwu nwolɛ neazo la, ye VIDIO ne. Akee ye kpuya ɛhye anloa.
Wɔ vidio ne anu, kɛzi Ryan kpondɛle adenle luale zo boale asafo ne kpalɛ ɛ?
Baebolo ne kile ninyɛne bie mɔ mɔɔ ɔwɔ kɛ mediema mrenyia dwu nwo amaa bɛazonle kɛ azonvolɛ nee mgbanyima la. Kenga 1 Timote 3:1-13, na akee bɛzuzu kpuya ɛhye mɔ anwo:
Duzu a ɔwɔ kɛ mediema mrenyia mɔɔ kpondɛ kɛ bɛsonle kɛ azonvolɛ nee mgbanyima la yɛ a?
Duzu a ɔwɔ kɛ bɛ abusua ne anu amra yɛ a?—Nea ngyehyɛnu 4 nee 11.
Saa mediema mrenyia bɔ mɔdenle dwu ninyɛne ɛhye mɔ anwo a, kɛzi awie biala mɔɔ wɔ asafo ne anu la nyia zolɛ nvasoɛ ɛ?
BIE A AWIE BABIZA KƐ: “Kɛzi Gyihova Alasevolɛ nyia ezukoa yɛ bɛ gyima ne ɛ?”
Kɛzi ɛbaye ɔ nloa ɛ?
EDWƐKƐ TITILI
Gyihova anye die mɔdenle mɔɔ yɛbɔ yɛfa yɛ mekɛ, yɛ anwosesebɛ nee yɛ ninyɛne yɛboa asafo ne la anwo kpole.
Ndinu
Kɛzi yɛbahola yɛava yɛ mekɛ nee yɛ anwosesebɛ yɛaboa asafo ne ɛ?
Kɛzi yɛbahola yɛava yɛ ninyɛne yɛaboa asafo ne ɛ?
Ndenle boni mɔ a ɛkulo kɛ ɛdua zo ɛboa asafo ne a?
KPONDƐ DƆƆNWO
Nea deɛmɔti Nyamenle ɛmmaa ye azonvolɛ ɛndua taete bieko la.
“Duzu A Baebolo Ne Ka Ye Wɔ Taete Ɛdualɛ Nwo A?” (Edwɛkɛ mɔɔ wɔ jw.org azo)
Baebolo ne maa mrenyia mɔɔ bɛzɔne bɛ la adenle maa bɛyɛ ninyɛne bie mɔ. Na saa ɔhyia kɛ raalɛ mɔɔ bɛzɔne ye la yɛ ninyɛne ɛhye mɔ bie ɛ?
“Te Tileyɛlɛ Nwo Ngyehyɛleɛ Mɔɔ Wɔ Asafo Ne Anu La Abo” (Ɛzinzalɛ Arane, February 2021)
Nea Alasevolɛ bie mɔ mɔɔ lɛ akɛnrasesebɛ mɔɔ bɛbɔ afɔle mgbole amaa bɛava mbuluku bɛahɔmaa bɛ gɔnwo mɔ azonvolɛ la.
Nea kɛzi adenle mɔɔ yɛdua zo yɛnyia ezukoa yɛyɛ yɛ gyima ne la le ngakyile fi ɛzonlenlɛ ngakyile ɛdeɛ nwo la.
“Kɛzi Gyihova Alasevolɛ Tua Bɛ Gyima Ne Anwo Kakɛ Ɛ?” (Edwɛkɛ mɔɔ wɔ jw.org azo)