Moalɛ Ɛzonlenlɛ Gyima Ne

1, 2. (a) Anwongyelelɛ boni a Keleseɛnema mɔɔ bɛwɔ Dwudiya la hɔle nu a? (b) Ɛlɔlɛ boni a bɛlale ye ali bɛhilele Dwudiya Keleseɛnema ne a?

ƆBAYƐ ɛvolɛ 46 Y.M, na ɛnee ɛhɔne ɛzi Dwudiya. Kɛmɔ aleɛ nwo hyianle la ati, ye bolɛ yɛle se mɔɔ ɛnee Dwuu ɛdoavolɛma ne ɛngola bie tɔ fee. Noko, ɛnee bɛlɛba bɛaranwu Gyihova anwobanebɔlɛ ne wɔ adenle mɔɔ Kelaese ɛdoavolɛ biala ɛtɛnwunle bie ɛlɛ la azo. Duzu a ɛlɛba arazi a?

² Dwuu Keleseɛnema mɔɔ bɛwɔ Gyɛlusalɛm nee Dwudiya la amaneɛnwunlɛ ne hanle Dwuuma nee Maanle Maanle ne anu Keleseɛnema mɔɔ bɛwɔ Anteɔko nee Selea la yemɔti bɛhehanle bɛ sa aze kɛ bɛfa bɛaboa bɛ mediema diedima ne. Akee bɛkpale Baanabase nee Sɔɔlo kɛ bɛva mɔɔ bɛnyianle ye la bɛhɔmaa Gyɛlusalɛm asafo mgbanyima ne mɔ. (Bɛgenga Gyima ne 11:27-30; 12:25.) Nea kɛzi ɔbayɛ kɛ Anteɔko mediema ne mɔ ɛlɔlɛ ne hanle Dwudiya mediema mɔɔ ɛnee bɛwɔ ngyianlɛ nu la ahonle a!

3. (a) Kɛzi Nyamenle menli di neazo mɔɔ alumua Keleseɛnema mɔɔ bɛwɔ Anteɔko yɛle la anzi ɛ? Maa neazo. (Eza nea ɛlɛka “Yɛ Moalɛ Gyima Kpole Mɔɔ Lumua Wɔ Ɛnɛ Mekɛ Ye Anu.”) (b) Kpuyia boni mɔ a yɛbazuzu nwo a?

³ Edwɛkɛ zɔhane mɔɔ zile wɔ ɛvoya mɔɔ lumua Y.M anu la a le kɛlɛtokɛ mɔɔ lumua mɔɔ Keleseɛnema mɔɔ bɛwɔ maanle gyɛne zo la vale moalɛ ninyɛne hɔmanle Keleseɛnema mɔɔ bɛwɔ ɛleka gyɛne la a. Ɛnɛ, yɛdi neazo mɔɔ Anteɔko mediema ne mɔ yɛle la anzi. Saa yɛte kɛ esiane anzɛɛ ngyegyelɛ ɛdo yɛ mediema mɔɔ bɛwɔ ɛleka gyɛne la a, yɛkɔboa bɛ.a Amaa yɛanwu kɛzi yɛ moalɛ gyima ne fane yɛ ɛzonlenlɛ gyima gyɛne anwo la, bɛmaa yɛzuzu kpuyia nsa mɔɔ fane moalɛ gyima ne anwo la anwo. Duzu ati a yɛbu moalɛ gyima ne kɛ ɔle ɛzonlenlɛ gyima ɛ? Bodane boni a moalɛ gyima ne gyi zo a? Kɛzi yɛnyia moalɛ gyima ne azo nvasoɛ ɛ?

Deɛmɔti Moalɛ Gyima Ne Le “Ɛzonlenlɛ Nwuanzanwuanza” La

4. Duzu a Pɔɔlo hanle hilele Kɔlentema wɔ Keleseɛne ɛzonlenlɛ gyima ne anwo a?

⁴ Pɔɔlo hilehilele nu wɔ ye kɛlata ne mɔɔ ɔhɛlɛle Kɔlentema la anu kɛ Keleseɛnema ɛzonlenlɛ gyima ne gua ye ngakyile nwiɔ. Pɔɔlo hɛlɛle ye kɛlata ne hɔmanle Keleseɛnema mɔɔ bɛkpokpa bɛ la ɛdeɛ, noko ye edwɛkɛ ne fane Kelaese ‘mboane gyɛne’ ne noko anwo ɛnɛ. (Dwɔn 10:16) Yɛ ɛzonlenlɛ gyima ne ko a le “mgbɔdalɛ ɛzonlenlɛ gyima ne,” mɔɔ yemɔ a le yɛ edwɛkɛhanlɛ nee ngilehilelɛ gyima ne. (2 Kɔl. 5:18-20, nwt; 1 Tem. 2:3-6) Ko noko a le gyima mɔɔ yɛyɛ yɛboa yɛ mediema la. Pɔɔlo hwenle adwenle ziele “moalɛ ɛzonlenlɛ gyima” zo. (2 Kɔl. 8:4, NW) Giliki edwɛkɛkpɔkɛ di·a·ko·niʹa a bɛhile ɔ bo kɛ “ɛzonlenlɛ gyima” wɔ edwɛkɛ nwiɔ ɛhye, “mgbɔdalɛ ɛzonlenlɛ gyima” yɛɛ “moalɛ ɛzonlenlɛ gyima” anu a. Duzu ati a ɛhye hyia ɛ?

5. Duzu ati a ɔfɛta kɛ Pɔɔlo vɛlɛle moalɛ gyima ne ɛzonlenlɛ gyima ɛ?

⁵ Ɔlua Giliki edwɛkɛkpɔkɛ ko ne mɔɔ Pɔɔlo vale lile gyima manle gyima nwiɔ ɛhye la ati, ɔvale moalɛ ɛzonlenlɛ gyima ne ɔbokale ɛzonlenlɛ gyima gyɛne mɔɔ bɛyɛ ye wɔ Keleseɛne asafo ne anu la anwo. Ɛnee yelumua yeha kɛ: “Ɛzonlenlɛ ndenle ngakyile dɔɔnwo wɔ ɛkɛ, noko yɛsonle Awulae kokye ne ala, gyima ngakyile dɔɔnwo wɔ ɛkɛ, . . . noko Sunsum ko ne ala a yɛ ɛhye mɔ amuala a.” (1 Kɔl. 12:4-6, 11) Nɔhalɛ nu, Pɔɔlo vale asafo ne anu ɛzonlenlɛ gyima ngakyile ne mɔ totole “ɛzonlenlɛ nwuanzanwuanza” nwo.b (Wulo. 12:1, 6-8, NW) Ɔnyɛ nwanwane kɛ ɔdele nganeɛ kɛ ɔwɔ kɛ ɔfa ye mekɛ ne bie ɔsonle “Nyamenle menli” ne la!​—Wulo. 15:25, 26.

6. (a) Kɛmɔ Pɔɔlo hilehilele nu la, duzu ati a moalɛ gyima ne le yɛ ɛzonlenlɛ ne foa ɛ? (b) Ka kɛzi bɛyɛ yɛ moalɛ gyima ne wɔ ewiade amuala la anwo edwɛkɛ. (Nea ɛlɛka “Saa Esiane Si A!”)

⁶ Pɔɔlo boale Kɔlentema ɔmanle bɛnwunle deɛmɔti moalɛ gyima ne boka bɛ ɛzonlenlɛ gyima ne nee Gyihova ɛzonlenlɛ nwo la. Yɛ ye edwɛkɛ ne nzonlɛ: Keleseɛnema mɔɔ boa awie mɔ la yɛ ye zɔ ɔluakɛ “bɛdi Kelaese anwo Edwɛkpa ne mɔɔ bɛlie bɛdo bɛ nwo zo la azo.” (2 Kɔl. 9:13) Ɛhye ati, kɛ mɔɔ Keleseɛnema lɛ ɛhulolɛ kɛ bɛbali Kelaese ngilehilelɛ ne azo la ati, bɛboa bɛ mediema diedima. Pɔɔlo hanle kɛ, bɛ mediema mɔɔ bɛboa bɛ la da “ɛlolɛ molozo ne mɔɔ Nyamenle ɛva ɛlo bɛ la” ali. (2 Kɔl. 9:14; 1 Pita 4:10) Ɛhye ati December 1, 1975, Ɛzinzalɛ Arane ne hanle yɛ mediema mɔɔ bɛwɔ anwongyelelɛ nu mɔɔ yɛboa bɛ la anwo edwɛkɛ wienyi kɛ: “Ɔwɔ kɛ yɛte ɔ bo bɔkɔɔ kɛ ɛzonlenlɛ ɛhye hyia Gyihova Nyamenle nee ɔ Ra Gyisɛse Kelaese kpalɛ.” Nɔhalɛ nu, moalɛ gyima ne le ɛzonlenlɛ nwuanzanwuanza mɔɔ sonle bolɛ.​—Wulo. 12:1, 7; 2 Kɔl. 8:7; Hib. 13:16.

Moalɛ Gyima Ne Gyi Bodane Kpalɛ Zo

7, 8. Yɛ moalɛ gyima ne bodane mɔɔ lumua la a le boni? Kilehile nu.

⁷ Yɛ moalɛ gyima ne bodane a le boni? Pɔɔlo buale zɔhane kpuyia ne wɔ ye kɛlata ne mɔɔ tɔ zo nwiɔ mɔɔ ɔhɛlɛle ɔhɔmanle Kɔlentema la anu. (Bɛgenga 2 Kɔlentema 9:11-15.) Wɔ ngyehyɛnu ɛhye mɔ anu, Pɔɔlo hilele bodane nsa mɔɔ yɛdi nwolɛ gyima wɔ mekɛ mɔɔ yɛbava yɛ nwo yɛawula “bagua nu ɛzonlenlɛ gyima ɛhye,” mɔɔ yemɔ a le moalɛ gyima ne anu la. Bɛmaa yɛzuzu nwolɛ ngoko ngoko.

⁸ Mɔɔ lumua, moalɛ gyima ne wula Gyihova anyunlunyia. Yɛ kɛzi Pɔɔlo hwenle ɔ mediema ne mɔ adwenle hɔle Gyihova Nyamenle anwo zo wɔ ngyehyɛnu nnu ne mɔɔ wɔ anwuma ɛkɛ ne la anu la nzonlɛ. Ɛzoanvolɛ ne hakyele bɛ kɛ ɔmaa ‘bɛyɛ Nyamenle mo’ na ‘bɛbuke bɛ ahonle nu bɛyɛ Nyamenle mo.’ (Ngyehyɛnu 11, 12) Ɔhanle kɛzi moalɛ gyima maa Keleseɛnema “ye Nyamenle ayɛlɛ” na bɛ nye die “ɛlolɛ molozo ne mɔɔ Nyamenle ɛva ɛlo bɛ la” anwo edwɛkɛ. (Ngyehyɛnu 13, 14) Pɔɔlo dwulale ye edwɛkɛ ne mɔɔ fane moalɛ gyima ne anwo la kɛ: “Bɛmaa yɛyɛ Nyamenle mo.”​—Ngyenu 15; 1 Pita 4:11.

9. Kɛzi moalɛ gyima ne kola kakyi awie adwenle ɛ? Maa neazo.

⁹ Kɛmɔ Pɔɔlo yɛle la, Nyamenle menli mɔɔ bɛwɔ ɛkɛ ɛnɛ la bu moalɛ gyima ne mɔ kɛ nwolɛ adenle mɔɔ maa bɛwula Gyihova anyunlunyia na bɛdi ye ngilehilelɛ zo a. (1 Kɔl. 10:31; Tae. 2:10) Nɔhalɛ nu, moalɛ gyima ne ta boa maa menli ye adwenle ɛtane mɔɔ bɛlɛ ye wɔ Gyihova nee ye Alasevolɛ ne mɔ anwo la fi ɛkɛ. Kɛ neazo la: Raalɛ bie mɔɔ de ɛleka mɔɔ ahumuakyima zɛkyele ɛkɛ la vale edwɛkɛ ɛhye, “Gyihova Alasevolɛ​—Bɛmmaba Ɛke” bɔle ye anlenkɛ ne anyunlu. Akee kenle ko mɔɔ ɔwɔ ye sua nu la, ɔnwunle menli mɔɔ ɛlɛyɛ awie sua bie mɔɔ ɛzɛkye la boɛ. Ɔvale kenle dɔɔnwo ɔnleanle gyimayɛvoma ne na akee ɔhɔle kɛ ɔkanlea menli holɛ ko. Mɔɔ ɔnwunle kɛ menli ne le Gyihova Alasevolɛ la, ɔ nye liele na ɔhanle kɛ, “Menyianle bɛ nwo adwenle mɔɔ ɔnle kpalɛ.” Boni a vile nu rale a? Ɔyele deɛ ne mɔɔ ɔhɛlɛle ɔbɔle ye anlenkɛ ne anyunlu la.

10, 11. (a) Neazo boni mɔ a kile kɛ yɛlɛdwu yɛ moalɛ gyima ne bodane mɔɔ tɔ zo nwiɔ la anwo a? (b) Buluku boni a boa moalɛ gyimayɛvoma a? (Nea ɛlɛka “Debie Bieko Mɔɔ Baboa Moalɛ Gyimayɛvoma.”)

¹⁰ Mɔɔ tɔ zo nwiɔ, yɛmaa yɛ mediema diedima “nyia mɔ bɛkpondɛ la.” (2 Kɔl. 9:12a) Yɛkulo kɛ yɛdi yɛ mediema ngyianlɛ nwo gyima amaa bɛ amaneɛnwunlɛ zo ade. Duzu ati ɔ? Ɔluakɛ menli mɔɔ wɔ Keleseɛne asafo ne anu la bɔ nu yɛ “sonlabaka kokye,” na “saa sonlabaka ne nvɛyeba ko nwu nyane a, ɔka mɔɔ ɛha la amuala.” (1 Kɔl. 12:20, 26) Ɛhye ati, mediema ɛlɔlɛ nee anwunvɔnezelɛ ka mediema dɔɔnwo ɛnɛ ɔmaa bɛyɛ ngyehyɛleɛ ndɛndɛ bɛboɔboa bɛ nwo bɛkɔboa wɔ ɛleka mɔɔ esiane ɛzi la amaa bɛ mediema diedima anwo adɔ bɛ. (Gye. 2:15, 16) Kɛ neazo la, mɔɔ nyevile dule rale sua zo wɔ Japan wɔ 2011 la, United States ɔfese ne hɛlɛle kɛlata hɔbizale Maangyeba Suazilɛ Kɔmatii ne mɔɔ wɔ United States la saa “mediema ekyi mɔɔ fɛta” la bahola ahɔboa bɛamaa bɛasisi Belemgbunlililɛ Asalo wɔ ɛkɛ a. Boni a vile nu rale a? Yeangyɛ, mediema kɛyɛ 600 hanle kɛ bɛbaboa na bɛliele bɛdole nu kɛ bɛbadua bɛdabɛ mumua ne bɛ ɛhɔlɛ ne anwo kakɛ bɛahɔ Japan! United States ɔfese ne hanle kɛ, “Mediema mɔɔ liele dole nu la zinle yɛ nwo.” Mɔɔ adiema bie mɔɔ wɔ Japan bizale gyimayɛvo ko mɔɔ ɔnvi maanle ne anu deɛmɔti yera kɛ ɔbaboa la, ɔhanle ɔhilele ye kɛ: “Yɛ mediema mɔɔ bɛwɔ Japan la boka ‘yɛ sonlabaka’ ne anwo. Yɛte bɛ nyane nee bɛ amaneɛnwunlɛ ne bie.” Ɔdwu mekɛ ne bie a tunwomaa ɛlɔlɛ maa moalɛ gyimayɛvoma fa bɛ ngoane to esiane nu boa bɛ mediema.c​— 1 Dwɔn 3:16.

¹¹ Menli mɔɔ bɛnle Alasevolɛ la noko ɛhile yɛ moalɛ gyima ne anwo anyezɔlɛ. Kɛ neazo la, mɔɔ esiane bie zile Arkansas, U.S.A., wɔ 2013 la, adwelie kɛlata bie hɛlɛle Alasevolɛ mɔɔ bɛdule bɛ nwo bɛmanle ndɛndɛ la anwo edwɛkɛ kɛ: “Gyihova Alasevolɛ hyehyɛ bɛ moalɛ gyimayɛvoma ne kpalɛ yemɔti edwɛkɛ si a bɛdwu ɛkɛ ne ndɛndɛ na bɛdi ninyɛne nwo gyima kpalɛ.” Kɛmɔ ɛzoanvolɛ Pɔɔlo hanle la, amgba yɛmaa yɛ mediema mɔɔ bɛwɔ anwongyelelɛ nu la ‘nyia mɔɔ bɛkpondɛ la.’

12-14. (a) Duzu ati a yɛ moalɛ gyima ne bodane mɔɔ tɔ zo nsa mɔɔ yɛdwu nwo la hyia ɛ? (b) Edwɛkɛ boni mɔ a kile kɛ nvasoɛ wɔ sunsum nu ninyɛne mɔɔ yɛdi ɔ nzi dahuu la azo a?

¹² Mɔɔ tɔ zo nsa, yɛboa menli mɔɔ ɛlɛnwu amaneɛ la yɛmaa bɛyɛ bɛ sunsum nu gyima ne mɔ bieko. Duzu ati a ɛhye hyia a? Pɔɔlo hanle kɛ menli mɔɔ nyia moalɛ la “buke bɛ ahonle nu yɛ Nyamenle mo.” (2 Kɔl. 9:12b) Adenle kpalɛ mɔɔ menli mɔɔ ɛlɛnwu amaneɛ dua zo yɛ Gyihova mo la a le kɛ bɛbazia bɛayɛ bɛ sunsum nu gyima ne ndɛndɛ. (Fel. 1:10) Ɛzinzalɛ Arane ne hanle ye wɔ 1945 kɛ: “Pɔɔlo kponlenle. . . ndoboa ɛlielɛ ne azo ɔluakɛ ɛnee ɔlɛmaa . . . Keleseɛne mediema mɔɔ ɛhyia la anyia moalɛ wɔ nwonane afoa nu amaa bɛava mɔdenlebɔlɛ bɛayɛ Gyihova daselɛlilɛ gyima ne.” Bodane ko ne ala a yɛlɛ ye ɛnɛ a. Saa bɛyɛ daselɛlilɛ gyima ne bieko a, yɛ mediema ne mɔ kyekye bɛ nwo nee menli gyɛne mɔɔ bɛlɛdi nyane la arɛle.​—Bɛgenga 2 Kɔlentema 1:3, 4.

¹³ Suzu edwɛkɛ mɔɔ menli mɔɔ nyianle moalɛ kpole ɛhye bie hanle la anwo, bɛbɔle daselɛlilɛ bo na ɔmanle bɛnyianle anwosesebɛ. Adiema ko hanle kɛ: “Daselɛlilɛ mɔɔ abusua ne hɔle la yɛle nyilalɛ manle yɛ. Mɔɔ yɛlɛbɔ mɔdenle kɛ yɛbakyekye awie mɔ arɛle la, ɔmaa yɛye yɛ adwenle yɛfi yɛ adwenleadwenle ne azo.” Adiema raalɛ ko hanle kɛ: “Sunsum nu gyima mɔɔ menyɛle la yele me adwenle vile ninyɛne mɔɔ ɛzɛkye mɔɔ ɛbɔ me ɛyia la azo. Ɔmanle mendele nganeɛ kɛ melɛ anwobanebɔlɛ.” Adiema raalɛ ko noko hanle kɛ: “Ɔnva nwo kɛ ɛnee yɛngola tɛnlabelɛ ne anwo ɛhwee yɛ la, daselɛlilɛ ɛhɔlɛ boale me abusua ne. Ewiade fofolɛ ne mɔɔ yɛhanle nwolɛ edwɛkɛ yɛhilele awie mɔ la manle yɛnyianle anwodozo kpole kɛ debie biala bayɛ fofolɛ.”

¹⁴ Debiezukoalɛ ɛhɔlɛ noko le sunsum nu gyimalilɛ mɔɔ ɔwɔ kɛ yɛ mediema diedima mɔɔ ɛlɛnwu amaneɛ la bɔ ye ɛhɔlɛ bo bieko ndɛndɛ a. Suzu mɔɔ dole adiema raalɛ Kiyoko mɔɔ ɛnee wɔ ye ɛvolɛ 50 ne anu la anwo nea. Nyevile mɔɔ dule rale sua zo la manle ɔ nwo debie biala minlinle na ɔhale ye tɛladeɛ nee mgbɔlaboa mɔɔ ɔwula la ala, kɛ ɔkɛyɛ na yeahola yeanlea ɔ nwo la, ɛnee ɔyɛ se. Noko kpanyinli bie hanle hilele ye kɛ bɛbayɛ bɛ debiezukoalɛ ne wɔ ye kale ne anu. Kiyoko ka kɛ: “Me nee kpanyinli ko nee ɔ ye yɛɛ adiema raalɛ gyɛne ko dɛnlanle kale ne anu. Debiezukoalɛ ne le sikalɛ, noko ɛnee ɔyɛ nwanwane, me adwenle vile esiane ne mɔɔ zile la azo. Me nzo nu dwole me. Debiezukoalɛ zɔhane manle menwunle tumi mɔɔ wɔ Keleseɛnema ayia nu la.” Adiema raalɛ gyɛne ka debiezukoalɛ mɔɔ ɔhɔle wɔ esiane bie anzi anwo edwɛkɛ la, ɔhanle kɛ: “Bɛmanle mengyinlanle kpundii!”​—Wulo. 1:11, 12; 12:12.

Moalɛ Gyima Ne Maa Yɛnyia Nvasoɛ Dahuu

15, 16. (a) Nvasoɛ boni a ɛnee Keleseɛnema mɔɔ bɛwɔ Kɔlente nee ɛleka gyɛne la banyia avi moalɛ gyima ne anu a? (b) Kɛzi yɛdayɛ noko yɛnyia moalɛ gyima ne azo nvasoɛ ɛnɛ ɛ?

¹⁵ Mɔɔ Pɔɔlo kilehile moalɛ gyima ne anu ahile Kɔlentema la, eza ɔmanle bɛnwunle nvasoɛ mɔɔ bɛ nee Keleseɛnema gyɛne banyia wɔ gyima ɛhye ɛyɛlɛ nu la. Ɔhanle kɛ: “Zɔhane ati [Dwuu Keleseɛnema mɔɔ bɛwɔ Gyɛlusalɛm mɔɔ bɛ sa hanle moalɛ ne la bava] anwolɔlɛ ɛhulolɛ kpalɛ bɛazɛlɛ bɛamaa bɛ wɔ ɛlolɛ molozo ne mɔɔ Nyamenle ɛva ɛlo bɛ la ati.” (2 Kɔl. 9:14) Amgba, Kɔlentema nyele ne baha Dwuu Keleseɛnema ne yeamaa bɛazɛlɛ bɛamaa bɛ mediema mɔɔ bɛwɔ Kɔlente mɔɔ Maanle Maanle ne anu amra boka nwo la na ɛhulolɛ mɔɔ bɛlɛ bɛmaa bɛ la anu amia.

¹⁶ December 1, 1945 Ɛzinzalɛ Arane ne ka kɛzi Pɔɔlo edwɛkɛ ne mɔɔ fane nvasoɛ mɔɔ wɔ moalɛ gyima ne azo fane yɛ nwo ɛnɛ la, ɔhanle kɛ: “Saa Nyamenle menli ne mɔɔ bɛdu bɛ nwo bɛmaa la boa maa bɛdi ekpunli mɔɔ wɔ ɛleka gyɛne la ngyianlɛ nwo gyima a, nea kɛzi ɔmaa yɛyɛ ko a!” Zɔhane ala a moalɛ gyimayɛvoma ɛnwu ye ɛnɛ a. Asafo nu kpanyinli ko mɔɔ boale wɔ azuyilɛ mekɛ bie anu la hanle kɛ: “Moalɛ gyima mɔɔ menyɛle la manle membikyele me mediema ne mɔ kpalɛ.” Adiema raalɛ ko mɔɔ bɛboale ye na ɔhilele nwolɛ anyezɔlɛ la hanle kɛ, “Yɛ mediemayɛlɛ ne a le debie mɔɔ bikye yɛ kpalɛ mɔɔ ɔwɔ kɛ yɛ nye die nwo wɔ azɛlɛ ye azo a.”​—Bɛgenga Mrɛlɛbulɛ 17:17.

17. (a) Kɛzi edwɛkɛ mɔɔ wɔ Ayezaya 41:13 la fane moalɛ gyima ne anwo ɛ? (b) Ka neazo bie mɔ mɔɔ kile kɛzi moalɛ gyima ne wula Gyihova anyunlunyia na ɔmaa yɛyɛ ko la. (Eza nea ɛlɛka “Mediema Tu Bɛ Nwo Maa Boa Wɔ Esiane Mekɛ Nu.”)

¹⁷ Saa moalɛ gyimayɛvoma kɔ ɛleka mɔɔ esiane ɛzi la a, yɛ mediema mɔɔ ɛlɛnwu amaneɛ la nwu nɔhalɛ mɔɔ wɔ Nyamenle ɛwɔkɛ ne anu la wɔ adenle titile bie azo: “Medame, [Gyihova] bɛ Nyamenle, melɛ bɛ sa fema ne anu. Medame yɛɛ melɛka meahile bɛ a: Bɛmmasulo na mebaboa bɛ.” (Aye. 41:13) Adiema raalɛ bie mɔɔ nyianle ɔ ti wɔ esiane mekɛ nu la hanle kɛ: “Menwunle ninyɛne mɔɔ ɛzɛkye la, me anyelazo wiele, noko Gyihova zɔle me nu. Mennwu kɛzi meka moalɛ mɔɔ menyianle menvile mediema ɛkɛ la anwo edwɛkɛ a.” Mɔɔ esiane bie zile ɛleka bie la, mgbanyima nwiɔ mɔɔ bɛwɔ ɛkɛ la gyinlanle asafo mɔɔ bɛsonle wɔ nu la agyakɛ anu hɛlɛle kɛ: “Azɛlɛ ɛkpusulɛ ne manle menli lile nyane kpole noko yɛnwunle moalɛ mɔɔ Gyihova dua yɛ mediema nwo zo fa maa la. Yɛgenga moalɛ gyima nwo debie, noko kɛkala yɛnwu ye yɛ nye zo.”

Ɛbahola Wɔayɛ Bie Ɔ?

18. Saa ɛkpondɛ kɛ ɛyɛ moalɛ gyima ne bie a, duzu a ɔwɔ kɛ ɛyɛ a? (Eza nea ɛlɛka “Ɔhakyile Ye Ɛbɛlabɔlɛ.”)

¹⁸ Ɛkulo kɛ ɛnwu anyelielɛ mɔɔ wɔ moalɛ mɔɔ bɛfa bɛmaa wɔ esiane mekɛ nu la ɔ? Saa zɔhane a ɔde a, ɛnee nwu ye kɛ bɛta bɛkpa moalɛ gyimayɛvoma bɛfi menli mɔɔ bɛsisi Belemgbunlililɛ Asalo la anu. Yemɔti ka kile wɔ asafo nu mgbanyima kɛ ɛkulo kɛ ɛhyehyɛ nwolɛ ademizalɛ kɛlata na ɛkɔyɛ bie. Kpanyinli ko mɔɔ lɛ anwubielɛ dɔɔnwo wɔ moalɛ gyima ne anu la vale ngakyelɛ ɛhye dole gua kɛ: “Saa Esiane Mekɛ Nu Moalɛ Kɔmatii ne ɛtɛfɛlɛle wɔ a, mmakɔ ɛleka mɔɔ esiane ne ɛzi la.” Ɛhye bamaa moalɛ gyima ne ahɔ zo pɛpɛɛpɛ.

19. Kɛzi moalɛ gyimayɛvoma boa kpalɛ maa bɛnwu kɛ amgba yɛle Kelaese ɛdoavolɛma ɛ?

¹⁹ Moalɛ gyima ne le adenle titile mɔɔ yɛdua zo yɛdi Kelaese mɛla ne mɔɔ se “bɛhulo bɛ nwo ngoko ngoko” la azo a. Ɛlɔlɛ ɛhye mɔɔ yɛda ye ali la kile kɛ amgba yɛle Kelaese ɛdoavolɛma. (Dwɔn 13:34, 35) Nea kɛzi ɔle nyilalɛ ɔmaa yɛ ɛnɛ kɛ yɛlɛ gyimayɛvoma dɔɔnwo mɔɔ fi bɛ ɛhulolɛ nu ye Gyihova ayɛlɛ wɔ mekɛ mɔɔ bɛlɛfa moalɛ bɛamaa nɔhavoma mɔɔ boa Nyamenle Belemgbunlililɛ ne la a!