Ahyɛlɛdeɛ Mɔɔ Tɛla Biala

BIE a ɛnrɛbu debie mɔɔ bɛfa bɛsinzi pɛnsele mɔɔ bɛyɛ ye kɛ ɛlɛne mɔɔ Jordan lɛ la bie. Noko ɔle ninyɛne mɔɔ ɔsonle bolɛ kpalɛ ɔmaa ye la anu ko. Jordan kile nu kɛ, “Mele kakula ekyii la yɛɛ Russell, kpanyinli bie mɔɔ ɔ gɔnwo a le yɛ abusua ne la vale maanle me a.” Russell wule la, Jordan dele kɛ Russell boale ye nenyia nee ye awovolɛ, ɛnee ɔmaa bɛ anwosesebɛ wɔ bɛ anwongyelelɛ mekɛ nu. Jordan ka kɛ, “Kɛkala mɔɔ mede Russell anwo edwɛkɛ dɔɔnwo la, ahyɛlɛdeɛ ekyii ɛhye sonle bolɛ kpole kpalɛ maa me tɛla alimoa ne.”

Kɛ mɔɔ Jordan anwubielɛ ne kile la, bie a ahyɛlɛdeɛ bie ɛnrɛzonle bolɛ ɛnrɛmaa menli bie mɔ. Noko bie a ɔbazonle bolɛ yeamaa ahenle mɔɔ asa ɛha ye la. Baebolo ne ka ahyɛlɛdeɛ bie mɔɔ sonle bolɛ kpalɛ la anwo edwɛkɛ kɛ: “Nyamenle hulole ewiade ne kpole kpalɛ yemɔti ɔvale ɔ Ra kokye ne ɔmaanle, amaa awie biala mɔɔ kɛnyia diedi wɔ ye nu la bɛanzɛkye ye na yeanyia dahuu ngoane.”​—Dwɔn 3:16.

Ahyɛlɛdeɛ ɛhye kola maa dahuu ngoane! Duzu a sonle bolɛ tɛla ɛhye a? Menli bie mɔ ɛmbu ahyɛlɛdeɛ ɛhye, noko nɔhalɛ Kilisienema bu ye kɛ ‘ɔsonle bolɛ’ kpalɛ. (Edwɛndolɛ 49:8; 1 Pita 1:18, 19) Duzu ati a Nyamenle vale ɔ Ra ne bɔle afɔle maanle ewiade ne kɛ ahyɛlɛdeɛ a?

Ɛzoanvolɛ Pɔɔlo hilele nu kɛ: “Ɔlua sonla ko anwo zo ɛtane rale ewiade na ewule luale ɛtane nwo zo rale la, yɛɛ ewule dɛlɛle hanle menli kɔsɔɔti a.” (Wulomuma 5:12) Adam, nrenyia mɔɔ limoa la anye fuu yɛle Nyamenle anwo anzosesebɛ na ɔwule. Ɔlua Adam anwo zo, ewule rale ɔ bo zo amra kɔsɔɔti anwo zo.

“Ɛtane ahatualɛ a le ewule na ahyɛlɛdeɛ ne mɔɔ Nyamenle fa maa la a le dahuu ngoane wɔ yɛ Awulae Kelaese Gyisɛse ati.” (Wulomuma 6:23) Amaa Nyamenle alie alesama avi ewule fɔlɛbualɛ nwo la, ɔzoanle ɔ Ra, Gyisɛse Kelaese wɔ azɛlɛ ye azo kɛ ɔva ye ngoane mɔɔ di munli la ɔbɔ afɔle ɔmaa yɛ. Ɔlua afɔlebɔlɛ ɛhye mɔɔ bɛfɛlɛ ye “ɛkpɔnedeɛ ne” la azo, bɛdabɛ mɔɔ bɛkɛnyia Gyisɛse anu diedi la banyia dahuu ngoane.​—Wulomuma 3:24.

Pɔɔlo hanle nyilalɛ mɔɔ Nyamenle ɛlua Gyisɛse Kelaese anwo zo ɛva ɛmaa ye azonvolɛ la anwo edwɛkɛ kɛ: “Yɛyɛ Nyamenle mo wɔ ye nwanwane ahyɛlɛdeɛ ne anwo.” (2 Kɔlentema 9:15) Ɛkpɔnedeɛ ne yɛ nwanwane, ɔti yɛnnwu kɛzi yɛkilehile nu a. Noko Nyamenle ɛlolɛ ahyɛlɛdeɛ kɔsɔɔti mɔɔ yeva yemaa alesama la anzi, nzɔne ati a ɛkpɔnedeɛ ne le ngakyile ɛ? Adenle boni azo a ɔtɛla Nyamenle ahyɛlɛdeɛ biala ɛ?a Na boni a ɔwɔ kɛ yɛyɛ ye wɔ nwolɛ a? Yɛsɛlɛ wɔ kenga kpuya ɛhye mɔ anwo mualɛ mɔɔ Baebolo ne fa maa la wɔ edwɛkɛ nwiɔ mɔɔ doa zo la anu.