FOA NSA
Edwɛkɛ Mɔɔ Yɛ Nyane—Mekɛ Mɔɔ Yɛva Yɛ “Gɔnwo Anwo Ɛya” La
“Adiema raalɛ bie mɔɔ wɔ me asafo nu la dole me ɛzonle kɛ mewua ye ezukoa. Menli mɔɔ wɔ asafo ne anu la dele na bɛ nee ye yɛle adwenle. Nzinlii, adiema raalɛ ne hanle hilele me kɛ tɛ medame a menvale ezukoa ne a. Ɔwɔ nu kɛ ɔkpale me kyɛlɛ ɛdeɛ, noko mendele nganeɛ kɛ menrɛhola menrɛva menrɛhyɛ ye ɛlɛ.”—Linda.
ASOO diedinli bie ɛmaa wɔli nyane kɛmɔ ɔdole Linda la ɔ? Ɔyɛ alɔbɔlɛ kɛ, bie mɔ ɛli nyane ɔlua bɛ mediema subane ti na ɛhye ɛha bɛ ɛzonlenlɛ. Asoo kɛ wɔ tɛnlabelɛ ne de la ɛne?
Nwane A “Kɛhola Kɛkpɔkye Yɛ Kɛvi Nyamenle Ɛhulolɛ Ne” Anwo A?
Nɔhalɛ nu, bie a ɔbayɛ se kɛ yɛbava yɛ mediema nvonleɛ yɛahyɛ bɛ. Yeanyɛ boɛ fee la, ɔwɔ kɛ Kilisienema kulo bɛ nwo ngoko ngoko. (Dwɔn 13:34, 35) Saa adiema bie yɛ yɛ ɛtane a, ɔkola ɔmaa yɛ sa nu to na yɛdi nyane.—Edwɛndolɛ 55:12.
Baebolo ne ka kɛ ɔdwu mekɛ ne bie a, Kilisienema bahola ava ‘bɛ gɔnwo mɔ anwo ɛya.’ (Kɔlɔsaema 3:13) Saa ɛhye bie to yɛ a, wɔannea ɔbayɛ se kɛ yɛbava ahenle ɛtane yɛahyɛ ye. Duzu a bahola aboa yɛ a? Suzu Baebolo ngyinlazo nsa anwo:
Yɛ anwuma Selɛ ne ze debie biala. Gyihova nwu debie biala mɔɔ kɔ zo la. Nzisi nee amaneɛnwunlɛ mɔɔ vi nu ba la boka nwo. (Hibuluma 4:13) Eza yɛnwu amaneɛ a, Gyihova di nyane. (Ayezaya 63:9) Ɔmmaa “amaneɛnwunlɛ anzɛɛ anwongyelelɛ” anzɛɛ debie biala—bɔbɔ ye sonvolɛma—adenle kɛ ‘bɛkɛkpɔkye yɛ bɛkɛvi Nyamenle ɛhulolɛ ne’ anwo. (Wulomuma 8:35, 38, 39) Ɛhye ati ɔnle kɛ yɛdayɛ noko yɛmaa debie biala anzɛɛ awie biala kpɔkye yɛ fi Gyihova anwo.
Yɛfa ɛtane yɛkyɛ noko yɛnlie ɛtane yɛndo nu. Saa yɛfa menli mɔɔ yɛ yɛ ɛtane la nvonleɛ yɛkyɛ bɛ a, ɔngile kɛ yɛ nye die ɛtane nwo anzɛɛ yɛdie bɛ nyɛleɛ ne yɛto nu. Kakye kɛ, Gyihova ɛnlie ɛtaneyɛlɛ ɛndo nu, noko ɔfa ɛtane ɔkyɛ saa ɔnyia debie mɔɔ ɔkola ɔgyinla zo ɔfa ɔkyɛ a. (Edwɛndolɛ 103:12, 13; Habakɛke 1:13) Saa Gyihova maa yɛ anwosesebɛ kɛ yɛva ɛtane yɛhyɛ a, ɛnee ɔlɛka yeahile yɛ kɛ yɛzukoa ye. “Ɔnva ɛya ɔnzie ɔ kunlu dahuu.”—Edwɛndolɛ 103:9; Mateyu 6:14.
Saa yɛgyakyi edwɛkɛ nu a, ɔboa yɛ kpalɛ. Adenle boni azo? Suzu neazo ɛhye anwo nea. Fa ye kɛ wɔmaa bolɛ mɔɔ ɔnyɛ ɛlomboɛ la zo na wɔdende ɛ sa. Ɛbahola wɔalɛ ye wɔ mekɛ ezinra bie anu. Noko saa ɛdɛ ɛkyɛ a, mekɛ tendenle nyɛ a ɛbahola wɔalɛ ye ɛ sa nu a? Mitini anzɛɛ dɔnehwele? Saa ɔkyɛ a, ɛbavɛ na ɛ sa babu! Nɔhalɛ nu, bolɛ ne ɛlomboɛ ne ɛngakyi. Noko saa ɛdɛ ɛkyɛ a, ɛbade nganeɛ kɛ ɔyɛ ɛlomboɛ. Zɔhane ala a edwɛkɛ mɔɔ yɛ nyane mɔɔ yɛfa yɛsie yɛ nu la de a. Saa ɔkyɛ na edwɛkɛ ne le ekyi bɔbɔ a, ɔmaa yɛdi nyane. Ɔnyɛ nwanwane kɛ, Gyihova se yɛgyakyi edwɛkɛ nu la. Nɔhalɛ nu, yɛyɛ zɔ a, ɔboa yɛ kpalɛ.—Mrɛlɛbulɛ 11:17.
Saa yɛgyakyi edwɛkɛ nu a, ɔboa yɛ kpalɛ
“Mendele nganeɛ kɛ Gyihova ɛlɛtendɛ ahile me”
Duzu a boale Linda mɔɔ yeammaa yeanva kɛzi ɔ diema diedinli ne nee ye lile la anwo edwɛkɛ yeanzie ye nu ɛ? Ko a le kɛ, ɔdwenledwenlenle Ngɛlɛlera mɔɔ ka deɛmɔti ɔwɔ kɛ yɛfa ɛtane yɛkyɛ la anwo. (Edwɛndolɛ 130:3, 4) Mɔɔ boale Linda kpalɛ la a le kɛ, ɔranwunle kɛ saa yɛfa ɛtane yɛkyɛ a, Gyihova noko bava yɛ ɛtane yeahyɛ yɛ. (Ɛfɛsɛsema 4:32–5:2) Edwɛkɛ zɔhane maanle ɔhanle kɛ: “Mendele nganeɛ kɛ Gyihova ɛlɛtendɛ ahile me.”
Yeangyɛ biala, Linda gyakyile edwɛkɛ ne anu bɔkɔɔ. Ɔvile ahonle kɔsɔɔti anu ɔvale ɔhyɛle ɔ diema ne, na ɛnɛ bɛ mu nwiɔ bɛle agɔnwolɛma. Kɛkala Linda ɛhwe ɛbikye Gyihova kpalɛ wɔ ye ɛzonlenlɛ nu. Nyia anwodozo kɛ Gyihova kulo kɛ ɔboa ɛdawɔ noko ɔmaa ɛyɛ zɔ.