ƐZUKOALƐDEƐ 37
Mɔɔ Baebolo Ne Ka Ye Wɔ Gyima Nee Ezukoa Nwo La
Gyima anzɛɛ ezukoa ɛmaa adwenleadwenle ɛdɔ ɛ nwo ɛlɛ ɔ? Ɔbahola yeayɛ se kɛ yɛbali yɛ ngyianlɛ nwo gyima na eza yɛazonle Gyihova wɔ adenle mɔɔ ɔdie ɔto nu la azo. Baebolo ne fa folɛdulɛ kpalɛ mɔɔ baboa yɛ la maa.
1. Duzu a Baebolo ne ka ye wɔ gyima nwo a?
Nyamenle kulo kɛ yɛ nye die yɛ gyima nwo. Baebolo ne ka kɛ “debie kpalɛ biala ɛnle ɛkɛ ɛmmaa sonla kɛ . . . ɔ nye kɛlie ye gyima ɛsesebɛ nwo.” (Nolobɔvo 2:24) Gyihova yɛ gyima ɛsesebɛ. Saa yɛsukoa ye na yɛyɛ gyima ɛsesebɛ a, ɔmaa ɔ nye die na yɛ kunlu dwo yɛ nwo.
Gyima nwo hyia. Noko ɔnle kɛ yɛmaa nwolɛ kyia yɛ kpole tɛla Gyihova ɛzonlenlɛ ɛlɛ. (Dwɔn 6:27) Yebɔ yɛ ɛwɔkɛ kɛ saa yɛfa ye ɛzonlenlɛ yɛdimoa a, ɔbamaa yɛ sa aha mɔɔ yɛhyia la.
2. Ezukoa nwo adwenle kpalɛ boni a ɔwɔ kɛ yɛnyia a?
Baebolo ne ka kɛ ‘ezukoa bɔ yɛ nwo bane,’ noko eza ɔbɔ yɛ kɔkɔ kɛ tɛ ezukoa angomekye a bamaa yɛ nye alie a. (Nolobɔvo 7:12) Ɛhye ati, ɔtu yɛ folɛ kɛ yɛmmamaa yɛ nye bolo ezukoa na ‘yɛmaa yɛ kunlu ɛdwo mɔɔ yɛlɛ ye la anwo.’ (Kenga Hibuluma 13:5.) Saa yɛmaa yɛ kunlu dwo mɔɔ yɛlɛ ye la anwo a, dahuu yɛnrɛpele kɛ yɛkpondɛ dɔɔnwo na yeayɛ ɛvɛlɛ yeamaa yɛ. Ɔmmaa yɛndwe kakɛ yɛmmaa yɛ nwo. (Mrɛlɛbulɛ 22:7) Eza ɔmaa yɛtwe yɛ nwo yɛfi kyakyadolɛ nee ezukoa ndɛndɛ ɛkpondɛlɛ nwo esiane biala anwo.
3. Kɛ ɔkɛyɛ na yɛanyɛ akyɛbɛ wɔ yɛ ezukoa nwo ɛ?
Gyihova le Nyamenle mɔɔ kyɛ debie, na saa ‘yɛyɛ atiakunlukɛnlɛma, na yɛkyɛ debie’ a, ɛnee yɛlɛsukoa ye. (1 Timote 6:18) Saa yɛanyɛ akyɛbɛ a, yɛbahola yɛava yɛ ezukoa yɛaboa asafo ne nee awie mɔ mɔɔ hyia moalɛ la, titili yɛ mediema diedima. Gyihova anye die adwenle mɔɔ yɛfa yɛkyɛ debie la anwo, na tɛ kɛzi deɛ ne dodo ne de la ɔ. Saa yɛfi yɛ ahonle nu yɛkyɛ debie a, yɛ nye balie na ɔbazɔ Gyihova anye.—Kenga Gyima ne 20:35.
SUKOA DƆƆNWO
Nea nvasoɛ mɔɔ wɔ zo kɛ yɛbanyia gyima nwo adwenle kpalɛ na yɛamaa yɛ kunlu adwo yɛ nwo la.
4. Dua wɔ gyimayɛlɛ zo wula Gyihova anyunlunyia
Ɔwɔ kɛ agɔnwolɛvalɛ mɔɔ yɛ nee Gyihova lɛ la ka kɛzi yɛyɛ gyima la. Ye VIDIO ne, na akee bɛzuzu kpuya ɛhye mɔ anwo.
Wɔ vidio ne anu, duzu a ɛ nye liele nwo wɔ Jason subane nee ye nyɛleɛ mɔɔ ɔda ye ali wɔ gyima nu la anwo a?
Duzu a ɔyɛle amaa yeanyia gyima nwo adwenle kpalɛ a?
Kenga Kɔlɔsaema 3:23, 24, na akee bɛzuzu kpuya ɛhye anwo:
Duzu ati a subane mɔɔ yɛda ye ali wɔ gyima nwo la anwo hyia a?
Gyima nwo hyia. Noko ɔnle kɛ yɛmaa nwolɛ kyia yɛ kpole tɛla Gyihova ɛzonlenlɛ ɛlɛ
5. Yɛ kunlu dwo mɔɔ yɛlɛ la anwo a ɔboa yɛ
Menli dɔɔnwo bɔ mɔdenle kɛ bɛbanyia ezukoa dɔɔnwo. Noko Baebolo ne tu yɛ folɛ kɛ yɛmmayɛ zɔ. Kenga 1 Timote 6:6-8, na akee bɛzuzu kpuya ɛhye anwo:
Duzu a Baebolo ne tu yɛ folɛ kɛ yɛyɛ a?
Saa yɛlɛ ekyi bɔbɔ a yɛ nye bahola alie. Ye VIDIO ne, na akee bɛzuzu kpuya ɛhye anwo.
Mbusua ɛhye mɔ ɛnlɛ ezukoa dɔɔnwo ɛdeɛ, noko duzu a maa bɛ nye die a?
Na saa yɛlɛ bie yɛɛ yɛkpondɛ dɔɔnwo yɛaboka nwo ɛ? Gyisɛse yɛle esiane mɔɔ wɔ ɛhye anu la anwo ndonwo. Kenga Luku 12:15-21, na akee bɛzuzu kpuya ɛhye anwo:
Duzu a wɔzukoa wɔvi Gyisɛse ndonwo ne anu a?—Nea ngyɛnu 15.
Kenga Mrɛlɛbulɛ 10:22 yɛɛ 1 Timote 6:10 na fa toto nwolɛ. Akee bɛzuzu kpuya ɛhye mɔ anwo:
Boni a ɛnea a ɔhyia kpalɛ a? Gyihova mɔɔ yɛfa ye agɔnwolɛ anzɛɛ ezukoa dɔɔnwo mɔɔ yɛbanyia la? Duzu ati ɔ?
Saa yɛdoa ezukoa a ngyegyelɛ boni ɔfa ɔba a?
6. Gyihova bamaa yɛ sa aha mɔɔ yɛhyia nwo la
Gyima nee ezukoa nwo ngyegyelɛ bahola azɔ diedi mɔɔ yɛlɛ wɔ Gyihova anu la anlea. Ye VIDIO ne na nea kɛzi yɛbahola yɛagyinla diedi nwo sɔnea ɛhye mɔ anloa la, na akee bɛzuzu kpuya ɛhye mɔ anwo.
Wɔ vidio ne anu, ngyegyelɛ boni mɔ a adiema nrenyia ne yiale a?
Duzu a ɔyɛle amaa yeahola yeali ngyegyelɛ ne mɔ anwo gyima kpalɛ a?
Kenga Mateyu 6:25-34, na akee bɛzuzu kpuya ɛhye anwo:
Duzu a Gyihova ɛbɔ ɛwɔkɛ kɛ ɔbayɛ yeamaa bɛdabɛ mɔɔ bɛfa ye ɛzonlenlɛ bɛdimoa la a?
BIE MƆ KA KƐ: “Ɔwɔ kɛ meyɛ gyima ɛsesebɛ mefa menea me abusua ne. Menrɛhola menrɛhɔ debiezukoalɛ dapɛne biala.”
Ngɛlɛlera boni a maa ɛdie ɛdi kɛ ɛfa Gyihova ɛzonlenlɛ ɛdimoa dahuu a ɛnee wɔzi kpɔkɛ kpalɛ a?
EDWƐKƐ TITILI
Gyima nee ezukoa nwo hyia. Noko ɔnle kɛ yɛmaa bɛsɛkye yɛ mekɛ mɔɔ yɛfa yɛsonle Gyihova la ɛlɛ.
Ndinu
Duzu a baboa wɔ yeamaa wɔanyia gyima nwo adwenle kpalɛ a?
Kɛzi ɛmaa ɛ kunlu dwo mɔɔ ɛlɛ la anwo a ɔbaboa wɔ ɛ?
Kɛ ɔkɛyɛ na wɔahile kɛ ɛdie ɛwɔkɛ mɔɔ Gyihova ɛbɔ kɛ ɔbanlea ye menli la ɛdi ɛ?
KPONDƐ DƆƆNWO
Nea saa Baebolo ne bu ezukoa kɛ ɔle ɛtane a.
“Asoo Ezukoa Le Ɛtane Kɔsɔɔti Ndinli?” (Edwɛkɛ mɔɔ wɔ jw.org azo)
Sukoa kɛzi yɛbahola yeahyɛ debie yeamaa yeazɔ Nyamenle anye la anwo debie.
“Duzu A Baebolo Ne Ka Ye Wɔ Debie Ɛhyɛlɛ Nwo A?” (Edwɛkɛ mɔɔ wɔ jw.org azo)
Asoo esiane biala ɛnle kyakyadolɛ nu ɔ?
Nea debie mɔɔ maanle awie mɔɔ to kyakya na eza ɔle awule la hakyile ye ɛbɛlabɔlɛ la.
“Ɛnee Me Nye Die Mgbɔnwɔ Mɔɔ Bɛfa Bɛsu Ɛnriandilɛ La Anwo” (Ɛzinzalɛ Arane nu edwɛkɛ)