Folɛdulɛ Mɔɔ Fɛta

ƆWƆ kɛ Keleseɛne mgbanyima dua “Nyamenle edwɛkɛ” ne azo tu folɛ. (Tae. 1:9) Ɔdwu mekɛ ne bie a ɔwɔ kɛ yɛyɛ ɛhye wɔ mekɛ mɔɔ yɛlɛdi tɛnlabelɛ mɔɔ anu yɛ se kpalɛ anwo gyima la. Ɔwɔ kɛ yɛmaa yɛ folɛdulɛ nee adehilelɛ mɔɔ wɔ Ngɛlɛlera ne anu la yia. Ɛhye ati, ɔwɔ kɛ mgbanyima di folɛdulɛ ɛhye azo: “Maa ɛ nye ɛbolo . . . [folɛdulɛ] nwo.” (1 Tem. 4:13) Ɔnva nwo kɛ mɔɔ yɛlɛsuzu nwo wɔ ɛke la fane mgbanyima anzɛɛ menli mɔɔ ɛlɛdwu nwolɛ adenle ɛhye anwo la anwo la, ɔdwu mekɛ ne bie a ɔwɔ kɛ awovolɛ tu bɛ mra folɛ anzɛɛ menli mɔɔ ɛlɛyɛ Baebolo ɛzukoalɛ la tu bɛ Baebolo sukoavoma folɛ. Wɔ mekɛ ɛhye mɔ anu, adehilelɛ ko ne ala bahyia.

Tɛnlabelɛ Mɔɔ Bahyia Folɛdulɛ. Saa ɛnea tɛnlabelɛ ngakyile mɔɔ bɛdule menli folɛ wɔ nu wɔ Baebolo ne anu la anu a, ɔbaboa wɔ yeamaa wɔanwu mekɛ mɔɔ ɔwɔ kɛ ɛtu awie folɛ la. Ɛzoanvolɛ Pita dule mgbanyima folɛ kɛ bɛnlea mboane ekpunli ne mɔɔ Nyamenle ɛva ɛwula bɛ sa nu la boɛ. (1 Pita 5:1, 2) Pɔɔlo zele Taetɛse kɛ ɔdu mgbavolɛ folɛ kɛ “bɛzɔ bɛ nwo.” (Tae. 2:6) Pɔɔlo dule ɔ mediema Keleseɛnema folɛ kɛ bɛmaa bɛ “nloa ɛzɛ bɛ nwo” na bɛmmamaa mgbakyemgbakye biala bada bɛ avinli. (1 Kɔl. 1:10; Wulo. 16:17; Fel. 4:2) Ɔwɔ nu kɛ Pɔɔlo hanvole Tɛsalonaeka asafo ne anu amra wɔ bɛ nyɛleɛ kpalɛ nwo ɛdeɛ, noko ɔdule bɛ folɛ kɛ mɔɔ bɛzukoa la bɛyɛ ye molozo. (1 Tɛs. 4:1, 10) Pita kpale ɔ mediema Keleseɛnema kyɛlɛ kɛ ‘bɛmmadi nwonane atiakunluwɔzo ne mɔ anzi fee.’ (1 Pita 2:11) Dwuudu dule ɔ mediema folɛ kɛ “bɛho bɛmaa diedi ne” ɔluakɛ menli mɔɔ ɛnze Nyamenle la fa bɛ nwo wula adwɔmanebɔlɛ nu. (Dwuudu 3, 4) Bɛze Keleseɛnema kɔsɔɔti kɛ bɛdu bɛ nwo folɛ amaa ɛtane ambɛlɛbɛla bɛ biala na bɛakpunli bɛ ahonle. (Hib. 3:13) Pita dule Dwuuma mɔɔ bɛtɛdiele Kelaese bɛtɛdile la folɛ kɛ: “Bɛhwe bɛ nwo bɛvi amaneɛ mɔɔ amumuyɛma ɛhye mɔ banwu ye la anu.”​—Gyi. 2:40.

Subane boni mɔɔ a anwo hyia amaa yɛahola yɛadu folɛ kpalɛ wɔ tɛnlabelɛ zɛhae mɔ anu a? Kɛzi ahenle mɔɔ ɛlɛtu folɛ ne la bamaa bɛayɛ nwolɛ debie ndɛndɛ mɔɔ ɔnga ɛya a?

‘Maa Ɔgyinla Ɛhulolɛ Zo.’ Saa yɛ folɛdulɛ ne angyinla “ɛhulolɛ” zo a, bie a ɔbaha ɛya. (Fae. 9) Nɔhalɛ, saa ɔwɔ kɛ bɛyɛ debie bie ndɛndɛ a, ɔwɔ kɛ tendɛvolɛ ne ɛdendɛlɛ ne maa bɛnwu ye. Bie a ɛdendɛlɛ kpɔnɔlɔɔ bahile kɛ ɛlɛkpa kyɛlɛ. Mekɛ ko ne ala, ɔwɔ kɛ modolɛ ne fi ahonle nu na ɔkile kɛ ɛbu bɛ. Saa ɛfi ɛhulolɛ nu ɛsɛlɛ wɔ tievolɛma a ɔbaha bɛ ahonle. Mekɛ mɔɔ Pɔɔlo gyinla ɔ nee ɔ gɔnwo mɔ agyakɛ anu adendɛ ahile Tɛsalonaekama la ɔhanle kɛ: “Bɛdabɛ bɛnwunle kɛ yɛyɛle bɛ nuhua ko biala kɛ selɛ kɛyɛ ɔ ra la.” (1 Tɛs. 2:11) Zɔhane Keleseɛne neavolɛma ne vile ɛlɔlɛ nu manle mediema ne mɔ anwosesebɛ. Maa wɔ edwɛkɛhanlɛ ɛhile kɛ ɛdwenle wɔ tievolɛma anwo kpalɛ.

Maa ɛ nye ɛla ɛkɛ. Mmafa edwɛkɛ ɛta menli mɔɔ ɛkpondɛ kɛ bɛyɛ edwɛkɛ ne anwo debie la anye zo. Eza mmafa “debie biala mɔɔ fane Nyamenle ngyehyɛlɛ ne anwo” la ɛfea wɔ tievolɛma. (Gyi. 20:27) Wɔ tievolɛma mɔɔ anye die edwɛkɛ ne anwo la ɛnrɛva ɛya anzɛɛ bɛbahulo wɔ ɔluakɛ wɔvi ɛhulolɛ nu wɔzi bɛ adua kɛ bɛyɛ mɔɔ tenrɛ la.​​—Edw. 141:5.

Fane dɔɔnwo ne ala, ɔle kpalɛ kɛ ɛbava nganvolɛ titile bie wɔabɔ wɔ folɛdulɛ ne abo. Dwenle ninyɛne mgbalɛ mɔɔ ɛ mediema ɛlɛyɛ mɔɔ Gyihova anye die nwo la anwo: diedi mɔɔ bɛda ye ali wɔ gyima nu, ɛlɔlɛ mɔɔ maa bɛyɛ dɔɔnwo, na bɛgyinla bɛ munli nu wɔ tɛnlabelɛ ngakyile mɔɔ anu yɛ se anu la. (1 Tɛs. 1:2-8; 2 Tɛs. 1:3-5) Ɛhye bamaa ɛ mediema ade nganeɛ kɛ ɛ nye sɔ bɛ na ɛte bɛ edwɛkɛ bo, na ɛhye bamaa bɛayɛ bɛ adwenle kɛ bɛbadie mɔɔ ɛlɛba wɔaha la.

‘Nyia Abotane.’ Saa ɛlɛtu folɛ a ɔwɔ kɛ ɛnyia “abotane.” (2 Tem. 4:2) Duzu a ɛhye kile a? Abotanezilɛ kile kɛ ɛtɔ ɛ rɛle aze wɔagyinla debie mɔɔ ɛnle kpalɛ anzɛɛ ka ɛya la anloa. Awie mɔɔ lɛ abotane la lɛ anyelazo bɔkɔɔ kɛ ye tievolɛma bava mɔɔ ɔlɛka la ali gyima. Saa ɛfa subane ɛhye ɛtu folɛ a, ɔnrɛmaa wɔ tievolɛma ɛnrɛnyia adwenle kɛ ɛlɛ bɛ nwo adwenle mɔɔ ɛndenrɛ. Saa ɛnyia anwodozo kɛ ɛ mediema kpondɛ kɛ bɛsonle Gyihova kɛmɔ bɛbahola la a, ɔbamaa bɛayɛ mɔɔ tenrɛ la.​—Hib. 6:9.

Gyinla “Nyamenle Edwɛkɛ” Ne Azo. Kɛzi kpanyinli bahola agyinla “Nyamenle edwɛkɛ” ne azo adu folɛ ɛ? Kyesɛ “ɔsɔ Nyamenle edwɛkɛ ne mɔɔ bɛkola bɛfa bɛ rɛle bɛto zo na eza ɔ nee yɛ ngilehilelɛ ne kɔ zolɛ la anu kyengye.” (Tae. 1:9) Kɛ anrɛɛ ɛbaha wɔ ɛdeɛ mɔɔ wɔ wɔ adwenle nu la, maa Nyamenle edwɛkɛ ne ɛhile tumi mɔɔ wɔ wɔ edwɛkɛ ne anu la. Maa Baebolo ne ɛboa wɔ amaa wɔanwu mɔɔ ɔwɔ kɛ ɛka la. Ka nvasoɛ mɔɔ saa awie fa mɔɔ Baebolo ne ka fane mɔɔ bɛlɛsuzu nwo anwo la di gyima a ɔbanyia la anwo edwɛkɛ. Maa mɔɔ vi Nyamenle Edwɛkɛ ne mɔɔ bɛnli zolɛ anu bara kɛkala nee kenlebie la ɛdɛnla wɔ adwenle nu, na fa ɛhye boa wɔ tievolɛma maa bɛnwu mɔɔ ɔwɔ kɛ bɛyɛ la.

Kilehile nuhua kile wɔ tievolɛma maa bɛnwu mɔɔ ɔwɔ kɛ bɛyɛ nee kɛzi bɛbayɛ ye la. Maa ɔla ali kɛ mɔɔ ɛlɛka nwolɛ edwɛkɛ la gyi Ngɛlɛlera ne azo. Saa Ngɛlɛlera ne maa kpɔkɛ bie mɔɔ ɔwɔ kɛ bɛsi la anwo adenle a, maa bɛnwu kɛzi ɔde la. Akee saa ɛlɛdwula wɔ ɛdendɛlɛ ne a, ka edwɛkɛ mɔɔ bamaa ɛhulolɛ mɔɔ wɔ tievolɛma lɛ kɛ bɛbayɛ debie la anu ayɛ se la.

‘Ka Edwɛkɛ Mɔɔ Ɛnzulo.’ Amaa awie ahola adu folɛ kpalɛ la, ɔwɔ kɛ ‘ɔka diedi ne anwo edwɛkɛ mɔɔ ɔnzulo a.’ (1 Tem. 3:13) Duzu a maa awie tendɛ mɔɔ ɔnzulo a? Yemɔ a le kɛ ye “kilemunli kpalɛ wɔ gyima kpalɛ ɛyɛlɛ nu” nee mɔɔ ɔlɛtu ɔ mediema folɛ wɔ nwo kɛ bɛyɛ la yia. (Tae. 2:6, 7; 1 Pita 5:3) Mekɛ mɔɔ ɛhye le zɔ la, menli mɔɔ ɔlɛtu bɛ folɛ kɛ bɛyɛ debie la banwu ye kɛ ahenle mɔɔ ɔlɛtu bɛ folɛ la anye ɛnla kɛ bɛbayɛ debie mɔɔ ɔdaye mumua ne ɔnyɛ la. Bɛbanwu ye kɛ bɛbahola bɛazukoa ye diedi ne kɛmɔ ɔdaye noko ɔlɛbɔ mɔdenle yeazukoa Kelaese la.​—1 Kɔl. 11:1; Fel. 3:17.

Ɛgyinla Nyamenle Edwɛkɛ ne azo na ɛfi ɛlɔlɛ nu ɛtu folɛ a, nvasoɛ kpole bara zo. Ɔwɔ kɛ bɛdabɛ mɔɔ bɛva folɛdulɛ nwo ɛzonlelilɛ bɛwula bɛ sa la dua adenle kɛnlɛma zo yɛ ye kpalɛ.​—Wulo. 12:8.