Kɛzi Ɛkɔ Gyihova Alasevolɛ Debiezukoalɛ Ne Mɔ Bie A Ɔbaboa Wɔ Ɛ?

Wɔhɔ Gyihova Alasevolɛ debiezukoalɛ ne mɔ bie ɛlɛ ɔ? Saa ɛtɛkɔle bie ɛlɛ a, bie a kenle mɔɔ limoa la wɔ ahonle badu ekyii. Bie a ɛbabiza kɛ: ‘Duzu a bɛyɛ ye wɔ debiezukoalɛ ɛhye mɔ abo a? Duzu ati a nwolɛ hyia a? Duzu ati a ɔwɔ kɛ mekɔ bie a?’ Wɔ ɛzukoalɛdeɛ ɛhye anu, ɛbazukoa kɛzi ɛkɔ ayia ɛhye mɔ bie a ɔbamaa wɔabikye Nyamenle na yeaboa ɛdawɔ mumua ne la.

1. Debie titili mɔɔ ɔti Gyihova Alasevolɛ kɔ debiezukoalɛ la a le boni?

Yɛ kɛzi Baebolo kɛlɛvolɛ bie hilele debie titili mɔɔ ɔti yɛyia nu la nzonlɛ: “Mebaye Gyihova ayɛlɛ wɔ asafo kpole nu.” (Edwɛne 26:​12) Ɛhye ati a Gyihova Alasevolɛ anye die kpole kɛ bɛbayia nu a. Wɔ ewiade amuala, bɛyia nu dapɛne biala bɛye Nyamenle ayɛlɛ, bɛto edwɛne na bɛyɛ asɔne. Ɛvolɛ biala, eza bɛyɛ nyianu mgbole.

2. Duzu a ɛbazukoa wɔ yɛ ayia ne mɔ abo a?

Wɔ yɛ debiezukoalɛ ne mɔ abo, yɛfa yɛ adwenle yɛsie Nyamenle Edwɛkɛ ne azo, ‘yɛkilehile nu kpalɛ yɛmaa nuhua da ɛkɛ ne wienyi.’ (Kenga Nihɛmaya 8:8.) Saa ɛkɔ bie a, ɛbazukoa Gyihova nee ye subane ngɛnlɛma ne mɔ anwo debie. Mekɛ mɔɔ ɛlɛsukoa ɛlɔlɛ mɔɔ ɔlɛ ɔmaa wɔ anwo ninyɛne dɔɔnwo la, ɛbabikye ye kpalɛ. Eza ɛbazukoa kɛzi ɔbahola yeaboa wɔ yeamaa wɔ ɛbɛlabɔlɛ ayɛ anyelielɛ la.​—Ayezaya 48:​17, 18.

3. Kɛzi menli mɔɔ ɛbayia bɛ wɔ yɛ ayia ne mɔ abo la baboa wɔ ɛ?

Gyihova ɛha ɛhile yɛ kɛ “yɛzuzu yɛ nwo ngoko amaa yɛamaa yɛ nwo anwosesebɛ yɛahɔ ɛlɔlɛ nee gyima kpalɛ ɛyɛlɛ nu, [yɛmmagyakyi] kɛ yɛkɛhɔ yɛ nyianu ne mɔ.” (Hibuluma 10:​24, 25) Wɔ yɛ ayia ne mɔ abo, ɛbayia menli mɔɔ dwenle bɛ gɔnwo mɔ anwo kpalɛ na bɛ nye die kɛ bɛbazukoa Nyamenle anwo debie kɛ ɛdawɔ la. Ɛbade kɛ bɛlɛka Baebolo ne anu edwɛkɛ mɔɔ maa anwosesebɛ la. (Kenga Wulomuma 1:​11, 12.) Eza ɛbahola ɛ nee agyalɛma nee menli mɔɔ bɛtɛgyale mɔɔ bɛyia ngyegyelɛ noko bɛ nye die la ali adwelie. Ninyɛne mɔɔ ɔti Gyihova kulo kɛ yɛyia nu dahuu la bie mɔ ɛne!

SUKOA DƆƆNWO

4. Gyihova Alasevolɛ debiezukoalɛ ne mɔ

Wɔ ɛvoya mɔɔ limoa la anu, ɛnee Kilisienema yia nu dahuu sonle Gyihova. (Wulomuma 16:​3-5) Kenga Kɔlɔsaema 3:​16, na bɛzuzu kpuya ɛhye anwo:

• Kɛzi alimoa Kilisienema zonlenle Gyihova ɛ?

VIDIO: Duzu A Bɛyɛ Ye Wɔ Belemgbunlililɛ Asalo Ɛkɛ A? (2:12)

• Duzu a ɛnwunle kɛ bɛyɛ ye wɔ Belemgbunlililɛ Asalo ɛkɛ mɔɔ le kɛ edwɛkɛ mɔɔ ɛgengale ye wɔ Kɔlɔsaema 3:​16 la ɛ?

• Ɛnwunle debie gyɛne wɔ vidio ne anzɛɛ nvoninli ne anu wɔ debiezukoalɛ ne mɔ anwo mɔɔ ɛ nye die nwo ɔ?

Kenga 2 Kɔlentema 9:​7, na bɛzuzu kpuya ɛhye anwo:

• Duzu ati a Gyihova Alasevolɛ ɛnlielie ezukoa wɔ debiezukoalɛ bo a?

Maa wɔ kilehilevolɛ ne ɛboa wɔ na bɛnlea ninyɛne mɔɔ bɛbazuzu nwo wɔ debiezukoalɛ ko abo wɔ dapɛne ne anu la.

• Debiezukoalɛ ne foa boni a ɛ nye die nwo anzɛɛ ɔbaboa wɔ a?

Asoo ɛze?

Ɛbanwu ɛleka nee mekɛ mɔɔ bɛyɛ debiezukoalɛ wɔ ewiade amuala la wɔ jw.org azo.

1. A. Ɛdendɛlɛ, yɛkile yɛɛ vidio boka yɛ debiezukoalɛ ne mɔ anwo. Yɛfa edwɛne nee asɔneyɛlɛ yɛbɔ ɔ bo na yɛfa yɛkpɔne

2. B. Bɛmaa tievolɛma maa mualɛ wɔ debiezukoalɛ ne foa bie mɔ anu

3. D. Awie biala kola ba bie​—mbusua, baholɛ, mgbanyima yɛɛ ngakula

4. Ɛ. Bɛnlie ɛhwee wɔ debiezukoalɛ ne anwo. Gyihova Alasevolɛ ɛnlielie ezukoa anzɛɛ bɛndo kɔlɛhyɛne

5. Ɔhyia mɔdenlebɔlɛ na wɔahɔ debiezukoalɛ

Suzu neazo mɔɔ Gyisɛse abusua ne yɛle la anwo. Ɛvolɛ biala, ɛnee bɛtia kenle nsa adenle bɛfi Nazalɛte bɛkɔ Gyɛlusalɛm bɛkɔdi ɛvoyia. Ɛnee bɛdua awoka zo a bɛkɔ a. Kenga Luku 2:​39-42, na bɛzuzu kpuya ɛhye mɔ anwo:

• Ɛnea a ɛnee ɔhyia mɔdenlebɔlɛ na bɛapɛ adenle bɛahɔ Gyɛlusalɛm ɔ?

• Duzu ati a ɔhyia mɔdenlebɔlɛ na wɔahola wɔahɔ debiezukoalɛ a?

• Ɛnea a nvasoɛ wɔ zo kɛ ɛbabɔ mɔdenle wɔahɔ bie ɔ? Nzɔne ati ɔ?

• Duzu ati a ɔwɔ kɛ yɛkɔ debiezukoalɛ dahuu a?

EDWƐKƐ TITILI

Ɛkɔ debiezukoalɛ a ɔbaboa wɔ yeamaa wɔazukoa Gyihova anwo ninyɛne dɔɔnwo, ɛ nee ye agɔnwolɛvalɛ ne anu amia na ɛ nee awie mɔ abɔ nu azonle ye.

Ndinu

• Duzu ati a Gyihova maa yɛ anwosesebɛ kɛ yɛyia nu a?

• Duzu a ɛbazukoa ye wɔ Gyihova Alasevolɛ debiezukoalɛ bo a?

• Ɛnea a nvasoɛ boni bieko a ɛkɔ debiezukoalɛ a ɛbanyia a?

KPONDƐ DƆƆNWO

Na saa ɛsulo kɛ ɛbahɔ debiezukoalɛ ɛ? Nea kɛzi nrenyia bie mɔɔ ɛnee sulo kɛ ɔbahɔ debiezukoalɛ la nzinlii anye liele nwolɛ la.

Yɛ Rɛle Ɛnrɛvi Bɛ Ahyebizalɛ Ne Ɛlɛ (4:​16)

Nea mɔɔ maanle kpavolɛ bie anye liele debiezukoalɛ nwo nee mɔɔ ɔyɛle amaa yeahola yeahɔ dahuu la.

Ɛnee Me Nye Die Nyianu Ne Mɔ Anwo Kpalɛ! (4:​33)

Sukoa kɛzi bie mɔ bu debiezukoalɛ ɛhɔlɛ la.

“Duzu Ati A Ɔwɔ Kɛ Mekɔ Nyianu Wɔ Belemgbunlililɛ Asalo A?” (Edwɛkɛ mɔɔ wɔ jw.org azo)

Sukoa kɛzi nrenyia bie mɔɔ ɛnee kulo basabasayɛlɛ la subane hakyile wɔ mekɛ mɔɔ ɔhɔle Gyihova Alasevolɛ debiezukoalɛ ne bie la.

“Ɛnee Mengɔ Mengyakyi Me Etu” (Ɛzinzalɛ Arane, July 1, 2014)

5. Ewiade ɛhakyi ɔvi 1914 mɔɔ ba la

Ye VIDIO ne.

VIDIO: Ewiade Ɛhakyi Ɔvi 1914 Mɔɔ Ba La (1:10)

Gyisɛse hanle ninyɛne mɔɔ ɔbayɛ Belemgbunli a ɔbahɔ zo wɔ ewiade la anwo edwɛkɛ dole ɛkɛ. Kenga Luku 21:​9-11, na akee bɛzuzu kpuya ɛhye anwo:

• Ninyɛne ɛhye mɔ boni a wɔnwu ye anzɛɛ wɔde nwolɛ edwɛkɛ a?

Ɛzoanvolɛ Pɔɔlo hanle subane mɔɔ menli bala ye ali wɔ sonla tumililɛ mekɛ mɔɔ li awieleɛ anu la anwo edwɛkɛ. Kenga 2 Timote 3:​1-5, na akee bɛzuzu kpuya ɛhye anwo:

• Subane ɛhye mɔ boni a wɔnwu kɛ menli ɛlɛda ye ali ɛnɛ a?

6. Ɔwɔ kɛ Nyamenle Belemgbunlililɛ mɔɔ ɛlɛdi tumi la ka yɛ maa yɛyɛ debie

Kenga Mateyu 24:​3, 14, na akee bɛzuzu kpuya ɛhye mɔ anwo:

• Gyima mɔɔ anwo hyia la boni a kile kɛ Nyamenle Belemgbunlililɛ ne ɛlɛdi tumi kɛkala a?

• Kɛ ɔkɛyɛ na wɔayɛ gyima ɛhye bie ɛ?

Nyamenle Belemgbunlililɛ ne ɛlɛdi tumi kɛkala, na mekɛ mɔɔ ɔbanlea azɛlɛ ye azo amuala la ɛbikye. Kenga Hibuluma 10:​24, 25, na akee bɛzuzu kpuya ɛhye anwo:

• Duzu a ɔwɔ kɛ yɛ nuhua ko biala yɛ wɔ mekɛ mɔɔ ‘yɛnwu kɛ kenle ne ɛlɛbikye la’ ɛ?