ƐZUKOALƐDEƐ 11
Kɛzi Ɛbanyia Baebolo Ne Azo Nvasoɛ Kpalɛ La
Asoo gyima kpole bie mɔɔ ɛnee ɛkulo kɛ ɛyɛ la yɛle se maanle wɔ ɔ? Amaa ye ɛyɛlɛ anyɛ se ammaa wɔ la, bie a ɛhyehyɛle nuhua ngyikyi ngyikyi amaa wɔahola wɔayɛ. Kɛ Baebolo ne ɛgengalɛ noko de la ɛne. Bie a ɛbabiza kɛ, ‘Membɔ ɔ bo wɔ ni?’ Wɔ ɛzukoalɛdeɛ ɛhye anu, yɛbazuzu ninyɛne ngyikyi bie mɔ mɔɔ ɛbahola wɔayɛ amaa yeaboa wɔ na ɛ nye alie Baebolo ne ɛgengalɛ nee ye ɛzukoalɛ nwo la anwo.
1. Duzu ati a ɔwɔ kɛ yɛkenga Baebolo ne dahuu a?
Awie mɔɔ kenga Baebolo ne anzɛɛ “Gyihova mɛla ne” dahuu la anye balie na yeawie ye boɛ. (Kenga Edwɛne 1:1-3.) Bɔ mɔdenle fa mitini ekyi kenga bie alehyenlɛ biala. Mekɛ mɔɔ ɛlɛnwu ninyɛne dɔɔnwo wɔ Nyamenle Edwɛkɛ ne anu la, ɛ nye balie wɔ Baebolo ɛgengalɛ ne anwo.
2. Duzu a bamaa wɔanyia Baebolo ɛgengalɛ zo nvasoɛ a?
Amaa yɛanyia Baebolo ɛgengalɛ zo nvasoɛ kpalɛ la, ɔwɔ kɛ yɛgyinla na yɛdwenle mɔɔ yɛlɛkenga la anwo. Ɔwɔ kɛ yɛkenga na ‘yɛdwenledwenle nwo.’ (Dwɔhyua 1:8) Saa ɛlɛkenga a, biza ɛ nwo kpuya ɛhye mɔ: ‘Duzu a ɛhye maa menwu ye wɔ Gyihova Nyamenle anwo a? Kɛzi mebava ɛhye meali gyima wɔ me ɛbɛlabɔlɛ nu ɛ? Kɛzi mebahola meava tɛkese ɛhye mɔ meaboa awie mɔ ɛ?’
3. Kɛ ɔkɛyɛ na wɔanyia mekɛ wɔagenga Baebolo ne ɛ?
Ɔyɛ se ɔmaa wɔ kɛ ɛbanyia mekɛ wɔagenga Baebolo ne ɔ? Kɛ ɔde ye wɔ yɛ nuhua dɔɔnwo afoa nu la ɛne. Bɔ mɔdenle fa wɔ ‘mekɛ di gyima kpalɛ.’ (Ɛfɛsɛsema 5:16) Saa ɛye mekɛ fɔɔnwo bie ɛsie ahane mɔɔ ɛbava wɔagenga Baebolo ne dahuu biala a ɛbahola wɔayɛ ɛhye. Bie mɔ kenga Baebolo ne nwonlomɔ mangyee. Bie mɔ kenga ye wɔ alehyenlɛ ne anu, bie a ewiazo mɔɔ bɛlɛdie bɛ menle la. Bie mɔ noko kenga ye wɔ nɔsolɛ nu kolaa na bɛala. Mekɛ boni a baboa wɔ kpalɛ a?
SUKOA DƆƆNWO
Sukoa kɛzi ɛbamaa wɔ Baebolo ɛgengalɛ ne ayɛ anyelielɛ kpalɛ la. Sukoa kɛzi ɛbahola wɔaziezie ɛ nwo kpalɛ amaa wɔanyia wɔ Baebolo ɛzukoalɛ ne azo nvasoɛ la.
Kɛ mɔɔ yɛsukoa aleɛ ngakyile ɛlilɛ na yɛ nye die nwo la, zɔhane ala a yɛ nye kola die Baebolo ne ɛgengalɛ nwo a
4. Maa ɛ nye ɛlie Baebolo ɛgengalɛ nwo
Bie a ɔnla aze kɛ ɛbabɔ ɔ bo wɔagenga Baebolo ne. Noko, yɛbahola ‘yɛanyia ɛhulolɛ’ yɛava yɛayɛ zɔ, kɛ mɔɔ awie bahola amaa ɔ nye alie aleɛ fofolɛ bie anwo la. Kenga 1 Pita 2:2, na akee bɛzuzu kpuya ɛhye anwo:
Saa ɛkenga Baebolo ne alehyenlɛ biala a, ɛnea a ɔbamaa ɛ nye alie nwo kɛ ɛbagenga ye dɔɔnwo ɔ?
Ye VIDIO ne na nea kɛzi awie mɔ anye liele Baebolo ne ɛgengalɛ nwo la. Akee bɛzuzu kpuya ɛhye mɔ anwo.
Wɔ vidio ne anu, ngyegyelɛ boni mɔ a mgbavolɛ nee mbɛlɛra ne mɔ lile nwolɛ gyima a?
Duzu a boale bɛ maanle bɛhɔle zo bɛgengale Baebolo ne dahuu a?
Kɛzi bɛmaanle bɛ Baebolo ɛgengalɛ ne yɛle anyelielɛ kpalɛ ɛ?
Nzuzulɛ mɔɔ ɛbava wɔabɔ ɔ bo la:
Kpondɛ Baebolo mɔɔ bɛhile ɔ bo pɛpɛɛpɛ, na ɔ bo ɛdelɛ ɛnyɛ se la. Fa Ewiade Fofolɛ Ngilebɛbo ne mɔɔ wɔ wɔ aneɛ nu la bɔ ɔ bo.
Dimoa kenga ɛleka mɔɔ ɛ nye die nwolɛ kpalɛ la. Amaa wɔanwu ɛhye la, nea ɛlɛka “Bɔ Ɔ Bo Kenga Baebolo Ne.”
Yɛ mɔɔ wɔgenga la nzonlɛ. Fa “Yɛ Wɔ Baebolo Ɛgengalɛ Ne Nzonlɛ” ɛlɛka ne mɔɔ wɔ buluku ɛhye anu la di gyima.
Fa JW Library® app ne di gyima. Saa ɛlɛ bie wɔ wɔ fonu anzɛɛ milahyinli gyɛne zo a, ɛbahola wɔagenga anzɛɛ wɔadie Baebolo ne ɛgengalɛ wɔ ɛleka biala.
Fa mokanwo ne mɔ mɔɔ wɔ Ewiade Fofolɛ Ngilebɛbo ne anu la di gyima. Mape, ɛlɛka ngakyile yɛɛ edwɛkɛbohilelɛ mɔɔ bamaa wɔ Baebolo ɛgengalɛ ne ayɛ anyelielɛ kpalɛ la wɔ ɛkɛ.
5. Siezie ɛ nwo maa wɔ Baebolo ɛzukoalɛ ne
Kenga Edwɛne 119:34, na akee bɛzuzu kpuya ɛhye anwo:
Duzu ati a ɔle kpalɛ kɛ ɛyɛ asɔne kolaa na wɔagenga Baebolo ne anzɛɛ wɔaziezie ɛ nwo wɔamaa wɔ Baebolo ɛzukoalɛ ne a?
Kɛ ɔkɛyɛ na wɔanyia ɛzukoalɛdeɛ ko biala azo nvasoɛ kpalɛ ɛ? Saa ɛlɛsiezie ɛ nwo wɔamaa ɛzukoalɛdeɛ biala a, bɔ mɔdenle yɛ ninyɛne ɛhye mɔ:
A. Kenga ɛzukoalɛdeɛ ne ɛdendɛkpunli ne mɔ mɔɔ limoa la.
B. Nea na kenga tɛkese ne mɔ, na bɔ mɔdenle kɛ ɛbanwu kɛzi bɛfale edwɛkɛ ne anwo la.
D. Pɛ edwɛkɛ titili anzɛɛ edwɛkɛ mɔɔ bua kpuya ko biala la abo; ɛhye baboa wɔ yeamaa ɛ nee wɔ kilehilevolɛ ne azuzu ɛzukoalɛdeɛ ne anwo.
Asoo ɛze?
Gyihova Alasevolɛ ɛva Baebolo ngakyile dɔɔnwo ɛli gyima. Noko, yɛ nye die Ngɛlɛlera Nwuanzanwuanza—Ewiade Fofolɛ Ngilebɛbo ne anwo kpalɛ ɔluakɛ bɛhile ɔ bo pɛpɛɛpɛ, nuhua la ɛkɛ yɛɛ ɔfa Nyamenle duma ne ɔdi gyima.—Nea edwɛkɛ “Asoo Gyihova Alasevolɛ Lɛ Bɛ Baebolo?” mɔɔ wɔ jw.org azo la.
BIE MƆ KA KƐ: “Baebolo ne ɛzukoalɛ yɛ se. Menlɛ alagye yɛɛ ɔyɛ me ɛvɛlɛ.”
Kɛzi ɛnwu ye ɛ?
EDWƐKƐ TITILI
Amaa wɔanyia Baebolo ne azo nvasoɛ kpalɛ la, nyia mekɛ fa kenga, yɛ asɔne amaa wɔade mɔɔ ɛbagenga la abo, na siezie ɛ nwo maa Baebolo ɛzukoalɛ ne.
Ndinu
Duzu a bamaa wɔanyia Baebolo ne azo nvasoɛ kpalɛ a?
Mekɛ ne boni a ɛbanyia mekɛ wɔagenga Baebolo ne na wɔazukoa a?
Duzu ati a ɔle kpalɛ kɛ ɛsiezie ɛ nwo ɛmaa wɔ Baebolo ɛzukoalɛ ne a?
KPONDƐ DƆƆNWO
Nea nzuzulɛ bie mɔ mɔɔ bamaa wɔanyia wɔ Baebolo ɛgengalɛ ne azo nvasoɛ kpalɛ la.
“Kɛzi Ɛbanyia Baebolo Ɛgengalɛ Zo Nvasoɛ La” (Ɛzinzalɛ Arane No. 1 2017)
Nea ndenle nsa mɔɔ bɛdua zo bɛkenga Baebolo ne la.
“Kɛzi Baebolo Ne Bahola Aboa Me Ɛ?—Foa 1: Neɛnlea Wɔ Baebolo Ne Anu” (Edwɛkɛ mɔɔ wɔ jw.org azo)
Sukoa kɛzi ɛ nye balie Baebolo ɛgengalɛ nwo la.
Tie menli mɔɔ ɛgenga Baebolo ne ɛvolɛ dɔɔnwo la nzuzulɛ.