Yɛ Ɛbɛlabɔlɛ Nee Yɛ Ɛzonlenlɛ Nyianu Buluku Ne Anwo Neɛnleanu
MARCH 1-7
NYAMENLE EDWƐKƐ NE AZO NVASOƐ | NƆMBƐSE 7-8
“Mɔɔ Yɛsukoa Yɛfi Yizilayɛma Azokoɛleɛ Ne Anu La”
it-1 497 ¶3
Asafo
Ɛnee Yizilayɛma lɛ mgbanyima mɔɔ gyi maanle ne amuala agyakɛ anu mɔɔ bɛyɛ ninyɛne a. (Ɛze 10:14.) Ɛhye ati, mɔɔ bɛhyehyɛle ɛdanlɛsua ne bɛwiele la, “mbusua mgbanyima” ne mɔ vale bɛ afɔlebɔlɛ ne mɔ rale. (Nɔ 7:1-11) Bieko, wɔ Nihɛmaya mekɛ zo, ɛsɔfo ne mɔ, Livaema ne yɛɛ “menli ne mgbanyima” ne vale bɛ sa wulale ‘ngyekyeleɛ mɔɔ bɛyɛle na bɛhɛlɛle’ la abo. (Ni 9:38–10:27) Wɔ Yizilayɛma fienemgbole adendulɛ ne anu, “mgbanyima 250 mɔɔ bɛkpa bɛ wɔ menli ne anu na bɛle menli titili” la bokale Kɔla, Deetan, Abaelam yɛɛ Ɔɔn anwo na bɛboɔboale bɛ nloa bɛdwazole bɛtiale Mosisi nee Aalɔn. (Nɔ 16:1-3) Mosisi yɛle kɛ mɔɔ Gyihova hanle la, na ɔkpale Yizilayɛ mgbanyima 70 mɔɔ bɛle menli titili wɔ menli ne anu la amaa bɛaboa ye bɛamaa yeazoa ‘menli ne adesoa ne’ mɔɔ ɔ ngomekye ɔngola ye soa la. (Nɔ 11:16, 17, 24, 25) Lɛvitikɔso tile 4 ngyɛnu 15 ka “bɛ mgbanyima,” ne mɔ anwo edwɛkɛ. Ɔzɔho kɛ mgbanyima ɛhye mɔ mɔɔ gyi menli ne agyakɛ anu la ɛnee le maanle ne mgbanyima, bɛ mbusua mgbanyinli, bɛ ndɛnebuavolɛma yɛɛ bɛ menli titili.—Nɔ 1:4, 16; Dwh 23:2; 24:1.
it-2 796 ¶1
Wulubɛn
Wɔ Yizilayɛma azokoɛleɛ ne, ɛnee Wulubɛn, Semɛyɔn nee Gaade abozoamra ne wɔ ɛdanlɛsua ne nyiakɛ afoa nu. Saa bɛlɛtu bɛ bo a, mbusua ekpunli nsa ɛhye mɔɔ Wulubɛn a la bɛ nloa la di Dwuda, Yesakaa nee Zɛbulɛn mbusua ekpunli nsa ne anzi. (Nɔ 2:10-16; 10:14-20) Adenle ko ne ala azo a bɛluale bɛvale bɛ afɔlebɔdeɛ ne bɛrale wɔ mekɛ mɔɔ bɛyila ɛdanlɛsua ne azo la a.—Nɔ 7:1, 2, 10-47.
w04 8/1 25 ¶1
Nɔmbɛse Buluku Ne Anu Edwɛkɛ Titili
8:25, 26. Amaa Livaema ahola ayɛ bɛ gyima ne kpalɛ la, bɛzele mrenyia mɔɔ bɛ nye ɛvi la kɛ bɛgyakyi bɛ gyima ne. Noko akee, ɛnee bɛbahola bɛavi bɛ ɛhulolɛ nu bɛaboa Livaema mɔɔ ɛha la. Ɛnɛ, ɛvolɛ titili biala ɛnle ɛkɛ mɔɔ ɔwɔ kɛ awie gyakyi Belemgbunlililɛ edwɛkɛhanlɛ gyima ne a, noko ɛzukoalɛdeɛ titili bie wɔ ngyinlazo ɛhye anu. Saa Kilisienenli bie ɛngola ɛnli ye ɛzonlelilɛ bie mɔ anwo gyima ɔluakɛ ye ɛvolɛ ɛhɔ ɔ nyunlu la ati a, ɔbahola yeayɛ ɛzonlenlɛ gyima ne foa ngakyile mɔɔ ye anwosesebɛ bamaa ye adenle la.
Kpondɛ Baebolo Nu Ndelebɛbo
it-1 835
Belamunli Ralɛ, Mɔɔ Kɛlimoa
Kɛmɔ ɛnee Yizilayɛ belamunli mralɛ mrenyia a bayɛ mbusua ekpunli ngakyile ne mɔ mgbanyima la ati, ɛnee bɛgyi ɛkɛ ne bɛmaa maanle ne amuala. Nɔhalɛ nu, Gyihova hanle maanle ne amuala anwo edwɛkɛ kɛ ɔle ye “belamunli ralɛ” ɔlua Ebileham ngyekyeleɛ ne ati. (Ɛzɛ 4:22) Kɛmɔ ɛnee Gyihova ɛlie bɛ ngoane la ati, ɔlile mɛla kɛ ‘bɛde kakula nrenyia anzɛɛ nane nyinli biala mɔɔ bɛkɛlimoa bɛkɛwo ye la anwo bɛmaa ye.’ (Ɛzɛ 13:2) Ɛhye ati, ɛnee Yizilayɛ belamunli mralɛ mrenyia kɔsɔɔti le Gyihova ɛdeɛ.
MARCH 8-14
NYAMENLE EDWƐKƐ NE AZO NVASOƐ | NƆMBƐSE 9-10
“Kɛzi Gyihova Di Ye Menli Nyunlu La”
it-1 398 ¶3
Azokoɛleɛ Ne
Menli ɛwolaa ɛhye mɔɔ bɛhyehyɛle bɛ pɛpɛɛpɛ bɛmaanle bɛdule bɛ bo bɛvile bɛ azokoɛleɛ ne bɛhɔle ɛleka ngakyile la ɛnee le nwanwane debie. (Mosisi hanle ɛleka ngakyile kɛyɛ 40 mɔɔ bɛyɛle bɛ azokoɛleɛ la anwo edwɛkɛ wɔ Nɔmbɛse 33) Saa amungu ne wɔ ɛdanlɛsua ne azo a, bɛndu bɛ bo. Noko saa amungu ne kpogya ɔ nwo zo a, ɛnee bɛdu bɛ bo. “Saa Gyihova ka kɛ bɛdɛnla ɛkɛ a, ɛnee bɛdɛnla ɛkɛ, yɛɛ Gyihova ka kɛ bɛhɔ a, ɛnee bɛlɛkɔ.” (Nɔ 9:15-23) Bɛluale aweɛne ndendenle nwiɔ mɔɔ bɛvale dwɛtɛ fufule bɛyɛle la azo a bɛhanle Gyihova nrɛlaleɛ ne bɛhilele azokoɛleɛ ne anu amra a. (Nɔ 10:2, 5, 6) Ɛnee saa bɛbɔ aweɛne ne bɛmaa ɔ ne kɔ anwuma ba aze a, ɔkile kɛ ɔwɔ kɛ bɛtu bɛ bo. “Wɔ ɛvolɛ nwiɔ ne anu, [mɔɔ ɔle 1512 K.Y.M.], siane mɔɔ tɔ zo nwiɔ la kenle 20 ne azo” a bɛlimoale bɛbɔle aweɛne ɛhye a. Saa bɛlɛtu bɛ bo a, ngyekyeleɛ ɛlɛka ne a dimoa a, akee Dwuda, Yesakaa yɛɛ Zɛbulɛn mbusua ekpunli nsa ɛlɔne ne mɔɔ Dwudama a la bɛ nloa la toa ye. Akee Gɛhyɔnoma nee Mɛlɛlaema mɔɔ zo ɛdanlɛsua ne anwo ninyɛne bie mɔ la noko toa bɛ. Yemɔ anzi Wulubɛn, Semɛyɔn nee Gaade mbusua ekpunli nsa ne mɔɔ Wulubɛnema a la bɛ nloa la noko di bɛ nzi. Akee Kohatema mɔɔ soa ɛleka nwuanzanwuanza ne ninyɛne ne mɔ la toa zo. Yemɔ anzi Yifelaem, Manasɛ yɛɛ Bɛngyaman mbusua ekpunli nsa ɛlɔne mɔɔ tɔ zo nsa la noko di bɛ nzi. Dan, Ahya nee Nafetalae mbusua ekpunli nsa ne mɔɔ Dan abusua ne la bɛ nloa la a li awieleɛ a. Ɛhye ati, mbusua ekpunli nwiɔ mɔɔ ɛnee bɛ nwo zonle na bɛ nwo yɛ se kpalɛ la a lile bɛ nyunlu nee bɛ nzi a.—Nɔ 10:11-28.
w11 4/15 4-5
Asoo Ɛnwu Daselɛ Mɔɔ Kile Kɛ Nyamenle Ɛlɛkile Yɛ Adenle Ɔ?
Kɛzi yɛbahile kɛ yɛ nye sɔ Nyamenle adehilelɛ ɛ? Ɛzoanvolɛ Pɔɔlo hanle kɛ: “Bɛdie menli mɔɔ li bɛ nyunlu la na bɛbɛlɛ bɛ nwo aze bɛmaa bɛ.” (Hi 13:17) Tɛ dahuu a ɛhye ɛyɛlɛ la aze a. Kɛ neazo la: Fa ye kɛ ɛnee ɛboka Yizilayɛma anwo wɔ Mosisi mekɛ zo. Wɔdia adenle tendenle, akee ɛkanwu ye la amungu pila ne ɛgyinla. Ɛbiza ɛ nwo kɛ, ɔbali kenle nyɛ? Kenle ko? Dapɛne? Anzɛɛ siane dɔɔnwo? Ɛdwenle nwo kɛ, ‘Asoo mendu me ninyɛne kɔsɔɔti mengua ye aze ɔ?’ Bie a, ɛbalimoa wɔaye ninyɛne ekyi mɔɔ ɛbahyia nwo la wɔagua ye aze. Noko, mekɛ ɛlɛkɔ la, ɛbayeye ninyɛne dɔɔnwo wɔaboka nwo. Akee ɛ nye kara ɛ nwo zo la, ɛnee wɔdu wɔ ninyɛne ne amuala wɔgua ye aze yɛɛ amungu pila ne eza maanle ɔ nwo zo a—ɔti ɛnee ɔwɔ kɛ ɛhyehyɛ wɔ ninyɛne ne bieko! Ɛhye ɛyɛlɛ ɛnla aze fee. Noko akee, ɛnee ɔwɔ kɛ Yizilayɛma ne “tu bɛ bo ndɛndɛ.”—Nɔm. 9:17-22.
Saa yɛ sa ka adehilelɛ mɔɔ vi Gyihova ɛkɛ a, subane boni a yɛda ye ali a? Asoo yɛfa yɛyɛ gyima “ndɛndɛ”? Anzɛɛ yɛyɛ yɛ ninyɛne kɛ mɔɔ yɛyɛ ye dɛba ne ala la ɔ? Asoo yɛfa adehilelɛ ngakyile mɔɔ ɔfale Baebolo ɛzukoalɛ mɔɔ yɛyɛ, menli mɔɔ ka aneɛ gyɛne mɔɔ yɛdi bɛ daselɛ, abusua ɛzonlenlɛ mɔɔ yɛbayɛ ye dahuu, Asopiti Ngitanwolilɛ Kɔmatii mɔɔ yɛ nee bɛ bayɛ ko, yɛɛ subane mɔɔ ɔwɔ kɛ yɛda ye ali wɔ nyianu bo la anwo la yɛyɛ gyima ɔ? Saa yɛdie folɛdulɛ yɛto nuhua a, ɔkile kɛ yɛ nye sɔ Nyamenle adehilelɛ. Saa ɔwɔ kɛ yɛsi kpɔkɛ bie mɔɔ anwo hyia la a, yɛnva yɛ nwo yɛndo yɛ nrɛlɛbɛ zo, emomu yɛkpondɛ adehilelɛ yɛfi Gyihova nee ye ahyehyɛdeɛ ne ɛkɛ. Kɛ mɔɔ kakula kpondɛ banebɔlɛ fi ye awovolɛ ɛkɛ wɔ ahumudulɛ mekɛ nu la, zɔhane ala a ɔwɔ kɛ yɛkpondɛ anwobanebɔlɛ yɛfi Gyihova ahyehyɛdeɛ ne ɛkɛ wɔ mekɛ mɔɔ ewiade ɛhye ngyegyelɛ ngakyile mɔɔ le kɛ ahumu la ɛlɛbu yɛ kɔme la a.
Kpondɛ Baebolo Nu Ndelebɛbo
it-1 199 ¶3
Nyianu
Nyianu Zo Nvasoɛ. Akpabɛnwo ɛvoyia ne maa yɛnwu kɛ nvasoɛ wɔ zo kɛ yɛbava Gyihova nziezielɛ kɔsɔɔti mɔɔ yeyɛ kɛ ɔmaa yɛayia nu la yɛali gyima kpalɛ. Ɛnee ɔwɔ kɛ bɛye nrenyia biala mɔɔ anwo te anzɛɛ yeandu adenle yeangɔ moa na ɔkɛbu ɔ nye ɔkɛgua zo kɛ ɔbaziezie Akpabɛnwo afɔlebɔdeɛ ne la bɛfi ye menli ne avinli. (Nɔ 9:9-14) Mekɛ mɔɔ Belemgbunli Hɛzikaya fɛlɛ Dwudama nee Yizilayɛma kɛ bɛrali Akpabɛnwo ɛvoyia ne wɔ Gyɛlusalɛm la, ɔzele bɛ kɛ: ‘Yizilayɛma, bɛzia bɛrɛla Gyihova ɛkɛ, bɛmmakpunli bɛ ahonle kɛ bɛ nenyia mɔ la. Bɛbɛlɛ bɛ nwo aze bɛmaa Gyihova na bɛrɛla ye ɛzonlenlɛsua ne mɔɔ yede nwolɛ dahuu la anu na bɛzonle Gyihova bɛ Nyamenle ne, amaa ye ɛya wuluwulu ne avi bɛ nwo zo. Ɔluakɛ Gyihova bɛ Nyamenle ne akunlu yelɛyela ye yɛɛ ɔse anwunvɔne, na saa bɛsia bɛba ye ɛkɛ a ɔnrɛye ɔ nye ɔnrɛdo ahane.’ (2Ek 30:6-9) Saa awie anye fuu na yeangɔ a, ɔkile kɛ yɛkpo Nyamenle. Ɔwɔ nuhua kɛ Kilisienema ɛnli Akpabɛnwo ɛvoyia ne ɛnɛ, noko mɔɔ Pɔɔlo tu Nyamenle menli ne folɛ wɔ ayia ɛhɔlɛ nwo la, ɔzele bɛ kɛ: “Bɛmaa yɛzuzu yɛ nwo ngoko amaa yɛamaa yɛ nwo anwosesebɛ yɛahɔ ɛlɔlɛ nee gyima kpalɛ ɛyɛlɛ nu, bɛmmamaa yɛgyakyi kɛ yɛkɛhɔ yɛ nyianu ne mɔ, kɛ mɔɔ yeyɛ bie mɔ subane la, emomu bɛmaa yɛmaa yɛ nwo anwosesebɛ, titili wɔ mekɛ mɔɔ bɛkɛnwu kɛ kenle ne ɛlɛbikye la.”—Hi 10:24, 25.
MARCH 15-21
NYAMENLE EDWƐKƐ NE AZO NVASOƐ | NƆMBƐSE 11-12
“Duzu Ati A Ɔnle Kɛ Yɛtendɛ Yɛ Nzo Abo A?”
w01 6/15 17 ¶20
Mmamaa Ɛ Rɛle Fi Debie
Kilisienema dɔɔnwo ɛnva bɛ nwo ɛnwula nla nu ɛbɛlatane nu. Noko ɔwɔ kɛ yɛnea boɛ na yɛanyɛ menli mɔɔ yɛtendɛ yɛ nzo abo, debie mɔɔ bamaa Gyihova ava yɛ nwo ɛya la. Pɔɔlo dule yɛ folɛ kɛ: “Bɛmmamaa yɛsɔ Gyihova yɛnea kɛ mɔɔ bɛ bie mɔ zɔle ye nleanle na nwɔlɛ kekale bɛ hunle bɛ la. Eza bɛmmatendɛ bɛ nzo abo, kɛ mɔɔ bɛ bie mɔ dendɛle bɛ nzo abo na sɛkyevolɛ ne bɔle bɛ bo zo la.” (1 Kɔlentema 10:9, 10) Yizilayɛma dendɛle bɛ nzo abo tiale Mosisi nee Aalɔn nee Nyamenle mumua ne bɔbɔ wɔ mana ne mɔɔ ɔluale nwanwane adenle zo ɔvale ɔmaanle bɛ la anwo. (Nɔmbɛse 16:41; 21:5) Asoo bɛ adendɛbɛnzoabo ne angyegye Gyihova kɛ bɛ adwɔmane ɛbɛla ne ɔ? Baebolo ne maa yɛnwu kɛ nwɔlɛ hunle menli mɔɔ dendɛle bɛ nzo abo la anu dɔɔnwo. (Nɔmbɛse 21:6) Kolaa na ɛhye azi la, ɛnee bɛlimoa bɛzɛkye menli mɔɔ bo 14,700 mɔɔ bɛdendɛle bɛ nzo abo la. (Nɔmbɛse 16:49) Ɛhye maa yɛnwu kɛ ɔwɔ kɛ yɛkile ɛbulɛ yɛmaa Gyihova nziezielɛ amaa yɛanzɔ ye abotane ne yɛannea.
w06 7/15 15 ¶7
‘Bɛmmatendɛ Bɛ Nzo Abo’
Nea kɛzi Yizilayɛma subane ɛhakyi bɔkɔɔ a! Mɔɔ bɛyele bɛ bɛvile Yigyibiti na bɛliele bɛ bɛvile Nyevile Kɔkɔlɛ ne anu la, bɛhilele mɔɔ Gyihova yɛle maanle bɛ la anwo anyezɔlɛ na bɛdole ayɛlɛyelɛ edwɛne bɛmaanle ye. (Ɛzɛdɔso 15:1-21) Noko akee, ninyɛne angɔ ye kɛ mɔɔ bɛkpondɛ la wɔ fienemgbole ne anu yɛɛ Keenama anwo ɛzulolɛ dɔle bɛ nwo zo, ɔti anyezɔlɛ mɔɔ Nyamenle menli ne lɛ ye la minlinle na ɛnee bɛ kunlu ɛndwo bɛ nwo bieko. Kɛ anrɛɛ bɛbala Nyamenle ase wɔ fanwodi mɔɔ bɛnyia ye anwo la, bɛbɔle ye somolɛ kɛ ɔdaye a yemaa bɛ nwo ɛhyele bɛ a. Ɔlua bɛ adendɛbɛnzoabo ne ati, bɛangile ninyɛne mɔɔ Gyihova ɛyɛ ɛmaa bɛ la anwo anyezɔlɛ. Ɔnyɛ nwanwane kɛ Gyihova hanle kɛ: “Mekɛ tendenle nyɛ a amumuyɛma ɛhye mɔ bahɔ zo adendɛ bɛ nzo abo atia me a?”—Nɔmbɛse 14:27; 21:5.
it-2 719 ¶4
Butule
Adendɛbɛnzoabo. Adendɛbɛnzoabo maa bɛ sa nu to na ɔmmaa anwosesebɛ. Mɔɔ Yizilayɛma vile Yigyibiti la, yeangyɛ biala bɛnyianle kɛzi Gyihova ɛlɛdua Mosisi ne Aalɔn anwo zo ali bɛ nyunlu la anwo nvonleɛ na bɛdendɛle bɛ nzo abo bɛtiale ye. (Ɛzɛ 16:2, 7) Nzinlii bɛ adendɛbɛnzoabo ne maanle Mosisi asa anu dole na ɔhanle kɛ ɔkulo kɛ ɔwu. (Nɔ 11:13-15) Adendɛbɛnzoabo kola ku bɛ. Gyihova bule Mosisi mɔɔ bɛdendɛle bɛtiale ye la kɛ bɛlɛte adenle mɔɔ Ɔdaye ɔdua zo ɔdi bɛ nyunlu la anwo atua. (Nɔ 14:26-30) Kɛmɔ bɛ nuhua dɔɔnwo kpondɛle nvonleɛ la ati, bɛminlinle bɛ ngoane.
Kpondɛ Baebolo Nu Ndelebɛbo
it-2 309
Mana
Kɛzi Ɛnee Ɔde La. Ɛnee mana ne le kɛ ma fufule ekyi bie, yɛɛ ɔzɔho bedɛleɔn (bedɛleɔn le nzule mɔɔ vi baka nu finde la). Ɛnee ye fɛlɛko le kɛ keeki mɔɔ bɛva wolɛ bɛdo anzɛɛ keeki menlemenle mɔɔ bɛva nwole bɛyɛ la. Saa bɛti ye wɔ ɛdibolɛ zo anzɛɛ bɛsi ye duba nu bɛwie a, bɛkola bɛto anzɛɛ bɛfa bɛyɛ keeki nee paano.—Ɛzɛ 16:23, 31; Nɔ 11:7, 8.
MARCH 22-28
NYAMENLE EDWƐKƐ NE AZO NVASOƐ | NƆMBƐSE 13-14
“Diedi Maa Yɛnyia Akɛnrasesebɛ”
w06 10/1 16-17 ¶5-6
Diedi Nee Nyamenle Anwo Ɛzulolɛ Maa Yɛnyia Akɛnrasesebɛ
Ɛnee Dwɔhyua nee Keelɛbe mɔɔ bɛboka busiama ne anwo la ɛziezie bɛ nwo kɛ bɛbahɔ Ɛwɔkɛ Azɛlɛ ne azo. Bɛhanle kɛ, ‘Yɛbali Keenama anwo zo konim. Bɛnlɛ banebɔlɛ, yɛɛ Gyihova nee yɛ lua. Bɛmmasulo bɛ.’ (Nɔmbɛse 14:9) Asoo ɛnee Dwɔhyua nee Keelɛbe diedi ne ɛngyi kpɔkɛ zo ɔ? Ɔnle zɔ fee! Bɛ nee maanle ne amuala nwunle kɛzi Gyihova luale Ngyegyelɛ Bulu ne azo bɔle Yigyibitima nee bɛ nyamenle ne mɔ anyiemgba la. Eza bɛnwunle kɛzi Gyihova zɛkyele Falo nee ye ɛlɔnema ne wɔ Nyevile Kɔkɔlɛ ne anu la. (Edwɛne 136:15) Ɔda ali bɔkɔɔ kɛ, ɛzulolɛ mɔɔ hanle busiama bulu ne nee menli mɔɔ bɛ edwɛkɛ ne nyianle bɛ nwo zo tumi la ɛngyi kpɔkɛ zo. Gyihova lile bɛ nwo nyane kpole kpalɛ na ɔhanle kɛ: “Mekɛ tendenle nyɛ a sɛkɛlɛneɛ ɛhye mɔ mɔɔ meyɛ wɔ bɛ avinli bɔbɔ la anzi bɛnrɛnyia diedi wɔ me nu a?”—Nɔmbɛse 14:11.
Gyihova maanle bɛ ngyegyelɛ ne lale ali wienyi—bɛ foanvoanle subane ne maanle ɔlale ali kɛ ɛnee bɛnlɛ ye nu diedi. Ɛhɛe, diedi nee akɛnrasesebɛ a lua a, ɔlua ɛhye ati, mekɛ mɔɔ ɛzoanvolɛ Dwɔn kɛlɛ Kilisiene asafo ne sunsum nu boɛyɛlɛ nwo edwɛkɛ la, ɔhanle kɛ: “Mɔɔ ɛli ewiade ne anwo zo konim la a le yɛ diedi.” (1 Dwɔn 5:4) Ɛnɛ, menli mɔɔ bo mgbe nsia la ɛlɛda Dwɔhyua nee Keelɛbe diedi ne bie ali, ɔlua zo mgbanyinli nee ngakula, bɛdabɛ mɔɔ bɛlɛ anwosesebɛ nee mɔɔ bɛnlɛ anwosesebɛ la kɔsɔɔti ɛlɛbɔ Belemgbunlililɛ edwɛkpa ne nolo wɔ ewiade amuala. Kpɔvolɛ biala ɛtɛkolale ɛtɛsile edwɛkpa ɛhye mɔɔ yɛlɛfa akɛnrasesebɛ yɛabɔ ye nolo la adenle.—Wulomuma 8:31.
Kpondɛ Baebolo Nu Ndelebɛbo
it-1 740
Azɛlɛ Ne Mɔɔ Nyamenle Vale Maanle Yizilayɛma La
NƆHALƐ nu, azɛlɛ ne mɔɔ Nyamenle vale maanle Yizilayɛma la ɛnee le azɛlɛ kpalɛ. Mɔɔ Mosisi zoanle busiama ne kɛ bɛli maanle ne anyunlu na bɛhɔnlea kɛzi Ɛwɔkɛ Azɛlɛ ne de na bɛva nuhua aleɛ ne bie bɛrɛla la, bɛvale feege ma, pɔmegelanate, yɛɛ vanye ma siakɛ bɛrale. Kɛmɔ ɛnee vanye ma siakɛ ne le kpole la ati mrenyia ne mɔ anu nwiɔ vale dole baka zo zoale. Ɔwɔ nuhua kɛ diedi mɔɔ ɛnee bɛnlɛ la maanle ɛzulolɛ hanle bɛ, noko bɛbɔle amaneɛ kɛ: ‘Nɔhalɛ nu, meleke nee wolɛ se azɛlɛ ne azo.’—Nɔ 13:23, 27.
MARCH 29–APRIL 4
Kpondɛ Baebolo Nu Ndelebɛbo
w98 9/1 20 ¶1-2
Fa Ninyɛne Mɔɔ Anwo Hyia La Dimoa!
Gyihova bule edwɛkɛ ne kɛ anyebolo wɔ nu. Baebolo ne ka kɛ: “Na Gyihova zele Mosisi kɛ: ‘Ɔwɔ kɛ bɛku nrenyia ne.’” (Nɔmbɛse 15:35) Kɛmɔti a Gyihova vale nrenyia ne edwɛkɛ ne anyebolo zo a?
Ɛnee menli ne lɛ kenle nsia mɔɔ ɛnee bɛkola bɛfa bɛsesa ɛyɛne na bɛfa bɛdi bɛ ngyianlɛ gyɛne le kɛ, aleɛ, adɛladeɛ nee dabelɛ nwo gyima a. Ɛnee ɔwɔ kɛ bɛfa kenle nsuu ne bɛyɛ sunsum nu ninyɛne. Ɛnee ɔnle ɛtane kɛ awie basesa ɛyɛne, noko ɛnee ɔle ɛtane kɛ bɛbava mekɛ mɔɔ bɛva bɛzie ɛkɛ ne kɛ bɛfa bɛazonle Gyihova la bɛayɛ zɔ. Kilisienema ɛnle Mosisi Mɛla ne abo ɛdeɛ, noko ɛhye kilehile yɛ kɛ ɔwɔ kɛ yɛfa ninyɛne mɔɔ anwo hyia la yɛdimoa yɛ ɛbɛlabɔlɛ nu.—Felepaema 1:10.
APRIL 5-11
Kpondɛ Baebolo Nu Ndelebɛbo
g02 6/8 14 ¶2
Ngyenle—Debie Mɔɔ Sonle Bolɛ
Ngyenle rayɛle debie mɔɔ wɔ ɛkɛ ne dahuu la anwo sɛkɛlɛneɛ. Ɛhye ati wɔ Baebolo ne anu, bɛvɛlɛle ngyekyeleɛ mɔɔ wɔ ɛkɛ ne dahuu la kɛ “ngyenle ngyekyeleɛ.” (Nɔmbɛse 18:19) Fane dɔɔnwo ne ala, menli mɔɔ anwo wɔ ngyekyeleɛ ne anu la bɔ nu di aleɛ mɔɔ ngyenle boka nwo la bɛfa bɛsɔ ngyekyeleɛ ne anloa. Wɔ Mosisi Mɛla ne abo, ɛnee bɛfa ngyenle bɛboka afɔlebɔlɛ mɔɔ ɛnee bɛbɔ ye wɔ afɔlemokyea ne azo la anwo, ɔluakɛ ngyenle gyi ɛkɛ ne maa debie mɔɔ ɔmkpɔlɔ anzɛɛ ɔnzɛkye la.
APRIL 12-18
NYAMENLE EDWƐKƐ NE AZO NVASOƐ | NƆMBƐSE 20-21
“Yɛ Bɛlɛvo Wɔ Mekɛ Mɔɔ Bɛlɛpiepia Wɔ Anzɛɛ Bɛlɛtinlitinli Ɛ Nwo Zo Kɛ Ɛyɛ Debie La”
w09 9/1 19 ¶5
Ndɛnebuavolɛ Mɔɔ Ɔmbu Ɔ Nye Ɔngua Ninyɛne Mɔɔ Tenrɛ Azo La
Mɔɔ limoa, Nyamenle anga angile Mosisi kɛ ɔdendɛ ɔhile menli ne yɛɛ yeanze ye kɛ ɔbua menli ne ndɛne kɛ bɛle atuadelɛma. Mɔɔ tɔ zo nwiɔ, Mosisi nee Aalɔn anwula Nyamenle anyunlunyia. Nyamenle zele bɛ kɛ, “bɛanyɛ me nwuanzanwuanza.” (Ngyɛnu 12) Mɔɔ Mosisi hanle kɛ, “Yɛmaa nzule ɛvi bodane ɛhye anu ɛrɛla” la, ɛnee ɔle kɛ asɛɛ ɔ nee Aalɔn a bɛdua nwanwane adenle zo bamaa bɛ nzule a, na tɛ Nyamenle ɔ. Mɔɔ tɔ zo nsa, Kɛ mɔɔ Nyamenle ammaa awolɛndoazo bie mɔɔ bɛdele atua la angɔ Keena la, zɔhane a ɛnee ɔde ye wɔ Mosisi nee Aalɔn afoa nu a. Ɛnee bɛ ndɛnebualɛ ne le kɛ bɛ ɛdeɛ ne la. (Nɔmbɛse 14:22, 23) Mɔɔ tɔ zo nna, ɛnee Mosisi nee Aalɔn a li Yizilayɛma anyunlu a. Menli mɔɔ lɛ ɛzonlelilɛ dɔɔnwo la Nyamenle babiza dɔɔnwo avi bɛ ɛkɛ.—Luku 12:48.
APRIL 19-25
NYAMENLE EDWƐKƐ NE AZO NVASOƐ | NƆMBƐSE 22-24
“Gyihova Maanle Amowa Hakyile Nyilalɛ”
bt 53 ¶5
Ka “Gyisɛse Anwo Edwɛkpa Ne”
Kɛ mɔɔ ɛnee ɔde ye wɔ ɛvoya mɔɔ limoa anu la, ɛnɛ Nyamenle menli ne mɔɔ bɛlɛyɛ bɛ kpɔdekpɔde la ɛtɛmaanle bɛtɛgyakyile edwɛkɛ ne ɛhanlɛ. Kilisienema mɔɔ bɛgua bɛ efiade, anzɛɛ bɛtinlitinli bɛ nwo zo bɛmaa bɛkɔ maanle fofolɛ zo la, boa maa bɛka Belemgbunlililɛ edwɛkpa ne bɛkile menli mɔɔ bɛbayia bɛ wɔ ɛleka fofolɛ ne mɔɔ bɛhɔ la. Kɛ neazo la, wɔ Ewiade Konle II la anu, Gyihova Alasevolɛ lile daselɛ kpole wɔ Nazi efiade. Dwuunli bie mɔɔ yiale Alasevolɛ wɔ efiade la hanle kɛ: “Gyihova Alasevolɛ mɔɔ bɛguale bɛ efiade la akɛnrasesebɛ ne maanle menliele menlile kɛ bɛ diedi ne gyi Ngɛlɛlera ne azo, ɔti medame noko membanyɛle Dasevolɛ.”
it-2 291
Ɛlanebɔlɛ
Ɔle Ngoaseasɛm Kɛ Ɛbadwazo Wɔatia Gyihova. Amaa ngapezonli Beelam alie ezukoa avi Mowabema Belemgbunli Beelake ɛkɛ la, ɔliele ɔdole nu kɛ ɔbaha ngapezo edwɛkɛ yeatia Yizilayɛma ne mɔ mɔɔ yeandwenle nwolɛ a, noko Gyihova ammaa ye adenle. Ɛzoanvolɛ Pita hanle Beelam anwo edwɛkɛ kɛ, “Nane mɔɔ ɛndendɛ bɔbɔ la vale sonla ɛnelɛ zile ngapezonli ne ɛlanebɔlɛ ne adenle.” Mɔɔ ɔfale Beelam nyɛleɛ ne anwo la, ɛzoanvolɛ ne vale Giliki edwɛkɛkpɔkɛ pa·ra·phro·niʹa, mɔɔ kile “awie mɔɔ ɔngola ɔngome ɔ nwo zo fee” la lile gyima.—2Pi 2:15, 16; Nɔ 22:26-31.
Kpondɛ Baebolo Nu Ndelebɛbo
w04 8/1 27 ¶2
Nɔmbɛse Buluku Ne Anu Edwɛkɛ Titili
22:20-22—Duzu ati a Gyihova vale Beelam anwo ɛya ɛ? Gyihova zele Beelam kɛ ɔmmakɔwa Yizilayɛma ne amonle. (Nɔmbɛse 22:12) Noko akee, ngapezonli ne nee Beelake menli ne hɔle mɔɔ ɛnee ye bodane a le kɛ ɔkawa Yizilayɛma ne amonle a. Ɛnee Beelam kulo kɛ ɔsɔ Mowabe belemgbunli ne anye amaa yeanyia ye ɛkɛ ne ahatualɛ. (2 Pita 2:15, 16; Dwuudu 11) Mekɛ bɔbɔ mɔɔ bɛzele Beelam kɛ ɔyila Yizilayɛma la, ɛnee ɔkulo kɛ ɔsɔ belemgbunli ne anye, ɔti ɔmaanle ye adwenle kɛ ɔmaa mraalɛ mɔɔ sonle Beeyale la ɛbɛlɛbɛla Yizilayɛ mrenyia ne mɔ. (Nɔmbɛse 31:15, 16) Yemɔti Nyamenle vale ngapezonli Beelam anwo ɛya ɔluakɛ ɛnee ɔle anyebolo kpole kpalɛ.
APRIL 26–MAY 2
Kpondɛ Baebolo Nu Ndelebɛbo
it-1 359 ¶1-2
Ɛweɛne
Ɔda ali kɛ bɛgyinlanle ninyɛne nwiɔ ɛhye azo a bɛhyɛle azɛlɛ ne bɛmaanle mbusua ekpunli ne mɔ a: ma ɛgualɛ yɛɛ kɛzi abusua bie kpole de la. Ɔbayɛ kɛ ma ɛgualɛ ne maanle bɛnwunle ɛleka fɔɔnwo mɔɔ abusua bie bahola anyia bɛ agyapadeɛ la. Ma ɛgualɛ ne boale maanle bɛnwunle abusua mɔɔ badɛnla sɔlɔ anzɛɛ nyiakɛ, aduduleɛ anzɛɛ adɔleɛ, nyevile ne anloa anzɛɛ awoka ne mɔ azo la. Ɛnee ma ɛgualɛ ne anwo kpɔkɛzilɛ biala vi Gyihova ɛkɛ, ɔti yeammaa nungulehwenlɛ anzɛɛ butule biala andɔ mbusua ne mɔ avinli. (Mrɛ 16:33) Nyamenle luale adenle ɛhye azo nleanle maanle debie biala hɔle zo kɛnlɛma wɔ abusua biala anu kɛ mɔɔ tete selɛ Gyekɔbo hanle nwolɛ ngapezo wɔ ye ewule ɛkpa zo mɔɔ bɛla ye ali wɔ Gyɛnɛsese 49:1-33 la.
Saa bɛdua ma ɛgualɛ zo bɛnwu ɛleka fɔɔnwo mɔɔ abusua bie badɛnla la bɛwie a, akee bɛnea kɛzi abusua bie kpole de la amaa bɛanwu azɛlɛ dodo mɔɔ ɔwɔ kɛ bɛfa bɛmaa bɛ la. “Ɔwɔ kɛ bɛgua azɛlɛ ne anwo ma na bɛkyɛ ye kɛ agyapadeɛ wɔ bɛ mbusua ne mɔ anu. Ɔwɔ kɛ bɛmaa ekpunli mɔɔ bɛ nwo zonle la agyapadeɛ kpole na bɛte ekpunli mɔɔ bɛ nwo anzo la agyapadeɛ ne azo. Awie biala banyia ye agyapadeɛ wɔ ɛleka mɔɔ bɛgua ma ne a ɔbahile la.” (Nɔ 33:54) Kpɔkɛ mɔɔ bɛkɛzi kɛ abusua bie badɛnla ɛleka fɔɔnwo bie la ɛngakyi, noko bɛkola bɛyɛ nzenzaleɛ wɔ abusua bie agyapadeɛ nu na bɛte ye kpole ne azo. Mekɛ mɔɔ bɛnwunle kɛ Dwuda abusua ne azɛlɛ ne le kpole bo bɛ nwo zo la, bɛvale bie bɛmaanle Semɛyɔn abusua ne.—Dwh 19:9.