• “Yinɔko Zɔle Nyamenle Anye”
    Ɛzinzalɛ Arane (Maanlema Ɛdeɛ)—2017 | No. 1

    • YINƆKO “HANLE BƐ NWO EDWƐKƐ”

      Bie a Yinɔko dele nganeɛ kɛ ɔ ngomekye a ɔle sonla mɔɔ ɔlɛ diedi wɔ ewiade mɔɔ awie biala ɛnlɛ diedi la anu a. Noko, asoo Gyihova, ye Nyamenle ne nwunle ye ɔ? Ɛhɛe. Mekɛ bie rale mɔɔ Gyihova nee ye sonvolɛ nɔhavo ne dendɛle a. Nyamenle maanle Yinɔko nrɛlaleɛ bie kɛ ɔha ɔhile ye mekɛ zo amra. Ɔti, ɔyɛle Yinɔko ngapezonli, mɔɔ limoa mɔɔ ye edwɛkɛ ne wɔ Baebolo ne anu la. Yɛze edwɛkɛ ɛhye ɔluakɛ sunsum ne hanle Dwuudu, mɔɔ ɔ diema a le Gyisɛse la maanle ɔhɛlɛle Yinɔko ngapezo edwɛkɛ ne wɔ ɛvoya dɔɔnwo anzi.a

      Yinɔko ngapezo ne a le boni? Kɛ ɔkɔ ye la ɛne: “Awulae nee ye soanvolɛma nwuanzanwuanza apenle apenle bara arabua awie biala ndɛne, na yeadea bɛdabɛ mɔɔ bɛnze Nyamenle la wɔ bɛ ninyɛndane mɔɔ bɛyɛ ye atisesebɛ nu nee amumuyɛ edwɛkɛ mɔɔ menli ɛhye mɔ mɔɔ ɛnze Nyamenle la ɛha ɛtia ye la anwo.” (Dwuudu 14, 15) Ɛnee Yinɔko lɛ diedi kpole kɛ zɔhane edwɛkɛ ne mɔ bara nu bɔkɔɔ. Wɔ ye afoa nu, ɔle kɛ asɛɛ Nyamenle ɛmaa ngapezo ɛhye ɛlimoa ɛra nu. Adenle ɛhye azo a ngapezo ngakyile ne mɔ luale zo a. Adwenle ne a le kɛ: Saa ngapezoma ne ɛlɛka debie mɔɔ bɛze kɛ ɔbara nu la anwo edwɛkɛ a, bɛka ye kɛ asɛɛ deɛ ne ɛlimoa ɛra nu la!​—Ayezaya 46:10.

      Yinɔko hanle edwɛkɛ ne hilele menli mɔɔ ɛnze Nyamenle la

      Yinɔko vale akɛnrasesebɛ hanle Nyamenle nrɛlaleɛ ne hilele ewiade mɔɔ kulo basabasayɛlɛ la

      Adenle boni azo a Yinɔko luale zo hanle nrɛlaleɛ zɔhane hilele awie biala ɛ? Nea kɛzi ɛnee kɔkɔbɔlɛ ne anloa yɛ se la​—wɔ aneɛ mɔɔ bɛlimoale bɛvale bɛhɛlɛle la anu, ɔvale edwɛkɛkpɔkɛ “bɛnze Nyamenle” ɔlile gyima fane nna ɔdendɛle ɔtiale menli ne, bɛ nyɛleɛ nee adenle mɔɔ bɛdua zo bɛyɛ bɛ ninyɛne la. Ngapezo zɔhane bɔle alesama kɔsɔɔti kɔkɔ kɛ ewiade zɔhane mɔɔ bɛkyekyele ɔvi mekɛ mɔɔ bɛvoanle Adam nee Yive bɛvile Yidɛn tola ne anu la ɛkpɔlɔ bɔkɔɔ. Ewiade zɔhane bara ye awieleɛ wɔ mekɛ mɔɔ Gyihova nee ye “soanvolɛma nwuanzanwuanza”​—anwumabɔvolɛma mgbe dɔɔnwo mɔɔ bɛlɛ tumi mɔɔ bɛle ɛlɔnema barazɛkye ye la. Yinɔko angomekye vale akɛnrasesebɛ hanle Nyamenle kɔkɔbɔlɛ ne! Bie a kɛzi Yinɔko lɛ akɛnrasesebɛ la zinle ye anlɔnra Leemɛke anwo. Saa ɔle zɔ a, ɛnee yɛbade deɛmɔti ɔle zɔ la abo.

      Yinɔko diedi ne bahola aha yɛ yeamaa yɛabiza yɛ nwo saa yɛnwu ewiade ne kɛ mɔɔ Gyihova nwu ye la a. Ndɛnebualɛ ne mɔɔ Yinɔko vale akɛnrasesebɛ bɔle ye nolo la tɛbɔ ɛkɛ; ɔfale ɛnɛ ewiade ne anwo, kɛ mɔɔ ɛnee ɔde wɔ Yinɔko mekɛ zo la. Ɔlua Yinɔko kɔkɔbɔlɛ ne azo, Gyihova vale Azuyilɛ kpole ne zɛkyele ewiade bie mɔɔ ɛnee bɛnze Nyamenle la wɔ Nowa mekɛ zo. Zɔhane ɛzɛkyelɛ ne le ɛzɛkyelɛ kpole ne mɔɔ bara la anwo neazo. (Mateyu 24:38, 39; 2 Pita 2:4-6) Ɛnɛ, Nyamenle nee ye soanvolɛma nwuanzanwuanza ne ɛziezie bɛ nwo kɛ bɛfa ndɛnebualɛ fɔɔnwo bɛara ewiade mɔɔ ɛnze Nyamenle la anwo zo. Ɔwɔ kɛ yɛ nuhua ko biala maa Yinɔko kɔkɔbɔlɛ ne tɛnla ye adwenle nu na ɔka ɔkile awie mɔ. Bie a yɛ abusua ne nee yɛ gɔnwo mɔ nee yɛ ɛnrɛyɛ adwenle. Ɔyɛ a yɛte nganeɛ kɛ yeha yɛ ngome. Gyihova angyakyi Yinɔko; yɛɛ ɔnrɛgyakyi ye sonvolɛma nɔhavoma ɛnɛ noko!

  • “Yinɔko Zɔle Nyamenle Anye”
    Ɛzinzalɛ Arane (Maanlema Ɛdeɛ)—2017 | No. 1

    • a Baebolo nwomama bie mɔ ka kɛ Dwuudu vale edwɛkɛ ne vile apoklifa gyima bie mɔɔ bɛfɛlɛ ye Yinɔko Buluku la anu, noko buluku zɔhane le nwɔra edwɛkɛ mɔɔ bɛnze ɛleka mɔɔ ɔ bo vi a, na bɛha ye adalɛ nu kɛ Yinɔko anwo edwɛkɛ ɔ. Ɔka Yinɔko ngapezo ne anwo edwɛkɛ pɛpɛɛpɛ, noko bie a bɛnyianle ye wɔ tete debie bie anu mɔɔ yɛnlɛ ye ɛnɛ la​—bie a ɔle edwɛkɛ mɔɔ bɛhɛlɛ anzɛɛ bɛhanle a. Bie a Dwuudu vale tete debie ɛhye lile gyima anzɛɛ bie a ɔzukoale Yinɔko anwo debie ɔvile Gyisɛse mɔɔ nwunle Yinɔko ɛbɛlabɔlɛ wɔ anwuma la ɛkɛ.