Ndɛnebualɛ Kenle​—Yemɔ A Le Duzu?

KƐZI ɛbu Ndɛnebualɛ Kenle ne ɛ? Menli dɔɔnwo suzu kɛ bɛbava menli mgbe mgbe bɛara Nyamenle belemgbunli ebia ne anyunlu ngoko ngoko na bɛabua bɛ nuhua ko biala ndɛne wɔ ɛkɛ. Bɛbamaa bie mɔ anyia anwuma asetɛnla mɔɔ yɛ anyelielɛ, na bɛabua bie mɔ fɔlɛ bɛamaa bɛanwu amaneɛ dahuu. Noko akee, Baebolo ne ka mekɛ ɛhye anwo edwɛkɛ ngakyile. Nyamenle Edwɛkɛ ne ɛnga kɛ ɔle mekɛ mɔɔ yɛ ɛzulolɛ, na emomu ɔkile kɛ ɔle anyelazo ne ɛlielɛ mekɛ.

Yɛkenga mɔɔ ɛzoanvolɛ Dwɔn hanle ye wɔ Ndɛnebualɛ Kenle ne anwo la wɔ Yekile 20:11, 12 kɛ: ‘Menwunle Belemgbunli ne nee ye belemgbunli ebia fufule ne mɔɔ ɔde zolɛ la. Anwuma nee azɛlɛ minlinle ɔ nyunlu ɛkɛ ne na bɛannwu bɛ bieko. Na menwunle mɔwuamra, mgbole nee ngyikyi kɔsɔɔti, kɛ bɛgyigyi belemgbunli ebia kpole ne anyunlu, na bɛbukebuke mbuluku nu wɔ ɛkɛ. Eza bɛbukele teasema buluku ne noko anu, na bɛluale mɔɔ bɛhɛlɛ bɛ wɔ mbuluku ne anu la azo bɛbuale mɔwuamra ndɛne wɔ bɛ nyɛleɛ nwo.’ Ndɛnebuavolɛ boni a bɛha ɔ nwo edwɛkɛ wɔ ɛke a?

Gyihova Nyamenle a le Ndɛnebuavolɛ kpole ne a. Noko akee, yeva ndɛnebualɛ gyima ne yewula awie asa nu. Kɛmɔ Gyima ne 17:31 kile la, ɛzoanvolɛ Pɔɔlo hanle kɛ Nyamenle ɛhile “kenle mɔɔ ɔbalua sonla ne mɔɔ yedu ye yezie ɛkɛ ne la anwo zo yeabua aleɛabo amra kɔsɔɔti ndɛne a.” Ndɛnebuavolɛ ɛhye mɔɔ bɛdu ye bɛzie ɛkɛ ne la a le Gyisɛse Kelaese mɔɔ bɛdwazo ye bɛvi ewule nu la. (Dwɔn 5:22) Noko, mekɛ boni a Ndɛnebualɛ Kenle ne babɔ ɔ bo a? Ɔbayɛ mekɛ tendenle nyɛ?

Yekile buluku ne kile kɛ Ndɛnebualɛ Kenle ne babɔ ɔ bo wɔ Amagɛdɔn konle ne anzi, mekɛ mɔɔ bɛbazɛkye Seetan ewiade ne la.a (Yekile 16:14, 16; 19:19–20:3) Wɔ Amagɛdɔn anzi bɛbado Seetan nee ye sunsum evinli ne mɔ efiade wɔ kuma ne mɔɔ ɛnlɛ ɔ bo la anu ɛvolɛ apenle ko. Wɔ zɔhane mekɛ ne anu, menli 144,000 ne bayɛ ndɛnebuavolɛma na bɛ nee ‘Kelaese ali belemgbunli ɛvolɛ apenle.’ (Yekile 14:1-3; 20:1-4; Wulomuma 8:17) Ndɛnebualɛ Kenle ne ɛnle dɔnehwele 24 mekɛ mɔɔ bapɛ nu ndɛndɛ a. Ɔbayɛ ɛvolɛ apenle ko.

Wɔ ɛvolɛ apenle mekɛ ne anu, Gyisɛse Kelaese “babua anyewɔzoamra nee mɔwuamra ndɛne.” (2 Temɔte 4:1) “Anyewɔzoamra” ne bayɛ menli “pemgbenleamgbe” anzɛɛ ekpunli kpole ne mɔɔ bapɛ Amagɛdɔn la. (Yekile 7:9-17) Ɛzoanvolɛ Dwɔn eza nwunle ‘mɔwuamra kɛ bɛgyigyi belemgbunli ndɛnebualɛ ebia ne anyunlu.’ Kɛmɔ Gyisɛse bɔle ɛwɔkɛ la, ‘mɔwuamra amuala bade Kelaese ane wɔ bɛ nla ne mɔ anu, na bɛvi bɛ nla ne mɔ anu bɛbavinde’ ɔlua ewudwazo zo. (Dwɔn 5:28, 29; Gyima ne 24:15) Noko duzu a bɛbagyinla zo bɛabua bɛ kɔsɔɔti ndɛne a?

Kɛmɔ ɛzoanvolɛ Dwɔn ɛnyelɛzodeɛnwunlɛ ne kile la, ‘bɛbukebukele mbuluku nu’ na ‘bɛluale mɔɔ bɛhɛlɛ wɔ mbuluku ne anu la azo bɛbuale mɔwuamra ndɛne wɔ bɛ nyɛleɛ nwo.’ Asoo ninyɛne mɔɔ menli yɛle ye dɛba la a wɔ mbuluku ɛhye mɔ anu a? Kyɛkyɛ, ndɛnebualɛ ne ɛnrɛgyinla ninyɛne mɔɔ menli yɛle kolaa na bɛawu la azo. Kɛzi yɛkola yɛka ye zɔ ɛ? Baebolo ne ka kɛ: “Sonla wu a, ɛnee ɔnle ɛtane tumi bo bieko [“ɛnee bɛbua ye benle wɔ ye ɛtane nwo,” NW].” (Wulomuma 6:7) Ɛhye ati, saa yɛbaha a, menli mɔɔ bɛbadwazo bɛ la bɛara ngoane nu mɔɔ bɛva bɛ ɛtane bɛhyɛ bɛ a. Yemɔti mbuluku ne mɔ bagyinla ɛkɛ ne amaa ninyɛne fofolɛ mɔɔ Nyamenle kulo kɛ yɛyɛ la. Saa menli mɔɔ bapɛ Amagɛdɔn nee bɛdabɛ mɔɔ bɛbadwazo bɛ la bɛadɛnla aze dahuu a, ɔwɔ kɛ bɛdi Nyamenle mɛla nee debie fofolɛ biala mɔɔ Gyihova kulo kɛ bɛyɛ mɔɔ ɔbala ye ali wɔ ɛvolɛ apenle ne anu la azo. Ɛhye ati, bɛbagyinla mɔɔ menli bayɛ ye wɔ Ndɛnebualɛ Kenle ne anu la azo a bɛabua bɛ ndɛne a.

Wɔ Ndɛnebualɛ Kenle ne anu menli mgbe mgbe dɔɔnwo banyia adenle mɔɔ lumua la azukoa Nyamenle anwo debie na bɛava bɛabɔ bɛ ɛbɛla. Ɛhye kile kɛ bɛbayɛ ngilehilelɛ gyima dɔɔnwo. Nɔhalɛ nu, ‘ewiade amra bazukoa pɛlepɛlelilɛ anzɛɛ tenleneyɛlɛ.’ (Ayezaya 26:9) Noko akee, tɛ menli ne amuala a bahulo kɛ bɛkɛyɛ Nyamenle ɛhulolɛdeɛ a. Ayezaya 26:10 ka kɛ: “Saa ɛnwu amumuyɛnli anwunvɔne a, ɔnzukoa pɛlepɛlelilɛ; ɔyɛ amumuyɛ wɔ pɛlepɛlema maanle nu, ɔnnwu kɛ [Gyihova, NW] si de bedevinli la.” Bɛbazɛkye ɛtanevolɛma ɛhye mɔ bɔkɔɔ wɔ Ndɛnebualɛ Kenle ne anu.​—Ayezaya 65:20.

Ndɛnebualɛ Kenle ne kara awieleɛ la, ɛnee alesama mɔɔ wɔ ɛkɛ ne la ‘ɛzia ɛra ngoane’ nu bieko kɛ menli mɔɔ di munli la. (Yekile 20:5) Ɛhye ati, Ndɛnebualɛ Kenle ne bamaa alesama azia ara bɛ mɔlebɛbo mekɛ mɔɔ ɛnee bɛdi munli la anu. (1 Kɔlentema 15:24-28) Akee sɔnea mɔɔ ɔli awieleɛ la bara. Bɛbaye Seetan bɛavi efiade ne na bɛamaa ye adenle bɛamaa yeazɔ alesama yeanlea mekɛ mɔɔ ɔli awieleɛ la. (Yekile 20:3, 7-10) Menli mɔɔ baho atia ye la bɛanyia Baebolo nu ɛwɔkɛ ɛhye: “Tenlenema bava azɛlɛ ne ayɛ bɛ ɛdeɛ, na bɛadɛnla zolɛ dahuu.” (Edwɛndolɛ 37:29)Ɛhɛe, Ndɛnebualɛ Kenle ne bayɛ nyilalɛ amaa alesama mɔɔ di nɔhalɛ la kɔsɔɔti!