• Ɔvale Ɛya Ɔhunle Ɔ Diema
    Sukoa Debie Fi Baebolo Ne Anu
    • Mɔɔ Ebɛle bɔle afɔle maanle Gyihova la, Keen vale ɛya

      ƐZUKOALƐDEƐ 4

      Ɔvale Ɛya Ɔhunle Ɔ Diema

      Mɔɔ Adam nee Yive vile Yidɛn tola ne anu la, bɛwole ngakula dɔɔnwo. Bɛ ra kpanyinli Keen yɛle ɛbɔ nu gyima yɛɛ Ebɛle mɔɔ tɔ zo nwiɔ la nleanle mboane.

      Kenle ko bie Keen nee Ebɛle bɔle afɔle maanle Gyihova. Ɛze mɔɔ afɔlebɔlɛ kile la ɔ? Ɔle ahyɛlɛdeɛ titili bie. Gyihova anye liele Ebɛle afɔlebɔlɛ ne anwo, noko ɔ nye anlie Keen ɛdeɛ ne anwo. Ɛhye maanle Keen vale ɛya kpole. Gyihova bɔle Keen kɔkɔ kɛ ye ɛya ne bahola amaa yeayɛ ɛtane. Noko yeandie.

      Akee Keen hanle hilele Ebɛle kɛ: “Maa yɛhɔ ɛbɔ nu.” Mɔɔ bɛhɔle la, Keen holole ɔ diema Ebɛle anwo zo na ɔhunle ye. Duzu a Gyihova yɛle a? Ɔhwenle Keen anzo ɔmaanle ɔvile ye abusua ne anwo ɔhɔle moamoa. Keen ɛnrɛzia ɛnrɛra bieko.

      Keen ɛlɛkɔ Ebɛle anwo ɛkɛ wɔ ɛya ne anu

      Duzu a yɛsukoa yɛfi nu a? Saa ninyɛne angɔ ye kɛ mɔɔ yɛkpondɛ la a, bie a yɛbava ɛya. Saa yɛnwu kɛ yɛta yɛfa ɛya anzɛɛ saa awie mɔ nwu kɛ yɛva ɛya na bɛtwe yɛ adwenle bɛkɔ zo a, ɔwɔ kɛ yɛyɛ nzenzaleɛ ndɛndɛ yɛkomo yɛ nwo zo amaa yɛanyɛ ɛtane.

      Kɛmɔ Ebɛle hulole Gyihova na ɔyɛle mɔɔ le kpalɛ la ati, Gyihova bahakye ye dahuu. Saa Nyamenle yɛ azɛlɛ ne paladaese a, ɔbadwazo Ebɛle.

      “Dimoa ɛ nee ɛ diema ne ɛziezie bɛ avinli na ɛsia ɛba a, akee wɔabɔ wɔ afɔle ne.”​—Mateyu 5:24

  • Nowa Ɛlɛne Ne
    Sukoa Debie Fi Baebolo Ne Anu
    • Nowa nee ye abusua ne ɛlɛbobɔ ɛlɛne ne

      ƐZUKOALƐDEƐ 5

      Nowa Ɛlɛne Ne

      Mekɛ ɛlɛkɔ la, menli nwo zonle dɔɔnwo wɔ azɛlɛ ye azo. Ɛnee bɛ nuhua dɔɔnwo le amumuyɛma. Anwumabɔvolɛ bie mɔ bɔbɔ yɛle ɛtane. Bɛvi anwuma bɛrale azɛlɛ ye azo. Ɛze deɛmɔti bɛyɛle zɔ la ɔ? Bɛhakyile bɛ nwo menli amaa bɛahola bɛagya mraalɛ.

      Anwumabɔvolɛ ne mɔ nee mraalɛ wole ngakula mrenyia. Ɛnee ngakula ne mɔ anwo yɛ se yɛɛ bɛ ti yɛ se. Bɛyɛle awie mɔ amumuyɛ. Ɛnee Gyihova ɛngulo mɔɔ bɛlɛyɛ la. Yemɔti ɔyɛle kɛ ɔfa azuyilɛ yeazɛkye ɛtanevolɛma.

      Nowa nee ye abusua ne ɛlɛbobɔ ɛlɛne ne na bɛaboɔboa aleɛ nloa

      Noko ɛnee nrenyia bie wɔ ɛkɛ mɔɔ ɔle sonlakpalɛ a. Ɛnee ɔkulo Gyihova. Bɛfɛlɛ ye Nowa. Ɔ nee ɔ ye wole ngakula mrenyia nsa, Hyɛm, Ham nee Gyeefɛte, na ɛnee biala lɛ ɔ ye. Gyihova zele Nowa kɛ ɔbobɔ ɛlɛne kpole amaa ɔ nee ye abusua ne anyia ngoane wɔ Azuyilɛ ne anu. Eza Gyihova hanle hilele Nowa kɛ ɔva nane ne mɔ bie ɔhɔ ɛlɛne ne anu amaa bɛanwu.

      Ɛkɛ ne ala Nowa bɔle ɔ bo kɛ ɔbobɔ ɛlɛne ne. Ɔ nee ye abusua ne vale ɛvolɛ kɛyɛ 50 a bobɔle ɛlɛne ne a. Bɛbobɔle ɛlɛne ne kɛ mɔɔ Gyihova se bɛyɛ ye la pɛpɛɛpɛ. Eza Nowa hanle Azuyilɛ ne anwo edwɛkɛ hilele menli ne. Noko bɛandie ye.

      Akee mekɛ dwule kɛ bɛkɔ ɛlɛne ne anu. Maa yɛnlea edwɛkɛ bieko mɔɔ zile la.

      “Kɛ mɔɔ ɛnee ɔde wɔ Nowa mekɛ zo la, zɔhane ala a sonla Ra ne ɛralɛ ne bayɛ a.”​—Mateyu 24:37