MOALƐ MAA ABUSUA | AGYALƐ
Kɛ Ɔkɛyɛ Na Bɛammaa Ɛlɛtɔlɔneke Ninyɛne Angyegye Bɛ La
Kɛzi ɛfa ɛlɛtɔlɔneke ninyɛne ɛdi gyima la bahola aboa wɔ agyalɛ ne anzɛɛ azɛkye ye. Kɛzi ɔlɛka wɔ agyalɛ ne ɛ?
Mɔɔ ɔwɔ kɛ ɛnwu ye
Saa bɛfa ɛlɛtɔlɔneke ninyɛne bɛdi gyima kpalɛ a, ɔbahola yeaboa bɛ agyalɛ ne. Kɛ neazo la, agyalɛma bie mɔ dua zo di adwelie wɔ mekɛ mɔɔ bɛ mu nwiɔ bɛnle sua nu la.
“Saa ɛkɛlɛ edwɛkɛ sikalɛ le kɛ, ‘Mekulo wɔ,’ anzɛɛ ‘Melɛdwenle ɛ nwo’ ɛnwa ye a, ɔbahola yeaboa bɛ agyalɛ ne kpalɛ.”—Jonathan.
Saa bɛanva ɛlɛtɔlɔneke ninyɛne bɛanli gyima kpalɛ a, ɔbahola yeazɛkye bɛ agyalɛ ne. Kɛ neazo la, dahuu menli bie mɔ anye gyi bɛ fonu anzɛɛ bɛ tabelɛte ne azo, na yemɔ ɛmmaa bɛnnyia mekɛ bɛmmaa bɛ ye anzɛɛ bɛ hu.
“Medie medi kɛ, fane dɔɔnwo ne ala, anrɛɛ me hu kulo kɛ ɔ nee me tendɛ, noko kɛmɔ me adwenle wɔ me fonu ne azo la ati, ɔmmaa ɔngola ɔ nee me ɛndendɛ.”—Julissa.
Menli bie mɔ ka kɛ, saa bɛlɛfa bɛ ɛlɛtɔlɔneke ninyɛne bɛali gyima a, bɛkola bɛ nee bɛ ye anzɛɛ bɛ hu di adwelie kɛnlɛma wɔ mekɛ ko ne ala. Awulaba Sherry Turkle hanle kɛ, “menli ka edwɛkɛ ɛhye fa bɛlɛbɛla bɛ nwo ala.” Menli suzu kɛ, saa ɛkola ɛyɛ ninyɛne dɔɔnwo wɔ mekɛ ko ne ala a, ɔle subane kpalɛ, noko ɔnle nɔhalɛ. Sherry hanle kɛ, “saa yɛbɔ mɔdenle kɛ yɛyɛ ninyɛne dɔɔnwo wɔ mekɛ ko ne ala anu a, akee bɔbɔ ɔmmaa yɛnyɛ bɛ kpalɛ.”a
“Saa me nee me hu ɛlɛbɔ adawu a, me nye die, noko saa ɔlɛyɛ ninyɛne ngakyile a, ɔnyɛ boɛ. Saa me nee ye ɛlɛtendɛ na ɔlɛyɛ debie gyɛne a, ɔmaa mete nganeɛ kɛ ɔnnwu kɛ mewɔ ɛkɛ ne bɔbɔ.”—Sarah.
Yɛ ye nzonlɛ kɛ: Kɛzi ɛfa ɛlɛtɔlɔneke ninyɛne ɛdi gyima la bahola aboa wɔ agyalɛ ne anzɛɛ azɛkye ye.
Mɔɔ ɛbahola wɔayɛ
Nwu ninyɛne mɔɔ hyia kpalɛ la. Baebolo ne ka kɛ: Bɛnwu “ninyɛne mɔɔ hyia kpalɛ la.” (Felepaema 1:10) Biza ɛ nwo kɛ, ‘Asoo mekɛ mɔɔ me nee me ye anzɛɛ me hu nyia maa yɛ ɛlɛtɔlɔneke ninyɛne ne mɔ la ɛmmaa yɛnnyia mekɛ yɛmmaa yɛ nwo ɔ?’
“Ɛbanwu kɛ nrenyia bie nee raalɛ bie ɛlɛdi aleɛ, noko ɛnee bɛ mu nwiɔ bɛ nye gyi bɛ fonu ne azo—ɔyɛ alɔbɔlɛ kpalɛ. Yɛngulo kɛ yɛyɛ ngɛkɛlɛ yɛmaa yɛ ɛlɛtɔlɔneke ninyɛne na yɛ rɛle fi debie mɔɔ hyia kpalɛ la—abusuabɔlɛ mɔɔ wɔ yɛ avinli la.”—Matthew.
Nwu mekɛ mɔɔ ɛbava wɔali gyima. Baebolo ne ka kɛ: “Bɛnlea boɛ kpalɛ na kɛzi bɛbɔ bɛ ɛbɛla la anyɛ kɛ menli mɔɔ ɛnze nrɛlɛbɛ emomu kɛ nrɛlɛbɛvolɛma, na bɛva bɛ mekɛ bɛli gyima kpalɛ.” (Ɛfɛsɛsema 5:15, 16) Biza ɛ nwo kɛ, ‘Kɛ anrɛɛ medwazo ala a mebagenga edwɛkɛ biala mɔɔ awie mɔ bɛahɛlɛ anwa me la, asoo mebahola meanyia mekɛ fɔɔnwo bie mɔɔ mebava meali ɛhye mɔ anwo gyima ɔ?’
“Menwu kɛ, saa mefa me fonu ne meto ɛleka mɔɔ ɔsu a ɔnyɛ dede na nzinlii meagenga edwɛkɛ mɔɔ awie mɔ ɛhɛlɛ ɛnwa me la a, ɔboa kpalɛ. Fane dɔɔnwo ne ala, menli mɔɔ kɛlɛ edwɛkɛ nwa me anzɛɛ fɛlɛ me la edwɛkɛ ne ɛnle debie mɔɔ ɔwɔ kɛ medi nwolɛ gyima ndɛndɛ a.”—Jonathan.
Saa ɔbayɛ boɛ a, mmafa wɔ gyima ne bie ɛkɔ sua nu. Baebolo ne ka kɛ: “Debie biala lɛ ye mekɛ.” (Nolobɔvo 3:1) Biza ɛ nwo kpuya ɛhye mɔ: ‘Asoo meyɛ me gyima ne bie wɔ me fonu ne azo wɔ sua nu mɔɔ ɔmmaa mennyia mekɛ memmaa me abusua ne ɔ? Saa zɔhane a meyɛ ye a, ɛnee kɛzi ɛhye ɛlɛka me agyalɛ ne ɛ? Boni a me ye anzɛɛ me hu bɛaha wɔ kpuya ɛhye mɔ anwo a?’
“Ɛlɛtɔlɔneke ninyɛne bamaa wɔahola wɔayɛ gyima mekɛ biala. Ɛnee ɔwɔ kɛ mebɔ mɔdenle kpalɛ na meanda meanva me sa meanga me fonu ne anzɛɛ meanyɛ ninyɛne mɔɔ fale me gyima ne anwo wɔ mekɛ mɔɔ me nee me ye ɛlɛdi adwelie la.”—Matthew.
Bɛzuzu kɛzi bɛbava ɛlɛtɔlɔneke ninyɛne bɛali gyima la anwo. Baebolo ne ka kɛ: “Awie biala mmakpondɛ ɔ ngome ye boɛyɛlɛ, ɔkpondɛ awie mɔ noko ɛdeɛ.” (1 Kɔlentema 10:24) Bɛha kɛzi bɛ nuhua ko biala fa ɛlɛtɔlɔneke ninyɛne di gyima la anwo edwɛkɛ, na saa ɔhyia kɛ bɛyɛ nzenzaleɛ bie a, bɛyɛ. Bɛbahola bɛava ninyɛne mɔɔ bɛbahola bɛazuzu nwo mɔɔ wɔ edwɛkɛ ɛhye anu la bɛabɔ ɔ bo.
“Me nee me hu di nɔhalɛ maa yɛ nwo, na saa yɛ nuhua biala nwu kɛ ɔ gɔnwo ɛlɛsɛkye mekɛ wɔ ye fonu anzɛɛ ye tabelɛte ne anwo a, ɔka ɔkile ye. Yɛ mu nwiɔ yɛze kɛ ɛhye bahola ava ngyegyelɛ ara, ɔti saa yɛ nuhua ko ka nwolɛ edwɛkɛ a, yɛdwenle nwo kpalɛ.”—Danielle.
Yɛ ye nzonlɛ kɛ: Ɔwɔ kɛ ɛmaa ɛlɛtɔlɔneke ninyɛne yɛ kɛ wɔ sonvolɛ, ɔnle kɛ ɔyɛ ɛ menle.
a Ɔvi Reclaiming Conversation—The Power of Talk in a Digital Age buluku ne anu.