Lo Maak Bee Ɛm
16 Nyɔɔwo, sɔ̄ Dee Fɛɛrɛloo etɛ̄na, Meri Magdelin le Meri ka Jems le Salomi bee yaɛ pya nu a wee sī lele nuloo lokwa ba lu wee yereloo ekpaloo Jizɔs. 2 E taɛ bagara lɔɔrɛ nyɔɔ tua biradee bu kaɛ, sɔ̄ zue emɔā, ba bee lu ina kpaɛ̄ kpoli* a. 3 Ba aa bee kɔ nɛ ɛnia aba kɔ: “Mɛɛ na ekigere dɛm lɛɛ nu lo kpoli i nɛ a?” 4 Mɛ sɔ̄ ba bee ɛp, ba muɛ kɔ lo dɛm elua ekigere lɛɛ kereadoo a bee kuī gbɛnɛ. 5 Sɔ̄ ba yii bu lo kpoli, ba bee muɛ ziī zege gbara a yaa ɛɛ bɛloo a le e’ɛŋɛtɛ̄ bara bahle, e a bee wa lu nyɛŋia loo gbɛnɛ. 6 A bee wa kɔ nɛ kɔ: “Bɔɔ aa i aa. M suā kɔ bui gaa gbī Jizɔs nɛɛ Nazarɛt a bee lu eka loo te a. Elua edana ye lɛɛ kɛ̄. A naa lena akɛāma. Ɛp! Kɛ̄ a bee lu emaɛ̄ ye na ama. 7 Mɛ siaa sa kɔ nɛ pya a wee ye nyɔɔnɛ dumɛ le Pita kɔ, ‘A gaa i dasī kii Galilii. Bui muɛ ye bie lo kɛ̄ dookɛ̄ a bee i kɔ nɛ doo.’” 8 Nyɔɔwo, sɔ̄ ba bee aabu sira ee, ba bee teera aa kpaɛ̄ kpoli a bu bɔɔ sa a bee wa lu nyɛŋia loo kaāna. E ba naa bee kɔ lɔgɔ nu nɛ lɔgɔ nɛɛ nyɔɔbee bɔɔ bee wa aa.*