Lo Jɔn Bee Ɛm
2 E nyɔɔ lo eree taa biradee, bee lu edoo doonu ii’ii wa bie Kena a le Galilii, e ka Jizɔs bee le lo kɛ̄. 2 Bee lunage ekue Jizɔs gbaāloo pya a wee ye nyɔɔnɛ dumɛ loo lo doonu ii’ii wa.
3 Mɛ sɔ̄ mii bee wa tah bah, ka Jizɔs bee ye kɔ nɛ kɔ: “Ba naa ɛrɛna mii.”* 4 Mɛ Jizɔs bee ye kɔ nɛ kɔ: “Nɛɛwa, ena a kuu olo le mda a?* Na awa sii ina.” 5 Ye ka kɔ nɛ pya aa bee sitam lo kɛ̄ kɔ: “Dooraa ɛrɛgebah nu a i kɔ nɛ.” 6 A bee ɛrɛ ini’ī gbɛnɛ ka kāna maā alu esu dɛm kwaā a bee le lo kɛ̄ lo ba wee su loŋa loo wa ɛɛrɛ dookɛ̄ doonu pya Juu le doo, ziī ziī aba dap lu baɛ tup le nia ale taa tup le ini’ī lita.* 7 Jizɔs bee wa kɔ nɛ kɔ: “Tɔaā maā mmɛ bu pya lo kāna.” Nyɔɔwo, ba bee tɔ̄ maā mmɛ bee. 8 E a bee wa kɔ nɛ kɔ: “Ibiaa siga ma nɛɛ a le bee doonu ii’ii wa.” Nyɔɔwo, ba bee ibi. 9 Sɔ̄ nɛɛ a le bee doonu ii’ii wa a edaara nu maā a bee lu ekiira nua mii a, kere a naa suā kɛ̄ a aa, (mɛ pya tam a bee ibi maā a suā), nɛɛ a le bee doonu ii’ii wa a bee kue dam wa 10 sa ye kɔ nɛ kɔ: “Dɛ̄dɛɛ̄ nɛɛ wee dasī nɛ ekpe mii, e sɔ̄ ebūmɛ pya nɛɛ, ba su lo a naa kpe nua. O esere ekpe mii mmɛ anyaawo.” 11 Jizɔs bee doo lo ama bie Kena a le Galilii bu bɔātɛ̄ loo ye nyɛŋiatam, e lo ama bee doo kɔ ye ka a sira, e pya a wee ye nyɔɔnɛ dumɛ bee ye ɛrɛ yira bu.
12 Sɔ̄ lo ba ama etɛ̄na, ye ka le ɛɛ gbaāloo pya ye wuga le pya a wee ye nyɔɔnɛ dumɛ bee kii Kapaniɔm, mɛ ba naa bee tɔɔ̄ lo kɛ̄ gbɛnɛ-edo dee.
13 Lo sɔ̄, Doonu Tɛɛ̄yee pya Juu ebee tɔɔ̄ waɛloo kɛ̄, e Jizɔs bee kii Jerusɛlɛm. 14 A bee muɛ pya a gaa oo nam, naana pee gbaāloo bɛmaakuku le pya nyaana kpugi ba le ɛŋɛtɛ̄ kɛ̄ bu tɔkaɛ. 15 Nyɔɔwo, sɔ̄ esua eziī lo loo ziī sah, a bee kpo dɛ̄dɛɛ̄ pya aa bee oo naana pee le nam lɛɛ bu tɔkaɛ, a bee egara kpugi pya nyaana kpugi sa kiirasī wa kasi uukɛ̄. 16 E a bee kɔ nɛ pya a gaa bee oo bɛmaakuku a kɔ: “Suaa pya nu ama lɛɛ akɛāma! Bui aa su tɔ na Tɛ nua tɔ uradu!” 17 Pya a wee ye nyɔɔnɛ dumɛ bee nyɛŋiabu kɔ a bee lu e’ɛm kɔ: “Wereloo* m ɛrɛ loo o tɔ ede mɛ lɛɛ.”
18 Lo sɔ̄ pya Juu kɔ ye nɛ kɔ: “Amunu edobah nu na o i dap tɔgɛ lo etɔgɛ kɔ a bee lu enɛ a ekpo kɔ o doo pya nu ama a?” 19 Jizɔs kɔ wa nɛ kɔ: “Feeraa tɔkaɛ ama tɛrɛ kɛ̄, e m sikɛ̄ wu bu taa biradee.” 20 Lo sɔ̄ pya Juu bee kɔ: “Bee lu esu 46 zua wuā tɔkaɛ ama, e olo o wu ye loo taa biradee ni”? 21 Mɛ tɔkaɛ aa bee kɔ nu akiiloo na ye ekpaloo. 22 Nyɔɔwo sɔ̄ a bee lu elɛɛ Jizɔs kɛ̄ bu luh, pya a wee ye nyɔɔnɛ dumɛ bee nyɛŋiabu kɔ a wee kɔ nu ama, e ba bee yiga nu a le bu kpa kaɛ le nu a bee kɔ.
23 Kerewo, sɔ̄ a bee le Jerusɛlɛm loo doonu Tɛɛ̄yee, gbɛnɛ-edo pya nɛɛ bee ɛrɛ yira bu ye bee sɔ̄ ba muɛ pya nyɛŋiatam a gaa si. 24 Mɛ Jizɔs naa bee wa dɛrɛ nyiɛ nyɔɔ nyɔnɛbee a suā wa loo, 25 e a naa lu ebɛɛ̄ kɔ lɔgɔ nɛɛ a kɔ nu akiiloo nɛɛ ye nɛ nyɔnɛbee a suā nu a le bu beenyiɛ nɛɛ.