Lo Maak Bee Ɛm
11 Sɔ̄ ba lu waɛloo Jerusɛlɛm, ba bee ina nyɔɔ kpokɛ̄ Olive a le Bɛtfaji le Bɛtani, a yere baɛ pya a wee ye nyɔɔnɛ dumɛ. 2 A kɔ wa nɛ kɔ: “Siaa bu Buɛ̄ i aa yira muɛ ayah, e aba sɔ̄ bui yii bui muɛ nwī-enyanya-toora-toh alu esim lo lɔgɔ nɛɛ sii ɛŋɛtɛ̄ nyɔɔ. Yɔbaraa ye sa ye su nua akɛāma. 3 E lo a le ɛrɛgebah nɛɛ kɔ i nɛ kɔ: ‘Ena anua bui aa doo lo ama a?’ kɔaa kɔ, ‘A bɛɛ̄ Nɛɛ-a-i-ɛrɛ, e a e’obara nua sɔ̄ sɔ̄ naa binia.’” 4 Nyɔɔwo ba bee aa sa muɛ nwī-enyanya-toora-toh alu esim nutɔ a le loo dee kɛ̄ ee, e ba bee ye yɔbara. 5 Mɛ pio pya a bee le eyira lo kɛ̄ bee wa kɔ nɛ kɔ: “Ena anua bui aa yɔbara nwī-enyanya-toora-toh ama a?” 6 Ba bee kɔ taɛ nu Jizɔs bee wa kɔ nɛ, e ba lɛɛ wa bahloo kɔ ba a kii.
7 E ba su lo nwī-enyanya-toora-toh ma Jizɔs sa su wa bɛloo deenyɔɔ kpɛɛra nyɔɔ sa a ɛŋɛtɛ̄ nyɔɔ. 8 Gbaāloo wo, gbɛnɛ-edo nɛɛ bee kpɛɛra wa bɛloo deenyɔɔ nyɔɔ kɛ̄dee, mɛ pya dɔɔ̄na bee figi epanya te kpɛɛra kɛ̄. 9 E pya a bee ye zasī le pya a ye lu gɔdumɛ bee kiisī lo ewiikpā kɔ: “Kpɔā na i bara a! Leelee a le nɛ nɛɛ alu bu bee Jɛhova!* 10 Leelee a le nɛ nɛɛ alu wee bɛɛ bu Buɛ̄-mɛnɛ i tɛ Devid! I bara kɔ Nɛɛ a le li bunyɔɔ a kpɔā ye!” 11 E a bee yii Jerusɛlɛm sa yii bu tɔkaɛ, e a bee tɛɛ̄ ɛŋɛnɛ sa ɛp dɛ̄dɛɛ̄ nu, mɛ sɔ̄ ebee lu loo uunɛ a, a bee obia kii Bɛtani gbaāloo Lop Le Baɛ pya ye nɛɛ lɛɛratam.
12 Lo dee a za nyɔɔnɛ, loo ye bee lɛɛ sɔ̄ ba aa obia aa Bɛtani. 13 A bee yira kɛ̄ a binia muɛ te fig epanya le emma nyɔɔ, e a bee kiā si wee ɛp lo emuɛge ziī bee nyɔɔ naa e, mɛ sɔ̄ a inaloo, a naa bee muɛ lɔgɔ bee nyɔɔ mɛ aba epanya nyɔnɛbee a naale sɔ̄ fig wee mum. 14 E a bee kɔ nɛ lo te fig kɔ: “Doolo lɔgɔ nɛɛ aa dena bee a a aa nyɔɔ.” E pya a wee ye nyɔɔnɛ dumɛ bee le aa gbaɛ̄tɔ̄.
15 Ba bee lu ina Jerusɛlɛm. A bee yii bu tɔkaɛ sa bɔātɛ̄ ekpo pya aa bee oo nu sa yaɛ nu lɛɛ bu tɔkaɛ, sa bee kiirasī kasi pya nyaana kpugi uukɛ̄ le kasi pya aa bee oo bɛmaakuku, 16 e a naa bee yiga kɔ lɔgɔ nɛɛ a dana ziī nu tɛ̄ma bu tɔkaɛ. 17 A gaa bee tɔgɛnu sa wa kɔ nɛ kɔ: “Naa bee lu e’ɛm kɔ, ‘Mdaa tɔ elu ekure tɔ yere kara nɛ dɛ̄dɛɛ̄ edonyɔɔ’ ni? Mɛ bui esua ye nua edee pya biu.” 18 E pya tɛsī ewɔp le pya ɛm kpa bee dā sa ba bɔātɛ̄ egbī kɛ̄ ba edoo ye fɛ; mɛ ba bee ye ɛrɛ bɔɔ loo, nyɔnɛbee kɛ̄ a tɔgɛnu doo bee lu nyɛŋia loo gbɛnɛkpo nɛɛ a.
19 E sɔ̄ elua loo uunɛ, ba bee aabu gbɛnɛ buɛ̄ a. 20 Mɛ sɔ̄ ba aa bee tɛɛ̄ lo kɛ̄ bagara lɔɔrɛ, ba bee muɛ lo te fig ekaga mmɛ loo ye li. 21 Pita bee nyɛŋiabu loo sa a kɔ: “Rabai, ɛp! lo te fig o bee kaɛnu nɛ a ekaga.” 22 Jizɔs bee wa ture nɛ kɔ: “Ɛrɛaa yira bu Bari. 23 Kaka m kɔ i nɛ kɔ ɛrɛgebah nɛɛ a kɔ nɛ gbɛnɛ kpokɛ̄ ama kɔ: ‘Aa akɛāma sa dɔ bu gbɛnɛ pɛnɛ,’ sa a naa ɛrɛ baɛbaɛ beenyiɛ mɛ a ɛrɛ yira kɔ nu a kɔ esira, edooa ye nɛ doo wo. 24 Nu anua m kɔ i nɛ lo kɔ dɛ̄dɛɛ̄ nu bui bara bu kara, ɛrɛaa yira kɔ bui e’ɛrɛ wa, e bui ɛrɛ. 25 Ɛrɛgebah sɔ̄ bui yira sa aa yere kara, aaraaloo nu ɛrɛgebah nɛɛ bee i doo pima lokwa bui tɛ a le li bunyɔɔ aanageloo bui tɛɛ̄ ekwɔ i nɛ.” 26* ——
27 Ba bee obia lu Jerusɛlɛm. E sɔ̄ aa bee kiā bu tɔkaɛ, pya tɛsī ewɔp le pya ɛm kpa le pya kanɛɛ bee lu, 28 e ba bee ye kɔ nɛ kɔ: “Amunu ekpo na o su daā pya nu ama a? Ale mɛɛ na a a nɛ ekpo kɔ o doo pya nu ama a?” 29 Jizɔs kɔ wa nɛ kɔ: “M bip i ziī ebip. Tureaa mɛ nɛ, e m kɔ ekpo m su daā pya nu ama i nɛ. 30 Limaā Jɔn bee aa bunyɔɔ sɛh a bee aabah pya nɛɛ? Tureaa mɛ nɛ.” 31 Lo sɔ̄ ba bɔātɛ̄ ekɔnia yɛɛ wa kɔ: “Lo i kɔ ‘a aa bunyɔɔ,’ lo sɔ̄ ekɔ ‘Ena anua buii bee ye yira nɛ a?’ 32 E ii le edap kɔ, ‘A aabah pya nɛɛ.’” Bɔɔ bee wa aa loo gbɛnɛkpo nɛɛ a nyɔnɛbee dɛ̄dɛɛ̄ aba wee yiga kɔ Jɔn bee le nɛɛ mɔmanudɛɛ̄. 33 Nyɔɔwo, ba bee ture nɛ Jizɔs kɔ: “Ii suā.” E Jizɔs kɔ wa nɛ kɔ: “Mda mm le ekɔnage kɛ̄ m aā ekpo m daā pya nu ama i nɛ.”