Lo Luk Bee Ɛm
20 A ɛrɛ dee aa bee tɔgɛnu pya nɛɛ bie bu tɔkaɛ sa zue le yereue, e pya tɛsī ewɔp le pya ɛm kpa gbaāloo pya kanɛɛ bee lu 2 sa ye kɔ nɛ kɔ: “Kɔ i nɛ, tɛ̄maloo amunu ekpo na o doo pya nu ama a? E mɛɛ na a a nɛ ekpo a?” 3 A bee wa ture nɛ kɔ: “Mda m bipnage i ziī ebip sa bui ture mɛ nɛ: 4 Limaā Jɔn bee aa bunyɔɔ sɛh a bee aabah pya nɛɛ?” 5 Lo sɔ̄ ba bɔātɛ̄ ekɔnia yɛɛ wa kɔ: “Lo i kɔ, ‘A aa bunyɔɔ,’ ekɔ ‘Ena anua buii bee ye yiga nɛ a?’ 6 Mɛ lo i kɔ, ‘A aabah pya nɛɛ,’ dɛ̄dɛɛ̄ pya nɛɛ etubo i dɛm nyɔnɛbee ba wee yiga kɔ Jɔn ɛɛ nɛɛ mɔmanudɛɛ̄. 7 Nyɔɔwo, ba bee ture kɔ ba naa suāe kɛ̄ a aa. 8 Jizɔs kɔ wa nɛ kɔ: “Mda mm le ekɔnage kɛ̄ m aā ekpo m daā pya nu ama i nɛ.”
9 Lo sɔ̄ a bɔātɛ̄ su edobah ama kɔā ue nɛ pya nɛɛ kɔ: “Ziī nɛɛ bee foh kere uwe vine sa nɛ pya tam wii kɔ ba a kuūdɛɛ̄loo, lɛɛ a kii dɔɔ̄na buɛ̄ bu nyɔɔnyɔɔ sɔ̄. 10 E sɔ̄ e’ina sɔ̄ gbīnu, a lɛɛra ziī ye zooro kɔ a si loo pya tam wii a lokwa ba ye nɛ pio bee a aabu lo uwe vine, mɛ pya tam wii a bee ye yere ekobah ture sɔ̄ ba eziba ye sah. 11 E a bee sikɛ̄ yere dɔɔ̄na ye zooro wa ma. E ba bee ye zipnage, ye bɔbɛɛ kɛɛ sa ye yere ekobah ture. 12 Kerewo, a bee yerenage lo eree taa zooro; mɛ ba bee ye yere muū loo sa ye top tɛrɛ ee. 13 Lo sɔ̄, tɛ ɛrɛ uwe vine a bee kɔ: ‘Ena m doo a? M yere na nwiīnɛɛdam m wereloo wa ma. Naadabah ba enwa ye dɛɛ̄.’ 14 Sɔ̄ pya tam wii a emɔna ye, ba bee kɔ yɛɛ ɛnia aba kɔ, ‘Nɛɛ ama na e’ɛrɛ pya zɔ ama a. Dooraa i fɛ ye, e pya nu a ye kuu elu ili.’ 15 Nyɔɔwo ba bee ye top lɛɛ bu uwe vine a sa ye fɛ. Lo sɔ̄, ena tɛ-ɛrɛ uwe vine a edoo wa a? 16 Elu sa fɛ pya tam wii a, sa su lo kere uwe vine nɛ pya dɔɔ̄na.”
Sɔ̄ ba edaā pya nu ama, ba bee kɔ: “Dua nu ama naale esira doo pippip!” 17 Mɛ a bee wa ɛp doo tɔɔ sa wa kɔ nɛ kɔ: “Ena nu a bee lu e’ɛm ama kura a, lo a kɔ: ‘Ekpodɛm pya wu be bee kiī elua bātɛ̄ be’ a?* 18 Ɛrɛgebah nɛɛ a dɔ nyɔɔ lo dɛm ebaga lu epɛɛ epɛɛ. E lo dɛm etuŋ ɛrɛgebah nɛɛ a dɔ nyɔɔ.”
19 Pya ɛm kpa le pya tɛsī ewɔp bee gbī e’aa ye taɛ lo sɔ̄, mɛ bɔɔ bee wa aa loo pya nɛɛ a, nyɔnɛbee ba bee suā kɔ alaba na a gaa su lo edobah nu kɔā ue kumaloo a. 20 Sɔ̄ ba e’ɛba ye kaāna sah, ba bee gɔā kpɛ kpugi nɛ pya nɛɛ kɔ ba a daādaa kɔ ba lue pya kaāna dogo lokwa ba ye aa bu nu ekɔ sa ye su yere kɛ̄bah pya bɛbɛɛ le mɛnɛ aa bɛɛ. 21 E ba bip ye kɔ: “Nɛɛ Tɔgɛnu, i suā kɔ o wee kɔ sa tɔgɛ nu alu kaka e oo wee ɛp sī nɛɛ, mɛ o wee tɔgɛ kaka akiiloo dee Bari: 22 A bɔgeloo* bu lok kɔ i kpɛ etup nɛ Siza sɛh a naa bɔloo ni?” 23 Mɛ nyɔnɛbee a bee suā wa kiāŋana, a bee wa kɔ nɛ kɔ: 24 “Tɔgɛaa mɛ ziī denariɔs. Sī mɛɛ le bee mɛɛ na a le nyɔɔ a?” Ba kɔ: “Lo Siza.” 25 A bee wa kɔ nɛ kɔ: “Nyɔɔbee wo, mɔnaa kɔ bui kpɛ nu Siza nɛ Siza sa kpɛ nu Bari nɛ Bari.” 26 Kɛādoo, ba naa bee ye dap aa bu nu a kɔ bie kɛ̄sī pya nɛɛ a, mɛ ye ture bee wa lu nyɛŋia loo, e ba bee ɔbɛpiī.
27 Kerewo, pio pya Sadusii lo ba naa wee yiga bu aakɛ̄ bu luh bee lu sa ye bip kɔ: 28 “Nɛɛ Tɔgɛnu, Mozis bee i ɛm nɛ kɔ, ‘lo ziī nɛɛ u bie ye wa sɔ̄ a sii ɛrɛ lɔgɔ nwiī, ye wuga nɛɛdam a su lo wa sa buɛ̄ nwiī bu nɛ ye wuga.’ 29 Ɛrɛba wuga nɛɛdam bee le. Lo tuatua bee ii wa, mɛ a u sɔ̄ a sii ɛrɛ lɔgɔ nwiī. 30 E kɛ̄ lo eree baɛ 31 le lo eree taa bee ye iinage doo lo. Bu aba lo sīdee, dɛ̄dɛɛ̄ ɛrɛba aba bee u sɔ̄ ba sii ye ɛrɛ nwiī bah. 32 Bu kpɛdumɛ, lo wa bee unage. 33 Nyɔɔwo, sɔ̄ aakɛ̄ bu luh, elu wa mɛɛ? Nyɔnɛbee a bee le wa ɛrɛba aba.”
34 Jizɔs bee wa kɔ nɛ kɔ: “Pya miɔŋɔ sɔ̄ eku ama* ii wa sa alu enɛnage wa dam, 35 mɛ pya alu ebuū kɔ ba bɔloo etɔɔ̄ bu lo sɔ̄ eku le pya elu elɛɛ kɛ̄ bu luh naale e’ii wa ale kɔ alu enɛnage wa dam. 36 Bu kaka, ba naale e’una nyɔnɛbee ba ele doodoo pya ɛnjɛl, e nyɔɔbee alu elɛɛ wa kɛ̄ bu luh a, ba elu miɔŋɔ Bari. 37 Mɛ kɔ alu elɛɛ pya e’ua kɛ̄ bu luh, kere Mozis bee doonage kɔ alu esuā bu e’ɛma akiiloo te suu a, sɔ̄ a bee su Jɛhova* kure ‘Bari Ebreham, Bari Aizik le Bari Jekɔb.’ 38 A naale Bari pya e’ua mɛ Bari pya a le dum, nyɔnɛbee kiikɛ̄ a le,* dɛ̄dɛɛ̄ aba le dum.” 39 E pio pya ɛm kpa bee ture kɔ: “Nɛɛ Tɔgɛnu, o kɔ leere.” 40 Nyɔnɛbee lɔgɔ aba naa bee ye dapna bip lɔgɔ ebip.
41 Lo sɔ̄, Jizɔs bip wa kɔ: “Ena anua ba kɔ Kraist lu nwiī Devid a? 42 Nyɔnɛbee Devid bee kɔ bu kpa Le-yɔɔ kɔ, ‘Jɛhova* bee kɔ nɛ Nɛɛ-a-mɛ-ɛrɛ kɔ: “Ɛŋɛ mɛ tɛ̄ bara bahle 43 mmɛ sɔ̄ m su pya o nɛɛ baa a sere kɛɛ̄ baɛ tɔ doodoo nu dɛrɛ tɔ nyɔɔ.”’ 44 Nyɔɔwo, lo Devid bee ye kure Nɛɛ-a-mɛ-ɛrɛ; tɛɛ̄ doodoo wa lu ye nwiī?”
45 Sɔ̄ dɛ̄dɛɛ̄ nɛɛ bee lege aa ye gbaɛ̄tɔ̄, a bee kɔ nɛ pya a wee ye nyɔɔnɛ dumɛ kɔ: 46 “Nwanaadɛɛ̄ loo pya ɛm kpa lo ba yaa nyɔɔnyɔɔ bɛloo kiāŋa sa wereloo kana muɛ̄ kɛ̄du le ɛŋɛtɛ̄ deesī* te bie tɔ bɔŋanaloo le ɛŋɛtɛ̄ dɔ ka sɔ̄ alu ekue wa loo nuede, 47 e ba su dɛ̄dɛɛ̄ nu* sah bah pya waa ua dam sa daādaa yere nyɔɔnyɔɔ dɛɛ̄ kara. Wa biaɛ e’agabah* kaāna ee lo pya dɔɔ̄na nɛɛ.”