Lo Jɔn Bee Ɛm
9 Sɔ̄ aa bee kiā tɛɛ̄, a bee muɛ ziī gbara a bee lu zimadɛɛ̄ aā bu ka. 2 E pya a wee ye nyɔɔnɛ dumɛ bee ye bip kɔ: “Rabai, ena anua gbara ama bee lu zimadɛɛ̄ aā bu ka a, ekɔ nyɔɔ alɛɛ pɔrɔ sɛh lo ye tɛ le ye ka ni?” 3 Jizɔs ture kɔ: “Naale gbara ama ale ye tɛ le ye ka na a si pɔrɔ a, mɛ a sira doo wo lokwa alu emuɛ tam Bari ye tɛ̄maloo. 4 I ɛrɛ esitam nɛɛ a bee mɛ yere sɔ̄ dee lege e’ɛɛ; mɛ zii gaa lu sɔ̄ lɔgɔ nɛɛ naale edap sitam. 5 Kuma sɔ̄ m le bu nyɔuwe, mda na ɛɛdee nyɔuwe a.” 6 Sɔ̄ ekɔa pya nu ama sah, a bee tup maāsa kɛnɛkɛ̄ sa su tɔā esaā sa ye lɛrɛ nyɔɔ baɛ dɛɛ̄, 7 e a bee ye kɔ nɛ kɔ: “Kii wee loga sī a bu dɛgara bana maā Sailom” (lo sɔ̄ alu etap nu a kura na “Yere Ture”). A bee si wee loga sī, e a muɛ nu sɔ̄ a obia lu.
8 Lo sɔ̄, pya le ɛɛ le, le pya a ye suā loo kɔ a wee bara nu bee kɔ: “Ekɔ a naale gbara a wee ɛŋɛtɛ̄ kɛ̄ sa bara nu a na ama ni?” 9 Pio aba gaa bee kɔ: “Ɛɛ ye.” E pya lo dɔɔ̄na kɔ: “Eeye, a bee ye.” Lo nɛɛ bee kɔ: “Ɛɛ mda.” 10 Nyɔɔwo ba bip ye kɔ: “Tɛɛ̄ doodoo wa na dɛɛ̄ a yeea a?” 11 A ture kɔ: “Gbara a kura Jizɔs bee tuɔ nu sa mɛ lɛrɛ baɛ dɛɛ̄ sa mɛ kɔ nɛ kɔ, ‘Kii bu dɛgara bana maā Sailom wee loga sī a.’ Nyɔɔwo, m bee kii wee loga sī mɛ, e m muɛ nu.” 12 Lo sɔ̄, ba bee ye kɔ nɛ kɔ: “Lo gbara le mɛ kɛ̄?” A kɔ: “Mm suā.”
13 Ba su gbara a bee lu zimadɛɛ̄ tua sɔ̄ a ma pya Farisii. 14 A sira kɔ dee Jizɔs bee tuɔ nu sa ye yeere dɛɛ̄ a bee le Dee Fɛɛrɛloo. 15 Nyɔɔwo, pya Farisii bee sinagekɛ̄ bip lo gbara kɛ̄ a tɛɛ̄ doo muɛ nu. A kɔ wa nɛ kɔ: “A bee su nu alu etuɔ mɛ lɛrɛ baɛ dɛɛ̄, e m bee loga sī mɛ sa m muɛ nu.” 16 Lo sɔ̄, pio pya Farisii bɔātɛ̄ ekɔ: “Nɛɛ ama naa aaloo Bari, nyɔnɛbee a naa sere Dee Fɛɛrɛloo.” E pya dɔɔ̄na kɔ: “Etɛɛ̄ doodoo wa nɛɛ alu nɛɛ pɔrɔ dap doo dua edobah nu ama?” Nyɔɔwo, popooa bee wa yii yɛɛ. 17 E ba bee sinagekɛ̄ bip lo nɛɛ a bee lu zimadɛɛ̄ a kɔ: “Ena o dap kɔ kumaloo nɛɛ ama a, kuma sɔ̄ alɛ na a bee a yeere dɛɛ̄ a?” Lo gbara bee kɔ: “Ɛɛ nɛɛ mɔmanudɛɛ̄.”
18 Kerewo, pya Juu naa bee yiga kɔ gbara a bee le nɛɛ zimadɛɛ̄ a esiakɛ̄ muɛ nu, mmɛ sɔ̄ ba kue tɛ le ka lo gbara nua. 19 E ba bee wa bip kɔ: “Ekɔ a lege bui nwiī bui bee kɔ alu zimadɛɛ̄ aābu ka a na ama? Tɛɛ̄ doodoo wa na a sikɛ̄ muɛ nu anyaawo a?” 20 Ye tɛ le ye ka bee ture kɔ: “I suā kɔ ɛɛ i nwiī na ama, e a bee lu zimadɛɛ̄ aābu ka. 21 Mɛ ii suā kɛ̄ a tɛɛ̄ doo muɛ nu anyaawo, e ii suānage nɛɛ a doo kɔ dɛɛ̄ ye a yeea. Bibaa ye. Elua kagbara nɛɛ. A dap kɔ ue bee ye loo.” 22 Ye tɛ le ye ka bee kɔ pya nu ama nyɔnɛbee bɔɔ bee wa aa loo pya Juu, nyɔɔbee pya Juu ebee gbaa yiga kɔ ɛrɛgebah nɛɛ a ye yiga nɛ kɔ ɛɛ Kraist, elu ekpo lo nɛɛ lɛɛ bu tɔ bɔŋanaloo. 23 Nu anua lo sa ye tɛ le ye ka bee kɔ: “Elua kagbara nɛɛ. Bibaa ye ue.”
24 Nyɔɔwo, ba bee kue lo gbara a bee lu nɛɛ zimadɛɛ̄ tua sɔ̄ a lo eree baɛ sɔ̄ sa ye kɔ nɛ kɔ: “Nɛ ka Bari; i suā kɔ gbara ama ɛɛ nɛɛ pɔrɔ dogo.” 25 A bee ture kɔ: “Lo a le gbara ama lu nɛɛ pɔrɔ, mda mm suā. Mɛ nu mda suā na kɔ m bee le nɛɛ zimadɛɛ̄, mɛ nyaawo m dap muɛ nu.” 26 Lo sɔ̄ ba kɔ ye nɛ kɔ: “Ena a bee a doo loo a? Bu mɛ sīdee na a bee a yeere dɛɛ̄ a?” 27 A bee wa ture nɛ kɔ: “M ebee i kɔ nɛ, mɛ buii bee gbaɛ̄tɔ̄. Ena anua bui gbī esikɛ̄ dā a? Ekɔ bɔɔlo gbīnage elu pya a wee ye nyɔɔnɛ dumɛ ni?” 28 Nyɔɔwo, ba bee ye gbɛɛrɛ muɛ̄ loo sa kɔ: “Olo lu nɛɛ a wee nyɔɔnɛ dumɛ gbara ama, mɛ ili wee nyɔɔnɛ dumɛ Mozis. 29 I suā kɔ Bari bee kɔ ue nɛ Mozis, mɛ taɛ gbara ama, ii suā kɛ̄ a aa.” 30 Lo gbara bee wa ture nɛ kɔ: “Lo ama lu nyɛŋia kɔ buii suā kɛ̄ a aa, mɛ kerewo a bee mɛ yeere dɛɛ̄. 31 I suā kɔ Bari naa wee gbaɛ̄tɔ̄loo pya pɔrɔ dogo, mɛ ɛrɛgebah nɛɛ a ɛrɛ bɔɔ loo Bari sa doo nu a kɔ, a wee ye gbaɛ̄tɔ̄. 32 Aa kere, a sii lu edā kɔ lɔgɔ nɛɛ yeere dɛɛ̄ nɛɛ a bee lu zimadɛɛ̄ aābu ka. 33 Lo nɛɛ ama naa bee aaloo Bari, naale ebee dap doo lɔgɔ nu.” 34 Ba bee ye ture nɛ kɔ: “Pɔrɔ bee a mma loo aā dee o bee mɛā, e o gbī etɔgɛ i nu ni?” Nyɔɔwo, ba bee ye top tɛrɛ ee!
35 Jizɔs bee dā kɔ elua etop ye tɛrɛ ee, e sɔ̄ a emɔna ye, a kɔ ye nɛ kɔ: “Ekɔ o ɛrɛge yira bu Nwiīnɛɛ ni?” 36 Lo gbara bee ture kɔ: “Mɛɛ na ɛɛ a a tɛtɔ, lokwa m ye ɛrɛ yira bu?” 37 Jizɔs bee ye kɔ nɛ kɔ: “O emɔna ye, e ɛp! ɛɛ alɛ na o gaa nyɔɔnɛ kɔnia ue a.” 38 A bee kɔ: “M ɛrɛ ye yira bu a Nɛɛ-a-mɛ-ɛrɛ.” E a bee uubeekɛ̄ ye nɛ. 39 Lo sɔ̄ Jizɔs kɔ: “M bee lu bu nyɔuwe lokwa a dap lu ebiaɛ nyɔuwe sa doo kɔ pya alu zimadɛɛ̄ a muɛ nu, e pya a muɛ nu alu zimadɛɛ̄.” 40 Pya Farisii ba bee ye le loo bee dā pya nu a kɔ ama, e ba kɔ ye nɛ kɔ: “Ekɔ ili lunage zimadɛɛ̄ ni?” 41 Jizɔs kɔ wa nɛ kɔ: “Lo bui bee lu pya zimadɛɛ̄, buii le ebee ɛrɛna pɔrɔ. Mɛ sɔ̄ bui kɔ bui muɛe nu a, bui pɔrɔ etɔɔ̄ i bialoo.”