Lo Matiu Bee Ɛm

5 Sɔ̄ emɔna gbɛnɛkpo nɛɛ a, a kii nyɔɔ kpokɛ̄ wee ɛŋɛtɛ̄, e pya a wee ye nyɔɔnɛ dumɛ bee ye lu loo. 2 A bɔātɛ̄ ekɔ ue sa wa tɔgɛ nu kɔ:

3 “Ɛɛbu le nɛ pya a suā wa ebɛɛ̄ bu edɔɔ̄,* nyɔnɛbee alaba na e’ɛrɛ Buɛ̄-mɛnɛ bunyɔɔ a.

4 “Ɛɛbu le nɛ pya a baāŋa, nyɔnɛbee a elu egbɔ̄ wa.

5 “Ɛɛbu le nɛ pya a kuma nyiɛ kɛ̄, nyɔnɛbee alaba na ba e’ɛrɛ nyɔuwe a.

6 “Ɛɛbu le nɛ pya a ɛrɛ taɛ lo edoo kaāna dogo, nyɔnɛbee Bari edoo mmɛɛ nu a wa taɛ.*

7 “Ɛɛbu le nɛ pya a tɔgɛ toesaɛ̄, nyɔnɛbee elu eto wa esaɛ̄.

8 “Ɛɛbu le nɛ pya a ɛɛ bu beenyiɛ, nyɔnɛbee ba emuɛ Bari.

9 “Ɛɛbu le nɛ pya a sere efɛɛloo,* nyɔnɛbee elu ekure wa miɔŋɔ Bari.

10 “Ɛɛbu le nɛ pya alu etɛ̄ŋaloo nyɔɔbee kaāna dogo, nyɔnɛbee ba e’ɛrɛ Buɛ̄-mɛnɛ bunyɔɔ.

11 “Ɛɛbu le a nɛ sɔ̄ pya nɛɛ a bege ue, a tɛ̄ŋaloo, sa kɔgara pɔrɔ pɔrɔ nu alu esah a kumaloo nyɔɔ mdaa bee. 12 Ɛɛŋa sa ɛrɛ gbɛnɛ ɛɛbu, nyɔnɛbee o ekpɛanu lu gbɛnɛ li bunyɔɔ, nyɔɔbee kɛ̄ ba bee tɛ̄ŋanage loo pya mɔmanudɛɛ̄ a bee a dasī doo lo.

13 “Bɔɔlo na loh nyɔuwe a, mɛ lo loh pee ye etoba, ena edap sikɛ̄ doo kɔ a top ani? Lɔgɔ nu edap lu esikɛ̄ ye su daā naale, mɛ elu etop bie kɛ̄ ee sa pya nɛɛ zag tɔ nyɔɔ.

14 “Bɔɔlo na ɛɛdee nyɔuwe a, naale edap lu egɔ̄ buɛ̄ a le nyɔɔ egu. 15 Pya nɛɛ naa wee muī miā sere kɛɛ̄ kpɔ,* mɛ nyɔɔ nu sere numiā nyɔɔ sa a mɔ̄ nɛ dɛ̄dɛɛ̄ pya a le bu tɔ a. 16 Bu aba lo sīdee, doraa kɔ bui ɛɛdee a mɔ̄ kɛ̄sī pya nɛɛ lokwa ba muɛ bui le tam sa nɛ ka bui Tɛ a le li bunyɔɔ.

17 “Bui aa kɛɛrɛ kɔ m bee lu wee yere kuma loo Lok ale nu Pya Mɔmanudɛɛ̄ bee ɛm. Mm bee lu wee yere kuma loo, mɛ m bee lu wee mmɛɛ. 18 Kaka m kɔ i nɛ, kere bunyɔɔ le kɛnɛkɛ̄ tɛɛ̄ aa, dɛ̄dɛɛ̄ nu a bee lu e’ɛm bu Lok, kere lo nwīgbagbara a le yɛɛ naale elɔ mmɛ sɔ̄ dɛ̄dɛɛ̄ ɛɛ edooa. 19 Nyɔɔwo, ɛrɛgebah nɛɛ a gbee ziī yɛɛ pya lo lok alu ebuū kɔ a tera ama sa tɔgɛnage pya dɔɔ̄na kɔ ba a doo wo, elu ebuū kɔ a naa bɔloo Buɛ̄-mɛnɛ bunyɔɔ. Mɛ ɛrɛgebah nɛɛ a wa sere sa wa tɔgɛ, elu ebuū ye kɔ a bɔloo Buɛ̄-mɛnɛ bunyɔɔ. 20 Nyɔnɛbee m kɔ i nɛ, lo a le bui kaāna dogo naa eenyɔɔ lo pya ɛm kpa le lo pya Farisii, buii le eyii Buɛ̄-mɛnɛ bunyɔɔ.

21 “Bui ebee dā kɔ a bee lu ekɔ nɛ pya bui nama tɛ kɔ: ‘O aa fɛ nɛɛ, nyɔnɛbee ɛrɛgebah nɛɛ a fɛ nɛɛ elu esu ye kuma tɔbiaɛ.’ 22 Kerewo, mda kɔ i nɛ kɔ ɛrɛgebah nɛɛ a kiisī lo e’ɛrɛ saŋ pima ye wuga,* elu esu ye kuma tɔbiaɛ, e ɛrɛgebah nɛɛ a gbɛ ye wuga elu esu ye kuma Gbɛnɛ Tɔbiaɛ, e ɛrɛgebah nɛɛ a su dɔɔ̄na nɛɛ kure nɛɛ ezu eyii bu miā Gɛhɛna.*

23 “Lo o waa su o dɔɔ̄nu nua kɛ̄ wɔp zɔɔ sa a nyɛŋia a bu bie lo kɛ̄ kɔ o wuga ɛrɛ saŋ a pima, 24 lɛɛbahloo o dɔɔ̄nu bie kɛ̄ wɔp zɔɔ a sa kii, dasī nyɔɔnɛ o wuga sere efɛɛloo lɛɛ o obia lu wee nɛ o dɔɔ̄nu.

25 “Nwaabah nyɔɔnɛ nɛɛ a a pima ue sere efɛɛloo sɔ̄ bui le nyɔɔ dee aa kii tɔbiaɛ lokwa a naa su a yere kɛ̄bah nɛɛ biaɛ, e nɛɛ biaɛ esu a yere kɛ̄bah nɛɛ aa sitam tɔbiaɛ sa alu etop a tɛrɛ tɔ-kpɔgɔrɔ. 26 Bu kaka, m kɔ a nɛ, naale elu elɛa a bah mmɛ sɔ̄ o ekpɛa yube kpugi* a bee a le bah.

27 “Bui ebee dā kɔ a bee lu ekɔ: ‘O aa kue wa nɛɛ.’ 28 Mɛ mda kɔ i nɛ kɔ, ɛrɛgebah nɛɛ a bialoo ɛp ziī wa mmɛ kɛ̄ a ɛrɛ taɛ lo enyɔɔnɛ ye makɛ̄, ekuera ye bu ye beenyiɛ. 29 Nyɔɔwo, lo a le dɛɛ̄ bara bahle a edoo kɔ o dɔ, togara ye lɛa bee sa top bie. Nyɔnɛbee elee kɔ o peere ziī kɛ̄ a a le loo ee kɔ alu etop yube o ekpaloo tɛrɛ bu Gɛhɛna.* 30 E lo a le bara bahle a edoo kɔ o dɔ, fii ye lɛa loo top bie. Nyɔnɛbee elee o peere ziī kɛ̄ a a le loo ee kɔ alu etop yube o ekpaloo tɛrɛ bu Gɛhɛna.*

31 “Gbaāloo wo, a bee lu ekɔ: ‘Lo a le ɛrɛgebah nɛɛ lɛa ye wa bah, doolo a ye nɛ kpa ania loo ziī.’ 32 Kerewo, m kɔ i nɛ kɔ ɛrɛgebah nɛɛ a lɛa ye wa bah e a naale nyɔɔ kɔ a si nɛɛ, eyere ye bu kɛ̄tɔɔ̄ edoo kɔ a si nɛɛ,* e ɛrɛgebah nɛɛ a ii wa a bee lu elɛa bah sɔ̄ a naa si nɛɛ ekuera wa dɔɔ̄na nɛɛ.

33 “Dɔɔ̄na bui ebee dā kɔ a bee lu ekɔ nɛ pya bui nama tɛ kɔ: ‘O aa yira yii sa oo kpɛ, mɛ o ɛrɛ ekpɛ dɛ̄dɛɛ̄ yii o bee yira nɛ Jɛhova.’ 34 Kerewo, m kɔ i nɛ kɔ: Bui aa yira yii doo pippip, kere tɛ̄maloo bunyɔɔ, nyɔnɛbee alu kasi mɛnɛ Bari; 35 ale tɛ̄maloo kɛnɛkɛ̄, nyɔnɛbee alu ye nu dɛrɛ tɔ nyɔɔ, ale tɛ̄maloo Jerusɛlɛm, nyɔnɛbee alu buɛ̄ lo Gbɛnɛ Mɛnɛ. 36 O aa su ekobee a yiā yii kuma sɔ̄ oo le edap doo kɔ ziī ekpo zia a a le bee a ɛɛ ale a bira a. 37 Doolo bui ‘Aiī’ lu aiī, e bui ‘Eeye’ lu eeye, nyɔnɛbee ɛrɛgebah nu a ee lo ba ama aaloo pɔrɔ nɛɛ a.

38 “Bui ebee dā kɔ a bee lu ekɔ: ‘Dɛɛ̄ a le nɛ dɛɛ̄, e daa a le nɛ daa.’ 39 Kerewo, mda kɔ i nɛ, bui aa bebe loo nɛɛ bag dogo, mɛ ɛrɛgebah nɛɛ a i zip bah sī bara bahle, kiiranage elua naɛsī a ye nɛ. 40 Lo a le ziī nɛɛ gbī esu a kuma tɔbiaɛ lokwa a su o bɛloo bu, lɛɛnage bahloo o bɛloo deenyɔɔ ye nɛ; 41 e lo a le ziī nɛɛ a le dɔ ekpo su bah ekpo a aā kɔ o dana nu sa kiā loo ziī maɛl, nyɔɔnɛ ye kiā loo baɛ maɛl. 42 Dɔɔ̄ nu nɛ nɛɛ a a bara, e o aa kiira sī a lɛɛ loo nɛɛ a gbī ebɔgara nu* a aābah.

43 “O bee dā kɔ a bee lu ekɔ: ‘O ɛrɛ ewereloo nɛɛ le ɔɔ le sa baaloo o nɛɛ baa.’ 44 Kerewo, m kɔ i nɛ kɔ: Bui kiisī lo ewereloo pya bui nɛɛ baa sa yere kara bee pya a i tɛ̄ŋaloo, 45 lokwa bui tɔgɛ kɔ bui lu miɔŋɔ bui Tɛ a le li bunyɔɔ, nyɔnɛbee a doo kɔ ye zue a mɔ̄ nyɔɔ pya bag dogo le pya le dogo sa doo kɔ boo a dɔɔ nyɔɔ pya kaāna dogo le pya pɔrɔ dogo. 46 Mɛ lo o wereloo aba pya a a wereloo, amunu biī na o ɛrɛ a? Kunɛ pya tup etup naa doonage wo ni? 47 E lo a le bui kana muɛ̄ aba pya bui wuga, ena bui doo ema pya dɔɔ̄na ani? Ekɔ pya dɔɔ̄na buɛ̄ naa doonage wo ni? 48 Nyɔɔwo, bui ɛrɛ e’mmana* dookɛ̄ bui Tɛ a le li bunyɔɔ mmana doo.