Lo Matiu Bee Ɛm

24 Sɔ̄ Jizɔs aa bee aa bu tɔkaɛ, pya a wee ye nyɔɔnɛ dumɛ bee ye lu loo sa ye tɔgɛ kɛ̄ alu ewu tɔkaɛ doo. 2 A kɔ wa nɛ kɔ: “Bui muɛge dɛ̄dɛɛ̄ pya nu ama ni? Kaka m kɔ i nɛ, naale elu elɛɛbahloo kunɛ ziī ekpodɛm ama bie nyɔɔ ziī sa a naa lu efee tɛrɛ kɛ̄.”

3 Sɔ̄ a bee le e’ɛŋɛtɛ̄ nyɔɔ kpokɛ̄ Olive, pya a wee ye nyɔɔnɛ dumɛ bee ye lu loo aba aba sa ye bip kɔ: “Kɔ i nɛ, mɛ sɔ̄ na pya nu ama esudɔ a, e ena elu esu yeā nukuādɛɛ̄ loo sɔ̄ o obia lu* le kuma lo sɔ̄ eku ama* ani?”

4 Jizɔs ture wa nɛ kɔ: “Nwanaadɛɛ̄ lokwa lɔgɔ nɛɛ naa dag i, 5 nyɔnɛbee gbɛnɛ-edo nɛɛ elu bu na bee sa kɔ, ‘Mda na Kraist a,’ e ba edag gbɛnɛ-edo nɛɛ. 6 Bui gaa le dā kɔma nɔ̄ le kpɛa akiiloo booboo nɔ̄. Mɔnaa kɔ buii ɛrɛ bɔɔ nyɔnɛbee pya nu ama ɛrɛge esira, mɛ kuma sii lu.

7 “Nyɔnɛbee edonyɔɔ ebebe loo edonyɔɔ, e buɛ̄-mɛnɛ ebebe loo buɛ̄-mɛnɛ, e kii nuede ele, e nyɔŋa kɛnɛkɛ̄ elegara keekee kɛ̄. 8 Dɛ̄dɛɛ̄ pya nu ama na bɔātɛ̄ etɛɛrɛloo* a.

9 “Lo sɔ̄ pya nɛɛ etɛ̄ŋa i loo* sa i fɛ, e dɛ̄dɛɛ̄ edonyɔɔ ebaa i loo nyɔɔ mdaa bee. 10 Lo sɔ̄ gbɛnɛ-edo nɛɛ edɔnage aaloo yira, e ba etɛ̄ŋaloo ziī sa baaloo ɛnia aba. 11 Gbɛnɛ-edo pya mɔmanudɛɛ̄ esah e’aakɛ̄ sa dag gbɛnɛ-edo nɛɛ; 12 e nyɔɔ kɛ̄ bag dogo e’agɛrɛbah yii loo doo, wereloo booboo efiitɔɔ. 13 Mɛ nɛɛ a egerebu mmɛ kuma na elu ekpɔā a. 14 E elu ezue le yereue akiiloo Buɛ̄-mɛnɛ tɛ̄ma ɛŋɛnɛ dɛ̄dɛɛ̄ nyɔuwe nua nu ekeebee nɛ dɛ̄dɛɛ̄ edonyɔɔ, e lo sɔ̄ na kuma elu a.

15 “Nyɔɔwo sɔ̄ bui muɛ saāŋa nu a wee gbee nu a le eyira kɛ̄ kaɛ lo nɛɛ mɔmanudɛɛ̄ Daniɛl bee kɔ nu akiiloo, (doolo nɛɛ a buū suā nu a kura), 16 lo sɔ̄, doolo pya a le Judia teera kii nyɔɔ egu. 17 Doolo nɛɛ a le nyɔɔ tɔ aa sira kɛ̄ lo esu pya nu a le bu ye tɔ, 18 e doolo nɛɛ a le wii aa obia kii be wee su ye bɛloo dee nyɔɔ. 19 Ekiɛ̄nu ele nɛ pya waa bu loo le pya a gaa nɛ mah nwiī bu lo gbo dee! 20 Kiraasī lo eyere kara kɔ dee bui teera aa lu sɔ̄ tɔɔ ale nyɔɔ Dee Fɛɛrɛloo; 21 nyɔnɛbee lo sɔ̄ gbɛnɛ etɛɛrɛloo gaa le le, dua lo a sii bee le aā bɔātɛ̄ nyɔuwe mmɛ nyaawo, e a naale esinakɛ̄ le lɔgɔ sɔ̄. 22 Bu kaka, etaage bee alu efii gbo dee a kpuree, lɔgɔ nɛɛ naale e’ɛrɛ kpɔā; mɛ elu efii gbo dee a kpuree nyɔɔbee pya a bee lu esagɛ.

23 “E lo a le ziī nɛɛ kɔ i nɛ kɔ, ‘Ɛp! Kraist le akɛāma,’ ale ‘A le kɛ̄ li ma!’ bui aa yiga. 24 Nyɔnɛbee pya esah Kraist le pya mɔmanudɛɛ̄ esah e’aakɛ̄ sa doo gbɛnɛ gbɛnɛ edobah nu le nyɛŋiatam lo edag pya nɛɛ, e lo a waɛ ba edagnage kunɛ pya a bee lu esagɛ. 25 Ɛp! M ezuura i bah tɔ̄. 26 Nyɔɔwo lo pya nɛɛ kɔ i nɛ kɔ, ‘Ɛp! A le bu kpo-sagara-wii,’ bui aa kii ee; ‘Ɛp! A le bu tɛm,’ bui aa yiga. 27 Nyɔnɛbee dookɛ̄ ɛnɛmdee wee sira aakɛ̄ enaani wee sira aa mmɛ kɛ̄ enaani wee dɛp kii doo, kɛ̄ lulu* Nwiīnɛɛ elenage doo lo. 28 Ɛrɛgebah kɛ̄ ii nu le, kɛ̄ a na goh* wee bɔŋia a.

29 “Aba sɔ̄ etɛɛrɛloo bu gbo dee etɛ̄na, zue eyii zii, e enɔɔ̄ naale emɔna, e zina edɔ aa bunyɔɔ, e dɛ̄dɛɛ̄ ekpo bunyɔɔ enyɔŋa. 30 Lo sɔ̄ nu a tɔgɛ kɔ Nwiīnɛɛ esaa elu esira bunyɔɔ, e dɛ̄dɛɛ̄ gā loo nyɔuwe eziaga bahloo bu ekiɛ̄nu, e ba emuɛ Nwiīnɛɛ a gaa lu bu tɔ̄dee loo bunyɔɔ bu ekpo le gbɛnɛ ka. 31 E a gaa le su gbɛnɛ muɛ̄ dɔɔ̄ni yeā pya ye ɛnjɛl ture ee sa bɔŋɛnɛloo pya ye nɛɛ a bee lu esagɛ aā nia gah loo nyɔuwe, aā ziī kuma bunyɔɔ mmɛ elua a.

32 “Nyɔɔwo, nɔaā nu aāloo edobah akiiloo te fig: Aba sɔ̄ ye naā si mɛɛ̄ sa yere epanya, bui wee suā kɔ sɔ̄ zue ewara. 33 Kɛ̄ a lenage doo lo kumaloo bɔɔlo, sɔ̄ bui emɔna dɛ̄dɛɛ̄ pya nu ama, suaā kɔ ewaraloo nudee. 34 Kaka m kɔ i nɛ kɔ lo sɔ̄ eku ama naale etɛɛ̄ aa mmɛ sɔ̄ dɛ̄dɛɛ̄ pya nu ama esira. 35 Bunyɔɔ le kɛnɛkɛ̄ etɛɛ̄ aa, mɛ pya na ue naale etɛɛ̄ aa.

36 “Kiiloo dee ale awa a lɔgɔ nɛɛ naa suā, kere pya ɛnjɛl a le li bunyɔɔ ale Nwiīnɛɛdam mɛ aba Tɛ. 37 Nyɔnɛbee dookɛ̄ a bee le doo bu gbo dee Noa, kɛ̄ lulu* Nwiīnɛɛ elenage doo lo. 38 Nyɔɔbee dookɛ̄ a bee le doo bu gbo dee a lɛɛ yii maā gae lu, pya nɛɛ gaa bee denu sa ɔ̄ nu, ba gaa bee ii wa sa nɛnage wa dam, mmɛ dee Noa yii bu fah a, 39 e ba naa bee suā mmɛ sɔ̄ yii maā a lu sa su dɛ̄dɛɛ̄ aba aā, kɛ̄ lulu* Nwiīnɛɛ elenage doo lo. 40 Lo sɔ̄ baɛ nɛɛdam ele wii, e elu esu ziī nɛɛ sa lɛɛbahloo elua a. 41 Baɛ wa ele aa su dɛm gbɛā nuede; e elu esu ziī aba sa lɛɛbahloo elua a. 42 Nyɔɔwo, tɔ̄naa baɛ nyɔɔbee buii suā dee Nɛɛ-a-i-ɛrɛ elu.

43 “Mɛ suā lo ba ama kɔ lo tɛ-ɛrɛ tɔ bee suā taɛ eleke* nɛɛ biu elu, ebee tɔɔ̄ yeere sa naale ebee lɛɛbahloo kɔ alu ebaa ye tɔ. 44 Nyɔɔbee wo, bui kpɛ̄naaloo nyɔɔbee Nwiīnɛɛ gaa le lu taɛ awa buii ɛmadɛɛ̄.

45 “Mɛɛ na zooro a bɔloo eture nyiɛ loo sa suānu lo ye tɛtɔ bee ye tubobahloo kɔ a nɛ nuede pya ye zooro taɛ sɔ̄ a bɔloo a? 46 Ɛɛbu ele nɛ zooro a lo ye tɛtɔ lu sa ye muɛ a gaa doo wo! 47 Kaka m kɔ i nɛ, etubo ye bahloo kɔ a kuūdɛɛ̄loo dɛ̄dɛɛ̄ nu a ɛrɛ.

48 “Mɛ lo a le zooro a lu pɔrɔ sa kɔ bu beenyiɛ ye kɔ, ‘Na tɛtɔ gaa biɛ̄ dee,’ 49 e a bɔātɛ̄ ezip pya le ɛɛ gbaa lu zooro sa nyɔɔnɛ pya bumɛ mii ɔ̄ nu sa denu, 50 ye tɛtɔ elu taɛ dee a naa bee ɛmadɛɛ̄ le sɔ̄ awa a naa suā, 51 a gaa le tɔg ye bu e’agabah* sa ye top tɛrɛ yɛɛ pya baɛsī. Kɛ̄ a na eto to sa tagi daa ye bie a.