Lo Matiu Bee Ɛm
20 Nyɔnɛbee Buɛ̄-mɛnɛ bunyɔɔ le doodoo tɛ-ɛrɛ tɔ a bee kii ee bagara lɔɔrɛ wee gbī pya esu kɔ ba a sitam bu ye uwe vine. 2 Sɔ̄ enyɔɔnɛ pya tam a yiga kɔ ekpɛe wa ziī denariɔs* loo ziī biradee, a bee wa yere ture bu ye uwe vine. 3 A bee sinagekɛ̄ kii ee lo eree taa sɔ̄ awa* sa muɛ pya dɔɔ̄na a le eyira kɛ̄du a sii lu esu wa loo tam; 4 e a kɔ wa nɛ kɔ: ‘Bɔɔlo kiraanage wee sitam bu na uwe vine e m kpɛ i nu a bɔloo.’ 5 Nyɔɔwo ba bee kii li. A bee sinagekɛ̄ kii ee bu lo eree ini’ī* le ɛrɛnia sɔ̄ awa* sa sunage pya dɔɔ̄na loo tam. 6 Bu kpɛdumɛ, sɔ̄ edaba lu 11 sɔ̄ awa,* a bee kiinage ee sa muɛ pya dɔɔ̄na ba le eyira, e a bee wa bip kɔ: ‘Ena anua bui yira akɛāma yube loo nii’ee e buii si tam a?’ 7 Ba ture kɔ: ‘Nyɔnɛbee lɔgɔ nɛɛ naa su i loo tam.’ A kɔ wa nɛ kɔ: ‘Bɔɔlo kiraanage bu na uwe vine wee sitam.’
8 “Sɔ̄ e’ina loo uunɛ, tɛ-ɛrɛ uwe vine bee kɔ nɛ nɛɛ a wee kuūdɛɛ̄loo uwe a kɔ: ‘Kue pya tam a sa o kpɛ wa kpugi, bɔātɛ̄ aāloo pya nɛɛ a bee lu kpɛdumɛ mmɛ loo pya lo tuatua.’ 9 Sɔ̄ pya a bee bɔātɛ̄ tam bu 11 sɔ̄ awa bee lu, a bee lu ekpɛ ziī denariɔs* ziī ziī aba. 10 Nyɔɔwo sɔ̄ pya tua nɛɛ a bee bɔātɛ̄ tam a bee lu, ba kɛɛrɛ kɔ elu ekpɛe wa emanyɔɔ, mɛ a bee lunage ekpɛ wa ziī denariɔs. 11 Sɔ̄ ba esua, ba bee bɔātɛ̄ enuumi num loo tɛ-ɛrɛ tɔ a 12 sa kɔ: ‘Pya nɛɛ a bee lu kpɛdumɛ ama sitam loo aba ziī awa, kerewo o kpɛ wa aba nu o kpɛ ili i bee piaga loo tam yube loo dee sa le kɛɛ̄ aramiā zue!’ 13 Mɛ a bee ture nɛ ziī aba kɔ: ‘Na gbo, mm a doo lɔgɔ piya nu loo. I bee gbaa yiga ziī denariɔs,* nae wo ni? 14 Su olo sa o kii. Nu m kpɛ olo na m gbīnage ekpɛ pya lo kpɛdumɛ nɛɛ a. 15 Ekɔ a naa kuu mɛ esu pya nu m ɛrɛ daā nu a mɛ nia ni? Sɛh o manyiɛ* lenu m wa doo loo ni?’ 16 Bu aba lo sīdee, pya kpɛdumɛ elu tuatua e pya lo tuatua elu kpɛdumɛ.”
17 Sɔ̄ Jizɔs le 12 pya a wee ye nyɔɔnɛ dumɛ bee le nyɔɔ dee aa kii Jerusɛlɛm, a bee wa su kuma kɛ̄ alu aba aba sa wa kɔ nɛ kɔ: 18 “Ɛp! i aa kii Jerusɛlɛm, e elu esu Nwiīnɛɛ yere kɛ̄bah pya tɛsī ewɔp le pya ɛm kpa. E ba gaa le biaɛ kɔ alu efɛ ye 19 e elu esu ye yere kɛ̄ bah pya edonyɔɔ kɔ alu ebɔbɛɛ ye kɛɛ sa ye zip* sa alu eka ye loo te; e elu elɛɛ ye kɛ̄ bu luh nyɔɔ eree taa biradee.”
20 Lo sɔ̄, ka baɛ pya miɔŋɔ nɛɛdam Zɛbidii bee ye lu loo gbaāloo baɛ pya ye miɔŋɔ nɛɛdam, ye uubeekɛ̄ nɛ sa ye bara nu aābah. 21 Jizɔs bip ye kɔ: “Ena o gbī kɔ m doo a nɛ a?” Lo wa ture kɔ: “Doo kɔ baɛ pya na miɔŋɔ nɛɛdam a le a kpaɛ̄ bu o Buɛ̄-mɛnɛ, ziī aba e’ɛŋɛ a tɛ̄ bara bahle e elua a e’ɛŋɛ a tɛ̄ bara bahkie.” 22 Jizɔs kɔ: “Buii suā nu bui gaa bara. Bui dapge ɔ̄ bu lo kɔp mda e’ɔ̄ ni?” Ba bee ye kɔ nɛ kɔ: “I dap.” 23 A kɔ wa nɛ: “Bu kaka, bui dap ɔ̄ bu na kɔp, mɛ mm ɛrɛ ekpo lo ekɔ nɛɛ e’ɛŋɛ mɛ tɛ̄ bara bahle ale bahkie nyɔɔbee lo dɔ le nɛ pya nɛɛ na Tɛ ebee tubobahloo kɔ ba a ɛŋɛtɛ̄.”
24 Sɔ̄ lop pya elua a bee dā nu akiiloo, ba bee si saŋ pima baɛ wuga ama. 25 Mɛ Jizɔs bee wa kue yaaloo sa kɔ: “Bui suā kɔ pya mɛnɛ nyɔuwe wee tɔgɛ kɔ ba eenyɔɔ pya a wa le kɛɛ̄, e pya gbɛnɛ nɛɛ wee ɛrɛ bah ekpo loo pya a wa le kɛɛ̄. 26 A naa ɛrɛ ele doo wo i yɛɛ; nyɔnɛbee ɛrɛgebah nɛɛ a gbī elu gbɛnɛ i yɛɛ ɛrɛ elu bui nɛɛtam, 27 e ɛrɛgebah nɛɛ a gbī elu tuatua i yɛɛ ɛrɛ elu bui zooro. 28 Dookɛ̄ Nwiīnɛɛ naa bee lu kɔ alu esitam ye nɛ doo, mɛ lo esitam sa su ye dum* nɛ lo e’agara booboo nɛɛ.”
29 E sɔ̄ ba gaa bee aa Jeriko, gbɛnɛkpo nɛɛ bee wa nyɔɔnɛ. 30 E ɛp! baɛ nɛɛ zimadɛɛ̄ a bee le e’ɛŋɛtɛ̄ loo dee bee dā kɔ Jizɔs gaa tɛɛ̄, e ba wiikpā kɔ: “Nɛɛ-a-i-ɛrɛ, Nwiī Devid, to i esaɛ̄!” 31 Mɛ gbɛnɛkpo nɛɛ a bee wa kɔgara ue sa wa kɔ nɛ kɔ ba a ɔbɛpiī; kerewo, ba bee agɛrɛbah wiikpā kɔ: “Nɛɛ-a-i-ɛrɛ, Nwiī Devid, to i esaɛ̄!” 32 Nyɔɔwo Jizɔs bee yira, wa kue yaaloo sa kɔ: “Ena bui gbī kɔ m doo i nɛ a?” 33 Ba kɔ ye nɛ kɔ: “Nɛɛ-a-i-ɛrɛ, doo kɔ dɛɛ̄ i a yeea.” 34 Nyɔɔ toesaɛ̄ Jizɔs ɛrɛ, a daa wa bahloo dɛɛ̄, e aba sɔ̄ a ba bee muɛ nu sa ye nyɔɔnɛ dumɛ.