Lo Matiu Bee Ɛm
15 Lo sɔ̄ pya Farisii le pya ɛm kpa a aa Jerusɛlɛm bee lu loo Jizɔs sa kɔ: 2 “Ena anua pya a wee a nyɔɔnɛ dumɛ lɛɛ bee kɛɛ̄ lok pya nama tɛ a? Bu edobah, ba naa loga bah* wa lɛɛ ba gae denu.”
3 Mɛ a bee wa ture nɛ kɔ: “Ena anua bui doonu yema nyɔɔ kɛ̄ lok Bari kɔ doo nyɔɔ bui doonu kɛnɛkɛ̄ a? 4 Bu edobah, Bari kɔ: ‘Nwadɛɛ̄ o tɛ le o ka,’ e ‘alu efɛ nɛɛ a kɔ ye tɛ ale ye ka gbee.’ 5 Mɛ bɔɔlo kɔ: ‘Ɛrɛgebah nɛɛ a kɔ nɛ ye tɛ ale ye ka kɔ: “Ɛrɛgebah nu m ɛrɛ lo m bee i su yeābah nɛ lu dɔɔ̄nu alu enɛ Bari,” 6 naa lu ebɛɛ̄ kɔ a nwadɛɛ̄ ye tɛ doo pippip.’ Nyɔɔwo, bui edoora kɔ Muɛ̄ Ue Bari aa dɔna biī nyɔɔbee bui doonu kɛnɛkɛ̄. 7 Bɔɔlo pya baɛsī, nɛɛ mɔmanudɛɛ̄ Aizaia bee kɔ leere sɔ̄ a bee i kɔ ue kumaloo kɔ: 8 ‘Pya nɛɛ ama nwa mɛ dɛɛ̄ tɛ̄maloo wa ekpa nyɔɔnu, mɛ beenyiɛ wa binia loo kɛ̄ m le. 9 Ba taāŋa mɛ bah bu yɔrɔ nyɔnɛbee ba tɔgɛ nu pya nɛɛ nɛ bu lok.’” 10 Lo sɔ̄ a kue gbɛnɛkpo nɛɛ a wama loo ye sa kɔ: “Gbānaatɔ̄ sa dābeeloo nu a kura: 11 Naale nu a yii bu egā nɛɛ na a gbee nɛɛ a, mɛ nu a aa bu egā nɛɛ na a gbee nɛɛ a.”
12 Lo sɔ̄ pya a wee ye nyɔɔnɛ dumɛ bee ye lu loo sa ye kɔ nɛ kɔ: “O suāge kɔ bu pya Farisii biira nyɔɔbee nu o kɔ ni?” 13 A ture wa nɛ kɔ: “Ɛrɛgebah nu na Tɛ a le li bunyɔɔ naa bee foh elu ebugara. 14 Lɛɛ wa bahloo. Ba lu pya zimadɛɛ̄ a gaa tɔgɛ dee pya nɛɛ. Lo nɛɛ zimadɛɛ̄ tɔgɛ dee nɛɛ zimadɛɛ̄ baɛ aba edɔ bu bana.” 15 Mɛ Pita ture kɔ: “Doo kɔ i dābeeloo nu edobah ue ama kura.” 16 Lo sɔ̄ Jizɔs kɔ ye nɛ kɔ: “Bɔɔlo buii dānage beeloo ni? 17 Buii suā kɔ ɛrɛgebah nu a yii bu egā nɛɛ wee tɛɛ̄ yii bu nɛɛ sa alu enɛ bu tɔ-bi ni? 18 Kerewo, ɛrɛgebah nu a aabu egā nɛɛ aabu beenyiɛ nɛɛ, e pya nu ama na a gbee nɛɛ a. 19 Bu edobah, aā bu beenyiɛ na pɔrɔ pɔrɔ ekɛɛrɛ aa a, fɛ nɛɛ, kue wa dɔɔ̄na nɛɛ, yib biu, kunagā,* yira ekeebee esah le gbee bee nɛɛ. 20 Pya lo nu ama na a gbee nɛɛ a; mɛ a naale sɔ̄ nɛɛ denu sɔ̄ a naa loga bah* na a gbee nɛɛ a.”
21 Sɔ̄ Jizɔs aa lo kɛ̄, a bee kii barasī Taia le Saidɔn. 22 E ɛp! ziī waa Kenan a aa lo barasī bee lu sa ye to loo kɔ: “To mɛ esaɛ̄ a Nɛɛ-a-i-ɛrɛ, Nwiī Devid. Pɔrɔ-edɔɔ̄ le bu na Nwiīnɛɛwa, e a tɔg ye gbɛnɛ.” 23 Mɛ a naa bee ture lɔgɔ ue ye nɛ. Nyɔɔwo, pya a wee ye nyɔɔnɛ dumɛ bee lu sa ye kɔ nɛ kɔ: “Kpo ye kɔ a kii, nyɔnɛbee a bialoo i to nyɔɔnɛ dumɛ.” 24 A ture kɔ: “Naa bee lu eyere mɛ ma dɔɔ̄na nɛɛ mɛ aba pya a le doodoo naana pee a bee pe loo tɔ Izrɛl.” 25 Mɛ lo wa bee lu sa ye uubeekɛ̄ nɛ sa kɔ: “Nɛɛ-a-i-ɛrɛ, yerebah mɛ nɛ!” 26 A bee ye ture nɛ kɔ: “Naa lee esu fituru gbomiɔŋɔ top tɛrɛ kɛ̄ nɛ miɔŋɔ gbo.” 27 Lo wa ture kɔ: “Aiī a Nɛɛ-a-i-ɛrɛ, kerewo, miɔŋɔ gbo wee de epɛɛ epɛɛ nuede a dɔ aa nyɔɔ kasi wa Tɛ-ɛrɛ.” 28 Lo sɔ̄ Jizɔs ture nɛ lo wa kɔ: “Aa wa a ɛrɛ e’agatɛ̄ yira, a dooa a nɛ dookɛ̄ o bara le doo.” E aba sɔ̄ a, loo ye nwiīnɛɛwa bee nwaɛ̄.
29 Sɔ̄ Jizɔs aa lo kɛ̄, a bee lu ina kpaɛ̄ pɛnɛ Galilii, e a bee dɛɛ̄ kii nyɔɔ kpokɛ̄ sa ɛŋɛtɛ̄ kɛ̄. 30 Lo sɔ̄ gbɛnɛkpo nɛɛ bee ye lu loo, aaragi pya kɔgah, pya a ɛrɛ boh, pya zimadɛɛ̄, pya bɔ̄nɔ le gbɛnɛ-edo pya dɔɔ̄na loo dumɛ sa ye su sere kpaɛ̄ tɔ, e a bee wa bo. 31 Nyɔɔwo, a bee lu nyɛŋia loo gbɛnɛkpo nɛɛ a sɔ̄ ba muɛ pya bɔ̄nɔ gaa kɔ ue, sɔ̄ loo pya a ɛrɛ boh nwaɛ̄, pya kɔgah gaa kiā le sɔ̄ pya zimadɛɛ̄ gaa muɛ nu, e ba bee nɛ ka Bari Izrɛl.
32 Mɛ Jizɔs bee kue pya a wee ye nyɔɔnɛ dumɛ yaa loo ye sa wa kɔ nɛ kɔ: “Gbɛnɛkpo nɛɛ ama lu mɛ esaɛ̄ bu nyɔnɛbee ba etɔ̄na mɛ loo bu taa biradee e ba naa ɛrɛ lɔgɔ nuede.* Mm gbī eyere wa ture bu lɛɛraloo taā a doo ba gbaa bia nyɔɔ dee.” 33 Kerewo, pya a wee ye nyɔɔnɛ dumɛ bee ye ture nɛ kɔ: “Kɛ̄ i le ama binia loo buɛ̄, e mɛ kɛ̄ na i ɛrɛ fituru egbɔɛ̄ loo gbɛnɛkpo nɛɛ ama aā ani?” 34 Lo sɔ̄ Jizɔs kɔ wa nɛ kɔ: “Ku bee fituru bui ɛrɛ ni?” Ba kɔ: “Ɛrɛba bee le pio esɔgɔ bari.” 35 Nyɔɔwo, a kɔ nɛ gbɛnɛkpo nɛɛ a kɔ ba a ɛŋɛtɛ̄ kɛnɛkɛ̄, 36 e a su ɛrɛba bee fituru le bari a sa doo yaa, e a buū sa nɛ pya a wee ye nyɔɔnɛ dumɛ, e pya a wee ye nyɔɔnɛ dumɛ su nɛ gbɛnɛkpo nɛɛ a. 37 E dɛ̄dɛɛ̄ aba bee de sa a mma wa, e ba bee lap lo a siga yere bu ɛrɛba gbɛnɛka kpɔ. 38 Dɛ̄dɛɛ̄ pya a bee de bee le 4,000 pya nɛɛdam, e a naa bee lu ebuū pya nɛɛwa le gbomiɔŋɔ wa gbaāloo. 39 Bu kpɛdumɛ, sɔ̄ a eyere gbɛnɛkpo nɛɛ a ture, a bee yii bu fah maā sa lu ina barasī Magadan.