Lo Maak Bee Ɛm
8 Bu lo gbo dee ama, gbɛnɛ eku nɛɛ bee sinagekɛ̄ bɔŋia, e ba naa bee ɛrɛ lɔgɔ nuede. Nyɔɔwo, a bee kue pya a wee ye nyɔɔnɛ dumɛ sa wa kɔ nɛ kɔ: 2 “Gbɛnɛkpo nɛɛ ama lu mɛ esaɛ̄ bu nyɔnɛbee ba etɔɔ̄na mɛ loo taa biradee e ba naa ɛrɛ lɔgɔ nuede. 3 Lo m kɔ ba a kii bu lɛɛraloo,* ba egbaa bia nyɔɔ dee nyɔɔbee pio aba aa kɛ̄ a binia.” 4 Mɛ pya a wee ye nyɔɔnɛ dumɛ bee ye ture nɛ kɔ: “Kɛ̄ i le ama binia aaloo buɛ̄, mɛ kɛ̄ na i ɛrɛ fituru egbɔɛ̄loo pya nɛɛ ama aā a?” 5 Lo sɔ̄ a bip wa kɔ: “Ku bee fituru bui ɛrɛ?” Ba kɔ: “Ɛrɛba bee.” 6 E a bee kɔ nɛ gbɛnɛkpo nɛɛ a kɔ ba a ɛŋɛtɛ̄ kɛnɛkɛ̄. Lo sɔ̄ a su lo ɛrɛba bee fituru sa doo yaa, e a buū sa nɛ pya a wee ye nyɔɔnɛ dumɛ kɔ ba a nɛ wa, e ba bee su sa nɛ gbɛnɛkpo nɛɛ a. 7 E ba bee ɛrɛnage pio esɔgɔ bari, e sɔ̄ a eyere kara* sah, a bee wa kɔnage nɛ kɔ ba a su nɛ gbɛnɛkpo nɛɛ a. 8 Nyɔɔwo, ba bee de sa a mma wa, e ba bee bɔŋɛnɛloo lo ekpo ekpo a siga, sa a mma bu ɛrɛba ka kpɔ. 9 Ba bee lu 4,000 nɛɛ. E a bee wa yere ture.
10 E aba lo sɔ̄ alɛ le pya a wee ye nyɔɔnɛ dumɛ bee yii bu fah sa ba lu ina barasī Dalmanuta. 11 Pya Farisii bee ye lu loo bie lo kɛ̄ sa ye bɔātɛ̄ enyɔɔnɛ amkɛ̄, sa kɔ a tɔgɛ wa edobah nu a aa bunyɔɔ lo edoā ye ɛp. 12 Nyɔɔwo, a bee ɛrɛ ekiɛ̄nu bu nyiɛ ye sa a kɔ wa nɛ kɔ: “Ena anua lo sɔ̄ eku nyɔuwe ama gbī edobah nu ani? Bu kaka m kɔ i nɛ, naale elu enɛ lɔgɔ edobah nu lo sɔ̄ eku nyɔuwe ama.” 13 Lo sɔ̄ a aa wa loo sa sinagekɛ̄ yii bu fah sa kii elua sīloo uwe li.
14 Kerewo, a bee wa ibere lo e’aara fituru, e ba naa bee ɛrɛ lɔgɔ nu bu fah a kaɛlɛɛ aba ziī bee fituru. 15 E a bee wa zuurabahtɔ̄ kɔ: “Ɛbaa leere sa nwaɛdɛɛ̄ loo nu a wee muunɛ fituru lo pya Farisii le nu a wee muunɛ fituru lo Hɛrɔd.” 16 Nyɔɔwo, ba bee bɔātɛ̄ e’amkɛ̄ yɛɛ wa nyɔɔbee ba naa bee ɛrɛ lɔgɔ fituru. 17 Sɔ̄ emɔna doo wo, a bee wa kɔ nɛ kɔ: “Ena anua bui amkɛ̄ nyɔɔ fituru ani? Ekɔ bui sii suāge sa dābeeloo ni? Ekɔ bui beenyiɛ lege eduu sa naa dābeeloo ni? 18 ‘Ekɔ bui ɛrɛ dɛɛ̄ e buii muɛ nu ni? E bui ɛrɛ tɔ̄, mɛ buii dā nu ni?’ Ekɔ buii nyɛŋiabu 19 sɔ̄ m bee buū o’oo bee fituru nɛ 5,000 pya nɛɛ a,* ku kpɔ a bee siga lo bui bee lap?” Ba bee kɔ: “Lop le baɛ kpɔ.” 20 “Sɔ̄ m bee buū ɛrɛba bee fituru nɛ 4,000 pya nɛɛ, ku ka gbɛnɛka kpɔ a bee siga bui bee lap?” Ba kɔ: “Ɛrɛba.” 21 Lo sɔ̄ a kɔ wa nɛ kɔ: “Bui sii dāgebeeloo ni?”
22 Mɛ ba bee lu ina Bɛtsaida, e pya nɛɛ bee su ziī gbara zimadɛɛ̄ ye ma kɔ a bo ye*. 23 A bee aabah lo nɛɛ zimadɛɛ̄ aā bu buɛ̄ kuma ee, e sɔ̄ a etuba ye maāsa baɛ dɛɛ̄, a su bah ye dɛrɛ nyɔɔ sa ye bip kɔ: “O muɛge nu ni?” 24 Lo nɛɛ bee ɛp bunyɔɔ sa kɔ: “M muɛ pya nɛɛ, mɛ ba le doodoo te a gaa kiāŋa.” 25 A bee sikɛ̄ su bah ye dɛrɛ nyɔɔ baɛ dɛɛ̄ lo nɛɛ, e lo nɛɛ bee muɛ nu leere. Dɛɛ̄ ye bee yeea, e a bee muɛ dɛ̄dɛɛ̄ nu leere dookɛ̄ ba le doo. 26 A bee ye yere ture be sa ye kɔ nɛ kɔ: “O aa yii bu buɛ̄ ama.”
27 Jizɔs le pya a wee ye nyɔɔnɛ dumɛ bee aa sa kii bu buɛ̄ Sɛsaria Filipai, e sɔ̄ ba le nyɔɔ dee, a bee bip pya a wee ye nyɔɔnɛ dumɛ kɔ: “Pya nɛɛ kɔ mm mɛɛ ni?” 28 Ba kɔ ye nɛ kɔ: “Jɔn Nɛɛ Limaā, pya dɔɔ̄na kɔ Elaija, e pya dɔɔ̄na kɔ ziī yɛɛ pya nɛɛ mɔmanudɛɛ̄.” 29 E a bee wa bip kɔ: “Bɔɔlo kɔ mm mɛɛ ni?” Pita ture kɔ: “Olo na Kraist.” 30 Lo sɔ̄ a nɛ wa lok agɛrɛ kɔ ba aa kɔ nu a ye kiiloo nɛ lɔgɔ nɛɛ. 31 E a bee wa kɔnage nɛ* kɔ Nwiīnɛɛ etɔga gbɛnɛ, e pya kanɛɛ le pya tɛsī ewɔp le pya ɛm kpa ekiī ye sa ye fɛ, mɛ e’aakɛ̄ sɔ̄ taa biradee etɛ̄na. 32 Bu kaka, a bee kɔ ue ama bie taɛkɛ̄. Mɛ Pita bee ye su kuma barakɛ̄ sa bɔātɛ̄ ekɔgara ye ue. 33 Lo sɔ̄, a kiiya ɛp pya a wee ye nyɔɔnɛ dumɛ sa kɔgara ue Pita kɔ: “Tɛɛ̄ mɛ kii dumɛ a Setan! nyɔnɛbee oo kɛɛrɛ nu alu ekɛɛrɛ Bari mɛ lo pya nɛɛ.”
34 A bee kue gbɛnɛkpo nɛɛ a yaa loo ye le pya a wee ye nyɔɔnɛ dumɛ sa wa kɔ nɛ kɔ: “Lo ɛrɛgebah nɛɛ gbī enyɔɔnɛ mɛ dumɛ, doolo a anna ye loo sa dāna ye te tɔga* sa kiisī lo enyɔɔnɛ mɛ. 35 Ɛrɛgebah nɛɛ a gbī ekpɔā ye dum* epee ye, mɛ ɛrɛgebah nɛɛ a pee ye dum* nyɔɔ mda le nyɔɔ le yereue ekpɔā ye dum. 36 Nyɔnɛbee amunu biī na nɛɛ e’ɛrɛ lo a ɛrɛ dɛ̄dɛɛ̄ nyɔuwe sa a pee ye dum* ani? 37 Taɛ ena nɛɛ edap su nyaana loo ye dum* a? 38 Nyɔnɛbee ɛrɛgebah nɛɛ kɛɛ ye bɔp mɛ loo le na ue bu lo nyɔuwe a si pɔrɔ sa naa tɔɔ̄ nɛ Bari ama,* kɛɛ ebɔpnage Nwiīnɛɛ ye loo sɔ̄ elu bu ka ye Tɛ gbaāloo pya ye ɛnjɛl a le kaɛ.”