Lo Jɔn Bee Ɛm
18 Sɔ̄ Jizɔs ekɔa pya nu ama sah, pya a wee ye nyɔɔnɛ dumɛ le ɛɛ bee tɛɛ̄ Pɛɛkɛ̄ Kidrɔn kɛ̄ ziī kere gɔh le, e ba bee yii bu. 2 Mɛ Judas alu nɛɛ a bee ye lɛɛ bee suānage lo kɛ̄, nyɔnɛbee Jizɔs wee aara pya a wee ye nyɔɔnɛ dumɛ kuma lo kɛ̄ gbɛnɛ-edo sɔ̄. 3 Nyɔɔwo, Judas bee aara eku pya nɔ̄ le pya tam pya tɛsī ewɔp le pya Farisii nua, e ba bee aara bee miā le numiā, gbaāloo nu nɔ̄. 4 Lo sɔ̄, nyɔɔbee Jizɔs bee suā pya nu esira ye loo a, a bee kiā lu sa wa bip kɔ: “Mɛɛ na bui aa gbī a?” 5 Ba ture ye nɛ kɔ: “Jizɔs nɛɛ Nazarɛt.” A kɔ wa nɛ kɔ: “Mda na ɛɛ a.” Kɛādoo, Judas nɛɛ a bee ye lɛɛ bee le eyiranage wa kpaɛ̄.
6 Kerewo, sɔ̄ Jizɔs bee kɔ “Mda na ɛɛ a,” ba bee zuura loo kii dumɛ sa dɔ kɛnɛkɛ̄. 7 Nyɔɔwo, a bee sinagekɛ̄ wa bip kɔ: “Mɛɛ na bui aa gbī a?” Ba kɔ: “Jizɔs nɛɛ Nazarɛt.” 8 Jizɔs kɔ wa nɛ kɔ: “M ebee i kɔ nɛ kɔ mda na ɛɛ a. Nyɔɔwo, lo a le mda na bui aa gbī a, lɛraabahloo kɔ pya nɛɛ ama a kii.” 9 A bee doo lo ba ama lo edoo mmɛnɛ nu a bee kɔ kɔ: “M sii pee kunɛ ziī nɛɛ aā yɛɛ pya o bee mɛ nɛ.”
10 Lo sɔ̄, Saimɔn Pita lo gɛ̄ bee le bah, bee miina kuā zooro nɛɛ tɛsī ewɔp sa ye fii tɔ̄ bara bahle lɛɛloo. Bee lo zooro bee kura Malkɔs. 11 Kerewo, Jizɔs bee kɔ nɛ Pita kɔ: “Obara o gɛ̄ yere bu ye laɛ. Ekɔ a naa bɔloo kɔ m ɔ̄ aābu kɔp lo Tɛ enɛā mɛ ni?”
12 Lo sɔ̄, pya nɔ̄ le nɛɛbee nɔ̄ le pya baɛloo pya Juu bee aa Jizɔs sa ye bɔp. 13 Ba bee ye dasī su ma Annas lo a bee le tɛ-nwaā Keafas alu nɛɛ tɛsī ewɔp bu lo zua. 14 A bee le taɛ Keafas na a bee zuurabahtɔ̄ pya Juu kɔ edɔbiī wa nɛ lo a le ziī nɛɛ u bee pya nɛɛ a.
15 Lo sɔ̄, Saimɔn Pita gbaāloo dɔɔ̄na nɛɛ a wee ye nyɔɔnɛ dumɛ bee nyɔɔnɛ Jizɔs. Nɛɛ tɛsī ewɔp suāloo nɛɛ a wee ye nyɔɔnɛ dumɛ a, e a nyɔɔnɛ Jizɔs yii kɛ̄ ee loo tɔ nɛɛ tɛsī ewɔp, 16 mɛ Pita bee yira nutɔ kɛ̄ ee.* Nyɔɔwo, elua nɛɛ a wee nyɔɔnɛ dumɛ Jizɔs lo nɛɛ tɛsī ewɔp suāloo a, bee si loo nɛɛ baɛloo sa ye kɔ ue nɛ sa su Pita nyima bu. 17 Zooro nɛɛwa alu nɛɛ baɛloo nudee a bee kɔ nɛ Pita kɔ: “Ekɔ oo le ziī nɛɛ a wee nyɔɔnɛ dumɛ nɛɛ ama ni?” A kɔ ye nɛ: “Mm le ɛɛ.” 18 Lo sɔ̄, pya zooro le pya tam bee le eyira kpaɛ̄ kpo-miā lo ba bee kwa sa aa yɔba nyɔnɛbee tɔɔ bee le. Pita bee wa yiranage kpaɛ̄ sa yɔba miā.
19 Nyɔɔwo, nɛɛ tɛsī ewɔp bee bip ebip Jizɔs akiiloo pya a wee ye nyɔɔnɛ dumɛ le ye tɔgɛnu. 20 Jizɔs bee ye ture nɛ kɔ: “M ebee kɔ ue nɛ nyɔuwe bie taɛkɛ̄. M wee tɔgɛ nu bu tɔ bɔŋanaloo le tɔkaɛ, kɛ̄ dɛ̄dɛɛ̄ pya Juu wee gbaa bɔŋia, e mm bee kɔ lɔgɔ nu bu gɔā. 21 Ena anua o bip mɛ ebip a? Bip pya nɛɛ edaā nu m bee wa kɔ nɛ. Ɛp! Ba suā nu m bee kɔ.” 22 Sɔ̄ ekɔa pya lo nu ama sah, ziī nɛɛ tam a bee le eyira lo kɛ̄ bee maŋ bah sī Jizɔs sa kɔ: “Kɛ̄ o agara ue nɛ nɛɛ tɛsī ewɔp doo na ama?” 23 Jizɔs bee ye ture nɛ kɔ: “Lo m kɔ nu a naa lee, kɔ* nu m kɔ a naa lee; mɛ lo a le nu m kɔ lu kaka, ena anua o zip mɛ a?” 24 Lo sɔ̄ Annas bee ye bɔp sa ye yere ture ma Keafas nɛɛ tɛsī ewɔp.
25 Mɛ sɔ̄ Pita bee le eyira kɛ̄ aa bee yɔba miā a, ba bee ye kɔ nɛ kɔ: “Ekɔ oo le ziī nɛɛ a wee nyɔɔnɛ dumɛ nɛɛ ama ni?” A bee anna sa kɔ: “Mm le ɛɛ.” 26 Ziī zooro nɛɛ tɛsī ewɔp alu manamana gbara Pita bee fii tɔ̄ a, bee kɔ: “M bee a muɛ o ye le loo bie bu gɔh a, sɛh mm bee a muɛ ni?” 27 Kerewo, Pita bee sinagekɛ̄ anna, e aba sɔ̄ a, edoo kɔɔ̄ bee ku kpā.
28 Lo sɔ̄, ba ture Jizɔs aā tɔ Keafas kuma kɛ̄ nɛɛ aa bɛɛ wee tɔɔ̄. A bee le bagara lɔɔrɛ. Mɛ ba alaba naa bee yiga eyii kɛ̄ nɛɛ aa bɛɛ aa tɔɔ̄, nyɔnɛbee ba naa bee gbī egbee wa loo lokwa ba dap de nuede Tɛɛ̄yee. 29 Nyɔɔwo, Pailet bee wa pii kɛ̄ ee sa kɔ: “Amunu pɔrɔ na bui kɔ nɛɛ ama doo a?” 30 Ba bee ye ture nɛ kɔ: “Lo nɛɛ ama naa bee doo pɔrɔ nu,* ii le ebee ye su a yere kɛ̄bah.” 31 Nyɔɔwo, Pailet bee wa kɔ nɛ kɔ: “Bɔɔlo, bui suaa ye sa ye biaɛ dookɛ̄ bui lok kɔ doo.” Pya Juu bee ye ture nɛ kɔ: “A naa bɔloo bu lok kɔ i fɛ lɔgɔ nɛɛ.” 32 Lo ama bee dooa lo e’mmɛnɛ nu Jizɔs bee kɔ kumaloo dua luh e’u.
33 Lo sɔ̄, Pailet bee obia yii tɔ mɛnɛ sa bip Jizɔs kɔ: “Lege olo na Mɛnɛ pya Juu ani?” 34 Jizɔs ture kɔ: “O aa bip lo ama nyɔɔ oloo sɛh pya dɔɔ̄na ebee kɔ nu a mɛ kiiloo a nɛ ni?” 35 Pailet bee ture kɔ: “Mda mm le nɛɛ Juu, naale wo ni? Pya o edonyɔɔ le pya tɛsī ewɔp bee a su mɛ yere kɛ̄bah. Ena o bee doo a?” 36 Jizɔs bee ture kɔ: “Mdaa Buɛ̄-mɛnɛ naa aabu lo nyɔuwe ama. Lo na Buɛ̄-mɛnɛ bee aabu lo nyɔuwe ama, pya na nɛɛtam ebee bebe lokwa a naa lu esu mɛ yere kɛ̄bah pya Juu. Mɛ kɛ̄ a le doo, na Buɛ̄-mɛnɛ naa aa akɛāma.” 37 Nyɔɔwo, Pailet bee ye kɔ nɛ kɔ: “Ekɔ ɔɔ mɛnɛ ni?” Jizɔs ture ye nɛ kɔ: “Olo na o kɔ mm mɛnɛ a. Nyɔɔ lo ba ama na a bee lu emaɛ̄ mɛ a, e nyɔɔ lo bah ama na m bee lu bu nyɔuwe a lokwa m yira ekeebee loo kaka ue. E ɛrɛgebah nɛɛ a yira ekeebee loo kaka ue, egbaɛ̄tɔ̄loo na muɛ̄.” 38 Pailet bee ye kɔ nɛ kɔ: “Ena kaka ue a?”
Sɔ̄ ekɔa pya lo ba ama sah, a bee si loo pya Juu kɛ̄ ee sa wa kɔ nɛ kɔ: “Mm muɛ lɔgɔ piya nu nɛɛ ama doo. 39 Kaɛlɛɛ wo, a ɛrɛ nu bui wee doo ɛrɛgebah sɔ̄ Doonu Tɛɛ̄yee. Bui wee kɔ m lɛa ziī nɛɛ bah i nɛ, nyɔɔwo, bui gbī kɔ m lɛa Mɛnɛ pya Juu bah i nɛ ni?” 40 Ba sikɛ̄ wiikpā kɔ: “Naale lo gbara ama, mɛ Barabas!” Kɛādoo, Barabas bee le nɛɛ aŋana nu lɛɛ bah nɛɛ.