Lo Maak Bee Ɛm

14 Sɔ̄ ebee siga baɛ biradee lɛɛ alu edoo Doonu Tɛɛ̄yee le Fituru A Naa Wee Muū. Pya tɛsī ewɔp le pya ɛm kpa aa bee gbī kɛ̄ edoo su kiāŋana ye aā sa ye fɛ; 2 nyɔnɛbee ba aa bee kɔ: “Ii le e’aa ye bu sɔ̄ doonu; nyɔnɛbee pya nɛɛ dap doo taāŋa.”

3 E sɔ̄ a bee le aa denu* bie tɔ Saimɔn a bee lu nɛɛ ebiakpaŋ li Bɛtani, ziī wa a aara elolo alabaster lo nɔɔ̄ a wee sī lele nuloo le bu bee lu; kaāna nɔɔ̄ nard lo a si gbɛnɛ du. A bee kpaāna lo elolo alabaster sa su lo nɔɔ̄ ye tɔ̄ bee. 4 Lo sɔ̄, pio aba bee kɔ nɛ ziī bu saŋ kɔ: “Ena anua alu epee nɔɔ̄ a sī lele nuloo ama a? 5 Nyɔnɛbee ebee dap lu e’oo nɔɔ̄ ama loo nu a yeeloo 300 denariɔs* sa alu enɛ lo kpugi pya kporo!” E ba bee si saŋ pima* lo wa. 6 Mɛ Jizɔs bee kɔ: “Lɛraa ye bahloo. Ena bui ye nɛ taāŋa loo a? A doo mɛ le nu loo. 7 Nyɔnɛbee pya kporo le i yɛɛ dɛ̄dɛɛ̄ sɔ̄, e bui dap wa doo le nu loo ɛrɛgebah sɔ̄ bui gbī, mɛ mda mm le ele i yɛɛ dɛ̄dɛɛ̄ sɔ̄. 8 Edoora nu a dap doo; a tɔ̄ mɛ nɔɔ̄ loo bɛma na lili. 9 Kaka m kɔ i nɛ, ɛrɛgebah kɛ̄ le yereue lu ezue bu nyɔuwe, elunage ekɔ nu akiiloo nu wa ama doo lo enyɛŋia ye bu.”

10 E Judas Iskariɔt, ziī nɛɛ yɛɛ Lop Le Baɛ a bee si loo pya tɛsī ewɔp sa wa nyɔɔnɛ biraloo kɛ̄ etɛɛ̄ doo tɛ̄ŋaloo Jizɔs wa nɛ. 11 Sɔ̄ ba bee dā, bu wa bee ɛɛ gbɛnɛ, e ba yiga kɔ ba enɛe ye kpugi silva. Nyɔɔwo, a bee bɔātɛ̄ egbī taɛ sɔ̄ elee elɛɛ ye.

12 Nyɔɔ tua dee loo Doonu Fituru A Naa Wee Muū, sɔ̄ ba wee waara zɔɔ Tɛɛ̄yee, pya a wee ye nyɔɔnɛ dumɛ bee ye kɔ nɛ kɔ: “Mɛ kɛ̄ na o gbī kɔ i kwa a nɛ lokwa o tɔɔ̄ de nuede Tɛɛ̄yee a?” 13 Lo sɔ̄, a bee yere baɛ pya a wee ye nyɔɔnɛ dumɛ sa wa kɔ nɛ kɔ: “Kiraa bu buɛ̄ e bui zɔ̄ŋia ziī gbara a toora kāna maā. Nyɔɔnɛaa ye, 14 e ɛrɛgebah kɛ̄ a yii, nyɔɔnɛaa ye, sa bui kɔ nɛ tɛ-ɛrɛ tɔ a kɔ, ‘Nɛɛ Tɔgɛnu kɔ: “Mɛ kɛ̄ na tɛm pya saanɛɛ le a, kɛ̄ m nyɔɔnɛ pya a wee mɛ nyɔɔnɛ dumɛ de nuede Tɛɛ̄yee a?”’ 15 E a etɔgɛ i ziī gbɛnɛ ka tɛm a le mmnyɔɔ lo elua ekwa sa sere leere. Lo kɛ̄ na bui kwa nuede Tɛɛ̄yee i sɛɛ a.” 16 Nyɔɔwo, pya a wee ye nyɔɔnɛ dumɛ bee aa sa yii bu buɛ̄ sa muɛ dookɛ̄ a bee wa kɔ nɛ doo, e ba bee kwa lo kɛ̄ loo Doonu Tɛɛ̄yee.

17 Sɔ̄ elua loo uunɛ, a bee lu gbaāloo Lop Le Baɛ pya a wee ye nyɔɔnɛ dumɛ. 18 E sɔ̄ ba bee le e’ɛŋɛtɛ̄ kpaɛ̄ kasi aa denu, Jizɔs kɔ: “Kaka m kɔ i nɛ, ziī nɛɛ a i le yɛɛ lo a gaa mɛ nyɔɔnɛ denu elɛɛ mɛ.” 19 Nyɔɔwo, ba bee bɔātɛ̄ e’ɛrɛ ekiɛ̄nu sa ziī ziī aba bip kɔ: “Ɛɛ mda ni?” 20 A bee wa kɔ nɛ kɔ: “Ɛɛ ziī nɛɛ yɛɛ Lop Le Baɛ bui, lo nɛɛ a mɛ nyɔɔnɛ ka bu aba fɛrɛ. 21 Bu kaka, Nwiīnɛɛ ekii dookɛ̄ a bee lu e’ɛm ye kumaloo doo, mɛ ekiɛ̄nu a le nɛ nɛɛ elu etɛ̄ma ye bah lɛɛ Nwiīnɛɛ! Ebee lee kɔ lo nɛɛ naa bee mɛā.”

22 E sɔ̄ ba bee lege aa denu, a su fituru sa yere kara*, a buū sa wa su nɛ sa kɔ: “Suaa, lo ama tɔɔ̄dɔ na ekpaloo.” 23 E a su kɔp sa doo yaa lɛɛ a su wa nɛ, e dɛ̄dɛɛ̄ aba bee ɔ̄ aābu. 24 E a kɔ wa nɛ kɔ: “Lo ama tɔɔ̄dɔ ‘Mdaa miī, lo a le miī yii bɔmadum’ lo elu e’egara nyɔɔ booboo nɛɛ. 25 Kaka m kɔ i nɛ, mm le e’ɔ̄na lɔgɔ mii a aaloo bee vine mmɛ dee m nyɔɔnɛ i ɔ̄ lo aā bie bu Buɛ̄-mɛnɛ Bari.” 26 Bu kpɛdumɛ, sɔ̄ ba e’ɔra yɔɔ leera Bari sah, ba bee kii nyɔɔ kpokɛ̄ Olive.

27 E Jizɔs bee wa kɔ nɛ kɔ: “Dɛ̄dɛɛ̄ bui gaa le dɔ, nyɔnɛbee ebee lu e’ɛm: ‘M gaa le zip nɛɛ tɔɔ̄loo naana pee, e gbo naana pee eteera yaara.’ 28 Mɛ sɔ̄ elua elɛɛ mɛ kɛ̄ bu luh, m da i sī kii Galilii.” 29 Mɛ Pita bee ye kɔ nɛ kɔ: “Kere dɛ̄dɛɛ̄ nɛɛ dɔ, mda mm le edɔ.” 30 Lo sɔ̄ Jizɔs bee ye kɔ nɛ kɔ: “Kaka m kɔ a nɛ kɔ taɛ uunɛ nii’ee, lɛɛ edoo kɔɔ̄ gae ku baɛ sɔ̄ kpā, o anna mɛ taa sɔ̄.” 31 Mɛ a kiisī lo ekɔ: “Kere a kura kɔ m nyɔɔnɛ a u, mm le e’anna a doo pippip.” E dɛ̄dɛɛ̄ pya lo dɔɔ̄na bee kɔnage doo wo.

32 Sɔ̄ ba e’ina kɛ̄ alu ekure Gɛtsɛmani, a bee kɔ nɛ pya a wee ye nyɔɔnɛ dumɛ kɔ: “Bui ɛŋɛaatɛ̄ akɛāma mɛ m kii wee yere kara.” 33 E a su Pita, Jems, le Jɔn yaaloo ye, e a bee bɔātɛ̄ e’ɛrɛ gbɛnɛ ekiɛ̄nu le biirabu. 34 A bee wa kɔ nɛ kɔ: “M* ɛrɛ gbɛnɛ ekiɛ̄nu mmɛ loo luh. Tɔɔ̄naa akɛāma sa tɔɔ̄ yeere.” 35 Sɔ̄ ekiā kina kiisī, a bee kunɛzū kɛ̄ sa uubeekɛ̄ yere kara kɔ lo a waɛ, lo awa a tɛɛ̄e ye yee. 36 E a bee kɔ: “Abba,* Tɛ, olo dap doo dɛ̄dɛɛ̄ nu; su kɔp ama mɛ lɛɛ kɛ̄sī. Kerewo, naale doo kɛ̄ mda gbī doo, mɛ dookɛ̄ olo gbī doo.” 37 A bee obia lu sa wa muɛ ba le daa, e a kɔ nɛ Pita kɔ: “Saimɔn, o daa ni? Oo ɛrɛ e’agaloo esu tɔ̄ma yeere loo ziī awa ni? 38 Tɔɔ̄naa yeere sa kiisī lo eyere kara lokwa buii dɔ bu doā-ɛp. Bu kaka, edɔɔ̄ gbī edoo mɛ namloo ɔloo.” 39 E a sinagekɛ̄ kii wee yere kara sa kɔ aba pya nu a bee kɔ elua sɔ̄ a. 40 E a obia lu sa wa sinagekɛ̄ muɛ ba le daa nyɔnɛbee dɛɛ̄ wa bee dɔ̄nia, e ba naa bee suā lɔgɔ nu eture ye nɛ. 41 E a obia lu lo eree taa sɔ̄ sa wa kɔ nɛ kɔ: “Dua sɔ̄ a le doo wo ama na bui gaa daadaa sa seea a! Eleera! Lo sɔ̄ e’ina! Ɛp! elua elɛɛ Nwiīnɛɛ yere kɛ̄ bah pya pɔrɔ. 42 Aaraakɛ̄, dooraa i aa. Ɛp! Nɛɛ elɛɛ mɛ ewaraloo kɛ̄.”

43 E aba sɔ̄ a, sɔ̄ a bee lege gaa kɔ ue, Judas, ziī nɛɛ yɛɛ Lop Le Baɛ a, lu gbaāloo gbɛnɛkpo nɛɛ gɛ̄ nɔ̄ le tum wa legara bah, lo pya tɛsī ewɔp, pya ɛm kpa, le pya kanɛɛ bee yere. 44 Nɛɛ a bee ye lɛɛ ebee wa nyɔɔnɛ biraloo nu edoo sa ba suā ye loo, sa kɔ: “Ɛrɛgebah nɛɛ m kuɛ̄ nyɔɔnu loo na ɛɛ a; aaraa ye sa ye su aā.” 45 E a bee ye kiā lu loo sa kɔ: “Rabai!” lɛɛ a kɛɛrɛloo ye kuɛ̄ nyɔɔnu loo. 46 Nyɔɔwo, ba bee ye aa sa ye su aā. 47 Kerewo, ziī nɛɛ a bee le eyira bee miina ye gɛ̄ nɔ̄ sa kuā zooro nɛɛ tɛsī ewɔp sa ye fii tɔ̄ lɛɛloo. 48 Mɛ Jizɔs bee wa kɔ nɛ kɔ: “Bui aara gɛ̄ nɔ̄ le tum nua wee aa mɛ doodoo nɛɛ biu ni? 49 Aā ziī dee yii ziī m wee i le loo bu tɔkaɛ sa gaa tɔgɛ nu, e buii bee mɛ aa. Kerewo, dɛ̄dɛɛ̄ lo ama sira lo edoo gbɔ̄mɛɛ nu a bee lu e’ɛm bu Kpa Kaɛ.”

50 E dɛ̄dɛɛ̄ aba bee ye lɛɛbahloo sa teera. 51 Kerewo, a ɛrɛ ziī zege gbara a bee su aba bɛ linen uuwa loo ye sa wa nyɔɔnɛ kinakina, e ba bee gbī e’aa ye, 52 mɛ a bee lɛɛbahloo ye bɛ linen wa bie bah sa su ekotɛ̄* teā.

53 Ba bee su Jizɔs ma nɛɛ tɛsī ewɔp, e dɛ̄dɛɛ̄ pya tɛsī ewɔp le pya kanɛɛ le pya ɛm kpa bee bɔŋana lo kɛ̄. 54 Mɛ Pita bee ye nyɔɔnɛ kinakina ina kɛ̄-ee loo tɔ nɛɛ tɛsī ewɔp; e a bee le kpaɛ̄ pya a wee sitam tɔ a sa gaa yɔba miā. 55 Nyaawo pya tɛsī ewɔp le dɛ̄dɛɛ̄ pya a bee le tɔbiaɛ Sanhidrin gaa bee gbī ue edɛrɛ Jizɔs lokwa ba ye fɛ, mɛ ba naa bee muɛ lɔgɔ nu edɛrɛ ye. 56 Gbɛnɛ-edo nɛɛ gaa bee yira ekeebee esah ye kumaloo, mɛ wa ue bee be ziī. 57 Gbaāloo wo, a ɛrɛ pya nɛɛ a gaa bee yiranage ekeebee esah ye kumaloo kɔ: 58 “I bee dā sɔ̄ a gaa kɔ, ‘M fee tɔkaɛ alu esu bah wuā ama tɛrɛkɛ̄ sa bu taa biradee m wu lo dɔɔ̄na a naa lu esu bah daā.’” 59 Mɛ kere ba bee kɔ doo wo, wa ekeebee bee benage ziī.

60 Lo sɔ̄ nɛɛ tɛsī ewɔp bee yira taɛ yɛɛ pya nɛɛ a sa bip Jizɔs kɔ: “Oo ture lɔgɔ nu ni? Ekɔ oo dā nu pya nɛɛ ama aa a kɔ kumaloo ni?” 61 Mɛ a bee ɔbɛpiī sa naa kɔ lɔgɔ nu. E nɛɛ tɛsī ewɔp bee ye sinagekɛ̄ bip kɔ: “Lege olo na Kraist Nwiīnɛɛdam Bari a le Kaɛ a?” 62 Jizɔs bee kɔ: “Ɛɛ mda; e bui muɛ Nwiīnɛɛ a le e’ɛŋɛtɛ̄ bara bahle Bari a ɛrɛ ekpo sa gaa lu bu tɔ̄dee.” 63 Lo sɔ̄ nɛɛ tɛsī ewɔp bee baa ye bɛloo sa kɔ: “Amunu ekeebee na i gaa gbīge a? 64 Bui edaā kɛ̄ a kɔ Bari gbee doo. Ena bui biaɛfii a?”* Dɛ̄dɛɛ̄ aba bee kɔ a bɔloo luh. 65 E pio aba bee bɔātɛ̄ etup ye maāsa sī, ye uu bah sī sa ye zima munu, lɛɛ ba kɔ ye nɛ kɔ: “Lo o lu nɛɛ mɔmanudɛɛ̄, kɔ nɛɛ a a zip i nɛ!” E pya a wee si tam tɔbiaɛ bee ye su aā.

66 Sɔ̄ Pita bee le kɛ̄-ee loo tɔ a, ziī zooro nɛɛwa nɛɛ tɛsī ewɔp bee lu. 67 Sɔ̄ emɔna Pita a gaa yɔba miā, a bee ye ɛp sa ye kɔ nɛ kɔ: “Olo bee lenage loo Jizɔs nɛɛ Nazarɛt.” 68 Mɛ a bee anna sa kɔ: “Mm ye suāloo, e mm dābeeloo lɔgɔ nu o gaa kɔ nu akiiloo,” e a aa sa kii nudee tɛ̄ma nyima. 69 Lo zooro nɛɛwa bee ye sikɛ̄ muɛ bie lo kɛ̄ sa kɔ nɛ pya a le eyira lo kɛ̄ kɔ: “Ɛɛ ziī aba na ama.” 70 E a bee sinagekɛ̄ anna. E sɔ̄ ziī nwī sɔ̄ etɛ̄na, pya a bee le eyira waɛloo bɔātɛ̄ ekɔ nɛ Pita kɔ: “Bu kaka, olo lunage ziī nɛɛ a wee wa le yɛɛ nyɔnɛbee o lu Galilii.” 71 Mɛ a bee bɔātɛ̄ ekaɛnu sa yira yii kɔ: “Mm suāloo nɛɛ bui gaa kɔ ama!” 72 Aba lo sɔ̄, edoo kɔɔ̄ bee kukpā lo eree baɛ sɔ̄, e Pita bee nyɛŋiabu nu Jizɔs bee ye kɔ nɛ kɔ: “Lɛɛ edoo kɔɔ̄ gae ku baɛ sɔ̄ kpā, o anna mɛ taa sɔ̄.” E a bee bɔātɛ̄ eto gbɛnɛ to.