Lo Jɔn Bee Ɛm
21 Sɔ̄ pya lo nu ama etɛ̄na, Jizɔs bee sinagekɛ̄ su ye loo tɔgɛ* pya a wee ye nyɔɔnɛ dumɛ bie kpaɛ̄ Pɛnɛ Tiberias. Bu lo sīdee ama na a bee tɔgɛ ye loo siā a. 2 Saimɔn Pita le Tɔmɔs (lo alu ekure Nwiī-maɛ̄-baɛ), Nataniɛl alu buɛ̄ Kena li Galilii, le baɛ miɔŋɔ Zɛbidii, gbaāloo baɛ dɔɔ̄na pya a wee ye nyɔɔnɛ dumɛ bee gbaa le kpaɛ̄ ziī. 3 Saimɔn Pita bee wa kɔ nɛ kɔ: “M gaa kii wee fɛ bari.” Ba kɔ ye nɛ: “I nyɔɔnɛ a.” E ba gbaa aa sa yii bu fah, mɛ ba naa bee aa lɔgɔ bari lo uunɛ.
4 Kerewo, sɔ̄ dee e’ina aa ɛɛ, Jizɔs bee yira beemaā, mɛ pya a wee ye nyɔɔnɛ dumɛ naa bee suā kɔ ɛɛ Jizɔs. 5 Lo sɔ̄, Jizɔs kɔ wa nɛ kɔ: “Gbomiɔŋɔ, bui ɛrɛge nu* edeā nu ni?” Ba ture kɔ: “Eeye!” 6 A bee wa kɔ nɛ kɔ: “Tobaa gbɔ̄ tɛrɛ bara bahle kpaɛ̄ fah a, e bui aa pio bari.” Nyɔɔwo, sɔ̄ ba bee top, ba naa bee dap zuura nyɔɔbee bari bee mma bu gbɛnɛ. 7 Lo sɔ̄ nɛɛ a wee nyɔɔnɛ dumɛ Jizɔs lo a wereloo bee kɔ nɛ Pita kɔ: “Ɛɛ Nɛɛ-a-i-ɛrɛ!” Nyɔɔwo, sɔ̄ Pita edaā kɔ ɛɛ Nɛɛ-a-i-ɛrɛ, a bee yaa ye bɛloo deenyɔɔ nyɔɔbee a bee le ekoloo* sa pɛɛ dɔ bu pɛnɛ a. 8 Mɛ dɔɔ̄na pya a wee ye nyɔɔnɛ dumɛ bee ɔp nwīgbagbara fah a nua sa zuura gbɔ̄ bari le e’mma bu a, nyɔnɛbee ba naa bee le kɛ̄ a binia aaloo uwe, a bee le aba 300 fit* aā kpaɛ̄ uwe.
9 Sɔ̄ ba bee ina nyɔɔ kpo-uwe, ba bee muɛ kpomiā bari le dɛɛ̄ le fituru. 10 Jizɔs kɔ wa nɛ: “Suaa pio bari bui bee aa ama nua.” 11 Nyɔɔwo, Saimɔn Pita bee yii bu fah, sa zuura gbɔ̄ gbɛnɛ gbɛnɛ bari le e’mma bu a nua bee kpomaā, a bee lu 153 epa bari a bee le bu. Mɛ kere lo bari bee kuīkpo, lo gbɔ̄ naa bee baara. 12 Jizɔs bee wa kɔ nɛ kɔ: “Luaa wee de nuede lɔɔrɛ.” Mɛ lɔgɔ pya a wee ye nyɔɔnɛ dumɛ naa bee ye dap bip kɔ: “Ɔɔ mɛɛ?” Nyɔnɛbee ba bee suā kɔ ɛɛ Nɛɛ-a-i-ɛrɛ. 13 Jizɔs bee lu sa su fituru a wa nɛ, e a bee wa nɛnage bari a. 14 Lo ama na lo eree taa sɔ̄ Jizɔs bee siraloo pya a wee ye nyɔɔnɛ dumɛ sɔ̄ a bee aakɛ̄ bu luh a.
15 Sɔ̄ ba edea nuede lɔɔrɛ sah, Jizɔs bee kɔ nɛ Saimɔn Pita kɔ: “Saimɔn nwiī Jɔn, o werege mɛ loo ee pya lo nu ama ni?” A bee ture kɔ: “Aiī, Nɛɛ-a-i-ɛrɛ, o suā kɔ m were a loo kaāna.” A bee ye kɔ nɛ kɔ: “Nɛ nuede na miɔŋɔ naana pee.” 16 A bee sinagekɛ̄ ye kɔ nɛ lo eree baɛ sɔ̄ kɔ: “Saimɔn nwiī Jɔn, o werege mɛ loo ni?” A bee ture kɔ: “Aiī, Nɛɛ-a-i-ɛrɛ, o suā kɔ m were a loo kaāna.” A bee ye kɔ nɛ kɔ: “Kuūdɛɛ̄loo na miɔŋɔ naana.” 17 A bee ye bip lo eree taa sɔ̄ kɔ: “Saimɔn nwiī Jɔn, o werege mɛ loo kaāna ni?” A bee kiɛ̄ Pita nyɔnɛbee a bee ye bip eree taa sɔ̄ kɔ “O werege mɛ loo kaāna ni?” Nyɔɔwo, a bee kɔ: “Nɛɛ-a-i-ɛrɛ, o suā dɛ̄dɛɛ̄ nu; o suā kɔ m were a loo kaāna.” Jizɔs kɔ ye nɛ: “Nɛ nuede na miɔŋɔ naana pee. 18 M kɔ kaka a nɛ, sɔ̄ o bee le zege, o wee yaa bɛloo sa kii ɛrɛgebah kɛ̄ o gbī esi. Mɛ sɔ̄ o e’ana, o niina baɛ bah a sa dɔɔ̄na nɛɛ yere a bɛloo loo sa a su kuma kɛ̄ oo gbī esi.” 19 A bee kɔ lo ba ama lo etɔgɛ kɛ̄ luh Pita enɛ ka Bari doo. Sɔ̄ ekɔa lo ba ama sah, a bee ye kɔ nɛ kɔ: “Kiisī lo enyɔɔnɛ mɛ.”
20 Pita bee kiiya sa muɛ nɛɛ a wee ye nyɔɔnɛ dumɛ lo Jizɔs wereloo aa wa nyɔɔnɛ, nɛɛ a bee ma bɛŋia beenyiɛ Jizɔs sɔ̄ ba aa bee de nuede loo uunɛ sa ye kɔ nɛ kɔ: “Nɛɛ-a-i-ɛrɛ, mɛɛ na aa gbī elɛɛ a a?” 21 Nyɔɔwo, sɔ̄ emɔna ye, Pita bee kɔ nɛ Jizɔs kɔ: “Nɛɛ-a-i-ɛrɛ, e lo nɛɛ ama ni a?” 22 Jizɔs kɔ ye nɛ: “Lo a le m gbī kɔ a le mmɛ sɔ̄ m lu, ena a a kuu a? Olo kiisī lo enyɔɔnɛ mɛ.” 23 Nyɔɔwo, ue ama bee yaara yɛɛ pya wuga sa kɔ nɛɛ a wee ye nyɔɔnɛ dumɛ ama naale e’u. Kerewo, Jizɔs naa bee kɔ a naale e’u, mɛ a bee kɔ: “Lo a le m gbī kɔ a le mmɛ sɔ̄ m lu, ena a a kuu a?”
24 Alɛ ama na nɛɛ a wee ye nyɔɔnɛ dumɛ lo a yira ekeebee loo pya nu ama sa ɛm pya nu ama a, e i suā kɔ ye ekeebee lu kaka.
25 A ɛrɛnage gbɛnɛ-edo pya dɔɔ̄na nu Jizɔs bee doo, e lo a bee lu e’ɛm dɛ̄dɛɛ̄ ɛɛ, nyɔuwe naale ebee dap toora dɛ̄dɛɛ̄ ui-kpa alu e’ɛm bu.