Lo Matiu Bee Ɛm
28 Bagara lɔɔrɛ nyɔɔ tua biradee bu kaɛ sɔ̄ Dee Fɛɛrɛloo etɛ̄na, Meri Magdelin le Meri wa Zɛbidii bee lu wee ɛp kpoli a.
2 E ɛp! Gbɛnɛ nyɔŋa kɛnɛkɛ̄ ebee dɔ lo kɛ̄, nyɔnɛbee ɛnjɛl Jɛhova* ebee lu aa bunyɔɔ sa kigere dɛm a lɛɛ, e a bee le e’ɛŋɛtɛ̄ nyɔɔ. 3 A mɔ bee ɛnɛmdee, e ye bɛloo bee ɛɛ doodoo snow. 4 Nyɔɔbee gbɛnɛ bɔɔ a bee aa pya baɛloo a, ba bee nyɔŋa sa bee pya e’ua.
5 Mɛ lo ɛnjɛl bee kɔ nɛ pya lo wa kɔ: “Bɔɔ aa i aa, nyɔnɛbee m suā kɔ bui gaa gbī Jizɔs a bee lu eka loo te a. 6 A naa lena akɛāma nyɔɔbee elua elɛɛ ye kɛ̄ bu luh dookɛ̄ a bee kɔ doo. Luaa sa ɛp kɛ̄ a bee lu emaɛ̄ ye. 7 Sa bui nwaabah si sa kɔ nɛ pya a wee ye nyɔɔnɛ dumɛ kɔ elua elɛɛ ye kɛ̄ bu luh, nyɔnɛbee a gaa i dasī kii Galilii. E bui muɛ ye bie lo kɛ̄. Ɛp! Nyɛŋiaābu pya nu m ekɔa i nɛ.”
8 Nyɔɔwo, ba bee nwaabah aa kɛ̄ li nɛɛ a, e ba su bɔɔ le gbɛnɛ ɛɛbu teā siā wee kɔ enɛ pya a wee ye nyɔɔnɛ dumɛ. 9 E ɛp! Jizɔs bee wa zɔ̄ŋia sa wa kɔ nɛ kɔ: “Kana muɛ̄!” Ba bee ye yiiloo, ye aabahloo ekaɛtɔ sa ye uubeekɛ̄ nɛ. 10 Lo sɔ̄ Jizɔs bee wa kɔ nɛ: “Bɔɔ aa i aa! Kiraa sa kɔ nɛ pya na wuga lokwa ba kii Galilii, e lo kɛ̄ na ba emuɛ mɛ bie a.”
11 Sɔ̄ ba bee le nyɔɔ dee aa kii lo kɛ̄, pio pya baɛloo a kii bu gbɛnɛ buɛ̄ a sa kɔ dɛ̄dɛɛ̄ nu a bee sira nɛ pya tɛsī ewɔp. 12 E sɔ̄ pya kanɛɛ le aba egbaara zɔ̄ŋia sa biraloo sah, ba bee nɛ gbɛnɛ-edo kpugi silva pya baɛloo a 13 sa kɔ: “Kɔaa kɔ, ‘Pya a wee ye nyɔɔnɛ dumɛ bee lu uunɛ sɔ̄ i le daa sa yip ye ii aā.’ 14 E lo Pailet dā, ili i baatɛ̄ ye nɛ leere,* bui aa nɛ taāŋa loo i.” 15 Nyɔɔwo, ba bee su lo kpugi silva sa doo dookɛ̄ a bee lu ekɔ wa nɛ doo, e nu ba bee kɔ a na alu ekɔ yaari yɛɛ pya Juu mmɛ anii’ee a.
16 Kerewo, 11 pya a wee nyɔɔnɛ dumɛ Jizɔs bee kii nyɔɔ kpokɛ̄ a le Galilii, kɛ̄ Jizɔs le aba ebee biraloo kɔ ba egbaa zɔ̄ŋia. 17 Sɔ̄ ba bee ye muɛ, ba bee ye uubeekɛ̄ nɛ, mɛ pio aba bee ɛrɛ baɛbaɛ beenyiɛ. 18 Jizɔs bee wa lu waɛloo sa wa kɔ nɛ kɔ: “Elua enɛ mɛ dɛ̄dɛɛ̄ ekpo aā bunyɔɔ mmɛ a kɛnɛkɛ̄. 19 Nyɔɔwo, kiraa sa doo kɔ pya nɛɛ a aabu dɛ̄dɛɛ̄ edonyɔɔ alu pya a mɛ nyɔɔnɛ dumɛ sa wa limaā bu bee Tɛ le Nwiīnɛɛdam le kaɛ edɔɔ̄, 20 wa tɔgɛ kɔ ba a doo dɛ̄dɛɛ̄ nu m bee i nɛ bu lok. E ɛp! M le i loo dɛ̄dɛɛ̄ dee mmɛ kuma lo sɔ̄ nyɔuwe ama.”*