Lo Luk Bee Ɛm
18 Lo sɔ̄, a bee su ziī edobah wa kɔā ue nɛ akiiloo kɛ̄ alu ebɛɛ̄ kɔ ba a kiisī lo eyere kara sa loo wa aa ɔ doo, 2 sa kɔ: “A ɛrɛ ziī nɛɛ biaɛ a bee le ziī buɛ̄ lo a naa wee ɛrɛ bɔɔ loo Bari ale nwadɛɛ̄ nɛɛ. 3 E a bee ɛrɛnage ziī wa ua dam a bee le lo buɛ̄ lo a wee ye si loo dɛ̄dɛɛ̄ sɔ̄ sa ye bara kɔ, ‘Biaɛ mɛ leere loo ue a le yɛɛ nɛɛ aa mɛ pima ue le mm.’ 4 Kɛādoo, a naa bee gbī edoo tua sɔ̄, mɛ sɔ̄ esaa a bee kɔ nɛ aba ɛɛ kɔ, ‘Kere mm ɛrɛ bɔɔ loo Bari ale nwadɛɛ̄ nɛɛ, 5 nyɔnɛbee wa ua dam ama enɛā mɛ etɛɛrɛloo gbɛnɛ a, m biaɛ ye leere lokwa a naa bialoo lu sa mɛ sah ekpo loo tɛ̄maloo ye bara.’” 6 Lo sɔ̄ Nɛɛ-a-i-ɛrɛ bee kɔ: “Naa daā nu nɛɛ biaɛ a naa lu nɛɛ kaāna dogo kɔ! 7 Bu kaka, ekɔ Bari naale ebiaɛ kaāna biaɛ nɛ pya a bee lu esagɛ lo ba ye to loo edɛɛ̄ le pie kuma sɔ̄ a wa ɛrɛ egerebu kumaloo ni? 8 M kɔ i nɛ, enwaabah wa biaɛ leere. Kerewo, sɔ̄ Nwiīnɛɛ elu, emuɛge dua yira* ama bu nyɔuwe ni?”
9 A bee sunage edobah ama kɔā ue nɛ pio pya ba dɛrɛ nyiɛ nyɔɔ wa kaāna dogo lo ba naa ɛp pya dɔɔ̄na yere dɛɛ̄ lɔgɔ nu kɔ: 10 “Baɛ nɛɛ bee kii bu tɔkaɛ wee yere kara, ziī aba bee le nɛɛ Farisii e elua a bee le nɛɛ tup etup. 11 Nɛɛ Farisii a bee yira yah sa yere kara bu beenyiɛ ye kɔ, ‘Aa Bari, m doo a yaa nyɔnɛbee mm le doodoo pya dɔɔ̄na nɛɛ—pya aŋana nu lɛɛbah nɛɛ, pya pɔrɔ dogo, pya kue wa nɛɛ—ale doodoo nɛɛ etup ama. 12 M wee kaɛ nuede baɛ sɔ̄ bu ziī kaɛ; e m wee nɛ lop kɛmkɛm loo pya nu m ɛrɛ.’ 13 Mɛ nɛɛ tup etup a bee yira kɛ̄ a binia sa naa bee dana kunɛ dɛɛ̄ ye ɛma bunyɔɔ, mɛ a bee zia bah beenyiɛ ye sa kɔ, ‘Aa Bari, to mɛ esaɛ̄ nyɔnɛbee m lu nɛɛ pɔrɔ.’ 14 M kɔ i nɛ, nɛɛ ama kii ye be sa tɔgɛ kɔ alue nɛɛ kaāna dogo ee nɛɛ Farisii a. Nyɔnɛbee ɛrɛgebah nɛɛ a danaloo ye nɛ nyɔɔ elu esu ye kuma kɛ̄, mɛ ɛrɛgebah nɛɛ a kuma loo ye kɛ̄ elu edana ye nɛ nyɔɔ.”
15 Lo sɔ̄, pya nɛɛ su gbomiɔŋɔ ye ma lokwa a wa daabahloo, mɛ sɔ̄ pya a wee ye nyɔɔnɛ dumɛ emɔna wa, ba bee bɔātɛ̄ wa kɔgara ue. 16 Kerewo, Jizɔs bee kue pya lo miɔŋɔ yaa loo ye sa kɔ: “Lɛraabahloo gbomiɔŋɔ a mɛ lu loo, e bui aa wa kpaɛ̄ nyɔnɛbee Buɛ̄-mɛnɛ Bari le nɛ pya a le doo wo ama. 17 Kaka m kɔ i nɛ, ɛrɛgebah nɛɛ a naa su Buɛ̄-mɛnɛ Bari doodoo nwiī, naale eyii bu doo pippip.”
18 E ziī nɛɛ aa bɛɛ bee ye bip kɔ: “Le Nɛɛ Tɔgɛnu, ena m doo lokwa m ɛrɛ dum anaatah a?” 19 Jizɔs bee ye ture nɛ kɔ: “Ena anua o kure mɛ le nɛɛ a? Lɔgɔ nɛɛ a lee naale mɛ aba Bari. 20 O suā nu Lok kɔ: ‘O aa kue wa dɔɔ̄na nɛɛ, o aa fɛ nɛɛ, o aa yip biu, o aa yira ekeebee esah, nwadɛɛ̄ o tɛ le o ka.’” 21 Lo nɛɛ bee kɔ: “M wee doo pya nu ama aā dee m bee le nwiī.” 22 Sɔ̄ Jizɔs edaā doo wo, a bee ye kɔ nɛ kɔ: “A ɛrɛ ziī nu o sii doo: Oo dɛ̄dɛɛ̄ nu o ɛrɛ sa nɛ pya kporo lɛɛ o nyɔɔnɛ mɛ dumɛ, e o ɛrɛ zɔ li bunyɔɔ.” 23 Sɔ̄ a bee dā lo ama, a kiɛ̄ ye kaāna nyɔɔbee a bee ɛrɛ gbɛnɛ-edo zɔ.
24 Jizɔs bee ye ɛp sa kɔ: “Naa ɛp kɛ̄ e’agabah pya a ɛrɛ kpugi kɔ ba a yii bu Buɛ̄-mɛnɛ Bari doo a! 25 Bu kaka, ewaɛ kɔ kamɛl a tɛɛ̄ dɛɛ̄ elaga ee kɔ nɛɛ mɛnɛ a yii bu Buɛ̄-mɛnɛ Bari.” 26 Pya a bee dā nu ama bee kɔ: “Mɛɛ na edap lu ekpɔā ani?” 27 A bee kɔ: “Nu a agaloo nɛɛ edoo waɛloo Bari.” 28 Mɛ Pita bee kɔ: “Ɛp! I elɛrabahloo pya nu i ɛrɛ sa a nyɔɔnɛ.” 29 A bee wa kɔ nɛ kɔ: “Kaka m kɔ i nɛ, lɔgɔ nɛɛ elɛrabahloo tɔ ale wa ale pya wuga ale tɛ le ka ale gbomiɔŋɔ nyɔɔbee Buɛ̄-mɛnɛ Bari 30 lo a naale e’ɛrɛ gbɛnɛ-edo sɔ̄ bu lo sɔ̄ ama* naale, e bu sɔ̄ a gaa lu e’ɛrɛ dum anaatah.”
31 Lo sɔ̄, a kue Lop Le Baɛ pya ye nɛɛ lɛɛratam kuma dɔɔ̄na kɛ̄ sa wa kɔ nɛ kɔ: “Ɛp! I gaa kii Jerusɛlɛm, e dɛ̄dɛɛ̄ nu pya nɛɛ mɔmanudɛɛ̄ bee ɛm kumaloo Nwiīnɛɛ gaa le dooa gbɔ̄mɛɛ.* 32 Bu edobah, elu esu ye yere kɛ̄bah pya edonyɔɔ, e ba ekɛgɛ ye, ye si bag loo sa ye tup maāsah loo. 33 E sɔ̄ ba esua etari ye zima sah, ba efɛ ye, mɛ e’aakɛ̄ nyɔɔ lo eree taa biradee.” 34 Kerewo, ba naa bee suā nu pya lo nu kura, nyɔnɛbee a bee lu egɔ̄ pya ue ama wa lɛɛloo, nyɔɔwo ba naa dap dābeeloo pya nu a kɔ.
35 Sɔ̄ Jizɔs bee lu waɛloo Jeriko, ziī nɛɛ zimadɛɛ̄ bee le e’ɛŋɛtɛ̄ loo dee aa bara nu. 36 Nyɔɔbee a bee dā sɔ̄ gbɛnɛkpo nɛɛ aa tɛɛ̄ a, a bee bɔātɛ̄ ebip nu aa sira. 37 Ba bee ye kɔ nɛ kɔ: “Jizɔs nɛɛ Nazarɛt gaa tɛɛ̄!” 38 Aba lo sɔ̄, a wiikpā kɔ: “Jizɔs Nwiī Devid, to mɛ esaɛ̄!” 39 E pya a bee ye le deesī bee bɔātɛ̄ ekɔgara ye ue kɔ a ɔbɛpiī, mɛ a bee agɛrɛbah wiikpā kɔ: “Nwiī Devid, to mɛ esaɛ̄!” 40 Lo sɔ̄, Jizɔs bee yira sa kɔ ba a su lo nɛɛ ye mae. E sɔ̄ lo nɛɛ e’ina ye kpaɛ̄, Jizɔs bee ye bip kɔ: 41 “Ena o gbī kɔ m doo a nɛ a?” A bee kɔ: “Nɛɛ-a-i-ɛrɛ, doo kɔ m muɛ nu.” 42 Nyɔɔwo, Jizɔs bee ye kɔ nɛ kɔ: “Sikɛ̄ muɛ nu, o yira edoora kɔ loo a a nwaɛ̄.” 43 E aba lo sɔ̄, a muɛ nu, e a bee bɔātɛ̄ enyɔɔnɛ Jizɔs sa bee leera Bari. Gbaāloo wo, sɔ̄ dɛ̄dɛɛ̄ pya nɛɛ bee muɛ nu a bee sira ama, ba bee leera Bari.