Lo Matiu Bee Ɛm
11 Sɔ̄ Jizɔs ekɔa nɛ 12 pya a wee ye nyɔɔnɛ dumɛ nu ba edoo sah, a bee kii wee zue ue sa tɔgɛnu bu pya buɛ̄ a le waɛloo.
2 Mɛ sɔ̄ Jɔn eyira kpɔgɔrɔ dā nu akiiloo pya tam Kraist gaa si, a yere pya a wee ye nyɔɔnɛ dumɛ 3 kɔ ba a bip ye kɔ: “Olo lege Nɛɛ A Gaa Lu, sɛh i ɛmadɛɛ̄ dɔɔ̄na nɛɛ ni?” 4 Jizɔs ture wa nɛ kɔ: “Kiraa sa kɔ nu bui dā sa muɛ nɛ Jɔn kɔ: 5 Elua edoo kɔ pya zimadɛɛ̄ a muɛ nu, pya kɔgah ekiā, pya ebiakpaŋ ɛɛ ɔ̄ŋia, pya naɛ̄bee dā nu, pya a u lu elɛɛ kɛ̄ bu luh, e elua ezue le yereue nɛ pya kporo. 6 Ɛɛbu a le nɛ nɛɛ a naa dɔ nyɔɔbee mda.”
7 Mɛ sɔ̄ ba gaa bee ye aa kpaɛ̄ obia kii, Jizɔs bɔātɛ̄ ekɔ nu akiiloo Jɔn nɛ gbɛnɛkpo nɛɛ a kɔ: “Ena bui bee si bu kpo-sagara-wii wee ɛp a? Ekpotiŋ efɔp gaa nyɔŋɛ nɛ sī nɛ dumɛ ni? 8 Taɛ ena bui bee kii ee wee ɛp a? Ekɔ ziī nɛɛ a yaa bɛloo a lee?* Kɛ̄ pya a yaa bɛloo a lee wee le na tɔ mɛnɛ. 9 Alu taɛ ena bui bee kii ee wee ɛp a? Lo emuɛ nɛɛ mɔmanudɛɛ̄ ni? Aiī! ɛɛ nɛɛ mɔmanudɛɛ̄ sa eenage nyɔɔ wo. 10 Alɛ ama na nɛɛ a bee lu e’ɛm kumaloo kɔ: ‘Ɛp! M gaa yere na nɛɛ lɛɛratam a zaāsī, nɛɛ a gaa le kwa o dee a sɛɛ!’ 11 Kaka m kɔ i nɛ, lɔgɔ nɛɛ a le yɛɛ pya nɛɛwa bee maɛ̄ a eenyɔɔ Jɔn Nɛɛ Limaā naale, mɛ nɛɛ alu nwīgbagbara bu Buɛ̄-mɛnɛ bunyɔɔ lu gbɛnɛ ye ee. 12 Aāge bu dee Jɔn Nɛɛ Limaā mmɛ anyaawo, Buɛ̄-mɛnɛ bunyɔɔ na nu pya nɛɛ aa piiga lo e’ɛrɛ a, e pya a biibahkɛ̄ kponia aa ye ɛrɛ. 13 Nyɔnɛbee lɛɛ Jɔn gae lu, Pya Mɔmanudɛɛ̄ le Lok ebee kɔ nu esira; 14 e lo a le bui yiga ale buii yiga, Jɔn na ‘Elaija lo ba bee kɔ a gaa lu a.’ 15 Doolo nɛɛ a ɛrɛ tɔ̄ a dā.
16 “Mɛɛ na m su sɔ̄ eku nyɔuwe ama dooreloo ani? A le doodoo gbomiɔŋɔ ba le e’ɛŋɛtɛ̄ kɛ̄du sa gaa kue pya wa gbo ba wee nyɔɔnɛ bira bii, 17 sa kɔ: ‘I bee fuuri ezinigā i nɛ mɛ buii bee yep, i bee toto mɛ buii bee ɛrɛ ekiɛ̄nu.’ 18 Bu aba lo sīdee, Jɔn bee lu e a naa denu ale ɔ̄ nu mɛ pya nɛɛ bee kɔ: ‘A ɛrɛ pɔrɔ-edɔɔ̄.’ 19 Mɛ Nwiīnɛɛ bee lu, denu sa ɔ̄ nu, mɛ pya nɛɛ bee kɔ: ‘Ɛp! Nɛɛ gbɛnɛ de le nɛɛ a ɔ̄ mii gbɛnɛ, gbo pya tup etup le pya pɔrɔ.’ Kerewo, nɛɛ suānu wee tɔgɛ ye kaāna dogo tɛ̄maloo ye tam.”*
20 Lo sɔ̄ a bɔātɛ̄ begee ue pya buɛ̄ a bee tɔɔ̄ si gbɛnɛ-edo ye nyɛŋiatam nyɔnɛbee ba naa bee kiiya, sa wa kɔ nɛ kɔ: 21 “Ekiɛ̄nu a le a nɛ a Korezin! Ekiɛ̄nu a le a nɛ a Bɛtsaida! nyɔnɛbee lo a le pya nyɛŋiatam a bee lu esi i bu na a bee lu esi bu Taia le Saidɔn a, ba ebee kiiya aa dee tɛ̄maloo eyaa bɛloo biirabu sa uuwa tɔ̄ bee. 22 Mɛ m kɔ i nɛ, nyɔɔ Dee Biaɛ, nu e’aga i loo ee kɛ̄ e’aga loo Taia le Saidɔn doo. 23 E olo a Kapaniɔm, eluge edana a nɛ nyɔɔ emanyɔɔ dɛ̄dɛɛ̄ nu ni? Eeye, elu esu a kuma kɛ̄ mmɛ taɛ bu bana luh* nyɔnɛbee lo a le pya nyɛŋiatam a bee lu esi a bu na a bee lu esi bu Sɔdɔm a, ebee le mmɛ nii’ee. 24 Mɛ m kɔ i nɛ, nu e’aga i loo nyɔɔ Dee Biaɛ ee kɛ̄ e’aga loo buɛ̄ Sɔdɔm doo.”
25 Lo sɔ̄ Jizɔs bee kɔ: “M leera a kɛ̄sī dɛ̄dɛɛ̄ nɛɛ, a Tɛ, Nɛɛ a ɛrɛ bunyɔɔ le kɛnɛkɛ̄, nyɔnɛbee o egɔā pya nu ama lɛɛloo pya suānu le pya suā kpa sa muuna nɛ gbomiɔŋɔ. 26 Aiī, Aa Tɛ nyɔnɛbee lo ba ama lu nu a a nia. 27 Na Tɛ enɛā mɛ dɛ̄dɛɛ̄ nu, e lɔgɔ nɛɛ naa suāloo Nwiīnɛɛdam a leere mɛ aba Tɛ; e lɔgɔ nɛɛ naa suānage loo Tɛ a leere mɛ aba Nwiīnɛɛdam le ɛrɛgebah nɛɛ Nwiīnɛɛdam gbī kɔ a suāloo Tɛ a. 28 Luaa mɛ loo bɔɔlo pya a piaga loo tam sa toora edɔ̄nia toh, e m nɛ i iinaloo. 29 Suaa na yoke kɛra sa mɛ nɔ nu aāloo, nyɔnɛbee m lu fɛgɛ sa kumalookɛ̄ bu beenyiɛ, e bui ɛrɛ iinaloo. 30 Nyɔnɛbee na yoke naa ziloo,* e na toh waɛbah.”