Lo Matiu Bee Ɛm

23 Lo sɔ̄ Jizɔs kɔ nɛ gbɛnɛkpo nɛɛ a le pya a wee ye nyɔɔnɛ dumɛ kɔ: 2 “Pya ɛm kpa le pya Farisii esua wa loo sere dɔ Mozis. 3 Nyɔɔwo, doraa sa sere dɛ̄dɛɛ̄ nu ba kɔ, mɛ bui aa doo nu ba doo nyɔnɛbee ba kɔ mɛ ba naa doo nu ba kɔ. 4 Ba bɔp edɔnia toh yere bee gāŋana pya nɛɛ, mɛ ba alaba naa gbī esu kunɛ bee nwībah taāloo lɛɛ dɔ. 5 Dɛ̄dɛɛ̄ nu ba doo, ba doo lokwa pya nɛɛ wa muɛ, nyɔnɛbee ba doo kɔ pya wa phylactery lo ba wee yaa nua nu kpega a kuī bu sa doo kɔ eza a le bee egā wa bɛloo a nyɔɔ. 6 Ba wee gbī e’ɛŋɛtɛ̄ dɔ ka* sɔ̄ alu ekue wa loo nuede le ɛŋɛtɛ̄ deesī* te bie tɔ bɔŋanaloo 7 le kana muɛ̄ kɛ̄du le kɔ pya nɛɛ a kuree wa Rabai.* 8 Mɛ aa lu ekure i Rabai nyɔnɛbee bui ɛrɛ ziī Nɛɛ tɔgɛnu, e dɛ̄dɛɛ̄ bui lu wuga. 9 Dɔɔ̄na, bui aa su lɔgɔ nɛɛ kure tɛ a bu nyɔuwe ama, mɛ bui ɛrɛ aba ziī Tɛ lo a le li bunyɔɔ. 10 E lɔgɔ nɛɛ aa i su kure nɛɛ zaāsī nyɔnɛbee bui ɛrɛ aba ziī nɛɛ zaāsī lo a le Kraist. 11 Mɛ nɛɛ alu gbɛnɛ i yɛɛ ɛrɛ elu bui nɛɛtam. 12 Ɛrɛgebah nɛɛ a dana loo ye nɛ nyɔɔ elu esu ye kuma kɛ̄, mɛ nɛɛ a kumalookɛ̄ elu edana ye nɛ nyɔɔ.

13 “Ekiɛ̄nu a le i nɛ a pya ɛm kpa le pya Farisii, pya baɛsī! nyɔnɛbee bui kpaɛ̄ Buɛ̄-mɛnɛ bunyɔɔ lɛɛ loo pya nɛɛ; sɔ̄ bɔɔlo buii yii a, buii aanage loo pya a gbī eyii kɔ ba a yii. 14* ——

15 “Ekiɛ̄nu a le i nɛ a pya ɛm kpa le pya Farisii, pya baɛsī! nyɔnɛbee bui fia maā sa kiāŋa bu dɛ̄dɛɛ̄ buɛ̄ lo edoo kɔ ziī nɛɛ a gbaaloo yigabari pya Juu, e sɔ̄ a elua sa i gbaaloo, bui doo kɔ a yii bu Gɛhɛna,* e alɛ sikɛ̄ si pɔrɔ ee bɔɔlo.

16 “Ekiɛ̄nu a le i nɛ bɔɔlo pya zimadɛɛ̄ a gaa tɔgɛ dee pya dɔɔ̄na lo bui kɔ, ‘Lo a le ziī nɛɛ su tɔkaɛ nyiā yii, a naa lu lɔgɔ nu; mɛ lo a le ziī nɛɛ su gold a le tɔkaɛ nyiā yii, a ɛrɛ edoo nu a bee yira.’ 17 Pya ezu le pya zimadɛɛ̄! Amunu na a kuī a, lo gold sɛh tɔkaɛ a doo kɔ lo gold a le kaɛ? 18 Dɔɔ̄na, ‘Lo a le ziī nɛɛ su da wɔp zɔɔ nyiā yii a naa lu lɔgɔ nu; mɛ lo a su dɔɔ̄nu a le nyɔɔ lo da wɔp zɔɔ nyiā yii, a ɛrɛ edoo nu a bee yira.’ 19 Pya zimadɛɛ̄! Amunu na a kuī a, lo dɔɔ̄nu sɛh da alu ewɔp lo dɔɔ̄nu nyɔɔ? 20 Nyɔɔwo, ɛrɛgebah nɛɛ a su da wɔp zɔɔ nyiā yii gaa su lo da le ɛrɛgebah nu a le nyɔɔ nyiā yii; 21 e ɛrɛgebah nɛɛ a su tɔkaɛ nyiā yii gaa su Nɛɛ a tɔɔ̄ lo tɔkaɛ nyiā yii; 22 e ɛrɛgebah nɛɛ a su bunyɔɔ nyiā yii gaa su kasi mɛnɛ Bari le Nɛɛ a le e’ɛŋɛtɛ̄ nyɔɔ nyiā yii.

23 “Ekiɛ̄nu a le i nɛ a pya ɛm kpa le pya Farisii, pya baɛsī! nyɔnɛbee bui nɛ ziī nyɔɔ lop loo mint le dill le cumin,* mɛ bui ɛp pya nu a kuī bu Lok tɛrɛ lo a le kaāna biaɛ, toesaɛ̄ le yira. Alu ebɛɛ̄ lo edoo pya lo tuatua nu a, mɛ a naa lee e’ɛp pya elua nu a tɛrɛ. 24 Bɔɔlo pya zimadɛɛ̄ a gaa tɔgɛ dee pya dɔɔ̄na, bui kuɛ̄ mum lɛɛ nyɔɔ mii mɛ bui yɔgara Kamɛl!

25 “Ekiɛ̄nu a le i nɛ a pya ɛm kpa le pya Farisii, pya baɛsī! nyɔnɛbee bui log ekpaloo kɔp le ekpaloo fɛrɛ, mɛ biaɛ mma wa bu, e kɛ̄ bɔɔlo le doo lo, wiibu* le doo nu a i nia mma i bu. 26 Bɔɔlo pya Farisii alu zimadɛɛ̄, daasī log bu kɔp le bu fɛrɛ ɛɛrɛ lokwa ye ekpaloo dapnage ɛɛ.

27 “Ekiɛ̄nu a le i nɛ a pya ɛm kpa le pya Farisii, pya baɛsī! nyɔnɛbee bui le doodoo kpoli alu etɛrɛ ɛɛ egba loo lo ye ekpaloo wee kpedɛɛ̄, mɛ nu a ye mma bu na ekpo ekpo nɛɛ e’ua le dɛ̄dɛɛ̄ nu a naa ɛɛ. 28 Bui sere loo i doodoo pya kaāna dogo kɛ̄sī pya nɛɛ, mɛ baɛsī le gbee lok mma i bu.

29 “Ekiɛ̄nu a le i nɛ a pya ɛm kpa le pya Farisii, pya baɛsī! nyɔnɛbee bui kwa bana luh pya nɛɛ mɔmanudɛɛ̄ sa kwaloo kpoli* pya kaāna dogo, 30 e bui kɔ, ‘Lo i bee le bu dee pya i nama tɛ, ii le ebee wa nyɔɔnɛ egara miī pya nɛɛ mɔmanudɛɛ̄.’ 31 Nyɔɔwo, bui gaa yira ekeebee loo aba bui kɔ bɔɔlo na miɔŋɔ pya a bee fɛ pya nɛɛ mɔmanudɛɛ̄ a. 32 Nyɔɔwo, doraa gbɔ̄mɛɛ nu pya bui nama tɛ bee doo.

33 “Bɔɔlo miɔŋɔ yɔɔ le miɔŋɔ bɔm, bui doodoo wa dap teera aaloo biaɛ Gɛhɛna* ni? 34 Nyɔɔwo, m gaa yere pya nɛɛ mɔmanudɛɛ̄, pya suānu, le pya nɛɛ zuurabahtɔ̄ i ma. Bui gaa le fɛ pio aba sa wa ka loo te, e bui zip siga aba bie bu bui tɔ bɔŋanaloo sa wa tɛ̄ŋaloo aā ziī buɛ̄ yii ziī, 35 lokwa miī dɛ̄dɛɛ̄ pya kaāna dogo elua e’egara a kɛnɛkɛ̄ i le bee, aāloo miī Ebɛl nɛɛ kaāna dogo mmɛ loo miī Zekaraia nwiī Berakaia, nɛɛ bui bee fɛ bie yɛɛ kɛ̄ kaɛ le kɛ̄ wɔp zɔɔ. 36 Kaka m kɔ i nɛ, dɛ̄dɛɛ̄ nu ama elu nyɔɔ lo sɔ̄ eku nyɔuwe ama.

37 “Jerusɛlɛm, Jerusɛlɛm, a wee fɛ pya mɔmanudɛɛ̄ sa tubo dɛm pya alu eyere ye ma; gbɛnɛ-edo sɔ̄ m bee gbī ebɔŋɛnɛloo pya o miɔŋɔ dookɛ̄ kɔɔ̄ wee bɔŋɛnɛloo pya ye miɔŋɔ kɛɛ̄ baɛ ye laba doo! Mɛ buii bee gbī. 38 Ɛp! Bui tɔ elua elɛɛbahloo bie i nɛ.* 39 Nyɔnɛbee m kɔ i nɛ, aā anyaawo buii le esinakɛ̄ mɛ muɛ mmɛ sɔ̄ bui kɔ, ‘Leelee a le nɛ nɛɛ alu bu bee Jɛhova!’”