Lo Jɔn Bee Ɛm
14 “Bui aa doo kɔ beenyiɛ i a nɛ i taāŋa. Ɛrɛaa yira bu Bari; sa bui ɛrɛnage yira bu mda. 2 Bu tɔ na Tɛ, booboo kɛ̄ etɔɔ̄ le. Lo a naa bee le doo wo, m bee i kɔ nɛ, nyɔnɛbee m gaa kii wee kwa kɛ̄ i esɛɛ. 3 Gbaāloo wo, lo m kii wee kwakɛ̄ i esɛɛ, m obia lu sa i su kuma kɛ̄ m le, lokwa kɛ̄ m le, bɔɔlo bui lenage. 4 E bui suā kɛ̄ m gaa kii.”
5 Tɔmɔs bee ye kɔ nɛ kɔ: “Nɛɛ-a-i-ɛrɛ, ii suā kɛ̄ o gaa kii. I tɛɛ̄ doodoo wa suā dee?”
6 Jizɔs bee ye ture nɛ kɔ: “Mda na dee a, le kaka ue, le dum. Lɔgɔ nɛɛ naale edap lu loo Tɛ lo a naa tɛ̄ma mɛ loo. 7 Lo bɔɔlo bee mɛ suāloo, bui bee suānage loo na Tɛ; aā anyaawo kiisī, bui esuā ye loo, e bui emɔna ye.”
8 Filip bee ye kɔ nɛ kɔ: “Nɛɛ-a-i-ɛrɛ, tɔgɛ i loo Tɛ a, e egbɔɛ̄ i loo.”
9 Jizɔs bee ye ture nɛ kɔ: “Filip, kere m etɔɔ̄na i loo bu nyɔɔnyɔɔ sɔ̄, o sii mɛ suāgeloo ni? Ɛrɛgebah nɛɛ emɔna mɛ, emɔnanage Tɛ a. Ena anua o kɔ, ‘Tɔgɛ i loo Tɛ a’? 10 Ekɔ oo yiga kɔ mda gbaaloo Tɛ a, e Tɛ a gbaaloo mda ni? Pya nu m i kɔ nɛ ama mm kɔ nyɔɔ na loo, mɛ Tɛ a gbaaloo mda aa si ye tam. 11 Bui yigaa mɛ nɛ kɔ mda gbaaloo Tɛ a, e Tɛ a gbaaloo mda; e lo a le buii yiga bu pya nu m kɔ, yigaa nyɔɔbee pya tam m si. 12 Kaka m kɔ i nɛ, ɛrɛgebah nɛɛ a mɛ ɛrɛ yira bu esinage pya tam mda si; e a edoonage eenyɔɔ wo nyɔnɛbee mda gaa pii Tɛ a. 13 Gbaāloo wo, ɛrɛgebah nu bui bara bu na bee, m gaa le doo lokwa alu enɛ ka Tɛ a tɛ̄maloo Nwiīnɛɛdam. 14 Lo bui bara ɛrɛgebah nu bu na bee, m gaa le doo.
15 “Lo bui were mɛ loo, bui sere pya na lok. 16 E m bara Tɛ a sa enɛ i dɔɔ̄na nɛɛ yerebah* lo ele i loo mmɛ deedee, 17 ɛɛ na edɔɔ̄ kaka, lo nyɔuwe naa dap ɛrɛ nyɔnɛbee ba naa muɛ ale suā ye loo. Bɔɔlo suā ye loo nyɔnɛbee a le i loo sa i le bu. 18 Mm le elɛɛ i bahloo bie bu ekiɛ̄nu.* M lu i loo. 19 Nwīgbagbara sɔ̄ aā anyaawo, nyɔuwe naale emuɛna mɛ, mɛ bɔɔlo bui muɛ mɛ nyɔnɛbee m le dum, e bɔɔlo ele dum. 20 Bu lo dee, bui suā kɔ mda gbaaloo na Tɛ, e bɔɔlo gbaaloo mda, e mda gbaaloo bɔɔlo. 21 E ɛrɛgebah nɛɛ a su na lok sa wa sere na nɛɛ a mɛ wereloo a. E na Tɛ ewereloo ɛrɛgebah nɛɛ a mɛ wereloo, e mda m were ye loo sa tɔgɛ na loo siā ye nɛ.”
22 Judas, lo a naa le Iskariɔt kɔ ye nɛ kɔ: “Nɛɛ-a-i-ɛrɛ, ena anua o gbī etɔgɛ oloo siā i nɛ sa oo doo wo nɛ nyɔuwe a?”
23 Jizɔs ture ye nɛ kɔ: “Ɛrɛgebah nɛɛ a mɛ wereloo, edoo pya nu m kɔ, e na Tɛ ewere ye loo, e i lu ye loo sa ye nyɔɔnɛ tɔɔ̄. 24 Ɛrɛgebah nɛɛ a naa were mɛ loo naa doo nu m kɔ. Pya ue bui aa dā ama naale lo mda, mɛ lo Tɛ a bee mɛ yere.
25 “M ekɔa pya nu ama i nɛ kuma sɔ̄ m i lege loo. 26 Mɛ nɛɛ yerebah, lo a le kaɛ edɔɔ̄ lo na Tɛ eyere i ma bu na bee na etɔgɛ i dɛ̄dɛɛ̄ nu sa doo kɔ bui nyɛŋiabu dɛ̄dɛɛ̄ nu m bee i kɔ nɛ a. 27 M bie efɛɛloo i nɛ, mdaa efɛɛloo na m i nɛ a. Mm i nɛ dookɛ̄ nyɔuwe wee nɛ doo. Bui aa doo kɔ beenyiɛ i a nɛ i taāŋa ale ɛrɛ gbɛnɛ bɔɔ. 28 Bui bee dā sɔ̄ m bee i kɔ nɛ kɔ, ‘M gaa kii, e m obia i lu loo.’ Lo bui were mɛ loo, bu i e’ɛɛ kɔ m gaa kii pii Tɛ a, nyɔnɛbee Tɛ a ee mɛ nyɔɔ. 29 Nyɔɔwo, m kɔ i nɛ anyaawo lɛɛ a gae sira, lokwa sɔ̄ esira, bui dap yiga. 30 Mm le enyɔɔnɛna i kɔ gbɛnɛ-edo nu nyɔnɛbee nɛɛ aa bɛɛ nyɔuwe ama aa lu, e a naa ɛrɛ mɛ lɔgɔ bah ekpo loo. 31 Mɛ lokwa nyɔuwe suā kɔ m wereloo Tɛ a, m gaa doo taɛ nu Tɛ bee mɛ nɛ lok kɔ m doo. Aaraakɛ̄, dooraa i aa akɛāma kii.