Lo Jɔn Bee Ɛm
13 Nyɔnɛbee Jizɔs bee suā lɛɛ a gae lu sɔ̄ doonu Tɛɛ̄yee kɔ ye sɔ̄ lo e’aa nyɔuwe ama pii ye Tɛ elua le kɔ a bee wereloo pya alɛ a bee le bu nyɔuwe ama, a bee wa wereloo mmɛ kuma. 2 Sɔ̄ ba bee le aa de nuede uunɛ, e Pɔrɔ-edɔɔ̄ ebee yere bu beenyiɛ Judas Iskariɔt nwiī Saimɔn kɔ a lɛɛ ye. 3 Nyɔɔwo, kuma sɔ̄ Jizɔs bee suā kɔ ye Tɛ esua dɛ̄dɛɛ̄ nu ye yeree kɛ̄bah le kɔ a aakɛ̄ Bari le, e a e’obianage pii Bari a, 4 a bee aakɛ̄ loo nuede uunɛ a sa lɛa ye bɛloo deenyɔɔ loo. E a su ebakaɛ̄ bɔba kɛ̄tɛ̄ ye. 5 Sɔ̄ esaa, a bee yere maā bu nu bira maā bu sa bɔātɛ̄ elog tɔ pya a wee ye nyɔɔnɛ dumɛ sa su ebakaɛ̄ a bee sima kɛ̄tɛ̄ ye a wa siŋaloo tɔ kagɛrɛ. 6 Lɛɛ alu ina kɛ̄ Saimɔn Pita le, e Saimɔn Pita kɔ ye nɛ kɔ: “Nɛɛ-a-i-ɛrɛ, ekɔ o gbī elog mɛ ekpotɔ ni?” 7 Jizɔs ture ye nɛ kɔ: “Oo dābeeloo pya nu m aa doo ama anyaawo, mɛ o dābeeloo sɔ̄ esaa.” 8 Pita kɔ ye nɛ kɔ: “Oo le elog mɛ tɔ doo pippip.” Jizɔs bee ye ture nɛ kɔ: “Lo mm a log tɔ, oo le eyɔ mɛ ɛrɛ lɔgɔ epoo.” 9 Saimɔn Pita bee ye kɔ nɛ kɔ: “Nɛɛ-a-i-ɛrɛ, o aa mɛ log aba tɔ, mɛ lognage mɛ baɛ bah le ekobee.” 10 Jizɔs bee ye kɔ nɛ kɔ: “Ɛrɛgebah nɛɛ ebee bira maā, aba baɛ tɔ ye na alu ebɛɛ̄ kɔ a loga a nyɔnɛbee a le ɛɛ. Bɔɔlo, bui le ɛɛ, mɛ a naale dɛ̄dɛɛ̄ bui.” 11 Nyɔnɛbee a bee suāloo nɛɛ a gaa ye lɛɛ. Nu anua lo a bee kɔ: “Naale dɛ̄dɛɛ̄ bui na bui le ɛɛ a.”
12 Nyɔɔwo, sɔ̄ eloga wa tɔ sah, a bee yaa ye bɛloo deenyɔɔ sa sikɛ̄ ɛŋɛtɛ̄ loo kasi nuede a sa wa kɔ nɛ kɔ: “Bui dāgebeeloo nu m i doo loo ama ni? 13 Bui kure mɛ ‘Nɛɛ Tɔgɛnu’ le ‘Nɛɛ-a-i-ɛrɛ,’ e bui kɔ leere nyɔnɛbee nɛɛ m lu lo. 14 Nyɔɔwo, lo mda m lu Nɛɛ-a-i-ɛrɛ le Nɛɛ Tɔgɛnu log i tɔ, bɔɔlo ɛrɛnage elog tɔ ɛnia bui. 15 Nyɔnɛbee mda bie edobah kɛ̄ i nɛ lokwa bui doonage dookɛ̄ mda i doo loo doo. 16 M kɔ kaka i nɛ kɔ, zooro naa wee eenyɔɔ ye tɛtɔ, ale kɔ nɛɛ alu eyere e’eenyɔɔ nɛɛ a bee ye yere. 17 Lo bui suā pya nu ama sa doo, ɛɛbu ele i nɛ. 18 Mm gaa kɔ lo ba ama kumaloo dɛ̄dɛɛ̄ bui; m suā pya nɛɛ m ebee sagɛ. Mɛ lokwa nu a bee lu ekɔ bu kpa kaɛ dooa mmɛnɛ, lo a kɔ: ‘Nɛɛ aa bee de na fituru edana ye tɛ̄kpɔŋtɔ* lo edoo mɛ.’ 19 Aā anyaawo kiisī, m kɔ lo ba ama i nɛ lɛɛ a gae sira lokwa sɔ̄ esira, bui yiga kɔ mda na ɛɛ a. 20 M kɔ kaka i nɛ kɔ, nɛɛ a su ɛrɛgebah nɛɛ m yere sunage mda, e ɛrɛgebah nɛɛ a mɛ su sunage Nɛɛ a bee mɛ yere.”
21 Sɔ̄ Jizɔs ekɔa pya ue ama sah, a bee ɛrɛ etɛɛrɛloo bu loo ye* sa a bee yira ekeebee kɔ: “Kaka m kɔ i nɛ, zii bui gaa le lɛɛ mɛ.” 22 Pya a wee ye nyɔɔnɛ dumɛ bee ɛpsī ziī nyɔnɛbee ba naa suā nɛɛ a gaa kɔ. 23 Ziī nɛɛ a le yɛɛ pya a wee ye nyɔɔnɛ dumɛ, lo Jizɔs wereloo, bee le e’ɛŋɛtɛ̄ kpaɛ̄* Jizɔs. 24 Nyɔɔwo, Saimɔn Pita bee su ekobee ye kuema sa ye kɔ nɛ kɔ: “Kɔ i nɛ nɛɛ aa kɔ nu akiiloo.” 25 Nyɔɔwo, lo nɛɛ sikɛ̄ su bee dɛrɛ nyɔɔ nyiɛ Jizɔs sa ye bip kɔ: “Nɛɛ-a-i-ɛrɛ, lo nɛɛ na mɛɛ?” 26 Jizɔs bee ture kɔ: “Ɛrɛgebah nɛɛ lo m nɛ nwīekpo fituru sɔ̄ m ekaa bu sah.” Nyɔɔwo, sɔ̄ esua lo fituru ka bu, a bee su nɛ Judas nwiī Saimɔn Iskariɔt. 27 Sɔ̄ Judas esua lo nwīekpo fituru sah, Setan bee ye yii bu. Nyɔɔwo, Jizɔs bee ye kɔ nɛ kɔ: “Nwaabah doo nu o gaa doo.” 28 Kerewo, lɔgɔ pya aa bee ye nyɔɔnɛ denu nyɔɔ kasi a naa bee suā nu anua a kɔ ye nɛ doo wo. 29 Kɛādoo, pio nɛɛ aa bee kɛɛrɛ kɔ kuma sɔ̄ Judas na a wee aara ekpo kpugi a, mɛ Jizɔs aa bee ye kɔ nɛ kɔ, “Yaɛ pya nu a i bɛɛ̄ loo lo doonu,” ale su pio nu nɛ pya kporo. 30 Nyɔɔwo, sɔ̄ esua lo nwīekpo fituru sah, a bee aa aba sɔ̄. E zii ebee yii.
31 Nyɔɔwo, sɔ̄ e’aara tɔ kii ee, Jizɔs bee kɔ: “Nyaawo, elua enɛ ka Nwiīnɛɛ, sa elua enɛ ka Bari ye tɛ̄maloo. 32 Bari enɛ ye ka, sa a naale epee sɔ̄ lo enɛ ye ka. 33 Pya gbomiɔŋɔ, mm le etɔɔ̄na i kpaɛ̄ bu nyɔɔnyɔɔ sɔ̄. Bui gbī mɛ, e dookɛ̄ m bee kɔ nɛ pya Juu doo, m kɔnage i nɛ anyaawo, ‘Kɛ̄ m gaa kii buii le edap lu.’ 34 Aā lok na m aa i nɛ a, kɔ bui wereloo ɛnia bui; dookɛ̄ mda bee i wereloo doo; bui wereaanageloo ɛnia bui. 35 Tɛ̄maloo lo ba ama na dɛ̄dɛɛ̄ nɛɛ esuā kɔ bui lu pya a wee mɛ nyɔɔnɛ dumɛ a—lo a le bui wereloo ɛnia bui.”
36 Saimɔn Pita bee ye kɔ nɛ kɔ: “Nɛɛ-a-i-ɛrɛ, mɛ kɛ̄ na o gaa kii a?” Jizɔs ture ye nɛ kɔ: “Kɛ̄ m gaa kii, oo le edap mɛ nyɔɔnɛ anyaawo, mɛ o nyɔɔnɛ mɛ sɔ̄ esaa.” 37 Pita kɔ ye nɛ kɔ: “Nɛɛ-a-i-ɛrɛ, ena anua mm le dap a nyɔɔnɛ anyaawo a? M su na dum* sere kɛ̄ a nyɔɔ.”* 38 Jizɔs kɔ ye nɛ kɔ: “O suge o dum* sere kɛ̄ mɛ nyɔɔ ni? M kɔ kaka a nɛ kɔ, edoo kɔɔ̄ naale eku kpā anii’ee mmɛ sɔ̄ o anna mɛ taa sɔ̄.”