Lo Matiu Bee Ɛm

6 “Ɛbaa loo i leere lokwa buii doo bui kaāna dogo kɛ̄sī pya nɛɛ lokwa ba i muɛ, lo bui doo wo buii le e’ɛrɛ lɔgɔ ekpɛanu aābah bui Tɛ a le li bunyɔɔ. 2 Nyɔɔwo, sɔ̄ o aa nɛ dɔɔ̄nu toesaɛ̄,* o aa dasī fuuri dɔɔ̄ni dookɛ̄ pya baɛsī wee doo bie bu tɔ bɔŋanaloo le nyɔɔ kɛ̄ dee lokwa pya nɛɛ wa nɛ ka. Kaka m kɔ i nɛ, kuma ekpɛanu ba e’ɛrɛ na ama. 3 Mɛ sɔ̄ bui nɛ bui dɔɔ̄nu toesaɛ̄, bui aa doo kɔ bui bahkie a suā nu bui bahle gaa doo, 4 lokwa bui dɔɔ̄nu toesaɛ̄ le bu gɔā, e bui Tɛ lo a wee muɛ nu bu gɔā e’obara i kpɛ.

5 “Gbaāloo wo, sɔ̄ bui yere kara, bui aa doodoo pya baɛsī, nyɔnɛbee a wee wa nia eyere kara bu tɔ bɔŋanaloo le nyɔɔ gbɛnɛ eba dee buɛ̄ lokwa pya nɛɛ wa muɛ. Kaka m kɔ i nɛ, kuma ekpɛanu ba e’ɛrɛ na ama. 6 Mɛ sɔ̄ bui yere kara, yiraa bu bui tɛm sa kpaɛ̄ bū lɛɛ bui yere kara nɛ bui Tɛ a le bu gɔā, e bui Tɛ lo a wee muɛ nu bu gɔā e’obara i kpɛ. 7 Sɔ̄ bui yere kara, bui aa kɔ aba nu tɛɛ̄ nyɔɔ booboo sɔ̄ dookɛ̄ pya dɔɔ̄na buɛ̄* wee doo, nyɔnɛbee ba kɛɛrɛ kɔ elu edaē wa lo ba kɔe booboo ue. 8 Nyɔɔwo, bui aa wa bee nyɔnɛbee bui Tɛ suā nu a i bɛɛ̄ lɛɛ bui gae bip ye.

9 “Nyɔɔwo, sɔ̄ bui yere kara, yereaa doo wo ama:

“‘Ilii Tɛ a le li bunyɔɔ, doolo o bee le kaɛ. 10 Doolo o Buɛ̄-mɛnɛ lu. Doolo o ekɛɛrɛ dooa a kɛnɛkɛ̄ dookɛ̄ a le doo li bunyɔɔ. 11 Nɛ i i nuede anii’ee. 12 Lɛɛbahloo pya i kɔm i nɛ, dookɛ̄ ili lɛɛnage bahloo nɛ pya ili ɛrɛ kɔm bee doo. 13 E o aa i lɛɛbahloo kɔ i dɔ bu ɛma ɛp, mɛ zuura* i lɛɛbah pɔrɔ nɛɛ a.’

14 “Nyɔnɛbee lo bui aaloo nɛ pya a i tɛɛ̄ ekwɔ loo, bui Tɛ a le li bunyɔɔ e’aanage loo i nɛ; 15 mɛ lo a le buii aaloo tɛɛ̄ ekwɔ pya dɔɔ̄na wa nɛ, bui Tɛ naale e’aanage loo bui tɛɛ̄ ekwɔ i nɛ.

16 “E sɔ̄ bui kaɛ-nuede, bui aa bege sī doodoo pya baɛsī, nyɔnɛbee ba bege sī wa lokwa pya nɛɛ muɛ kɔ ba gaa kaɛ-nuede. Kaka m kɔ i nɛ, kuma ekpɛanu ba ɛrɛ na ama. 17 Mɛ sɔ̄ bui kaɛ-nuede, lɛraa nɔɔ̄ bee i sa loga sī i, 18 lokwa pya nɛɛ naa muɛ kɔ bui gaa kaɛ-nuede, mɛ aba bui Tɛ a le bu gɔā. Lo sɔ̄ bui Tɛ a wee muɛ nu bu gɔā e’obara i kpɛ.

19 “Bui aa bɔŋɛnɛloo zɔ nyɔuwe nɛ bui loo, kɛ̄ ekɔ-ɛp le kaɛlogo etaa le kɛ̄ pya biu ebaa sa yib. 20 Taāwo, kpoogeaaloo bui zɔ li bunyɔɔ, kɛ̄ ekɔ-ɛp ale kaɛlogo naale etaa le kɛ̄ pya biu naale ebaa sa yib. 21 Nyɔnɛbee kɛ̄ o zɔ le na o beenyiɛ elenage a.

22 “Numiā ekpaloo na dɛɛ̄, nyɔɔwo lo a le dɛɛ̄ a lele,* ɛɛdee emma a loo. 23 Mɛ lo a le dɛɛ̄ a naa lele,* zii emma a loo. Mɛ lo ɛɛdee a a le bu lu zii, ɛp kɛ̄ lo zii elu gbɛnɛ doo a!

24 “Lɔgɔ nɛɛ naale edap lu zooro nɛ baɛ tɛtɔ, nyɔnɛbee ebaa loo ziī aba sa wereloo elua a, ale etɔɔ̄ bialoo ziī aba sa ɛp elua a kuma kɛ̄. Buii le edap lu zooro nɛ Bari le Zɔ.

25 “Nyɔɔbee wo, m kɔ i nɛ kɔ: Bui aa nɛ taāŋa loo i gbɛnɛ kumaloo bui dum,* nu bui de ale nu bui ɔ̄ ale nu bui yaa. Ekɔ dum* naa eenyɔɔ nuede, e ekpaloo naa eenyɔɔ nu eyaa ni? 26 Naa ɛbaa enuɛ̄ pɛɛ bunyɔɔ, ba naa foh eyuu ale bugara nu ale bɔŋɛnɛloo nu yere bu tɔ kpooge nu, kerewo, bui Tɛ a le li bunyɔɔ gaa wa nɛ nuede. Ekɔ bɔɔlo buii wa kuī ee ni? 27 Mɛɛ a i le yɛɛ na tɛ̄maloo ɛrɛ gbɛnɛ ekɛɛrɛ dap yere ziī kiubit loo ye dee dum ani? 28 Ena anua o ɛrɛ gbɛnɛ ekɛɛrɛ kumaloo nu o yaa a? Naa kɛɛrɛbu kɛ̄ kpɔmaā a le wii nyim doo, ba naa piaga loo tam ale gba bɛloo ba eyaa; 29 mɛ m kɔ i nɛ kɔ kunɛ Solomɔn bu dɛ̄dɛɛ̄ ye ka naa bee yaa bɛloo a kpedɛɛ̄ tɔɔ̄ ziī aba. 30 Nyɔɔwo, lo a le Bari yere bɛloo loo ebie a le wii lo a le dum anii’ee e alu etop ye tɛrɛ bu miā li nyɔɔ’ee, ekɔ a naale eyere bɛloo loo bɔɔlo pya a ɛrɛ nwīgbagbara yira ni? 31 Nyɔɔwo, bui aa ɛrɛ gbɛnɛ ekɛɛrɛ sa kɔ, ‘Ena i de a?’ ale ‘Ena i ɔ̄ a?’ ale ‘Ena i yaa a?’ 32 Nyɔnɛbee dɛ̄dɛɛ̄ pya nu ama na pya dɔɔ̄na buɛ̄ gaa piaga lo e’ɛrɛ a. Mɛ bui Tɛ a le li bunyɔɔ suā kɔ dɛ̄dɛɛ̄ pya nu ama bɛɛ̄ i.

33 “Kiraasī lo esu lo Buɛ̄-mɛnɛ le kaāna dogo Bari nua tuatua, e dɛ̄dɛɛ̄ pya lo nu ama elu eyere loo i nɛ. 34 Nyɔɔwo, bui aa ɛrɛ gbɛnɛ ekɛɛrɛ kumaloo nyɔɔ’ee li, nyɔnɛbee nyɔɔ’ee li ɛrɛ alɛɛ etɛɛrɛloo. Ziī ziī biradee ɛrɛ alɛɛ taāŋa.