Lo Jɔn Bee Ɛm
17 Sɔ̄ Jizɔs ekɔa pya nu ama sah, a bee dana dɛɛ̄ ye ɛp bunyɔɔ sa kɔ: “Tɛ, e’ina lo sɔ̄. Nɛ ka o nwiī lokwa o nwiīnɛɛdam a nɛ ka, 2 dookɛ̄ o ebee ye nɛ ekpo loo dɛ̄dɛɛ̄ namloo* doo, lokwa a dap nɛ dum anaatah dɛ̄dɛɛ̄ pya nɛɛ lo o bee ye nɛ. 3 Lo e’ɛrɛ dum anaatah, lu ebɛɛ̄ kɔ ba a suāloo olo,* aba kaka Bari, le Jizɔs Kraist, nɛɛ o bee yere. 4 M enɛā a ka bie bu nyɔuwe, nyɔnɛbee m esaa dɛ̄dɛɛ̄ tam o bee kɔ m si. 5 Nyɔɔwo, Tɛ, nɛ mɛ ka anyaawo, lo ka m bee ɛrɛ sɔ̄ m bee a le kpaɛ̄ lɛɛ nyɔuwe gae le.
6 “M edoora kɔ pya nɛɛ o bee mɛ nɛ aābu nyɔuwe a suā o bee. Ba bee le pya olo, e o bee wa su mɛ nɛ sa ba egbānatɔ̄ o ue. 7 Nyaawo, ba esuā kɔ dɛ̄dɛɛ̄ nu o bee mɛ nɛ aa a bah; 8 nyɔnɛbee m ekɔa pya nu o bee mɛ kɔ nɛ wa nɛ, e ba eyiga sa suā leere kɔ m lu nɛɛ a a tɔɔ̄dɔ sa ba eyiga kɔ o bee mɛ yere; 9 M bara wa bee, mm bara bee nyɔuwe mɛ bee pya o bee mɛ nɛ, nyɔnɛbee ba lu pya olo. 10 e dɛ̄dɛɛ̄ mdaa nu lu olo, e olo lu mda, e ba edoora kɔ m ɛrɛ ka.
11 “Mm lena bu nyɔuwe, mɛ alaba le bu nyɔuwe, e mda gaa alu pii. Tɛ a le kaɛ, m bara a kɔ o kuū wa dɛɛ̄loo nyɔɔ o bee lo o bee mɛ nɛ lokwa ba lu ziī* dookɛ̄ olo le mda lu ziī doo.* 12 Sɔ̄ m bee wa le loo, m bee wa kpega nyɔɔ o bee lo o bee mɛ nɛ; e m ekpega wa sa kunɛ ziī aba naa pe, aba nwiī pepe, lokwa nu a bee lu e’ɛm bu kpa kaɛ dooa gbɔ̄mɛɛ. 13 Mɛ nyaawo m gaa alu loo, e m kɔ pya lo nu ama bu nyɔuwe lokwa alaba ɛrɛ dua ɛɛbu lo mda ɛrɛ. 14 M enɛā wa o ue, mɛ nyɔuwe ebaara wa loo nyɔɔbee ba naa nuūna nyɔuwe dookɛ̄ mda mm nuūna nyɔuwe doo.
15 “Mm aa a bara kɔ o su wa lɛɛ bu nyɔuwe, mɛ kɔ o kuū wa dɛɛ̄loo nyɔɔbee pɔrɔ nɛɛ a. 16 Ba naa nuūna nyɔuwe dookɛ̄ mda mm nuūna nyɔuwe doo. 17 Doo kɔ ba a le kaɛ tɛ̄maloo kaka; o ue lu kaka. 18 Dookɛ̄ olo bee mɛ yere ture bu nyɔuwe doo, kɛ̄ mda wa yerenage ture bu nyɔuwe doo lo. 19 Mda sere na loo nua kaɛ nyɔɔbee alaba, lokwa alaba dapnage le kaɛ tɛ̄maloo kaka.
20 “Mm a bara bee aba alaba, mɛ m baranage nyɔɔbee pya e’ɛrɛ mɛ yira bu tɛ̄maloo nu ba kɔ, 21 lokwa dɛ̄dɛɛ̄ aba lu ziī, dookɛ̄ olo Tɛ gbaaloo mda, e mda gbaaloo olo doo, lokwa alaba i dapnage gbaaloo, lokwa nyɔuwe yiga kɔ olo na o bee mɛ yere a. 22 M enɛā wa ka o bee mɛ nɛ lokwa ba dap lu ziī dookɛ̄ ili lu ziī doo. 23 Mda le aba le bu gbaaloo, e olo le mm le bu gbaaloo,* lokwa alaba dap lu ziī, e lo sɔ̄ nyɔuwe esuā kɔ olo bee mɛ yere le kɔ o were wa loo dookɛ̄ o mɛ wereloo doo. 24 Tɛ, m gbī kɔ pya o bee mɛ nɛ a le mɛ loo kɛ̄ m le, lokwa ba dap muɛ dua ka o enɛā mɛ, nyɔnɛbee o bee mɛ wereloo lɛɛ nyɔuwe gae le. 25 Tɛ a kaāna, bu kaka, nyɔuwe naa suā a loo mɛ mda suā a loo, e alaba ama esuā kɔmɛ o bee mɛ yere. 26 M edoora kɔ ba a suā o bee, e m kiisī lo edoo kɔ ba a suā, lokwa ba tɔgɛ wereloo kumaloo pya dɔɔ̄na dookɛ̄ olo mɛ wereloo doo lokwa mda le aba le bu gbaaloo.”