Lo Luk Bee Ɛm

24 Mɛ nyɔɔ tua biradee bu kaɛ, ba bee lu kpaɛ̄ kpoli* a bagara lɔɔrɛ sa aara pya nu a wee sī lele nuloo lo ba bee kwa. 2 Mɛ ba bee muɛ kɔ elua ekigere lo dɛm lɛɛ nu kpoli* a, 3 e sɔ̄ ba bee yii bu, ba naa bee muɛ ii Nɛɛ-a-i-ɛrɛ Jizɔs. 4 Sɔ̄ nu a bee sira ama bee lege elu wa ziī dua loo, ɛp! baɛ nɛɛ a yaa ɛɛ bɛloo a mɔ̄ bee lu wa yira kpaɛ̄. 5 Bɔɔ bee aa pya lo nɛɛwa sa ba su sī wa uukɛ̄, nyɔɔwo pya lo nɛɛ bee wa kɔ nɛ kɔ: “Ena anua bui aa gbī nɛɛ a le dum yɛɛ pya e’ua a? 6 A naale akɛāma, e’aara kɛ̄. Nyɛŋiaabu loo nu a bee i kɔ nɛ sɔ̄ a bee le Galilii, 7 sɔ̄ a bee kɔ, elu esu Nwiīnɛɛ yere kɛ̄bah pya pɔrɔ, elu eka ye loo te sa e’aakɛ̄ nyɔɔ eree taa biradee.” 8 Lo sɔ̄ ba nyɛŋiabu pya ue a bee kɔ, 9 e ba bee obia aa kpaɛ̄ kpoli* a sa kɔ dɛ̄dɛɛ̄ nu a nɛ Lop Le Eziī pya ye nɛɛ lɛɛratam le dɔɔ̄na pya a wee ye nyɔɔnɛ dumɛ. 10 Pya lo nɛɛwa bee le, Meri Magdalin, Joana le Meri ka Jems. Gbaāloo wo, pya dɔɔ̄na nɛɛwa a bee wa le loo bee kɔ pya nu ama nɛ pya ye nɛɛ lɛɛratam. 11 Kerewo, ba naa bee muɛ lɔgɔ suānu a le bu nu pya lo nɛɛwa bee kɔ, nyɔɔwo ba naa yiga nu ba kɔ.

12 Mɛ Pita bee teera ina kpaɛ̄ kpoli* a, mɛ sɔ̄ a uulookɛ̄ ɛp bu, a muɛ aba bɛ linen. Nyɔɔwo, a bee aa sa bɔātɛ̄ ekɛɛrɛ nu a sira.

13 Mɛ ɛp! taɛ lo dee baɛ pya a wee ye nyɔɔnɛ dumɛ aa bee kii ziī buɛ̄ a kura Imeɔs, a dap lu ɛrɛba maɛl* aāloo Jerusɛlɛm, 14 e ba aa bee kɔnia nu akiiloo dɛ̄dɛɛ̄ pya nu a bee sira ama.

15 E sɔ̄ ba aa gbaa kɔnia pya nu ama, Jizɔs bee wa lu loo sa wa bɔātɛ̄ enyɔɔnɛ kiā, 16 mɛ ba naa bee ye suāloo. 17 A bee wa kɔ nɛ kɔ: “Ena bui aa amkɛ̄ nyɔɔ sɔ̄ bui aa gbaa kiā a?” E ba bee yira sa bege sī wa. 18 Ziī aba ye bee kura Klɛopas bee ye ture nɛ kɔ: “O lu nɛɛ saanɛɛ aba ɔɔ tɔɔ̄ Jerusɛlɛm lo a naa suā pya nu aa sira lo kɛ̄ a kunɛ dee ama ni?” 19 A bee wa bip kɔ: “Ena a sira a?” Ba kɔ ye nɛ kɔ: “Pya nu a bee siraloo Jizɔs nɛɛ Nazarɛt, lo a bee tɔgɛ kɔ a lue nɛɛ mɔmanudɛɛ̄ a ɛrɛ ekpo bu nu a doo le nu a kɔ kɛ̄sī Bari le pya nɛɛ; 20 le kɛ̄ pya i nɛɛ tɛsī ewɔp le pya bɛbɛɛ bee kɔ alu efɛ ye doo, e a bee lu eka ye loo te. 21 Mɛ i bee bɛābu kɔ nɛɛ ama na e’agara pya Izrɛl a. E kaɛlɛɛ dɛ̄dɛɛ̄ pya nu ama, nii’ee na eree taa biradee aā sɔ̄ dɛ̄dɛɛ̄ pya nu ama bee sira a. 22 Gbaāloo wo, pio pya nɛɛwa a i le yɛɛ bee doonage nu a i lu nyɛŋialoo, nyɔnɛbee ba bee si kpaɛ̄ kpoli* a bagara lɔɔrɛ 23 e sɔ̄ ba naa bee muɛ ye ii, ba bee lu sa kɔ ba muɛenage pya ɛnjɛl lo ba wa kɔ nɛ kɔ a le dum. 24 E pio pya a bee i le loo bee sinage kpaɛ̄ kpoli* a, e ba bee muɛ dookɛ̄ pya nɛɛwa a bee kɔ doo, mɛ ba naa bee ye muɛ.”

25 Nyɔɔwo, a bee wa kɔ nɛ kɔ: “Bɔɔlo pya a naa ɛrɛ ekɛɛrɛ, pya a duu bu beenyiɛ sa naa nwaabah yiga dɛ̄dɛɛ̄ nu pya mɔmanudɛɛ̄ bee kɔ! 26 Ekɔ a naa bee lu ebɛɛ̄ kɔ Kraist a tɔga kɛ̄bah pya nu ama sa yii bu ye ka ni?” 27 A bee baatɛ̄ pya nu alu e’ɛm ye kumaloo a le bu kpa kaɛ wa nɛ, bɔātɛ̄ aāloo lo Mozis le nu dɛ̄dɛɛ̄ pya mɔmanudɛɛ̄ bee ɛm.

28 Bu kpɛdumɛ, ba bee lu waɛloo buɛ̄ lo ba aa bee kii, e a sere loo doodoo bee a gaa kiiege deesī. 29 Mɛ ba bee ye bara kɔ a tɔɔ̄, sa kɔ: “Tɔɔ̄ i kpaɛ̄ nyɔnɛbee e’ina aa lu loo uunɛ, e zii esaa eyii.” Nyɔɔwo, a bee wa nyɔɔnɛ kii sa wa tɔɔ̄ kpaɛ̄. 30 E sɔ̄ aa bee wa nyɔɔnɛ denu,* a bee su fituru sa nɛ leelee, e a buū sa wa su nɛ. 31 Lo sɔ̄ dɛɛ̄ wa bee yeea, e ba suā ye loo; mɛ a pe wa aa kpaɛ̄. 32 E ba bee kɔ nɛ ɛnia aba kɔ: “Nu anua a lo beenyiɛ i bee bɛamiā i bu sɔ̄ aa bee i kɔ ue nɛ bie nyɔɔ dee sa gaa baatɛ̄ pya nu a le bu Kpa Kaɛ leere!” 33 E ba bee aakɛ̄ taɛ lo sɔ̄ sa obia kii Jerusɛlɛm, e ba muɛ Lop Le Eziī pya nɛɛ lɛɛratam le pya nɛɛ le aba le egbaa bɔŋia, 34 lo ba bee kɔ: “Bu kaka, Nɛɛ-a-i-ɛrɛ e’aara kɛ̄, e a bee siraloo Saimɔn!” 35 Lo sɔ̄ ba kɔ nu a bee sira sɔ̄ ba bee le nyɔɔ kɛ̄dee le kɛ̄ ba bee ye suāloo tɛ̄maloo sɔ̄ a buū fituru doo.

36 E sɔ̄ ba aa bee kɔge pya nu ama, a bee wa yira taɛ yɛɛ sa wa kɔ nɛ kɔ: “Efɛɛloo a le i nɛ.” 37 Mɛ ba bee yegia sa bɔɔ aa wa nyɔnɛbee ba bee kɛɛrɛ kɔ ba emɔna edɔɔ̄. 38 Nyɔɔwo, a bee wa bip kɔ: “Ena a i aarɛ bɔɔ a, e ena anua bui ɛrɛ baɛbaɛ beenyiɛ a? 39 Ɛbaa mɛ bah le tɔ lokwa bui suā kɔ ɛɛ mda; daaraa mɛ bahloo sa muɛ nyɔnɛbee edɔɔ̄ naa wee ɛrɛ namloo le ekpo dookɛ̄ bui muɛ kɔ mda ɛrɛ doo.” 40 E sɔ̄ ekɔa lo ba ama, a tɔgɛ wa bah le tɔ ye. 41 Mɛ sɔ̄ ba sii bee yiga nyɔɔ kɛ̄ bu wa ɛɛ le kɛ̄ a wa lu nyɛŋia loo doo, a bee wa kɔ nɛ kɔ: “Bui ɛrɛ ziī nu nɛɛ dap de a le akɛāma ni?” 42 Nyɔɔwo, ba bee ye nɛ bari ba ɔp, 43 e a su lo bari sa wa ba bie kɛ̄sī.

44 Lo sɔ̄, a kɔ wa nɛ kɔ: “Pya ue ama na m bee i kɔ nɛ sɔ̄ m bee i le loo a, kɔ dɛ̄dɛɛ̄ nu a bee lu e’ɛm mɛ kumaloo bu Lok Mozis le nu pya mɔmanudɛɛ̄ bee ɛm le nu a le bu Le-yɔɔ ɛrɛ edooa gbɔ̄mɛɛ.” 45 A bee wa yerebah nɛ kɔ ba a dābeeloo nu alu e’ɛm bu Kpa Kaɛ leere, 46 e a bee wa kɔ nɛ kɔ: “Ebee lu e’ɛm kɔ, Kraist etɔga sa elu edana ye lɛɛ kɛ̄ nyɔɔ lo eree taa biradee, 47 e nyɔɔ ye bee, elu ezue bu dɛ̄dɛɛ̄ edonyɔɔ kɔ pya nɛɛ a kiiya lokwa alu e’aaloo pɔrɔ wa nɛ, sa ebɔātɛ̄ aā Jerusɛlɛm. 48 Bui yira ekeebee loo * pya nu ama. 49 E ɛp! m gaa le yere nu na Tɛ bee yira yii loo i ma. Mɛ tɔɔ̄naa bu buɛ̄ a mmɛ sɔ̄ elu enɛ i ekpo a aa bunyɔɔ.”

50 Lo sɔ̄, a bee wa su aā lo kɛ̄ kuma Bɛtani, e a dana bah ye nɛ nyɔɔ sa wa nɛ leelee. 51 E sɔ̄ aa bee wa nɛ leelee, a bee wa aaloo sa Bari su ye kuma bunyɔɔ. 52 E ba bee ye uubeekɛ̄ nɛ sa obia kii Jerusɛlɛm bu gbɛnɛ ɛɛbu. 53 E ba wee le bu tɔkaɛ dɛ̄dɛɛ̄ sɔ̄ aa leera Bari.