Lo Matiu Bee Ɛm

7 “Bui aa biaɛ* lokwa a naa lu ebiaɛ i; 2 nyɔnɛbee kɛ̄ bui biaɛ pya dɔɔ̄na doo na elunage ebiaɛ i a, e nu bui su doā nu nɛ pya dɔɔ̄na na elunage esu i doā nɛ a. 3 Ena anua o ɛp epɛɛte a le dɛɛ̄ o wuga, e oo muɛ ebate a a le bu dɛɛ̄ a? 4 Ale ena anua o kɔ nɛ o wuga kɔ, doo m lɛɛ epɛɛte a a le bu dɛɛ̄ sɔ̄ ebate le dɛɛ̄ olo a? 5 Nɛɛ baɛsī, dasī lɛɛ ebate a a le dɛɛ̄, lo sɔ̄ o muɛ nu leere lo elɛɛ epɛɛte a le dɛɛ̄ o wuga.

6 “Bui aa su nu a le kaɛ nɛ gbo, e bui aa top bui dɛm a si gbɛnɛ du tɛrɛ kɛ̄ nɛ gbo zi, taā a doo ba zag tɔ nyɔɔ sa sikɛ̄ obia lu wee bagi i.

7 “Kiraasī lo ebara, e a elu enɛ i; kiraasī lo egbī, e bui gbī muɛ; kiraasī lo ekpoga, e a elu ekpaāna i nɛ; 8 nyɔnɛbee elu enɛ ɛrɛgebah nɛɛ a bara, e ɛrɛgebah nɛɛ a gbī egbī muɛ, e ɛrɛgebah nɛɛ a kpoga elu ekpaāna ye nɛ. 9 Bu kaka, mɛɛ a i le yɛɛ na lo a le ye nwiī bara ye fituru, e nɛ ye ekpodɛm a? 10 Ale lo a bara ye bari, e nɛ ye yɔɔ a? 11 Nyɔɔwo, lo a le bɔɔlo pya pɔrɔ suā kɛ̄ enɛ le dɔɔ̄nu pya bui miɔŋɔ doo, ekɔ bui Tɛ lo a le li bunyɔɔ naale enɛ le nu pya a ye bara ni!

12 “Nyɔɔwo, ɛrɛgebah nu bui gbī kɔ pya nɛɛ a doo i nɛ, bɔɔlo ɛrɛnage edoo wo wa nɛ. Nyɔnɛbee lo ama na nu Lok le nu Pya Nɛɛ Mɔmanudɛɛ̄ bee ɛm kura a.

13 “Tɛ̄naa nudee alu biibiisī yii, nyɔnɛbee nudee a bɛɛasī sa waɛ etɛɛ̄ ture nɛɛ mmɛ loo gbeerasī, e pya a tɛɛ̄ nyɔɔ lu booboo; 14 e nudee a biiyasī sa ye dee aga etɛɛ̄ nyɔɔ ture nɛɛ mmɛ loo dum, e pya a tɛɛ̄ nyɔɔ lu nwīepoo.

15 “Nwaɛ̄dɛɛ̄ loo pya zue ue esah lo ba sere loo wa doodoo naana pee, mɛ bu wa li ba lu gbo kuɛ a wee ba nu.* 16 Aāloo wa bee na elu esuā wa loo a. Pya nɛɛ naa wee bɔŋɛnɛloo bee vine aāloo suu ale bee fig aāloo biɔ̄nɔbiɔ̄kuɛ, ba wee dooge wo ni? 17 Bu aba lo sīdee, ɛrɛgebah le te wee mum le bee, mɛ pɔrɔ te wee mum pɔrɔ bee. 18 Le te naa dap mum pɔrɔ bee, e pɔrɔ te naa dapnage mum le bee. 19 Ɛrɛgebah te a naa mum le bee, wee lu efii tɛrɛ kɛ̄ sa alu etop tɛrɛ bu miā. 20 Nyɔɔwo, elu esuāloo pya nɛɛ ama tɛ̄maloo bee ba mum.

21 “Naale ɛrɛgebah nɛɛ a mɛ kɔ nɛ: ‘Nɛɛ-a-i-ɛrɛ, Nɛɛ-a-i-ɛrɛ,’ na eyii bu Buɛ̄-mɛnɛ bunyɔɔ a, mɛ aba nɛɛ a doo nu na Tɛ a le li bunyɔɔ gbī. 22 Lo dee gbɛnɛ-edo nɛɛ ekɔ mɛ nɛ kɔ: ‘Nɛɛ-a-i-ɛrɛ, Nɛɛ-a-i-ɛrɛ,’ ekɔ ii bee zue ue bu o bee, su o bee kpoā pɔrɔ-edɔɔ̄, sa si gbɛnɛ-edo nyɛŋia tam tɛ̄maloo o bee ni? 23 E lo sɔ̄ m kɔ wa nɛ kɔ: ‘Mm bee i suāloo, aaraa kɛ̄ m le, bɔɔlo pya doo pɔrɔ!’

24 “Nyɔɔwo, ɛrɛgebah nɛɛ a dā pya na ue sa wa doo, e le doodoo nɛɛ suānu a wu ye tɔ nyɔɔ dɛm. 25 E boo bee dɔɔ, e maā bee yii, sa efɔp bee dɔ sa zia tɔ a, mɛ a naa feea, nyɔnɛbee a bee lu ewu ye nyɔɔ dɛm. 26 Mɛ ɛrɛgebah nɛɛ a dā pya na ue sa naa doo wa, e le doodoo nɛɛ ezu a bee top ye tɔ nyɔɔ esaā. 27 E boo bee dɔɔ, e maā bee yii, sa efɔp bee dɔ sa zia tɔ a, e tɔ a bee feea sa ye fefeea lu gbɛnɛ.”

28 Sɔ̄ Jizɔs ekɔa pya ue ama sah, kɛ̄ a tɔgɛ nu doo bee lu nyɛŋia loo pya nɛɛ a, 29 nyɔnɛbee a bee wa kɔ ue nɛ doodoo nɛɛ a ɛrɛ ekpo, e a naale doodoo pya wa nɛɛ ɛm kpa.