Lo Maak Bee Ɛm

6 A bee aa lo kɛ̄ kii ye buɛ̄, e pya a wee ye nyɔɔnɛ dumɛ bee ye nyɔɔnɛ. 2 Sɔ̄ a bee ina dee fɛɛrɛloo, a bee bɔātɛ̄ etɔgɛnu bie bu tɔ bɔŋanaloo, e alu nyɛŋia loo gbɛnɛ-edo nɛɛ a bee ye dā sa ba kɔ: “Mɛ kɛ̄ na gbara ama aā pya nu ama a? A tɛɛ̄ doodoo wa ɛrɛ dua suānu ama sa dap si dua nyɛŋiatam ama ni? 3 Ɛɛ nɛɛ kanu, nwiī Meri, e pya ye wuga na Jems, Josɛf, Judas, le Saimɔn, naale wo ni? Ekɔ pya ye wuga nɛɛwa naa i le loo akɛāma ni?” Nyɔɔwo, ba naa bee ye ɛrɛ yira bu. 4 Mɛ Jizɔs bee wa kɔ nɛ kɔ: “Nɛɛ mɔmanudɛɛ̄ naa wee ɛrɛ ka bu ye buɛ̄ le yɛɛ pya ye wuga le bu ye tɔ.” 5 Nyɔɔwo, a naa bee dap si lɔgɔ nyɛŋiatam bie lo kɛ̄ mɛ a bee aadee dɛrɛ bah nyɔɔ pio pya loo dumɛ sa wa bo. 6 Bu kaka, a bee ye lu nyɛŋia loo nyɔɔ kɛ̄ ba naa ɛrɛ yira doo. E a bee kiāŋa bu dɛ̄dɛɛ̄ lo barasī le nwī-esɔgɔ buɛ̄ sa tɔgɛnu.

7 A bee kue Lop Le Baɛ a sa wa yere baɛ baɛ aba, e a bee wa nɛ ekpo lo ekpoā edɔɔ̄ a naa ɛɛ. 8 A bee wa nɛnage lok kɔ ba aa aara lɔgɔ nu nyɔɔ wa kiā, mɛ aba nwītum, e ba aa aara fituru, ale bɛrɛ nuede, ale kpugi* bu wa bɛrɛ sima kɛ̄tɛ̄— 9 Mɛ ba a yaa kpa ekaɛtɔ, e ba aa yaa baɛ ka bɛloo* 10 A bee wa sinagekɛ̄ kɔ nɛ kɔ: “Ɛrɛgebah sɔ̄ bui yii ziī tɔ, tɔɔ̄naa lo kɛ̄ mmɛ sɔ̄ bui aa. 11 E ɛrɛgebah kɛ̄ pya nɛɛ naa su i ale gbaɛ̄tɔ̄ bui ue, kparaa esaā lɛa kɛɛ̄ ekaɛtɔ i sɔ̄ bui aa lo kɛ̄ lokwa alu nu ekeebee wa nɛ.” 12 Lo sɔ̄ ba bee kii sa zue kɔ pya nɛɛ a kiiya, 13 e ba bee kpo gbɛnɛ-edo pɔrɔ-edɔɔ̄ sa lɛrɛ nɔɔ̄ gbɛnɛ-edo pya loo bee dumɛ sa wa boh.

14 Mɛ mɛnɛ Hɛrɔd bee dā nu akiiloo lo ama, nyɔnɛbee pya nɛɛ bee suā nu akiiloo bee Jizɔs kaāna, e pya nɛɛ aa bee kɔ: “Elua elɛɛ Jɔn Nɛɛ Limaā kɛ̄ bu luh, e nu anua aa si pya tam ama lo.” 15 Mɛ pya dɔɔ̄na aa bee kɔ: “Ɛɛ Elaija.” E pya lo dɔɔ̄na bee kɔ: “Alu nɛɛ mɔmanudɛɛ̄ doodoo ziī pya nɛɛ mɔmanudɛɛ̄ a dee kere.” 16 Mɛ sɔ̄ Hɛrɔd edaā lo ama, a bee kɔ: “Jɔn nɛɛ m bee fii bee lɛɛ mɛɛ, elua elɛɛ ye kɛ̄ bu luh.” 17 Nyɔnɛbee Hɛrɔd bee yere pya nɛɛ kɔ ba a aa ye sa ye bɔp yere kpɔgɔrɔ nyɔɔ Hɛrodias, wa ye wuga Filip, nyɔnɛbee a bee ye ii. 18 Nyɔnɛbee Jɔn wee bialoo kɔ nɛ Hɛrɔd kɔ: “Naa bɔloo bu lok kɔ o su wa o wuga.” 19 Nyɔɔwo, Hɛrodias bee ye baaloo* sa gbī efɛ ye, mɛ a naa bee dap. 20 Hɛrɔd bee ɛrɛ bɔɔ loo Jɔn, nyɔnɛbee a bee suā kɔ alu nɛɛ kaāna dogo le nɛɛ a le kaɛ, sa a bee ye kpega. E ɛrɛgebah sɔ̄ a dā nu Jɔn kɔ, a naa wee suā nu edoo, mɛ a wee kiisī lo esu ɛɛbu ye gbaɛ̄matɔ̄.

21 Dee Hɛrɔd aa bee nyɛŋiabu loo dee a bee mɛā. A bee kwa nuede nɛ pya aa bɛɛ, pya nɛɛbee nɔ̄, le pya gbɛnɛ nɛɛ a aa Galilii, mɛ Hɛrodias bee su lo sɔ̄ ama nua dee a ye kpaā nɛ lo edoo nu a bee nɔɔ̄. 22 Nwiīnɛɛwa Hɛrodias bee lu sa yep, e a bee ɛɛrɛbu Hɛrɔd le pya le ɛɛ aa bee gbaa denu.* E mɛnɛ a bee kɔ nɛ lo Nwiīnɛɛwa kɔ: “Bip ɛrɛgebah nu o gbī, e m gaa le nɛ a.” 23 E a bee ye yira yii nɛ kɔ: “M nɛ a ɛrɛgebah nu o bara, kere alu kunakuna bah loo na buɛ̄-mɛnɛ.” 24 Nyɔɔwo, lo nwiīnɛɛwa bee si loo ye ka sa ye bip kɔ: “Ena m bara a?” Ye ka bee ye kɔ nɛ kɔ: “Ekobee Jɔn Nɛɛ Limaā.” 25 Aba sɔ̄ a, a teera si loo mɛnɛ sa ye bara kɔ: “Su ekobee Jɔn Nɛɛ Limaā yere nyɔɔ gbɛnɛka ekpa fɛrɛ mɛ nɛ a taɛ nyaawo.” 26 Kere a bee kiɛ̄ mɛnɛ, a bee yiga lo enɛ ye nu a bara nyɔɔ yii a ebee yira le nyɔɔ pya nɛɛ a bee ye le loo* 27 E aba sɔ̄ a, mɛnɛ bee yere ziī nɛɛ baɛloo kɔ a si wee su ekobee Jɔn enua. Nyɔɔwo, a bee si sa ye fii bee lɛɛ mɛɛ bie tɔ kpɔgɔrɔ 28 sa su ye ekobee yere nyɔɔ gbɛnɛka ekpa fɛrɛ nua. A su nɛ lo nwiīnɛɛwa, e lo nwiīnɛɛwa su nɛ ye ka. 29 Sɔ̄ pya a wee ye nyɔɔnɛ dumɛ bee dā, ba bee lu sa su ye ii kuma wee li bu kpoli.*

30 E pya nɛɛ lɛɛratam bee tɛɛ̄ ɛŋɛnɛ Jizɔs sa kɔ dɛ̄dɛɛ̄ nu ba bee doo le nu ba bee tɔgɛ ye nɛ. 31 E a bee wa kɔ nɛ kɔ: “Bɔɔlo, bui luaa sa tɔɔ̄ kɛ̄ alu kpoogaloo sa seea kina.” Nyɔnɛbee gbɛnɛ-edo nɛɛ gaa lu sa kii, e ba naa ɛrɛ sɔ̄ edɛā kunɛ nuede. 32 Nyɔɔwo, ba bee yii bu fah maā kii kɛ̄ alu kpoogaloo sa tɔɔ̄ aba aba. 33 Mɛ pya nɛɛ bee wa muɛ sɔ̄ ba aa kii li, e gbɛnɛkpo nɛɛ bee wa suāloo, e pya a aa dɛ̄dɛɛ̄ buɛ̄ bee gbaa teera sa wa dasī ina lo kɛ̄. 34 E sɔ̄ a aabu fah, a muɛ gbɛnɛkpo nɛɛ a, e a bee wa ɛrɛ toesaɛ̄ loo nyɔnɛbee ba bee le doodoo naana pee a naa ɛrɛ nɛɛ a wa tɔɔ̄loo. Sa a bee wa tɔgɛ gbɛnɛ-edo nu.

35 Mɛ sɔ̄ ebee kuī, e pya a wee ye nyɔɔnɛ dumɛ bee ye lu loo sa ye kɔ nɛ kɔ: “Kɛ̄ ama binia aaloo buɛ̄, e dee ekuīna anyaawo. 36 Yere wa ture lokwa ba kii pya kɛ̄ a le waɛloo kɛ̄ le pya buɛ̄ a le tɛɛ̄ ɛŋɛnɛ lo barasī sa yaɛ nuede.” 37 A bee wa ture nɛ kɔ: “Bɔɔlo nɛaa wa nu ba ede.” Lo sɔ̄ ba bee ye kɔ nɛ kɔ: “I suge 200 Denariɔs* siā wee nyaa fituru enɛ pya nɛɛ ama kɔ ba a de ni?” 38 A kɔ wa nɛ kɔ: “Ku bee fituru a i le bah? Siaa wee ɛp!” Sɔ̄ ba emɔna, ba bee kɔ: “O’oo bee fituru le baɛ epah bari.” 39 E a bee kɔ nɛ dɛ̄dɛɛ̄ pya nɛɛ a kɔ ba a ɛŋɛtɛ̄ bu eku eku nyɔɔ ebie. 40 Nyɔɔwo, ba bee ɛŋɛtɛ̄ bu eku eku, pio 100, e pio 50. 41 A bee su o’oo bee fituru le baɛ epah bari a, e a ɛp bunyɔɔ sa yere kara. Lɛɛ a būŋ lo fituru sa nɛ pya a wee ye nyɔɔnɛ dumɛ kɔ ba a dɔɔ̄nɛ pya nɛɛ a, e a bee dɔɔ̄nage baɛ epah bari a nɛ dɛ̄dɛɛ̄ aba. 42 Nyɔɔwo, dɛ̄dɛɛ̄ aba bee de sa a mma wa bu, 43 E ba bee lap lo a siga sa a mma bu 12 kpɔ, sɔ̄ a naa lu eyere bari loo. 44 Pya a bee de bee lu 5,000 pya nɛɛdam.

45 Lo sɔ̄, a bee nwaabah kɔ nɛ pya a wee ye nyɔɔnɛ dumɛ kɔ ba a kii elua sīloo uwe li, kpaɛ̄ Bɛtsaida, e alɛ bee yere gbɛnɛkpo nɛɛ a ture. 46 Mɛ sɔ̄ eture wa sah, a bee kii nyɔɔ egu wee yere kara. 47 E sɔ̄ e’ina loo uunɛ, lo fah bee le taɛ pɛnɛ, mɛ alɛ bee le nyɔɔ kpo-uwe. 48 Nyɔɔwo, sɔ̄ emɔna wa ba gaa piiga lo e’ɔp fah nyɔɔbee ba gaa bee bebe loo efɔp a gaa bee dɔ, a bee kiā nyɔɔ pɛnɛ wa pii; mɛ a bee gbī ekiā wa tɛɛ̄ kpaɛ̄, a bee le bagara lɔɔrɛ sɔ̄ zii lege kɛ̄.* 49 E sɔ̄ ba emɔna ye a gaa kiā nyɔɔ pɛnɛ, ba bee kɔ: “Ɛɛ edɔɔ̄!” E ba bee wiikpā. 50 Nyɔnɛbee bɔɔ bee aa dɛ̄dɛɛ̄ aba sɔ̄ ba ye muɛ. Mɛ aba sɔ̄ a, a bee wa kɔ nɛ kɔ: “Ɛrɛaa e’agaloo! Ɛɛ mda; bɔɔ aa i aa.” 51 Lo sɔ̄, a yii wa kpaɛ̄ bu fah, e lo efɔp bee ɔp. E lo ama bee lu nyɛŋia loo dɛ̄dɛɛ̄ aba, 52 mɛ ba naa bee dābeeloo nu fituru a bee dɔɔ̄ a kura, nyɔnɛbee beenyiɛ wa bee duu lo edābeeloo nu.

53 Sɔ̄ ba bee ina elua sīloo uwe li, ba bee lu ina Gɛnɛsarɛt sa yere fah kɛ̄ bie lo kɛ̄. 54 Mɛ aba sɔ̄ ba aa bu fah a, pya nɛɛ bee ye suāloo. 55 E ba bee teera tɛɛ̄ ɛŋɛnɛ dɛ̄dɛɛ̄ lo barasī sa dana pya nɛɛ loo naa nwaɛ̄ nyɔɔ daɛ ma Jizɔs kɛ̄ ba bee dā kɔ a le. 56 E ɛrɛgebah sɔ̄ a yii bu gbɛnɛ buɛ̄ ale nwī-esɔgɔ buɛ̄, ba wee su pya nɛɛ loo dumɛ sere kɛ̄du, e ba wee bara kɔ ba edaae bahloo aba bee egā ye bɛloo deenyɔɔ*. E loo dɛ̄dɛɛ̄ pya a bee daabahloo ye bɛloo bee nwaɛ̄.