Lo Jɔn Bee Ɛm
12 Ini’ī biradee lɛɛ a gae lu dee Doonu Tɛɛ̄yee, Jizɔs bee ina Bɛtani kɛ̄ Lazarɔs nɛɛ a bee lɛɛ kɛ̄ bu luh a bee le. 2 Nyɔɔwo, ba bee doo nuede uunɛ bie lo kɛ̄ ye nɛ, e Mata aa bee wa ibi nɛ,* mɛ Lazarɔs bee le yɛɛ pya aa bee ye nyɔɔnɛ denu* a. 3 Lo sɔ̄, Meri bee su nɔɔ̄ a wee sī lele nuloo alu ziī pound* sɔ̄ alu edo, kaāna nɔɔ̄ nard lo a si gbɛnɛ du tɔ̄loo tɔ Jizɔs lɛɛ a su ye zia siŋa kagɛrɛ. E nuloo nɔɔ̄ a bee mma bu tɔ a. 4 Mɛ Judas Iskariɔt, ziī nɛɛ a wee ye nyɔɔnɛ dumɛ lo ebee sah elɛɛ ye bee kɔ: 5 “Ena anua nɔɔ̄ a wee sī lele nuloo ama naa bee lu e’oo loo 300 denariɔs sa alu enɛ pya kporo a?” 6 A bee kɔ nu ama naale nyɔɔbee a wee su pya kporo nua ziī nu, mɛ nyɔnɛbee a bee le nɛɛ biu le kɔ a wee aara ekpo kpugi, e a wee yip kpugi alu eyere bu. 7 Lo sɔ̄ Jizɔs bee kɔ: “Lɛɛ ye bahloo lokwa a doo lo ama lo ekpɛ̄na mɛ loo bɛma dee elu eli mɛ. 8 Nyɔnɛbee pya kporo le i yɛɛ dɛ̄dɛɛ̄ sɔ̄, mɛ mda mm le ele i yɛɛ dɛ̄dɛɛ̄ sɔ̄.”
9 Lo sɔ̄, gbɛnɛ-edo pya Juu bee suā kɔ a le lo kɛ̄, nyɔɔwo ba bee lu naale aba lo emuɛ Jizɔs mɛ lo emuɛnage Lazarɔs lo a bee lɛɛkɛ̄ bu luh a. 10 Nyɔɔwo, pya tɛsī ewɔp bee nɔɔ lo efɛnage Lazarɔs, 11 nyɔnɛbee a bee le nyɔɔ alɛ na gbɛnɛ-edo pya Juu aa bee kii lo kɛ̄ sa ɛrɛ yira bu Jizɔs a.
12 Lo dee a za nyɔɔnɛ, gbɛnɛkpo nɛɛ a bee lu uwe lo Doonu bee dā kɔ mɛ Jizɔs aa lu Jerusɛlɛm. 13 Nyɔɔwo, ba bee aara lah-zoo bah wa sa si wee zɔ̄ŋia ye, e ba bee bɔātɛ̄ ewiikpā kɔ: “I bara kɔ o kpɔā ye! Leelee a le nɛ nɛɛ alu bu bee Jɛhova, Mɛnɛ Izrɛl!” 14 Sɔ̄ Jizɔs bee muɛ ziī nwīgbagbara enyanya-toora-toh, a bee ɛŋɛtɛ̄ nyɔɔ, dookɛ̄ a bee lu e’ɛm doo kɔ: 15 “Bɔɔ aa a aa, a nwiīnɛɛwa Zaiɔn. Ɛp! o mɛnɛ gaa lu, a ɛŋɛtɛ̄ nyɔɔ nwī-enyanya-toora-toh.” 16 Pya a wee ye nyɔɔnɛ dumɛ naa bee dābeeloo nu ama tua sɔ̄, mɛ a bee le sɔ̄ elua enɛ ka Jizɔs na ba nyɛŋiabu kɔ ebee lu e’ɛm pya nu ama ye kumaloo a, le kɔ ba doo ye pya nu ama loo.
17 Lo sɔ̄, gbɛnɛ-edo nɛɛ a bee ye le loo sɔ̄ a bee kue Lazarɔs lɛɛ bu kpoli* sa ye lɛɛ kɛ̄ bu luh yɛɛ pya e’ua a, bee kiisī lo eyira ekeebee ye kumaloo. 18 Nu anuanage sa gbɛnɛkpo nɛɛ bee si wee zɔ̄ŋia ye lo nyɔnɛbee ba bee dā kɔ a bee si nyɛŋiatam ama. 19 Lo sɔ̄, pya Farisii bee kɔ yɛɛ wa kɔ: “Ekɔ buii muɛ kɔ lɔgɔ nu i gaa doo naa aa kiisī leere ni? Ɛp! Dɛ̄dɛɛ̄ nyɔuwe enyɔɔnɛ ye.”
20 Lo sɔ̄, ɛrɛ pio pya Grik a bee le yɛɛ pya a bee lu wee taāŋabah Bari bu sɔ̄ lo doonu. 21 Nyɔɔwo pya nɛɛ ama bee si loo Filip lo a aa Bɛtsaida loo Galilii sa ye bara kɔ: “Tɛtɔ, i gbī emuɛ Jizɔs.” 22 Filip bee si wee kɔ enɛ Andru. E Andru le Filip bee si sa kɔ nɛ Jizɔs.
23 E Jizɔs bee wa kɔ nɛ kɔ: “E’ina sɔ̄ elu enɛ ka Nwiīnɛɛ. 24 M kɔ kaka i nɛ, lo eyuu kpakpaa wheat naa dɔ kɛnɛkɛ̄ sa u, ebia aba ziī eyuu dookɛ̄ a bee le doo; mɛ lo a u, lo sɔ̄ na emum booboo eyuu a. 25 Ɛrɛgebah nɛɛ a wereloo ye dum* epee ye, mɛ ɛrɛgebah nɛɛ a baaloo ye dum* bu lo nyɔuwe ama ekpega ye bɛma dum anaatah. 26 Lo a le ɛrɛgebah nɛɛ gbī esitam mɛ nɛ, a nyɔɔnɛ mɛ, e kɛ̄ mda le na nɛɛ a mɛ sitam nɛ elenage a, e na Tɛ enɛ ka ɛrɛgebah nɛɛ a gbī esitam mɛ nɛ. 27 Nyaawo nu aa mɛ taɛ̄ŋɛ, e ena m kɔ a? Tɛ, kpɔā mɛ lɛɛ bu lo sɔ̄ ama. Kerewo, lo bah ama na anua m bee le mmɛ taɛ lo sɔ̄ ama a. 28 Tɛ, nɛ ka o bee.” Lo sɔ̄, ziī muɛ̄ aa bunyɔɔ kɔ: “M ebee ye nɛ ka, e m sinagekɛ̄ ye nɛ ka.”
29 Gbɛnɛkpo nɛɛ a bee le eyira lo kɛ̄ bee dā sa ba kɔ naānyɔɔ epɔma. E pya lo dɔɔ̄na bee kɔ: “Ɛnjɛl ekɔa ue ye nɛ.” 30 Jizɔs bee wa ture nɛ kɔ: “Naale nyɔɔ mda na muɛ̄ ama dɔ a, mɛ nyɔɔ bɔɔlo. 31 Nyaawo na aa lu ebiaɛ biaɛ loo nyɔuwe ama a; e nyaawo na elu etop nɛɛ aa bɛɛ nyɔuwe ama bie ee a. 32 E kere alu edana mda lɛɛ a nyɔɔ kɛnɛkɛ̄ ama kuma nyɔɔ, m zuura keekee eku pya nɛɛ nua loo mɛ.” 33 Mɛ a bee kɔ lo bah ama lo etɔgɛ dua luh e’u. 34 Lo sɔ̄, gbɛnɛkpo nɛɛ a kɔ ye nɛ kɔ: “I bee dā aābu Lok kɔ Kraist etɔɔ̄ mmɛ deedee. Ena anua o kɔ elu edana Nwiīnɛɛ nɛ nyɔɔ a? Mɛɛ na alu lo Nwiīnɛɛ a?” 35 Nyɔɔwo, Jizɔs bee wa kɔ nɛ kɔ: “Ebia kunɛ nwīgbagbara sɔ̄ lɛɛ ɛɛdee aa i yɛɛ. Kiaā sɔ̄ ɛɛdee i lege yɛɛ lokwa zii naa ee i bah; ɛrɛgebah nɛɛ a kiā bu zii naa suā kɛ̄ a gaa kii. 36 Ɛrɛaa yira bu ɛɛdee sɔ̄ ɛɛdee i le yɛɛ lokwa bui dap lu miɔŋɔ ɛɛdee.”
Sɔ̄ Jizɔs ekɔa pya nu ama sah, a bee aa sa wa gɔā loo. 37 E kereadoo a bee si gbɛnɛ-edo nyɛŋiatam wa kɛ̄sī, ba naa bee ye ɛrɛ yira bu, 38 lokwa ue a bee lu ekɔ tɛ̄ma nu nɛɛ mɔmanudɛɛ̄ Aizaia dooa gbɔ̄mɛɛ, lo a kɔ: “Jɛhova, mɛɛ na eyira pya nu* ba bee i dā aānu a? E mɛɛ na Jɛhova etɔgɛ ye ekpobah a?” 39 E nu anua ba naa bee dap yiga na nu Aizaia bee sikɛ̄ kɔ sɔ̄ a kɔ: 40 “Ezimɛ wa dɛɛ̄ sa doo kɔ beenyiɛ wa a aga, lokwa ba naa su dɛɛ̄ wa mɔma nu sa dābeeloo nu bu wa beenyiɛ sa mɛ kiiya pii lokwa m wa bo.” 41 Aizaia bee kɔ pya nu ama nyɔnɛbee a bee muɛ ye ka sa kɔ pya nu a ye kiiloo. 42 Kerewo, gbɛnɛ-edo pya aa bɛɛ bee ye ɛrɛ yira bu, mɛ ba naa bee kɔ siā nyɔɔbee pya Farisii, lokwa a naa lu ekpoe wa lɛɛ bu tɔ bɔŋanaloo; 43 nyɔnɛbee ba wereloo ka a aabah nɛɛ ee ka a aabah Bari.
44 Mɛ Jizɔs bee su gbɛnɛ muɛ wa kɔā nɛ kɔ: “Ɛrɛgebah nɛɛ a mɛ ɛrɛ yira bu, ɛrɛnage yira bu Nɛɛ a bee mɛ yere e a naale aba mda; 45 e ɛrɛgebah nɛɛ a mɛ muɛ, muɛnage Nɛɛ a bee mɛ yere. 46 M elua bu nyɔuwe doodoo ɛɛdee lokwa ɛrɛgebah nɛɛ a mɛ ɛrɛ yira bu naa bia bu zii. 47 Mɛ lo a le ɛrɛgebah nɛɛ dā pya na ue sa a naa doo wa, mm ye biaɛ; nyɔnɛbee mm bee lu wee biaɛ nyɔuwe mɛ lo ekpɔā nyɔuwe. 48 E ɛrɛgebah nɛɛ a naa yere mɛ ka loo sa naa su pya na ue, a ɛrɛ nɛɛ ebiaɛ ye. Ue m kɔ na ebiaɛ ye biaɛ loo nyɔɔ kpɛdumɛ dee a. 49 Nyɔnɛbee mm kɔ ue aāloo mdaa ekpo, mɛ Tɛ a bee mɛ yere enɛā mɛ lok kumaloo nu m kɔ le nu m tɔgɛ. 50 E m suā kɔ ye lok nua dum anaatah. Nyɔɔwo, ɛrɛgebah nu m kɔ, m kɔ taɛ kɛ̄ Tɛ a bee mɛ kɔ nɛ doo.”