Lo Matiu Bee Ɛm
2 Sɔ̄ Jizɔs emɛā sah bu Bɛtlihɛm loo Judia bu gbo dee mɛnɛ Hɛrɔd,* ɛp! pya a wee nɔ nu akiiloo sī dee ba aa Kɛ̄ Enaani Wee Sira Aa bee lu Jerusɛlɛm 2 sa kɔ: “Mɛ kɛ̄ na mɛnɛ alu emaɛ̄ nɛ pya Juu le a? Nyɔnɛbee i bee muɛ ye zina bie Kɛ̄ Enaani Wee Sira Aa, e i elua lokwa i ye uubeekɛ̄ nɛ.” 3 Sɔ̄ Mɛnɛ Hɛrɔd bee dā lo ama, alɛ le dɛ̄dɛɛ̄ Jerusɛlɛm bee ɛrɛ gbɛnɛ bɔɔ. 4 Sɔ̄ ebɔŋɛnɛloo dɛ̄dɛɛ̄ pya tɛsī ewɔp le pya ɛm kpa aā yɛɛ pya nɛɛ a sah, a bee wa bip kɛ̄ a bee lu ekɔ lo Kraist* emɛā bie. 5 Ba kɔ ye nɛ kɔ: “Bu Bɛtlihɛm loo Judia, nyɔnɛbee nɛɛ mɔmanudɛɛ̄ bee ɛm sere kɛ̄ kɔ: 6 ‘Olo, Aa Bɛtlihɛm a le buɛ̄ Juda, o lu nwīgbagbara yɛɛ pya mɛnɛ buɛ̄ Juda, nyɔnɛbee aābu olo na ziī mɛnɛ gaa le aa a, lo ekuūdɛɛ̄loo pya na nɛɛ Izrɛl.’”
7 Lo sɔ̄ Hɛrɔd bee kue pya a wee nɔ nu akiiloo sī dee a bu gɔā sa wa bip kaāna lo edābeeloo sɔ̄ lo zina bee bɔātɛ̄ esira. 8 Sɔ̄ aa wa yere ture Bɛtlihɛm, a bee kɔ: “Kiraa sa gbī nwiī a leere, e sɔ̄ bui emɔna ye doraa kɔ m suā lokwa mda sinage sa ye uubeekɛ̄ nɛ.” 9 Sɔ̄ ba edaā nu mɛnɛ kɔ, ba bee kii nyɔɔ wa dee, e ɛp, zina ba bee muɛ sɔ̄ ba bee le Kɛ̄ Enaani Wee Sira Aa a, bee wa zaāsī mmɛ sɔ̄ a bee yira kɛ̄ nwiī a le. 10 Sɔ̄ ba bee muɛ lo zina, bu wa bee ɛɛ gbɛnɛ. 11 E sɔ̄ ba yii lo tɔ, ba bee muɛ nwiī a le ye ka Meri. E ba wɛɛa dɔ sa ye uubeekɛ̄ nɛ. Ba bee dɔɔ̄nage gold, frankincense le myrrh ye nɛ aā yɛɛ wa nu zɔ. 12 Kerewo, nyɔɔbee Bari bee wa zuurabahtɔ̄ bu zagara kɔ ba aa obia si loo Hɛrɔd a, ba bee tɛɛ̄ dɔɔ̄na dee obia kii wa buɛ̄.
13 Sɔ̄ ba ekira, ɛp ɛnjɛl Jɛhova bee siraloo Josɛf bu zagara sa kɔ: “Aakɛ̄, su nwiī a le ye ka teā kuma Ijipt sa tɔɔ̄ lo kɛ̄ mmɛ sɔ̄ m kɔ nu o doo a nɛ, nyɔnɛbee Hɛrɔd esaa egbī nwiī a lokwa a ye fɛ.” 14 Nyɔɔwo, Josɛf bee aakɛ̄ taɛ lo uunɛ sa su nwiī a le ye ka kuma Ijipt. 15 A bee tɔɔ̄ lo kɛ̄ mmɛ sɔ̄ Hɛrɔd u, lo ama bee mmɛɛ nu Jɛhova bee kɔ tɛ̄maloo ye nɛɛ mɔmanudɛɛ̄ kɔ: “Aā bu Ijipt na m kue na nwiīnɛɛdam a.”
16 Nyɔɔwo, sɔ̄ Hɛrɔd emɔna kɔ pya a wee nɔ nu akiiloo sī dee ebirae ye, bu ye bee biira gbɛnɛ. Nyɔɔwo, aāloo nu pya a wee nɔ nu akiiloo sī dee a bee ye kɔ nɛ kumaloo sɔ̄ nwiī a bee mɛā, a bee nɛ lok kɔ alu efɛ dɛ̄dɛɛ̄ nwiīnɛɛdam a mɛā bu Bɛtlihɛm le dɛ̄dɛɛ̄ pya buɛ̄ a le waɛloo, aā nyɔɔ baɛ zua kii kɛ̄. 17 Lo ama mmɛɛ nu a bee lu ekɔ tɛ̄ma nu nɛɛ mɔmanudɛɛ̄ Jeremaia lo a kɔ: 18 “A bee lu edā ziī muɛ̄ bu Rema, muɛ̄ to le gbɛnɛ ekiɛ̄nu, a bee le Rechɛl na a gaa to nyɔɔ pya ye miɔŋɔ a, e a naa bee yiga kɔ alu egbɔ̄e ye, nyɔnɛbee pya ye miɔŋɔ naa bee lena.”
19 Sɔ̄ Hɛrɔd e’ua, ɛp ɛnjɛl Jɛhova bee siraloo Josɛf bu zagara bie Ijipt 20 sa ye kɔ nɛ kɔ: “Aakɛ̄, su nwiī a le ye ka kuma buɛ̄ Izrɛl nyɔnɛbee pya aa bee gbī efɛ* nwiī a e’ua.” 21 Nyɔɔwo, a bee aakɛ̄ sa su nwiī a le ye ka kuma buɛ̄ Izrɛl. 22 Mɛ sɔ̄ edaā kɔ Akɛleɔs na a gaa bɛɛ Judia a, e a naa lena ye tɛ Hɛrɔd, bɔɔ bee ye aa lo ekii lo kɛ̄, gbaāloo wo, dɛɛa nyɔɔ zuurabahtɔ̄ Bari bee ye nɛ bu zagara, a bee obia sa kii barasī Galilii. 23 E sɔ̄ a bee ina lo kɛ̄, a bee tɔɔ̄ ziī buɛ̄ a kura Nazarɛt lokwa alu edoo gbɔ̄mɛɛ nu a bee lu ekɔ tɛ̄ma nu pya nɛɛ mɔmanudɛɛ̄ kɔ: “Elu ekure ye nɛɛ Nazarɛt.”*