Lo Matiu Bee Ɛm

22 Jizɔs bee sinagekɛ̄ wa kɔ dɔɔ̄na kam nɛ kɔ: 2 “Dap lu esu Buɛ̄-mɛnɛ bunyɔɔ dooreloo mɛnɛ-buɛ̄ a bee bui nuede loo doonu ii’ii wa nɛ ye nwiīnɛɛdam. 3 E a yere pya ye zooro kɔ ba a kue pya a bee lu ekue loo lo doonu ii’ii wa, mɛ ba naa gbī esi. 4 A sinagekɛ̄ yere pya dɔɔ̄na zooro sa kɔ, ‘kɔaa nɛ pya a bee lu ekue kɔ, “Ɛp! m edoora na nuede sah, m efɛa pya na edoo nam le pya na nam a ɛrɛ lɛk, e dɛ̄dɛɛ̄ nu eleera. Luaa loo doonu ii’ii wa a.”’ 5 Mɛ ba naa ɛp ye nua lɔgɔ nu, ziī aba kii ye wii, lo dɔɔ̄na kii uwe ye gbora; 6 mɛ pya elua a bee aa pya ye zooro, wa si bag loo sa wa fɛ.

7 Bu lo mɛnɛ bee biira sa a yere pya ye nɔ̄, e ba fɛ pya a bee fɛ pya ye zooro a sa ɔp wa buɛ̄. 8 Lɛɛ a kɔ nɛ pya ye zooro kɔ, ‘Doonu ii’ii wa a eleera mɛ pya a bee lu ekue naa bɔloo. 9 Nyɔɔwo, kiraa nyɔɔ pya dee a tɛɛ̄ aabu gbɛnɛ buɛ̄ sa kue ɛrɛgebah nɛɛ bui muɛ nua loo doonu ii’ii wa a.’ 10 Lo sɔ̄, pya ye zooro bee kii nyɔɔ dɛ̄dɛɛ̄ dee sa bɔŋɛnɛloo dɛ̄dɛɛ̄ pya ba muɛ, pya pɔrɔ le pya le, e pya nɛɛ aa denu* bee mma tɛm aa lu etɔɔ̄ doo doonu ii’ii wa a.

11 “Mɛ sɔ̄ mɛnɛ a bee yii tɔ lo e’ɛp pya a bee lu ekue, a muɛ ziī nɛɛ a naa yaa bɛloo doonu ii’ii wa. 12 E a kɔ ye nɛ, ‘Na gbo, o tɛɛ̄ doodoo wa yii akɛāma sɔ̄ oo yaa bɛloo doonu ii’ii wa ni?’ Mɛ a naa bee dap kɔ lɔgɔ nu. 13 Lo sɔ̄ mɛnɛ a bee kɔ nɛ pya ye zooro kɔ, ‘Bɔbaa ye bah le tɔ sa ye top tɛrɛ kɛ̄ ee bu zii. Kɛ̄ a na eto to sa tagi daa ye a.’

14 “Nyɔnɛbee a bee lu ekue gbɛnɛ-edo nɛɛ mɛ pya alu esagɛ lu nwīepoo.”

15 Lo sɔ̄ pya Farisii bee aa sa biraloo kɛ̄ ba etɛɛ̄ doo ye aa tɛ̄maloo nu a kɔ. 16 Nyɔɔwo, ba bee lɛɛra pya a wee wa nyɔɔnɛ dumɛ gbaāloo pya a wee nyɔɔnɛ dumɛ Hɛrɔd kɔ ba a bip ye kɔ: “Nɛɛ tɔgɛnu, i suā kɔ o lu nɛɛ a kɔ kaka sa o wee tɔgɛ kaka dee Bari, e oo wee gbī ewonu aābah lɔgɔ nɛɛ nyɔnɛbee oo wee ɛp kɛ̄ mɛā nɛɛ le doo. 17 Kɔ i nɛ, ena o kɛɛrɛ a? A bɔgeloo* bu lok lo ekpɛ etup nɛ Siza sɛh a naa bɔloo ni?” 18 Mɛ nyɔnɛbee Jizɔs suā pɔrɔ nu ba aa nɔɔ a, a kɔ “ena anua bui doā mɛ ɛp a, a pya baɛsī? 19 Tɔgɛaa mɛ ziī kpɔgɔrɔ kpugi a wee lu esu kpɛā tax.” E ba bee ye nɛ ziī denariɔs.* 20 A kɔ wa nɛ kɔ: “Sī mɛɛ le bee mɛɛ na ama?” 21 Ba bee kɔ: “Lo Siza.” A kɔ wa nɛ: “Nyɔɔwo, kpɛaa nu a kuu Siza nɛ Siza sa kpɛ nu a kuu Bari nɛ Bari.” 22 Sɔ̄ ba dā doo wo, a bee wa lu nyɛŋia loo, e ba aa ye loo sa kii.

23 Taɛ lo dee, Pya Sadusii ba naa wee yiga bu aakɛ̄ bu luh bee ye lu loo sa ye bip kɔ: 24 “Nɛɛ tɔgɛnu, Mozis bee kɔ: ‘Lo a le ziī nɛɛ u sɔ̄ a sii ɛrɛ nwiī, ye wuga nɛɛdam e’ii ye wa sa a ɛrɛ nwiī ye nɛ.’ 25 Kɛādoo, ɛrɛba wuga nɛɛdam bee i le yɛɛ. Lo tuatua bee ii wa sa a u, e nyɔnɛbee a sii bee ɛrɛ lɔgɔ nwiī a, ye wuga bee sikɛ̄ ii ye wa. 26 E aba lo nu bee siranage loo lo eree baɛ le lo eree taa, e kɛ̄ a bee siranage loo dɛ̄dɛɛ̄ ɛrɛba aba doo lo. 27 Bu kpɛdumɛ, lo wa bee u. 28 Nyɔɔwo, sɔ̄ aakɛ̄ bu luh, elu wa mɛɛ yɛɛ ɛrɛba aba? Nyɔnɛbee a bee le wa ɛrɛba aba.”

29 Mɛ Jizɔs bee wa ture nɛ kɔ: “Bui tɛɛ̄ ekwɔ nyɔnɛbee buii suā nu a le bu Kpa Kaɛ ale ekpo Bari ɛrɛ; 30 mɛ bu aakɛ̄ bu luh, pya nɛɛ naale e’iina wa e ba naale enɛnage wa dam, mɛ ba ele doodoo pya ɛnjɛl li bunyɔɔ. 31 Mɛ kiiloo aakɛ̄ bu luh pya e’ua, bui sii bee buū nu Bari bee kɔ lo a kɔ: 32 ‘Mda na Bari Ebreham le Bari Aizik le Bari Jekɔb a’? Alu Bari pya a le dum e a naale lo pya a e’ua.” 33 E sɔ̄ gbɛnɛkpo nɛɛ a edaā doo wo, a bee wa lu nyɛŋia loo loo kɛ̄ a tɔgɛ nu doo.

34 Sɔ̄ pya Farisii edaā kɔ pya Sadusii naa dap agara ebip Jizɔs wa bip, ba bee gbaaloo lu ziī eku. 35 E ziī aba a suā lok kaāna a wa le yɛɛ bee ye doā-ɛp sa ye bip kɔ: 36 “Nɛɛ tɔgɛnu, amunu lok yɛɛ dɛ̄dɛɛ̄ Lok na a kuī gbɛnɛ a?” 37 A kɔ ye nɛ: “‘O ɛrɛ ewereloo Jɛhova* o Bari aābu dɛ̄dɛɛ̄ o beenyiɛ le aābu dɛ̄dɛɛ̄ o piogi.* le aābu dɛ̄dɛɛ̄ o ekɛɛrɛ.’ 38 Lo ama na lo tuatua le lo lok a kuī gbɛnɛ a. 39 Lo eree baɛ aba a ye bee na ama: ‘O ɛrɛ ewereloo nɛɛ le ɔɔ le doodoo oloo loo.’ 40 Dɛ̄dɛɛ̄ Lok le nu pya zue ue bee ɛm dɛɛa nyɔɔ baɛ lok ama.”

41 Mɛ sɔ̄ pya Farisii bee le ebɔŋia, Jizɔs bee wa bip kɔ: 42 “Ena bui kɛɛrɛ akiiloo Kraist a? Ɛɛ nwiī mɛɛ?” Ba kɔ ye nɛ: “Nwiī Devid.” 43 A bee wa bip kɔ: “Nyɔɔwo, ena anua sɔ̄ edɔɔ̄ Bari bee le loo Devid a bee ye kure Nɛɛ-a-i-ɛrɛ sa kɔ, 44 ‘Jɛhova* bee kɔ nɛ Nɛɛ-a-mɛ-ɛrɛ kɔ: “Ɛŋɛ mɛ tɛ̄ bara bahle mmɛ sɔ̄ m su pya o nɛɛ baa a yere kɛɛ̄ baɛ tɔ a”’? 45 Lo a le doo wo, ena anua Devid bee ye kure Nɛɛ-a-i-ɛrɛ a, e bu mɛ sīdee na alu ye nwiī a?” 46 E lɔgɔ nɛɛ naa bee ye dap ture lɔgɔ nu nɛ, sa aā lo dee kiisī, lɔgɔ nɛɛ naa bee donabahloo lo ebip ye ziī ebip.