Lo Matiu Bee Ɛm

10 E a bee kue 12 pya a wee ye nyɔɔnɛ dumɛ sa wa nɛ ekpo lo elɛma edɔɔ̄ a naa ɛɛ* le ekpo eboā dɛ̄dɛɛ̄ bee eyɔloo le ɛrɛgebah boh.

2 Bee 12 pya ye nɛɛ lɛɛratam na ama: Tuatua, Saimɔn alu ekure Pita, le Andru ye wuga; Jems nwiī Zɛbidi, le Jɔn ye wuga; 3 Filip le Batɔlɔmiu; Tɔmɔs le Matiu nɛɛ tup etup; Jems nwiī Alfiɔs le Tediɔs; 4 Saimɔn nɛɛ Kenan* le Judas Iskariɔt; nɛɛ a bee ye lɛɛ sɔ̄ esaa.

5 Jizɔs bee yere 12 nɛɛ ama ture ee sa wa zuurabahtɔ̄ kɔ: “Bui aa yii lɔgɔ buɛ̄ a naale buɛ̄ pya Juu, e bui aa yii lɔgɔ buɛ̄ Sameria; 6 mɛ taāwo, kiraasī lo egbī naana pee a bee pe loo tɔ Izrɛl. 7 Sɔ̄ bui kii, zueraa kɔ: ‘Buɛ̄-mɛnɛ bunyɔɔ ewaraloo kɛ̄.’ 8 Boaa pya loo dumɛ, lɛraa pya a u kɛ̄ bu luh, doraa kɔ pya ebiakpaŋ a ɛɛ, lɛraa gbo-yɔ. Bee lu enɛ i bu yɔrɔ, nɛaa yɔrɔ. 9 Bui aa aara gold ale silva ale nwīkpɔrɔ* bu bui bɛrɛ sima kɛ̄tɛ̄, 10 ale bɛrɛ nuede nyɔɔ bui kiā, ale baɛ ka bɛloo,* ale kpa ekaɛtɔ, ale nwī-tum, nyɔnɛbee a bɔloo kɔ nɛɛtam a denu.

11 “E ɛrɛgebah gbɛnɛ buɛ̄ ale esɔgɔ buɛ̄ bui yii, gbiaā nɛɛ a bɔloo sa tɔ̄naa lo kɛ̄ mmɛ sɔ̄ bui aa. 12 Sɔ̄ bui yii tɔ a, kānaa muɛ̄ tɛ ɛrɛ tɔ. 13 Lo pya a le tɔ a su i, doolo bui efɛɛloo le nyɔɔ tɔ a; mɛ lo a le ba naa su i, doo lo bui efɛɛloo i obia nyɔɔnɛ kii. 14 Ɛrɛgebah kɛ̄ pya nɛɛ naa su i ale ba naa gbaɛ̄tɔ̄ bui ue, kparaa esaā lɛa kɛɛ̄ ekaɛtɔ i sɔ̄ bui aa tɔ ale buɛ̄ a. 15 Kaka m kɔ i nɛ, nyɔɔ Dee Biaɛ, nu e’aga loo buɛ̄ a ee kɛ̄ a bee aga loo buɛ̄ Sɔdɔm le Gomora doo.

16 “Ɛp! m yere i doodoo naana pee yɛɛ gbo-kuɛ;* nyɔɔwo, luaa pya a nwaɛ̄dɛɛ̄ doodoo yɔɔ sa naa ɛrɛ kiāŋana doodoo bɛmaakuku. 17 Nwanaadɛɛ̄ loo pya nɛɛ nyɔnɛbee ba esu i kuma tɔbiaɛ sa ba zip i bie pya wa tɔ bɔŋanaloo. 18 E ba esu i nua kɛ̄sī pya bɛbɛɛ le pya mɛnɛ-buɛ̄ nyɔɔ mdaa bee, e bui yira ekeebee wa nɛ le pya dɔɔ̄na edonyɔɔ. 19 Kerewo, sɔ̄ ba esu i wa yere kɛ̄bah, bui aa nɛ taāŋa loo i loo nu bui kɔ ale kɛ̄ bui kɔ doo, nyɔnɛbee elu enɛ i nu bui kɔ taɛ lo sɔ̄; 20 nyɔnɛbee a naale bɔɔlo na bui kɔ ue a, mɛ edɔɔ̄ bui Tɛ lo a i kɔ ue tɛ̄ma bu. 21 Gbaāloo wo, wuga esu wuga yere kɛ̄bah luh, e tɛ esu nwiī, e gbomiɔŋɔ e’aakɛ̄ lo edoo wa tɛ le ka sa wa su yere kɛ̄bah luh. 22 E dɛ̄dɛɛ̄ nɛɛ ebaa i loo nyɔɔ mdaa bee, mɛ nɛɛ a egerebu mmɛ kuma na elu ekpɔā a. 23 Lo ba tɛ̄ŋa i loo bu ziī buɛ̄, bui teeraa kii lo dɔɔ̄na, nyɔnɛbee kaka m kɔ i nɛ, buii le edap sitam tɛ̄ma ɛŋɛnɛ dɛ̄dɛɛ̄ buɛ̄ Izrɛl mmɛ sɔ̄ Nwiīnɛɛ elu.

24 “Nɛɛ aa nɔ nu* naa wee eenyɔɔ ye nɛɛ tɔgɛnu, e zooro naa wee eenyɔɔ ye tɛtɔ. 25 Elu e’aara nɛɛ aa nɔ nu bu aba sīdee alu e’aara ye nɛɛ tɔgɛnu, e elu e’aara zooro bu aba sīdee alu e’aara ye tɛtɔ. Lo a le pya nɛɛ bee su tɛtɔ a kure Bɛɛlzɛbɔb,* ekɔ ba naale edoonage wo loo pya ye tɔ ni? 26 Nyɔɔwo, bui aa wa ɛrɛ bɔɔ loo nyɔnɛbee lɔgɔ nu alu e’uu nu nyɔɔ a naale elu emuuna naale, e lɔgɔ nu a le bu gɔā a naale elu esuā naale. 27 Nu m i kɔ nɛ bu zii, kɔaa siā bu ɛɛdee, e nu alu eyagara i nɛ, yiraa nyɔɔ tɔ zue. 28 E bui aa ɛrɛ bɔɔ loo pya a fɛ ekpaloo mɛ ba naa dap fɛ piogi;* mɛ ɛrɛaa bɔɔ loo nɛɛ a dap gbee piogi le ekpaloo bu Gɛhɛna.* 29 Ekɔ a naa wee lu e’oo baɛ ka nwīkpɛɛ̄ loo nwīgbagbara kpugi* ni? Kerewo, lɔgɔ aba naale edɔ kɛnɛkɛ̄ sa bui Tɛ naa suā. 30 Mɛ a suānage buā zia a i le ekobee. 31 Nyɔɔwo, bɔɔ aa i aa; bɔɔlo bui sidu ee booboo nwīkpɛɛ̄.

32 “Nyɔɔwo, ɛrɛgebah nɛɛ a mɛ kɔ siā kɛ̄sī pya nɛɛ, mda m kɔnage ye siā kɛ̄sī na Tɛ lo a le li bunyɔɔ. 33 Mɛ ɛrɛgebah nɛɛ a mɛ ana kɛ̄sī pya nɛɛ, mda m ananage ye kɛ̄sī na Tɛ lo a le li bunyɔɔ. 34 Bui aa kɛɛrɛ kɔ m bee lu wee sere efɛɛloo bu nyɔuwe; mm bee lu wee sere efɛɛloo mɛ gɛ̄nɔ̄. 35 M bee lu wee poo butɔ, lo edoo kɔ nwiīnɛɛdam a gbānasī ye tɛ, lo edoo kɔ nwiīnɛɛwa a gbānasī ye ka, e nwiīnɛɛwa a iya dam a gbānasī ye ka-dam. 36 Bu kaka, pya elu nɛɛ baa nɛɛ na pya ye butɔ. 37 Ɛrɛgebah nɛɛ a wereloo tɛ ale ka mɛ emanyɔɔ naa bɔloo elu nɛɛ a mɛ nyɔɔnɛ dumɛ, e ɛrɛgebah nɛɛ a wereloo nwiīnɛɛdam ale nwiīnɛɛwa mɛ emanyɔɔ naa bɔloo elu nɛɛ a mɛ nyɔɔnɛ dumɛ. 38 E ɛrɛgebah nɛɛ a naa su ye te tɔga* sa mɛ nyɔɔnɛ naa bɔloo elu nɛɛ a mɛ nyɔɔnɛ dumɛ. 39 Ɛrɛgebah nɛɛ a gbī ekpɔā ye dum epee ye, e ɛrɛgebah nɛɛ a pee ye dum nyɔɔ mdaa bee esikɛ̄ ye ɛrɛ.

40 “Ɛrɛgebah nɛɛ a i su sunage mda, e ɛrɛgebah nɛɛ a mɛ su sunage Nɛɛ a bee mɛ yere. 41 Ɛrɛgebah nɛɛ a su nɛɛ mɔmanudɛɛ̄ nyɔɔbee alu nɛɛ mɔmanudɛɛ̄ e’ɛrɛ ekpɛanu nɛɛ mɔmanudɛɛ̄, e ɛrɛgebah nɛɛ a su nɛɛ kaāna dogo nyɔɔbee alu nɛɛ kaāna dogo e’ɛrɛnage ekpɛanu nɛɛ kaāna dogo. 42 E ɛrɛgebah nɛɛ a nɛ ziī kɔp fiitɔɔ maā ziī pya lo nwīgbagbara ama kɔ a ɔ̄ nyɔnɛbee alu nɛɛ a mɛ nyɔɔnɛ dumɛ, kaka m kɔ i nɛ, lɔgɔ nu edoo kɔ a peere ye ekpɛanu naale.”