Lo Matiu Bee Ɛm
4 Lo sɔ̄ edɔɔ̄* bee ture Jizɔs kuma bu kpo-sagara-wii, e Pɔrɔ-edɔɔ̄ bee ye doā-ɛp bie lo kɛ̄. 2 Sɔ̄ ekara nuede loo 40 biradee le 40 uunɛ sah, loo ye bee lɛɛ. 3 E Nɛɛ Doā-ɛp bee ye lu loo sa ye kɔ nɛ kɔ: “Lo o lege Nwiīnɛɛdam Bari, kiira pya ekpodɛm ama nua fituru.” 4 Mɛ a ture ye nɛ: “Ebee lu e’ɛm kɔ: ‘Naale aba fituru na nɛɛ ede tɔ̄ma dum a, mɛ tɛ̄maloo dɛ̄dɛɛ̄ ue a aa bu egā Jɛhova.’”
5 Lo sɔ̄ Pɔrɔ-edɔɔ̄ bee ye su kuma buɛ̄ kaɛ sa ye sere kɛ̄ a kii nyɔɔ loo lo tɔkaɛ 6 sa ye kɔ nɛ kɔ: “Lo o lege Nwiīnɛɛdam Bari, pɛɛ sirakɛ̄, nyɔnɛbee ebee lu e’ɛm kɔ: ‘A gaa le yere pya ye ɛnjɛl a ma,’ e ‘Ba gaa le taba a nyɔɔ baɛ bah wa lokwa oo su tɔ a zima dɛm.’” 7 Jizɔs bee ye kɔ nɛ: “Ebee lunage e’ɛm kɔ, o aa doā-ɛp Jɛhova o Bari doo pippip.”
8 Pɔrɔ-edɔɔ̄ bee sinagekɛ̄ ye su kuma nyɔɔ ziī egu a kii nyɔɔ gbɛnɛ sa ye tɔgɛ dɛ̄dɛɛ̄ buɛ̄-mɛnɛ loo nyɔuwe le wa ka. 9 E a bee ye kɔ nɛ kɔ: “M nɛ a dɛ̄dɛɛ̄ nu ama lo a le o wɛɛadɔ* sa mɛ taāŋabah kere aba ziī sɔ̄.” 10 Lo sɔ̄ Jizɔs bee ye kɔ nɛ: “Kii a Setan! Nyɔnɛbee ebee lu e’ɛm kɔ: ‘Aba Jɛhova o Bari na o ɛrɛ etaāŋabah a, e aba alɛ na o ɛrɛ esitam a le kaɛ nɛ a.’” 11 Lo sɔ̄ Pɔrɔ-edɔɔ̄ bee ye aaloo, e pya ɛnjɛl bee lu sa ye kuūdɛɛ̄loo.
12 E sɔ̄ Jizɔs edaā kɔ elua e’aa Jɔn, a bee aa lo kɛ̄ sa kii Galilii. 13 Sɔ̄ e aara Nazarɛt, a bee kii wee tɔɔ̄ Kapaniɔm a le kpaɛ̄ pɛnɛ a le barasī Zɛbulɔn le Naftalai. 14 Lokwa nu nɛɛ mɔmanudɛɛ̄ Aizaia bee kɔ doa gbɔ̄mɛɛ, lo a kɔ: 15 “Aa pya buɛ̄ Zɛbulɔn le Naftalai a le kpaɛ̄ dee a tɛɛ̄ kii bu pɛnɛ a le elua naɛsī Jɔdan, lo a le buɛ̄ Galilii kɛ̄ pya a naa lu Juu wee tɔɔ̄! 16 Pya nɛɛ a bee le bu zii emɔna ɛɛdee, e ɛɛdee emɔā nyɔɔ pya a le kɛ̄ ekoo luh bee kuɛ.” 17 Aā lo sɔ̄, Jizɔs bee bɔātɛ̄ ezue ue sa kɔ: “Kiiyaa, nyɔnɛbee Buɛ̄-mɛnɛ bunyɔɔ ewaraloo kɛ̄.”
18 Sɔ̄ aa bee kiā kpaɛ̄ pɛnɛ Galilii, a bee muɛ baɛ wuga nɛɛdam, Saimɔn alu ekure Pita, le Andru ye wuga. Ba gaa bee top gbɔ̄ nyɔnɛbee ba bee le pya fɛ bari. 19 E a kɔ wa nɛ: “Nyɔɔnɛaa mɛ, e m doo kɔ bui lu pya aa nɛɛ.” 20 Aba lo sɔ̄, ba bee lɛɛbahloo wa gbɔ̄ sa ye nyɔɔnɛ. 21 Sɔ̄ e’aara lo kɛ̄, a bee muɛ dɔɔ̄na baɛ wuga nɛɛdam, lo a le Jems le Jɔn pya miɔŋɔ Zɛbidii. Baɛ aba bee le bu fah kpaɛ̄ wa tɛ Zɛbidii sa gaa bee kwa wa gbɔ̄, e a bee wa kue. 22 Aba lo sɔ̄, ba bee aaloo wa fah maā le wa tɛ sa ye nyɔɔnɛ.
23 Lo sɔ̄, a bee kiā tɛɛ̄ bu dɛ̄dɛɛ̄ buɛ̄ Galilii, tɔgɛ nu bu wa tɔ bɔŋanaloo sa zue le yereue akiiloo Buɛ̄-mɛnɛ. A bee bo dɛ̄dɛɛ̄ bee eyɔloo le dɛ̄dɛɛ̄ pya nɛɛ a bee ɛrɛ boh. 24 E ue a ye kiiloo bee yaara tɛɛ̄ ɛŋɛnɛ dɛ̄dɛɛ̄ Siria, e ba bee su pya a ɛrɛ keekee dumɛloo sa le bu gbɛnɛ ezialoo ye siāloo, gbaāloo pya pɔrɔ-edɔɔ̄ aa, pya boro aa, le pya ua baraloo, e a bee bo dɛ̄dɛɛ̄ aba. 25 Nyɔɔwo, gbɛnɛ-edo nɛɛ a aa Galilii le Dikapolis* le Jerusɛlɛm le Judia le elua naɛsī Jɔdan a bee ye nyɔɔnɛ.