Lo Luk Bee Ɛm

21 Sɔ̄ a bee dana dɛɛ̄ ɛp, a bee muɛ pya mɛnɛ ba gaa tɛrɛ kpugi bu nu kpooge kpugi bu. 2 E sɔ̄ a bee ɛp, a bee muɛnage ziī waa ua dam alu kporo a tɛrɛ baɛ nwīgbagbara kpɔgɔrɔ kpugi* a tera kaāna, 3 e a kɔ: “Kaka m kɔ i nɛ, waa ua dam alu kporo ama tɛrɛ ee dɛ̄dɛɛ̄ nɛɛ. 4 Nyɔnɛbee dɛ̄dɛɛ̄ aba tɛrɛ aāloo gbɛnɛ-edo nu ba ɛrɛ mɛ alɛ aābu ye naɛ̄nu* tɛrɛ dɛ̄dɛɛ̄ nu a bee ɛrɛ lo etɔ̄ma dum.”

5 Sɔ̄ esaa, sɔ̄ pio nɛɛ aa bee kɔ kɛ̄ alu esu pya dɛm a kpedɛɛ̄ le pya nu alu edɔɔ̄ nɛ Bari wuā tɔkaɛ doo, 6 a bee kɔ: “Pya nu bui aa muɛ ama, a ɛrɛ dee a naale elu elɛɛbahloo ziī ekpodɛm bie nyɔɔ ziī sa a naa lu efee tɛrɛ kɛ̄.” 7 Lo sɔ̄ ba bip ye kɔ: “Nɛɛ Tɔgɛnu, taɛ mɛ sɔ̄ na pya nu ama esira a, e ena elu esu yeā nukuadɛɛ̄ loo sɔ̄ pya nu ama esira a?” 8 E a kɔ: “Nwanaadɛɛ̄ lokwa a naa lu edag i nyɔnɛbee gbɛnɛ-edo nɛɛ elu bu na bee sa kɔ, ‘Mda na ɛɛ a,’ e ‘Sɔ̄ a bee lu esere ewaraloo.’ Bui aa wa nyɔɔnɛ. 9 Gbaāloo wo, sɔ̄ bui dā kpɛa akiiloo booboo nɔ̄ le labalaba bui aa ɛrɛ gbɛnɛ bɔɔ. Nyɔnɛbee pya nu ama ɛrɛ edasī sira mɛ a naale taɛ lo sɔ̄ na kuma elu a.”

10 Lɛɛ a kɔ wa nɛ kɔ: “Edonyɔɔ ebebe loo edonyɔɔ, e buɛ̄-mɛnɛ ebebe loo buɛ̄-mɛnɛ. 11 Gbɛnɛ nyɔŋa kɛnɛkɛ̄ elegara, e kii nuede le pɔrɔ dumɛloo a yaara elegara keekee kɛ̄; e nu a yere bɔɔ le gbɛnɛ edobah nu a aa bunyɔɔ ele.

12 “Mɛ lɛɛ pya nu ama gae sira, pya nɛɛ e’aa i sa i tɛ̄ŋaloo, e ba esu i kuma bu tɔ bɔŋanaloo sa i yere kpɔgɔrɔ. Elu esu i kuma kɛ̄sī pya mɛnɛ-buɛ̄ le pya aa bɛɛ nyɔɔ mdaa bee. 13 E lo ama edoo kɔ bui yira ekeebee. 14 Nyɔɔwo, biaɛraafii bu bui nyiɛ kɔ buii le edaesī tɛɛ̄nyɔɔ kɛ̄ bui kɔ ue bee aba bui doo, 15 nyɔnɛbee m gaa le nɛ i nu bui kɔ le suānu mmɛ kɛ̄ dɛ̄dɛɛ̄ pya a i gbanasī naale edap kiī ale anna nu bui kɔ. 16 Gbaāloo wo, kunɛ pya bui tɛ le ka le pya bui wuga nɛɛdam, le pya bui manamana le pya bui gbo esu i wa yere kɛ̄bah.* E ba efɛnage pio bui, 17 e dɛ̄dɛɛ̄ nɛɛ ebaa i loo nyɔɔ mdaa bee. 18 Mɛ kunɛ ekpo zia a i le bee naale epe. 19 Tɛ̄maloo egerebu na bui kpɔā bui dum* a.

20 “Nyɔɔwo, ɛrɛgebah sɔ̄ bui muɛ pya nɔ̄ a tɛɛ̄ ɛŋɛnɛ Jerusɛlɛm, suaā kɔ ye gbeerasī ewaraloo kɛ̄. 21 Lo sɔ̄ doolo pya a le Judia teera kii nyɔɔ egu, e pya a ye le bu a aa, e pya a le buɛ̄ a ye waɛloo aa yiina bu, 22 nyɔnɛbee lo dee na Bari ekpɔte loo* pya nɛɛ a lokwa alu edoo gbɔ̄mɛɛ pya nu a bee lu e’ɛm. 23 Ekiɛ̄nu ele nɛ pya waa bu loo le pya a gaa nɛ mah nwiī bu lo gbo dee! Nyɔnɛbee gbɛnɛ etɛɛrɛloo ele buɛ̄ a sa Bari e’ɛrɛ saŋ pima pya nɛɛ ama. 24 E ba edɔ tɛ̄maloo gɛ̄ nɔ̄ sa elu e’aa wa kuma dɔɔ̄na buɛ̄; e pya dɔɔ̄na buɛ̄ ezag tɔ nyɔɔ Jerusɛlɛm mmɛ sɔ̄ sɔ̄ pya dɔɔ̄na buɛ̄ e’ina kuma.

25 “Gbaānageloo wo, edobah nu esira bu zue le enɔɔ̄ le zina, e pya nɛɛ a le a nyɔɔ kɛnɛkɛ̄ ele bu gbɛnɛ bɔɔ nyɔnɛbee ba naale esuā nu edoo nyɔɔ kɔma a aaloo gbɛnɛ pɛnɛ le ye nyɔnyɔŋa. 26 Pya nɛɛ egbaa bu bɔɔ aāloo pya nu ba gaa ɛmadɛɛ̄ kɔ esira bu dɛ̄dɛɛ̄ nyɔuwe, nyɔnɛbee dɛ̄dɛɛ̄ ekpo bunyɔɔ enyɔŋa. 27 E lo sɔ̄ ba emuɛ Nwiīnɛɛ a gaa lu bu tɔ̄dee, bu ekpo le gbɛnɛ ka. 28 Mɛ kuma sɔ̄ pya nu ama bɔātɛ̄ esira, yiraa yah sa dana bee nɛ nyɔɔ nyɔnɛbee bui kpɔā ewaraloo kɛ̄.”

29 Lo sɔ̄, a su ziī edobah wa kɔā ue nɛ kɔ: “Yereaa nukuādɛɛ̄ loo te fig le dɛ̄dɛɛ̄ pya dɔɔ̄na te. 30 Sɔ̄ ba bɔātɛ̄ esaga, bui wee suā kɔ sɔ̄ zue ewaraloo kɛ̄. 31 Kɛ̄ a lenage doolo kumaloo bɔɔlo, sɔ̄ bui muɛ pya nu ama a gaa sira, suaā kɔ Buɛ̄-mɛnɛ Bari ewaraloo kɛ̄. 32 Kaka m kɔ i nɛ kɔ lo sɔ̄ eku ama naale etɛɛ̄ aa mmɛ sɔ̄ dɛ̄dɛɛ̄ pya nu ama esira. 33 Bunyɔɔ le kɛnɛkɛ̄ etɛɛ̄ aa, mɛ pya mdaa ue naale etɛɛ̄ aa doo pippip!

34 “Nwanaadɛɛ̄ lokwa a naa lu ebiinɛ bui beenyiɛ nɛ kɛ̄ tɛ̄maloo gbɛnɛ de le ɔ̄ mii gbɛnɛ le ɛrɛ gbɛnɛ ekɛɛrɛ bu dum, e dee a lu i dɔ nyɔɔ sɔ̄ buii bee ɛmadɛɛ̄ 35 doodoo zaɛ̄. Nyɔnɛbee elu nyɔɔ dɛ̄dɛɛ̄ pya a tɔɔ̄ a nyɔɔ kɛnɛkɛ̄. 36 Nyɔɔwo, tɔɔ̄naa yeere sa kiisī lo ebara bara dɛ̄dɛɛ̄ sɔ̄ lokwa bui dap tɛɛ̄ yeebah dɛ̄dɛɛ̄ pya nu esira ama sa yira kɛ̄sī Nwiīnɛɛ.”

37 Nyɔɔwo, sɔ̄ dee e’ɛɛra, a wee kii bu tɔkaɛ wee tɔgɛ nu, mɛ sɔ̄ zii eyira a wee kii nyɔɔ kpokɛ̄ alu ekure Kpokɛ̄ Olive wee tɔɔ̄. 38 E dɛ̄dɛɛ̄ pya nɛɛ wee lu bu tɔkaɛ bagara lɔɔrɛ wee gbaɛ̄ ye tɔ̄ loo.