Lo Jɔn Bee Ɛm
10 “M kɔ kaka i nɛ kɔ, nɛɛ a naa tɛɛ̄ nudee yii yɛɛ gbo naana mɛ a dɛɛ̄ tɛɛ̄ dɔɔ̄na kɛ̄, ɛɛ nɛɛ biu le nɛɛ aŋana nu lɛɛbah nɛɛ. 2 Mɛ nɛɛ a tɛɛ̄ nudee yii na nɛɛ tɔɔ̄loo naana pee a. 3 Nɛɛ tɔɔ̄loo nudee kpaāna nɛ lo nɛɛ, e gbo naana pee a gbaɛ̄tɔ̄ ye muɛ̄. A kue bee ziī ziī pya ye naana pee sa wa aara aā. 4 Sɔ̄ esua dɛ̄dɛɛ̄ pya lo alɛ nyima ee, a zaā wa sī, e lo gbo naana nyɔɔnɛ ye dumɛ nyɔnɛbee ba suāloo ye muɛ̄. 5 Ba naale enyɔɔnɛ nɛɛ saanɛɛ doo pippip, mɛ ba eteera ye aaloo nyɔnɛbee ba naa suāloo muɛ̄ nɛɛ saanɛɛ.” 6 Jizɔs bee su edobah nu ama wa kɔā ue nɛ, mɛ ba naa bee dābeeloo nu a gaa bee wa kɔ nɛ.
7 Nyɔɔwo Jizɔs bee wa sinagekɛ̄ kɔ ue nɛ kɔ: “M kɔ kaka i nɛ, mda na nudee gbo naana pee tɛɛ̄ a. 8 Dɛ̄dɛɛ̄ pya ebee lu bu na bee lu pya biu le pya aŋana nu lɛɛbah nɛɛ, mɛ gbo naana pee a naa gbaɛ̄ wa tɔ̄loo. 9 Mda na nudee a, ɛrɛgebah nɛɛ a mɛ tɛɛ̄loo yii bu, elu ekpɔā, e lo nɛɛ eyii bu sa aabu, e egbī le nuede muɛ. 10 Nɛɛ biu naa wee lu etaagebee a gbī eyip nu, fɛ nɛɛ sa gbeesī nu. Mda bee lu lokwa ba tɔɔ̄dum sa kiisī lo ele dum. 11 Mda lu le nɛɛ tɔɔ̄loo naana pee; le nɛɛ tɔɔ̄loo naana pee wee su ye dum sere kɛ̄ nyɔɔ gbo naana pee. 12 Nɛɛtam kpugi lo a naale nɛɛ tɔɔ̄loo naana pee, wee muɛ sɔ̄ gbo-kuɛ gaa lu sa teera bie lo gbo naana pee, e gbo-kuɛ wee wa aa sa wa kpo yaari, nyɔɔbee lo gbo naana pee naale alɛ— 13 e alu nɛɛtam kpugi, sa naa kuūdɛɛ̄loo pya lo naana pee. 14 Mda na le nɛɛ tɔɔ̄loo naana pee a. M suāloo pya na naana pee, e na naana pee suā mɛ loo, 15 dookɛ̄ Tɛ mɛ suāloo doo, e mda suāloo Tɛ a; e m su na dum* sere kɛ̄ nyɔɔ gbo naana pee.
16 “E m ɛrɛ dɔɔ̄na gbo naana pee lo a naa nuuna lo eku ama, e m turenage wa nua, sa ba egbaɛ̄tɔ̄loo na muɛ̄, e ba elu ziī eku naana pee sa ɛrɛ ziī nɛɛ tɔɔ̄loo naana pee. 17 Nu anua Tɛ were mɛ loo na kɔ m su na dum* sere kɛ̄ lokwa m dap sikɛ̄ ye ɛrɛ. 18 Lɔgɔ nɛɛ naale edap mɛ su lɛɛbah, mɛ m bee ye sere kɛ̄ nyɔɔ na loo. M ɛrɛ ekpo esu ye seākɛ̄, e m ɛrɛ ekpo e’obia ye su. Na Tɛ na a bee mɛ nɛ lok kɔ m doo wo a.”*
19 Popooa bee sinagekɛ̄ yii yɛɛ pya Juu nyɔɔ pya ue ama. 20 Gbɛnɛ-edo aba aa bee kɔ: “Pɔrɔ-edɔɔ̄ le ye bu, e a naa suā loo ye. Ena anua bui gbaɛ̄ ye tɔ̄ loo a?” 21 E pya dɔɔ̄na bee kɔ: “Pya ue ama naa bee ue nɛɛ pɔrɔ-edɔɔ̄ le bu. Ekɔ pɔrɔ-edɔɔ̄ edapge yeere dɛɛ̄ pya zimadɛɛ̄ ni?”
22 Doonu Nyɛŋiabu loo dee a bee lu Ewu Tɔkaɛ li Jerusɛlɛm bee sudɔ bu lo sɔ̄. A bee le sɔ̄ tɔɔ, 23 e Jizɔs aa bee kiā bu tɔkaɛ tɛɛ̄ kɛ̄ alu ekure kɛɛ̄daɛ̄ Solomɔn. 24 Lo sɔ̄ pya Juu a ye tɛɛ̄ ɛŋɛnɛ bee bɔātɛ̄ ekɔ ye nɛ kɔ: “Kuma mɛ sɔ̄ na i* tɔɔ̄ sa oo i kɔ nɛ taɛ nɛɛ o lu a? Lo olo na Kraist a, kɔ siā i nɛ.” 25 Jizɔs bee wa ture nɛ kɔ: “M bee i kɔ nɛ, kerewo buii yiga. Tam m gaa si bu bee na Tɛ yira ekeebee mɛ kumaloo. 26 Mɛ buii yiga nyɔnɛbee buii le na naana pee. 27 Pya na naana pee wee gbaɛ̄tɔ̄loo na muɛ̄, e m suā wa loo, e ba nyɔɔnɛ mɛ. 28 M nɛ wa dum anaatah, e a naale elu egbee wa sī doo pippip, e lɔgɔ nɛɛ naale edap wa su mɛ lɛɛbah. 29 Nu na Tɛ enɛā mɛ eenyɔɔ dɛ̄dɛɛ̄ dɔɔ̄na nu, e lɔgɔ nɛɛ naale edap wa su lɛɛbah na Tɛ. 30 Na Tɛ le mm lu ziī.”*
31 Pya Juu bee sinagekɛ̄ lap dɛm lo etubo ye. 32 Jizɔs ture wa nɛ sa kɔ: “M bee i tɔgɛ pya lele tam a aabah na Tɛ. Nyɔɔwo, amunu yɛɛ pya lo tam na bui le nyɔɔ mɛ tubo dɛm a?” 33 Pya Juu bee ye ture nɛ kɔ: “Naale nyɔɔ le tam o si na i gaa a tubo dɛm a, mɛ nyɔɔbee o kɔ Bari gbee; e kere o lu nɛɛ, o su oloo nua bari.” 34 Jizɔs ture wa nɛ kɔ: “Ekɔ a naa lu e’ɛm bu bui Lok kɔ ‘M kɔ: “Bui lu bari”’?* 35 Lo a bee lu esu pya nɛɛ kpa kaɛ naa kɔ lenu kumaloo kure ‘bari’ sa a naa lu enyaana nu a le bu kpa kaɛ— 36 bui kɔ nɛ mda lo na Tɛ mɛ sere kaɛ sa mɛ yere nua bu nyɔuwe kɔ, ‘O kɔ Bari gbee’ nyɔnɛbee m kɔ, ‘M lue Nwiīnɛɛdam Bari ni’? 37 Lo a naale tam na Tɛ na m gaa si a, bui aa mɛ yira nɛ. 38 Mɛ lo alu kɔ lo tam na m gaa si a, kere buii mɛ yira nɛ yigaa bu lo tam, lokwa bui suā sa kiisī lo esuā kɔ na Tɛ le mm lu ziī, e mda le loo Tɛ a.” 39 Nyɔɔwo, ba bee sinagekɛ̄ gbī e’aa ye, mɛ a bee wa si bah kii.
40 E a bee sinagekɛ̄ fia maā kii yere Jɔdan, kii kɛ̄ Jɔn aa bee limaā nɛɛ tua sɔ̄, e a bee tɔɔ̄ lo kɛ̄. 41 E gbɛnɛ-edo nɛɛ bee ye lu loo sa bɔātɛ̄ ekɔ: “Jɔn naa bee si lɔgɔ nyɛŋiatam, mɛ dɛ̄dɛɛ̄ nu Jɔn bee kɔ kumaloo nɛɛ ama lu kaka.” 42 E booboo nɛɛ bee ye yira nɛ bie lo kɛ̄.