Lo Matiu Bee Ɛm
16 Pya Farisii le pya Sadusii bee ye lu loo a kɛ̄ a lo edoā ye ɛp, e ba bee ye kɔ nɛ kɔ a tɔgɛe wa edobah nu a aa bunyɔɔ. 2 A ture wa nɛ kɔ: “Sɔ̄ e’ina loo uunɛ, bui wee kɔ ‘Sī dee lee, nyɔnɛbee bunyɔɔ lu miīmiī,’ 3 e sɔ̄ elua lɔɔrɛ, bui kɔ: ‘Bu dee efiitɔɔ, e boo edɔɔ anii’ee, nyɔnɛbee sī dee lu miīmiī sa kuɛ zii.’ Bui suā kɛ̄ e’ɛp sī dee sa suā nu a kura doo mɛ buii dap kɔ nu pya nu a gaa sira bu lo sɔ̄ ama kura. 4 Sɔ̄ eku nyɔuwe a bee piya sa kunagā* kiisī lo egbī edobah nu, mɛ a naale elu enɛ i lɔgɔ edobah nu kaɛlɛɛ lo Jona.” Lo sɔ̄ a bee wa aaloo bie lo kɛ̄ sa kii.
5 Lo sɔ̄ pya a wee ye nyɔɔnɛ dumɛ bee fia maā kii elua sīloo li, e a bee wa ibere lo e’aara fituru. 6 Jizɔs kɔ wa nɛ kɔ: “Ɛbaa leere sa nwaɛ̄dɛɛ̄ loo nu a wee muunɛ fituru lo pya Farisii le pya Sadusii.” 7 Nyɔɔwo, ba bee bɔātɛ̄ ekɔnia yɛɛ wa sa kɔ: “Ii bee aara lɔgɔ fituru nua a.” 8 Sɔ̄ Jizɔs esuā doo wo, a bee kɔ: “Ena anua bui gaa kɔnia yɛɛ i kɔ buii aarae lɔgɔ fituru a, a pya nwīgbagbara yira? 9 Bui sii suāge nu m gaa kɔ ni? Ale buii nyɛŋiabu o’oo bee fituru lo 5,000 nɛɛ bee de le kuma buā kpɔ bui bee lap ni? 10 Ale ɛrɛba bee fituru lo 4,000 nɛɛ bee de le kuma buā gbɛnɛka kpɔ bui bee lap ni? 11 Ena anua buii dābeeloo kɔ a naale fituru na m gaa kɔ nu akiiloo a? Mɛ kɔ bui nwaɛ̄dɛɛ̄ loo nu a wee muunɛ fituru lo pya Farisii le pya Sadusii.” 12 Lo sɔ̄ ba bee dābeeloo kɔ a naale nu a wee muūnɛ fituru na a kɔ ba a nwaɛ̄dɛɛ̄ loo a, mɛ tɔgɛnu pya Farisii le pya Sadusii.
13 Sɔ̄ e’ina barasī Sɛsaria Filipai, Jizɔs bee bip pya a wee ye nyɔɔnɛ dumɛ kɔ: “Mɛɛ na pya nɛɛ kɔ Nwiīnɛɛ lu a?” 14 Ba kɔ: “Pio nɛɛ kɔ Jɔn Nɛɛ Limaā, pya dɔɔ̄na kɔ Elaija, e pya dɔɔ̄na kɔ Jeremaia ale ziī nɛɛ mɔmanudɛɛ̄.” 15 E a kɔ wa nɛ kɔ: “Mɛɛ na bɔɔlo kɔ m lu a?” 16 Saimɔn Pita ture ye nɛ kɔ: “Olo na Kraist, Nwiīnɛɛdam Bari a le dum.” 17 Jizɔs ture ye nɛ kɔ: “Ɛɛbu a le a nɛ a Saimɔn nwiī Jona, nyɔnɛbee naale namloo le miī* na a a muuna nɛ a, mɛ na Tɛ a le li bunyɔɔ. 18 M kɔnage a nɛ kɔ: Olo na Pita a, e nyɔɔ dɛm ama na m wu na bɔŋanaloo a, e nudee bana luh* naale e’ɛrɛ ekpo ye ee. 19 M gaa le nɛ a igarabū loo Buɛ̄-mɛnɛ bunyɔɔ, e ɛrɛgebah nu o bɔp a kɛnɛkɛ̄ ebee lunage ebɔp li bunyɔɔ, e ɛrɛgebah nu o yɔbara a kɛnɛkɛ̄ ebee lunage eyɔbara li bunyɔɔ.” 20 Lo sɔ̄ a bee zuurabahtɔ̄ pya a wee ye nyɔɔnɛ dumɛ agɛrɛ kɔ ba aa kɔ nɛ lɔgɔ nɛɛ kɔ alɛ na Kraist a.
21 Aā lo sɔ̄ kiisī, Jizɔs bee bɔātɛ̄ ebaatɛ̄ nɛ pya a wee ye nyɔɔnɛ dumɛ kɔ ekiie Jerusɛlɛm, e pya kanɛɛ le pya tɛsī ewɔp le pya ɛm kpa etɔge ye kaāna sa ye fɛe, e nyɔɔ lo eree taa biradee elu elɛɛe ye kɛ̄ bu luh. 22 Lo sɔ̄ Pita su ye kuma barakɛ̄ sa bɔātɛ̄ ekɔgara ye ue kɔ: “Lu fɛgɛ loo aba ɔɔ a Nɛɛ-a-i-ɛrɛ; nu ama naale esira a loo doo pippip.” 23 Mɛ Jizɔs kiira dumɛ kpe Pita sa ye kɔ nɛ kɔ: “Tɛɛ̄ mɛ kii dumɛ a Setan! O lu nu kum tɔ loo mɛ nɛ nyɔnɛbee oo kɛɛrɛ nu alu ekɛɛrɛ Bari mɛ lo pya nɛɛ.”
24 Lo sɔ̄ Jizɔs bee kɔ nɛ pya a wee ye nyɔɔnɛ dumɛ kɔ: “Lo a le ɛrɛgebah nɛɛ gbī enyɔɔnɛ mɛ dumɛ, doolo a anna ye loo,* e a dana ye te tɔga* sa kiisī lo enyɔɔnɛ mɛ dumɛ. 25 Nyɔnɛbee ɛrɛgebah nɛɛ a gbī ekpɔā ye dum* epee ye, mɛ ɛrɛgebah nɛɛ a pee ye dum* nyɔɔ mdaa bee esikɛ̄ ye ɛrɛ. 26 Mɛ amunu biī na nɛɛ e’ɛrɛ lo a ɛrɛ dɛ̄dɛɛ̄ nyɔuwe sa peere ye dum* a? Ale ena nɛɛ edap nɛ lo esikɛ̄ ɛrɛ ye dum* a? 27 Nyɔɔbee Nwiīnɛɛ gaa le lu bu ka ye Tɛ gbaāloo pya ye ɛnjɛl, e aa le obia kpɛ ziī ziī nɛɛ dɛɛa nyɔɔ nu ba bee doo. 28 Kaka m kɔ i nɛ kɔ a ɛrɛ pio pya a le eyira akɛāma lo ba naale edaara edɛm loo luh mmɛ sɔ̄ ba emuɛ Nwiīnɛɛ aa lu bu ye Buɛ̄-mɛnɛ.”