Lo Matiu Bee Ɛm

3 Sɔ̄ sɔ̄ etɛ̄na, Jɔn Nɛɛ Limaā bee lu sa bɔātɛ̄ zue ue bu kpo-sagara-wii Judia, 2 sa kɔ: “Kiiyaa, nyɔnɛbee Buɛ̄-mɛnɛ bunyɔɔ ewaraloo.” 3 Bu kaka, alɛ na nɛɛ mɔmanudɛɛ̄ Aizaia gaa bee kɔ nu akiiloo a sɔ̄ a bee kɔ: “Ziī muɛ̄ gaa wiikpā bu kpo-sagara-wii kɔ: ‘Kwaa dee Jɛhova! Doraa kɔ ye dee a lera.’” 4 Nu a bee lu esu kwaā bɛloo Jɔn na zia Kamɛl, e a bee su kpanam bɔba kɛ̄tɛ̄ ye, e nu a wee de na ngurube le nɔɔ̄ yaago. 5 E pya a aa dɛ̄dɛɛ̄ kɛ̄ bu Jerusɛlɛm, Judia, le dɛ̄dɛɛ̄ pya buɛ̄ a tɛɛ̄ ɛŋɛnɛ Jɔdan aa bee ye lu loo, 6 e a bee lu eli wa maā* bu pɛnɛ Jɔdan, sa ba bee kɔ wa pɔrɔ siā kɛ̄sī dɛ̄dɛɛ̄ nɛɛ.

7 Sɔ̄ a muɛ gbɛnɛ-edo pya Farisii le pya Sadusii ba gaa lu wee liamaā, a bee wa kɔ nɛ kɔ: “Bɔɔlo miɔŋɔ bɔm, mɛɛ na a i zuurabahtɔ̄ kɔ bui teera aaloo saŋ a gaa lu a? 8 Nyɔɔwo, doraa nu a tɔgɛ kɔ bui ekiiya. 9 Bui aa kɛɛrɛ doo pippip kɔ: ‘Ebreham na ilii tɛ a.’ Nyɔnɛbee m kɔ i nɛ, Bari dap doo kɔ Ebreham a ɛrɛ miɔŋɔ aāloo pya ekpodɛm ama. 10 Sii e’ina ekatɛ̄ pya te a, nyɔɔwo, ɛrɛgebah te a naa mum le bee, elu efii sa tɛrɛ bu miā. 11 Mda li i maā tɛ̄maloo maā nyɔɔbee bui kikiiya, mɛ lo nɛɛ elu sɔ̄ mda e’aa, eenyɔɔ mda, lo nɛɛ mda mm bɔ kunɛ loo eyaari eziī ye kpa ekaɛtɔ. Alɛ gaa le li i maā tɛ̄maloo kaɛ edɔɔ̄ le miā. 12 Ye nu lɛma esaɛ loo kpakpaa le ye bah, e a gaa le kwa ye kɛ̄ zag esaɛ lɛɛloo kpakpaa ɛɛrɛ sa bɔŋɛnɛloo ye kpakpaa wheat yere bu ye tɔ kpooge nu, mɛ a gaa le ɔp esaɛ a aaloo bu miā a naale edap lu ezimɛ.”

13 Lo sɔ̄ Jizɔs bee aa Galilii lu Jɔdan lokwa Jɔn ye limaā. 14 Mɛ Jɔn bee gbī ekpaɛ̄ ye sɔ̄ a bee kɔ: “Ɛɛ mda na m bee lu kɔ olo o li mɛ maā a, tɛɛ̄ doodoo wa na olo mɛ lu loo ani?” 15 Mɛ Jizɔs ture ye nɛ kɔ: “Lɛɛbahloo a le doo wo a lo sɔ̄ ama, nyɔnɛbee bu lo sīdee na i dap doo dɛ̄dɛɛ̄ nu Bari gbī a.” Lo sɔ̄ a naa bee ye kpaɛ̄ na. 16 Sɔ̄ alu elimaā Jizɔs sah, a bee aa bu maā aba lo sɔ̄, e ɛp bunyɔɔ bee kpaā, e a bee muɛ edɔɔ̄ Bari a doodoo bemaakuku alu sa ye dɛɛa nyɔɔ. 17 Ɛp! Ziī muɛ̄ a aanage bunyɔɔ bee kɔ: “Alɛ ama na mdaa Nwiīnɛɛdam m wereloo a, bu mɛ ɛɛ ye loo.”