Lo Jɔn Bee Ɛm
16 “M ekɔa pya nu ama i nɛ lokwa buii dɔ. 2 Pya nɛɛ ekpo i lɛɛ bu tɔ bɔŋanaloo. Bu kaka, sɔ̄ gaa lu sɔ̄ ɛrɛgebah nɛɛ a i fɛ ekɛɛrɛ kɔ aa sietam a le kaɛ nɛ Bari. 3 Mɛ ba edoo pya nu ama nyɔnɛbee ba sii suāloo Tɛ a ale mda. 4 Kerewo, m kɔ pya nu ama i nɛ lokwa sɔ̄ e’ina sɔ̄ ba esira, bui nyɛŋiabu kɔ m ebee kɔ nu a wa kiiloo i nɛ.
“Mm bee i kɔ pya nu ama nɛ tua sɔ̄ nyɔnɛbee m bee i le loo. 5 Mɛ nyaawo, m gaa kii pii Nɛɛ a bee mɛ yere, kerewo, lɔgɔ bui sii mɛ bip kɔ, ‘Mɛ kɛ̄ na o gaa kii a?’ 6 Mɛ ekiɛ̄nu mma i bu beenyiɛ nyɔnɛbee m ekɔa pya nu ama i nɛ. 7 Kɛādoo, m kɔ kaka i nɛ, m gaa kii lokwa nu i lee loo. Nyɔnɛbee lo mm kii, nɛɛ yerebah naale elu i loo; mɛ m yere ye i ma lo m kii. 8 Sɔ̄ lo ama elu, esu pɔrɔ nyɔuwe ɛɛ ee, etɔgɛ kɔ m bee doo kaāna dogo sa edoo kɔ nyɔuwe a suā pya biaɛ Bari. 9 Esu pɔrɔ nyɔuwe ɛɛ ee nyɔnɛbee a naa ɛrɛ mɛ yira bu; 10 etɔgɛ nyɔuwe kɔ m doo nu a kaāna, nyɔnɛbee m gaa kii pii Tɛ a, lo sɔ̄, buii le esinakɛ̄ mɛ muɛ; 11 edoonage kɔ alu esuāloo nɛɛ Bari biaɛ, nyɔnɛbee elua ebiaɛ nɛɛ aa bɛɛ nyɔuwe ama.
12 “Gbɛnɛ-edo nu m bee i kɔ nɛ lege, mɛ buii le edap dābeeloo anyaawo. 13 Nyɔnɛbee sɔ̄ alɛ, lo a le edɔɔ̄ kaka elu, ebaɛ i loo sa i yerebah nɛ kɔ bui dābeeloo kaka leere, nyɔnɛbee edɔɔ̄ ama naa kɔ ue nyɔɔ alɛɛ loo, mɛ emuuna ɛrɛgebah nu Bari gbī kɔ a muuna sa ekɔ pya nu esira i nɛ. 14 Alɛ enɛ mɛ ka nyɔnɛbee ekɔ nu a mɛ dā aānu i nɛ. 15 Dɛ̄dɛɛ̄ nu na Tɛ ɛrɛ lu mda. Nu anua m kɔ i nɛ kɔ ekɔ nu a mɛ dā aānu i nɛ lo. 16 Bia kunɛ nwīgbagbara sɔ̄, buii le emuɛna mɛ, mɛ sɔ̄ nwīgbagbara sɔ̄ etɛ̄na, bui sikɛ̄ mɛ muɛ.”
17 Nyɔɔwo, pio pya a wee ye nyɔɔnɛ dumɛ bee kɔ nɛ ɛnia aba kɔ: “Ena nu aa i kɔ nɛ ama kura a sɔ̄ a kɔ, ‘Bia nwīgbagbara sɔ̄ buii le emuɛna mɛ, e sɔ̄ nwīgbagbara sɔ̄ etɛ̄na, bui sikɛ̄ mɛ muɛ,’ le sɔ̄ a kɔ, ‘Nyɔnɛbee m gaa kii pii na Tɛ’ a?” 18 Nyɔɔwo, ba bee kɔ: “Ena a gaa kɔ a sɔ̄ a kɔ, ‘bia kunɛ nwīgbagbara sɔ̄ ani? Ii suā nu a gaa kɔ.” 19 Nyɔɔbee Jizɔs suā kɔ ba gaa gbī ebip ye ebip a, a bee wa kɔ nɛ kɔ: “Ekɔ nu anua bui gaa bip ebip ɛnia bui na nyɔɔbee m kɔ: ‘Bu ziī nwī sɔ̄, buii le emuɛna mɛ, e bu ziī nwī sɔ̄, bui sikɛ̄ mɛ muɛ ni?’ 20 M kɔ kaka i nɛ, bɔɔlo bui to sa ɛrɛ gbɛnɛ ekiɛ̄nu, mɛ nyɔuwe e’ɛɛŋa; bui ɛrɛ ezialoo, mɛ bui ezialoo esikɛ̄ lu ɛɛbu. 21 Sɔ̄ ziī wa aa maɛ̄ nwiī, a wee ɛrɛ gbɛnɛ ezialoo, mɛ sɔ̄ emana nwiī sah, a naa wee nyɛŋianabu ye etɛɛrɛloo nyɔɔ ɛɛbu kɔ ziī nɛɛ emɛā yii bu nyɔuwe. 22 Kɛ̄ a lenage loo bɔɔlo doo lo, bui ɛrɛ ekiɛ̄nu anyaawo; mɛ i sikɛ̄ mɔna, e bui beenyiɛ e’ɛɛŋa sa lɔgɔ nɛɛ naale edapna doo kɔ bui aa ɛrɛ ɛɛbu. 23 Bu lo dee, buii le esinakɛ̄ mɛ bip lɔgɔ ebip. M kɔ kaka i nɛ, lo a le bui bara ɛrɛgebah nu na Tɛ, enɛ i nyɔɔ mdaa bee. 24 Mmɛge anyaawo, bui sii bara lɔgɔ nu bu na bee. Bui baraa, e bui ɛrɛ nu bui bara lokwa bui ɛɛbu mma.
25 “M su edobah kɔā pya nu ama i nɛ. Sɔ̄ gaa lu sɔ̄ mm le esuna edobah i kɔā ue nɛ, mɛ m kɔ dɛ̄dɛɛ̄ nu akiiloo Tɛ siā leere i nɛ. 26 Bu lo dee, bui bara nu na Tɛ bu na bee, mɛ lo ama naa kura kɔ mda m bara nu i nɛ. 27 Nyɔɔbee na Tɛ were i loo kaāna, nyɔɔbee bui bee mɛ wereloo kaāna, e bui yiga kɔ Bari bee mɛ yere. 28 M bee lu bu nyɔuwe doodoo nɛɛ Tɛ bee yere, e nyaawo, m gaa aabu nyɔuwe pii Tɛ a.”
29 Pya a wee ye nyɔɔnɛ dumɛ bee kɔ: “Ɛp! nyaawo o ekɔa leere i nɛ sa oo i suna edobah kɔā ue nɛ. 30 Nyɔɔwo, i suā kɔ o suā dɛ̄dɛɛ̄ nu, e a naa lu ebɛɛ̄ kɔ lɔgɔ nɛɛ a bip a ebip. Tɛ̄maloo lo ba ama na i suā kɔ o aakɛ̄ Bari le a.” 31 Jizɔs kɔ wa nɛ kɔ: “Bui yigage anyaawo ni? 32 Ɛp! Sɔ̄ gaa lu, bu kaka elua anyaawo, sɔ̄ ziī ziī bui eteera mɛ bie kii ye tɔ sa mɛ lɛɛbahloo bie aba mm. Mɛ mm le aba mm nyɔnɛbee Tɛ a le mɛ loo. 33 M ekɔa pya nu ama i nɛ lokwa tɛ̄maloo mda, bui ɛrɛ efɛɛloo. Bu nyɔuwe, bui ɛrɛ etɛɛrɛloo, mɛ ɛrɛaa e’agaloo! Nyɔnɛbee m ebea nyɔuwe eebah.”