Lo Jɔn Bee Ɛm
15 “Mda na lo kaāna te vine a, e na Tɛ na nɛɛ a wee sitam loo a. 2 A fii ɛrɛgebah lo naā a naa mum bee mɛ lɛɛ loo sa kwaloo lo a mum bee lokwa a mum bee yereloo. 3 Elua edoo kɔ bɔɔlo a le ɛɛ tɛ̄maloo ue m bee i kɔ nɛ. 4 Kiraasī lo egbaa mɛ loo, e mda egbaa i loo. Buii le edap mum bee dookɛ̄ naā-te naa wee dap mum bee lo a naa le loo te vine doo, bɔɔlo buii le dapnage mum bee lo buii kiisī lo egbaa mɛ loo. 5 Mda na te vine a, e bɔɔlo na pya ye naā a. Ɛrɛgebah nɛɛ a kiisī lo egbaa mɛ loo e mda gbaa ye loo, emum booboo bee; nyɔnɛbee lo mm i le loo, buii le edap doo lɔgɔ nu doo pippip. 6 Ɛrɛgebah nɛɛ a naa gbaa mɛ loo, ele doodoo naā alu etop tɛrɛ ee sa a kaga. E pya nɛɛ ebɔŋɛnɛloo pya lo naā sa top tɛrɛ bu miā, e elu e’ɔp wa. 7 Lo a le bui kiisī lo egbaa mɛ loo sa kiisī lo edoo nu m kɔ, baraa ɛrɛgebah nu a i bɛɛ̄, e elu edoo i nɛ. 8 Bu lo ba ama na alu enɛ ka na Tɛ a, sɔ̄ bui kiisī lo emum booboo bee sa tɔgɛ kɔ bui lu pya aa mɛ nyɔɔnɛ dumɛ. 9 Dookɛ̄ na Tɛ mɛ wereloo doo na m werenage loo bɔɔlo a; kiraasī lo etɔɔ̄ bu na wereloo. 10 Lo bui sere na lok, bui bia bu na wereloo dookɛ̄ mda bee sere lok na Tɛ sa bia bu ye wereloo doo.
11 “M ekɔa pya ue ama i nɛ lokwa bui ɛrɛ ɛɛbu dookɛ̄ mda doo sa kiisī lo e’ɛrɛ ɛɛbu. 12 Lok m i nɛ na kɔ, bui wereloo ɛnia bui dookɛ̄ mda i wereloo doo. 13 Lɔgɔ nɛɛ a ɛrɛ wereloo a ee lo ba ama naale, kɔ ziī nɛɛ su ye dum* sere kɛ̄ nyɔɔ pya ye gbo.* 14 Bui lu pya na gbo lo a le bui doo nu m i nɛ bu lok. 15 Mm i sinakɛ̄ kure zooro, nyɔnɛbee zooro naa wee suā nu ye tɛtɔ gaa doo. Mɛ m kure i pya na gbo, nyɔnɛbee m edoora kɔ bui suā dɛ̄dɛɛ̄ nu m bee dā aānu na Tɛ. 16 Bɔɔlo buii bee mɛ sagɛ, mɛ mda na m bee i sagɛ a, e m etubo i bahloo kɔ bui kiisī lo emum bee sa bui bee a kiisī lo etɔɔ̄ lokwa ɛrɛgebah nu bui bip na Tɛ bu na bee, enɛ i.
17 “Pya nu ama na m bee i nɛ bu lok a, kɔ bui wereloo ɛnia bui. 18 Lo a le nyɔuwe baa i loo, suaā kɔ ebee mɛ dasī baaloo lɛɛ a gae baa i loo. 19 Lo bui bee le loo nyɔuwe, nyɔuwe ebee i wereloo nyɔɔbee bui bee lu lo alɛ. Mɛ nyaawo, buii le loo nyɔuwe, nyɔnɛbee m ebee i sagɛ lɛɛ bu nyɔuwe, nu anua nyɔuwe baa i loo lo. 20 Nyɛŋiaabu nu m bee i kɔ nɛ kɔ: Zooro naa wee eenyɔɔ ye tɛtɔ. Lo ba bee mɛ tɛ̄ŋaloo, ba etɛ̄ŋanage loo bɔɔlo; lo ba bee gbaɛ̄tɔ̄loo na ue, ba egbaɛ̄nage tɔ̄loo bɔɔlo. 21 Mɛ ba edoo dɛ̄dɛɛ̄ nu ama nyɔɔ mdaa bee, nyɔnɛbee ba naa suāloo Nɛɛ a bee mɛ yere. 22 Lo m sii bee lu sa wa kɔ ue nɛ, ba naale ebee ɛrɛ beebee pɔrɔ. Mɛ nyaawo, ba naa ɛrɛ lɔgɔ kara eloh nyɔɔ wa pɔrɔ. 23 Ɛrɛgebah nɛɛ a mɛ baaloo, baanage loo na Tɛ. 24 Lo m sii bee si pya tam lɔgɔ nɛɛ sii si ama wa yɛɛ, ba naale ebee ɛrɛ lɔgɔ pɔrɔ; mɛ nyaawo, ba emɔna mɛ sa mɛ baaloo sa baanage loo na Tɛ. 25 Mɛ lo ama sira lokwa alu e’mmɛnɛ nu a bee lu e’ɛm bu wa lok kɔ: ‘Ba bee mɛ baaloo sɔ̄ mm doo lɔgɔ nu.’ 26 Sɔ̄ nɛɛ yerebah m yere aāloo Tɛ i ma elu, lo a le edɔɔ̄ kaka a aaloo Tɛ, alɛ eyira ekeebee mɛ kumaloo; 27 e bɔɔlo eyiranage ekeebee mɛ kumaloo, nyɔnɛbee bui bee mɛ le loo aā bɔātɛ̄.