Lo Matiu Bee Ɛm
9 Nyɔɔwo, a bee yii bu fah fia maā kii ye buɛ̄. 2 E ɛp! ba bee dana ziī nɛɛ ua baraloo a le ema nyɔɔ daɛ ye ma. E sɔ̄ Jizɔs muɛ kɛ̄ ba ɛrɛ yira doo, a kɔ nɛ nɛɛ ua baraloo a kɔ: “Ɛrɛ e’agaloo a nwiī! o pɔrɔ elua e’aaloo a nɛ.” 3 Mɛ pio pya ɛm kpa bee kɔ bu nyiɛ wa kɔ: “Nɛɛ ama lu nɛɛ a kɔ Bari gbee.” 4 Nyɔɔbee Jizɔs bee suā nu a wa le nyiɛ a, a bee kɔ: “Ena anua bui kɛɛrɛ pɔrɔ pɔrɔ nu bu bui beenyiɛ a? 5 Bu edobah, amunu na a waɛ a, lo ekɔ ‘O pɔrɔ elua e’aaloo a nɛ,’ sɛh lo ekɔ, ‘Aakɛ̄ kiā’? 6 Mɛ lokwa bui suā kɔ Nwiī nɛɛ ɛrɛ ekpo lo e’aaloo pɔrɔ bu nyɔuwe—” a bee kɔ nɛ nɛɛ ua baraloo a: “Aakɛ̄, dana o daɛ sa o kii o tɔ.” 7 E a bee aakɛ̄ sa kii ye tɔ. 8 Sɔ̄ gbɛnɛ eku nɛɛ a bee muɛ nu ama, bɔɔ bee wa aa, e ba bee nɛ ka Bari lo a nɛ dua ekpo ama pya nɛɛ.
9 Sɔ̄ esaa sɔ̄ Jizɔs gaa bee aa lo kɛ̄, a bee muɛ ziī gbara ye bee kura Matiu a le ɛŋɛtɛ̄ tɔ etup, e a kɔ ye nɛ: “Nyɔɔnɛ mɛ dumɛ.” Nyɔɔwo, a aakɛ̄ sa ye nyɔɔnɛ dumɛ. 10 Sɔ̄ esaa, sɔ̄ a bee le aa denu* bie tɔ a, ɛp! gbɛnɛ-edo pya tup etup le pya pɔrɔ bee lu sa bɔātɛ̄ enyɔɔnɛ Jizɔs le pya a wee ye nyɔɔnɛ dumɛ denu.* 11 Mɛ sɔ̄ pya Farisii emɔna wa, ba kɔ nɛ pya a wee ye nyɔɔnɛ dumɛ kɔ: “Ena anua bui nɛɛ tɔgɛnu nyɔɔnɛ pya tup etup le pya pɔrɔ denu a?” 12 Sɔ̄ edaā doo wo, a bee kɔ: “Pya loo nwaɛ̄ naa wee gbī dambie mɛ pya loo dumɛ. 13 Nyɔɔwo, kiraa sa nɔ nu ue ama kura, lo a kɔ: ‘M gbī toesaɛ̄ naale wɔp zɔɔ.’ Nyɔɔbee mm bee lu wee kue pya kaāna dogo mɛ pya pɔrɔ.”
14 Lo sɔ̄ pya a wee nyɔɔnɛ dumɛ Jɔn bee ye lu loo sa ye bip kɔ: “Ena anua ili le pya Farisii kaɛ-nuede sa pya a wee a nyɔɔnɛ dumɛ naa kaɛ a?” 15 Lo sɔ̄ Jizɔs bee wa kɔ nɛ kɔ: “Pya gbo nɛɛ a ii wa dapge ɛrɛ ekiɛ̄nu sɔ̄ nɛɛ aa ii wa wa lege loo ni? Mɛ gbo dee gaa lu sɔ̄ elu esu nɛɛ a ii wa a wa lɛɛloo, lo sɔ̄ na ba ekaɛ nuede a. 16 Lɔgɔ nɛɛ naa wee su eba aā bɛ a sii tugiri gba nyɔɔ lo nama nyɔnɛbee lo aā a ebaa lo nama, e ebaara gbɛnɛ ee tua sɔ̄. 17 E pya nɛɛ naa wee su aā mii vine yere bu nama bɛrɛ,* lo ba doo wo, lo bɛrɛ epɔm, e mii vine a e’egia, e lo bɛrɛ kpa-nam a egbe. Mɛ pya nɛɛ wee su aā mii vine yere bu aā bɛrɛ lokwa lɔgɔ nu naa tɛɛ̄ loo baɛ ɛɛ.”
18 Ɛp! sɔ̄ aa bee wa kɔge ue nɛ, ziī nɛɛ a le yɛɛ pya tɛsī bɔŋanaloo bee ye lu loo, ye uubeekɛ̄ nɛ sa kɔ: “Na nwiīnɛɛwa edaba u anyaawo, lu wee ye edɛrɛ bah nyɔɔ, e a esikɛ̄ le dum.”
19 Lo sɔ̄ Jizɔs aakɛ̄ sa ye nyɔɔnɛ gbaāloo pya a wee ye nyɔɔnɛ dumɛ. 20 E ɛp! ziī wa miī bee tɛɛ̄ loo bu 12 zua bee ye lu dumɛ sa daabahloo bee egā ye bɛloo, 21 nyɔnɛbee a bee kɔ nɛ aba ɛɛ kɔ: “Lo m daabahloo kunɛ ye bɛloo dee nyɔɔ, loo mɛ enwaɛ̄.” 22 Jizɔs kiiya sa ye muɛ sa kɔ: “Ɛrɛ e’agaloo a nwiīnɛɛwa! O yira edora kɔ loo a a nwaɛ̄.” E aā lo sɔ̄, loo lo wa bee nwaɛ̄.
23 Nyɔɔwo, sɔ̄ a bee lu ina tɔ lo nɛɛ tɛsī bɔŋanaloo sa muɛ pya aa fuuri ezinigā le gbɛnɛkpo nɛɛ aa bee yere kɔma, 24 Jizɔs kɔ: “Aaraa akɛāma, nyɔnɛbee nwiīnɛɛwa a naa u mɛ a le daa.” Lo sɔ̄ ba bɔātɛ̄ ekɛgɛ ye sa ye gbɛ. 25 Aba sɔ̄ gbɛnɛkpo nɛɛ a kii ee, a bee yii bu tɔ a sa aabahloo bah nwiī a, e nwiīnɛɛwa a bee aakɛ̄. 26 E kpɛa akiiloo nu ama bee yaara dɛ̄dɛɛ̄ lo barasī.
27 E sɔ̄ Jizɔs bee aa lo kɛ̄, baɛ nɛɛ zimadɛɛ̄ nyɔɔnɛ ye sa wiikpā kɔ: “To i esaɛ̄, a Nwiī Devid.” 28 Mɛ sɔ̄ Jizɔs eyira tɔ a baɛ nɛɛ zimadɛɛ̄ a lu ye loo, e Jizɔs bip wa kɔ: “Bui yigage kɔ m dap doo nu ama ni?” Ba ture ye nɛ sa kɔ: “Aiī, a Nɛɛ-a-i-ɛrɛ.” 29 Lo sɔ̄ a daa wa bah dɛɛ̄ sa kɔ: “A dooa doo wo i nɛ dookɛ̄ bui yira le doo.” 30 E dɛɛ̄ wa bee yeea, kerewo, Jizɔs bee wa zuurabahtɔ̄ agɛrɛ kɔ: “Mɔnaa kɔ buii kɔ nɛ lɔgɔ nɛɛ.” 31 Mɛ sɔ̄ ba ekira ee, ba bee kɔ nu akiiloo nu a bee sira a tɛ̄ma ɛŋɛnɛ dɛ̄dɛɛ̄ lo barasī.
32 Sɔ̄ a gaa bee aa, ɛp! pya nɛɛ bee su gbara pɔrɔ-edɔɔ̄ le bu alu bɔ̄nɔ ye ma. 33 E sɔ̄ elua ekpo pɔrɔ-edɔɔ̄ ye lɛɛ bu, gbara alu bɔ̄nɔ a bee kɔ ue. E alu nyɛŋia loo gbɛnɛ eku nɛɛ a sa ba kɔ: “Sii bee lu emuɛ lɔgɔ nu a mɛā doo wo ama bu Izrɛl lɔgɔ sɔ̄.” 34 Mɛ pya Farisii bee kɔ: “Ɛɛ tɛ̄maloo ekpo nɛɛbee pya pɔrɔ-edɔɔ̄ na a kpo pɔrɔ-edɔɔ̄ lɛɛ a.”
35 E Jizɔs bee kiā tɛɛ̄ ɛŋɛnɛ dɛ̄dɛɛ̄ gbɛnɛ buɛ̄ le nwī-esɔgɔ buɛ̄, tɔgɛ nu bu wa tɔ bɔŋanaloo sa zue le yereue akiiloo Buɛ̄-mɛnɛ, bo dɛ̄dɛɛ̄ bee eyɔloo le dɛ̄dɛɛ̄ bee boh. 36 E sɔ̄ emɔna gbɛnɛkpo nɛɛ a, a bee wa toesaɛ̄, nyɔnɛbee ba bee le doodoo pya nɛɛ alu ebii nɛ kɛ̄ sa lu e’ɛp tɛrɛ,* sa gaa teega nyɔɔbee ba naa ɛrɛ nɛɛ a wa tɔɔ̄loo. 37 Lo sɔ̄ a bee kɔ nɛ pya a wee ye nyɔɔnɛ dumɛ kɔ: “Bu kaka, nu ebugara aā wii kuīkpo mɛ pya tam lu nwīepoo. 38 Nyɔɔwo, baraa Tɛ-ɛrɛ uwe kɔ a yere pya tam ture bu ye uwe.”